Typuatꞌi Kurintiu 5:1-21
5 Pywo aipiit wyti aikotã og ape ewy. Katupono yt watoineꞌen motꞌi hin i mesuwarote. Miꞌi hawyi aipiit ikuꞌuro aikotã og ape ewy. Maꞌato aipiit pakup Tupana timoieineꞌen hawyi yt og ape ewy hin i. Katupono aipiit pakup topyhuꞌat aikotã Tupana yat atipy piat yt karãpiat ikuꞌuro rakat i.
2 Maꞌato mesuwe aipiit hero kahato haty kahato aipiit ete. -Tupana watoꞌe wahoꞌopot kahato aipiit ete haty kahato watoꞌe. Areto teran ewowi atipy kape watoꞌe. Atikyꞌesat uipiit pakup watoꞌe Tupana pe mesuwe yi tote hoꞌopot popuo. Aipiit mesuwe aikotã sokpe potꞌi ewy. Maꞌato aipiit pakup atipy piat aikotã ahesokpe pakup ewy. Miꞌi hawyi watikyꞌesat kahato aikotã ahesokpe pakup ewy.
3 Yt naku i yt kat i ahesokpe potꞌi hiotꞌe hawyi yt kat haipepiat pakup i hap pote yt naku i are. Yt naku i miitꞌin pyꞌasetpe yt ahesokpe i hap ewy. Miꞌi hap ewy maꞌato poꞌog saꞌag aikuꞌuro hawyi yt kat i aipiit pakup i atipy piat hap yt naku i are.
4 Aipiit mesuwarotiat kak e kyn kyn e neꞌi aipiit ikuꞌuro rakat toineꞌen pote. Aipiit mesuwarotiat tikyꞌesat kahato ipakup we toineꞌen hap. Taꞌi yne aito aipiit mesuwarotiat ikuꞌuro hap watikuap taꞌyn. Yt watikyꞌesat i pykai ikuꞌuro. Miꞌi pote wahẽtup Tupana -Atikyꞌesat kahato uipiit pakup we toineꞌen wuatꞌi eꞌat piat rakat watoꞌe. -Etunug no uipiit pakup ewat ewy watoꞌe Iesui pe. -Uipainug no watoꞌe. Aikotã uhesokpe pakup uikuꞌuro hawyi etopag uipiit epiit ikahu hap ewy watoꞌe.
5 Pyno aito Iesui mohey haria pote Tupana toꞌe ahepe -Uhaꞌyru mohey haria atum aru ehepe eipiit pakup eikuꞌuro hawyi. Pywo ti rat yt uheso i rat e. Miꞌi pote atimoherep Uipaꞌãu pywo eweiꞌe hamo eipiit pakup toineꞌen atipy pe hap kuap hamo e Tupana ahepe.
6 Pywo ti rat eipiit pakup toineꞌen Tupana Paꞌãu kawiat watomohey poꞌog poꞌog hap kaipyi are. Yt heremo i aipiit pakup maꞌato Tupana toꞌe pote -Pywo watoꞌe yn aimohey hap kaipyi. Aipiit wyti aiꞌyat mesuwarotiat ewy. Aipiit pakup aiꞌyat pakup atipy piat ewy.
7 Watoineꞌen mesuwarotiat aipiit pe pote Tupana yt heremo i. Maꞌato imohey hap kaipyi yn wataꞌakasa kuap.
8 Watomohey kahato miꞌi pote watoꞌe -Pywo ti rat atikyꞌesat kahato uipiit pakup hap. Katupono areineꞌen neran uipiit pakup wywo Tupana ehamo watoꞌe. Uito Pauru uiwanetup hawe poꞌog waku areineꞌen uipiit pakup wywo atipy pe mesuwat yi tote areineꞌen hap kai.
9 Watoineꞌen neran Tupana wywo miꞌi pote watowepotpap kahato aipiit wywo mesuwiat wywo mesuwarote te haty wo Tupana e hap nug hap ete. Taꞌi Tupana mowepiit kahato haria wo watukupteꞌen neran sio mesuwat yi totiat sio atipy pe. Mio tã e hap watikyꞌesat.
10 Waku aiweꞌeg wo kahato kat som watunug mesuwarote aipiit wywo hap ete. Katupono meiũran aru Aipotypot Iesui aikay kay yne tuwewawi haꞌup ium hamo. Wẽtup ok tuereto toikay kay yne aito. Itote toimoherep aiminug koꞌi wuatꞌi pe. Aiminug wakuat koꞌi iꞌewyte aiminug yt naku i hap koꞌi aiminug mesuwat totiat turan wuat koꞌi. Miꞌi hawyi toꞌe wẽtup ok wẽtup ok pe -En wakuat kahato e. Maꞌato wẽtup ok wẽtup ok pe -En yt naku i e. Miꞌi pote waku aiweꞌeg wo kahato aipiit wywo mesuwarote.
Waku Watikyi Miitꞌin Tupana Kape
11 Miꞌi hap eꞌat pe Aipotypot tiꞌatumoherep yne aiminug koꞌi sio waku sio yt hap koꞌi. Miꞌi pote waku watokenꞌẽ kahato yt naku i nug hap pupi. Waku watoꞌe -Atimotypot reran Uikaꞌiwat uiminug wakuat wywo waku watoꞌe yn. Waku watiꞌatuekyi kahato miitꞌin Aikaꞌiwat kape waku watoꞌe. Yt naku i iꞌatuekat kyewi neꞌi watiꞌatuekyi miitꞌin Iesui kape. Iꞌewyte yt naku i iꞌatumaꞌat reran haype neꞌi watiꞌatuekyi miitꞌin. Uruto miꞌi hap koꞌi eipiit kyewi hawyi ehekat kyewi neꞌi hap yt karãpe i uruiꞌatuekyi eipe. Miꞌi hap Tupana tikuap pywo piat urutoꞌe hap iꞌewyte eipe.
12 Yt karãpe i uruiꞌatumaꞌat eipe. -Uruto poꞌog yt urutoꞌe hin i. Taꞌi yt urutuwemowato teran i aikotã iraniaꞌin eimuꞌe haria ewy. Miꞌiria ti teꞌeruwepainug teꞌeruwemotypot hamo -Uimotypot mono taꞌatuꞌe hawe neꞌi. Maꞌato iꞌatuwanetup hawe yt hãpyk hin i -Uruto poꞌog iꞌatuꞌe hap. Miꞌiria eweikuap teran pote waku apo eweiꞌe sio waku apo eweiꞌe sio yt hap kuap hamo. -Urumuꞌe haria Pauru ewywuaria sio yt apo eweiꞌe. Miꞌi hawyi eweikuap sio waku sio eimaꞌat haria neꞌi hap koꞌi etiat.
13 -Pyno uruto poꞌog waku eimuꞌe hamo Pauruꞌin kai iꞌatuꞌe itote. Pauruꞌin yt taꞌatukuap i kat e teꞌeropat muꞌe hap koꞌi hesoꞌok takaria pote iꞌatuꞌe. Maꞌato Tupana wanetup hawe yt uruesoꞌok hin i katupono imikyꞌesat ewy urutunug. Maꞌato iꞌatuwanetup hawe uwe uwe inug Tupana mikyꞌesat miꞌi haria iꞌatuwanetup hawe hesoꞌok takaria wo. Iraniaꞌin teꞌeroꞌe -Pauruꞌin iꞌatuweꞌeg kahato miitꞌin maꞌat hap ete iꞌatuꞌe. Mio tã iꞌatuꞌe yt taꞌatukuap hin i kat hamo urupotpap kahato eipowyro hamo hap yt kat i eikyꞌe hap iꞌatuekai pote. Uruto uruikyꞌe kahato eipe miꞌi pote urupotpap kahato eipowyro hamuat ete. Aikotã ywot hoꞌopot tomepytꞌin powyro hamo hap ewy. Yt urutuwekyꞌe i eipowyro hamuat hap ete urupotpap kahato.
14 Pyno kat hamo urupotpap aat kaꞌap miitꞌin ekyi Iesui kapiat hamo. Pyno ahenoi kat pote hap. Iesui piat eikyꞌe sese hap totopag naꞌyn uruepe eikyꞌe kahato eipe urukaipyi. Miꞌi hawyi wẽtup miit ewy uruto iwywo eikyꞌe hap ete. Yt worohoꞌokyꞌe i pote haty kahato uruete. Pywo ti rat toiꞌatukyꞌe torannia wuatꞌi ywania koꞌi. Miꞌi pote tutuꞌu yne wuatꞌi apiheg hap tokuꞌuro ariaꞌyp posak etiat hawyi. Toikuap kahato yne miitꞌin Tupana miꞌapiheg koꞌi wo aru tukupteꞌen hap. Toikuap iꞌatuꞌapiheg hap hawyi ikuꞌuro iꞌatuekawiatno.
15 Tutum saꞌup yne Tupana pe aikyiꞌat hamo. Tohaꞌup nug yne hawyi Tupana watnuaria wo watoineꞌen. Koitywy Iꞌywot eropat haria watoineꞌen. Kat pote aikyiꞌat raꞌyn pote. Yt naku i watuweropat neꞌi. Waku poꞌog wateropat mekewat ikuꞌuro aikawiatno rakat.
16 Pyno yt naku i aiwanetup hawe watoꞌe -Miꞌi miit yt naku i miꞌi miit waku watoꞌe yt watikuap i te sese sio waku sio yt i te pykai. Mio tã watoꞌe saꞌawyꞌi Aikawiat Iesui ete aiwanetup hawe. Koitywy watikuap taꞌyn Aikaꞌiwat Iesui sese raꞌyn hawyi watikuap sese Waku Sese rakat toineꞌen. Saꞌawyꞌi -Yt kan hamo i Iesui watoꞌe yt kat i Iesui etiat watikuap pykai maꞌato mesup yt naku i miꞌi watunug. Miꞌi hap ewy kahato yt naku i watoꞌe aipyꞌa pe wẽtup ok miit pe -Yt kan hamo i en mana mimi mehin yt watikuap i te mekewat aimimohit hat rẽ e. Waku iminug upi watikuap waku sio yt e.
17 Watunug Iesui Aikaꞌiwat no hawyi watoineꞌen iwywo wẽtup miit ewy yn watoineꞌen. Miꞌi hawyi ipakup takaria wo watoineꞌen. Miꞌi hawyi aheko saꞌawyꞌi wuat saꞌag koꞌi watiwaure yne raꞌyn. Miꞌi hawyi aheko pakup taꞌyn Aikaꞌiwat eko ewywuat raꞌyn miit pakup watoineꞌen pote.
Waku Yne Miitꞌin Watuwyꞌinug Haria Wo Watoineꞌen
18 Pyno yne yne ipakup taꞌyn katupono Tupana aimopakup i raꞌyn. Aiwoꞌowyꞌinug Tupana wywuat hat Aikaꞌiwat Iesui. Aikaꞌiwat ewywuat koitywy watoineꞌen. Watoꞌowyꞌinug naꞌyn ahehay wo.
19 Pywo ti rat Aikaꞌiwat Iesui piit pe Tupana toineꞌen. Wuatꞌi miitꞌin wywuat tuwyꞌinug hamuat toineꞌen Tosaꞌyru piit pe. Tupana hewyry aipyꞌasetpe Tosaꞌyru piit pe. Tomohey haria sese pap tet pupi ti ikuꞌuro. Toiꞌatumorem tewanikaptia towyriaꞌin sese wo. Yt totereko i raꞌyn wyti miitꞌin minug saꞌag topyꞌa pe. Tomoweityk taꞌyn wyti mekewat topyꞌa piat koꞌi tosuu wo. Koitywy toꞌe ahepe -Ewehenoi ro miitꞌin me waure wo areineꞌen iꞌatuminug saꞌag kai e. Waku teꞌeraꞌaipok uhowowi e Aipotypot e mesup ahepe.
20 Koitywy toineꞌen Wuatꞌi Porekuat Koro wo. Miꞌi hawyi ainug topotpoꞌoro wo morekuat hit koꞌi wo wẽtup tawa kape wẽtup tawa kape tehay moherep hamo -Eweiꞌaipok to Tupana kape e hamo. Aikaꞌiwat Iesui toineꞌen atipy pe. Maꞌato uruto haipepiaria ihay moherep haria urutoꞌe. Tupana urupoꞌoro ehewowi eikyꞌe kahato haype. Worohoꞌokyꞌesat eipe uruwyriaꞌin wo i raꞌyn urutoꞌe. Eiwewyꞌinug no Tupana wywo urutoꞌe.
21 Aikaꞌiwat Iesui yt karãpe i inug saꞌag watoꞌe. -Taꞌi Uhaꞌyru waku sakpo e Tupana. Maꞌato miꞌi pykai Tupana tiꞌapiheg aiminug saꞌag upi. Aiminug saꞌag yne iꞌokpe tote toineꞌen kahato iꞌauka hap. Miꞌi hawyi Iesui topyhuꞌat yt naku i nug hat ewy aiminug saꞌag topiit tote hawyi. Yt towat tominug saꞌag hap upi Tupana tiꞌapiheg Iesui maꞌato aiwat aiminug saꞌag upi tohoꞌopot kahato. Miꞌi watomohey hawyi Tupana ainug wakuat sese rakaria Tosaꞌyru suu aikoho hawyi. Tosaꞌyru ewaku hap totopag ahepe. Waku pe watoineꞌen Tupana wanetup hawe watoꞌe wuatꞌi ywania pe aikope aikope aipoꞌoro hap upi Tosaꞌyru haipepiatno.
