Typuatꞌi Kurintiu 6:1-18
6 Urutoria Iesui ehay moherep haria sese. Miꞌi pote koitywy uruhẽtup kahato ehupi. Eipe iꞌewyte uruꞌewy te wẽtup piit ewy yn Tupana wywo. Watuwepotpap kahato wuatꞌi ywania piat ikuap Haꞌyru etiat hamo. Pyno Tupana eropat haria aito pote uruhẽtup ehupi urupyꞌa pyi kahato. Yt eweikupteꞌen neiꞌo Tupana piat eikyꞌe hap ete iraꞌak takaria wo neꞌi. Tupana tum naꞌyn ehepe kat koꞌi kat koꞌi topotpap nug hamuat yt kat saꞌup i. Yt naku i Tupana miium ahepiat koꞌi watiporerokosap neꞌi. Yt naku i watipun imiium koꞌi.
2 Mio tã e saꞌawyꞌi Tupana ahepe -Koran naꞌyn wyti worohoꞌoehakyeraꞌat teran e. Mesup eꞌat raꞌyn atikyꞌesat ehehakyeraꞌat e. Worohoꞌokuap eipe ehepiat uikay kay hap eꞌyian mete e. Worohoꞌokyꞌesat eipe ehepiat hoꞌopot hap eꞌat pe e Tupana ahepe mesup taꞌyn miwan me Isaia 49.8 pe.
3 Koitywy Aikaꞌiwat ehay moherep haria raꞌyn aito. Miꞌi pote waku aiweꞌeg wo kahato watoineꞌen. Kat pote karãpe watiꞌaparap pote miitꞌin teꞌeruwekyryꞌi kahato Aikaꞌiwat Iesui ete iꞌewyte ahete. Miꞌi hawyi yt uwe i tuwanetup teran ahehay kape.
Ahoꞌopot Pykai Waku Tupana Motypot Haria Wo Watoineꞌen
4 Uruwyriaꞌin waku kat koꞌi kat koꞌi watunug aiweꞌeg wo kahato Tupana mowepiit hap wywo -Meiẽ Tupana eropat hat sese iꞌatuꞌe hamo. Karãpe putꞌok e ahete ahatek hap ahoꞌopot hap koꞌi turan yt naku i iũteꞌen iũteꞌen aipyꞌahak miitꞌin ete iꞌewyte Tupana ete. Waku watimoherep Aipotypot eropat haria sese hap miꞌi hap eꞌat pe.
5 Karãpe aiꞌahyk ahyk iꞌewyte karãpe aipyhyp woꞌopyhyp hawe iꞌewyte karãpe miitꞌin sem aiꞌauka teran haria pyꞌasetpe watoineꞌen iꞌewyte karãpe ahero ahãꞌãg hap wywo Tupana potpap nug kahato hap ete iꞌewyte karãpe yt watoket i kaꞌap Tupana potpap nug hap eꞌat pe wy iꞌewyte karãpe yt kat i aimiium Tupana potpap nug turan miꞌi koꞌi ahete turan waku watuwepỹꞌãtutuk poꞌog yn naꞌyn. Miꞌi hawyi miitꞌin tikuap taꞌyn Aikaꞌiwat eropat haria sese aito hap.
6 Iꞌewyte karãpe yt kat i aiwanetup hawe yt naku i nug hap ete miꞌi hawyi meiũran miitꞌin tikuap Tupana eropat haria sese aito hap. Iꞌewyte karãpe watikuap Tupana aiwy sese ewywuat miꞌi hawyi -Tupana emiit kahato miꞌi iꞌatuꞌe. Iꞌewyte karãpe miitꞌin tunug saꞌag ahete maꞌato yt watiꞌatupoepyk i miꞌi hawyi -Pywo imohey hat sese iꞌatuꞌe ahepe. Iꞌewyte iwese rakaria wo watoineꞌen hawyi -Meiẽ iꞌatuꞌe toꞌe hap ewy imohey sese hat iꞌatuꞌe. Iꞌewyte karãpe watunug Tupana Paꞌãu mikyꞌesat ewy hawyi iꞌewyte karãpe watiꞌatukyꞌe miitꞌin sese aipyꞌa pyi hawyi taꞌatukuap pywuat Aipotypot Iesui eropat haria sese aito hap.
7 Iꞌewyte karãpe watimoherep aikotã Tupana e hap ewy hawyi ipotmuꞌeria sese aito hap taꞌatukuap taꞌyn. Iꞌewyte karãpe Tupana aimoesaika yt ahesaika pykai i hawyi -Pywo rakat iꞌatuꞌe ahepe. Iꞌewyte karãpe waku pe watoineꞌen Tupana wywo iꞌewyte miitꞌin wywo miꞌi hawyi aikotã surara hesaika rakat ewy watoineꞌen. Surara typy ipo pe kyseꞌyp takat ewy. Wakuaria watoineꞌen pote -Miꞌiria Tupana surara wakuat sese iꞌatuꞌe ahepe.
8 Waku pe yn watikyꞌesat Tupana potpap nug ahepiat imotypot wywuat hamo. Maꞌato iraniaꞌin aimotypot kahato tuereto. Maꞌato iraniaꞌin yt aimotypot hin i. Maꞌato iraniaꞌin teꞌeruwekyryꞌi kahato ahete. Maꞌato iraniaꞌin yt -Waku iꞌatuꞌe kahato. Pywo piat watimoherep turan iraniaꞌin -Iꞌatueso atueso neꞌi taꞌatuhenoi iꞌatuꞌe ahepiat. Maꞌato sio waku iꞌatuꞌe sio yt naku i iꞌatuꞌe pykai watiꞌatumuꞌe kahato te Tupana ehay wakuat ete.
9 Taꞌi iraniaꞌin yt aikuap teran hin i. Maꞌato Tupana aikuap kahato. Miꞌi hawyi iraniaꞌin aikuap wen maꞌato aiꞌauka hamo aikuap. Aiꞌahyk ahyk aiꞌapiheg kahato aipiit suk suk kahato hamo aikuap. Miꞌi hawyi ikuꞌuro raꞌyn iꞌatuꞌe. Maꞌato miꞌi turan watuwehymut i raꞌyn kat pote Tupana yt tikyꞌesat i te aikuꞌuro hap pote.
10 Aimosoꞌopot hap aimoꞌarot kahato. Maꞌato miꞌi pykai watuwehum kahato Tupana kape. Maꞌato iꞌatuwanetup hawe yt kat hamo rakaria wo i watoineꞌen. Maꞌato wahenoi Tupana ehay wakuat iꞌatuepe hawyi taꞌatumohey hawyi taꞌi Tupana mipoityro koꞌi wo tukupteꞌen naꞌyn. Miꞌi hawyi aikotã hekat rakaria ewy tukupteꞌen. Yt kat i ahekat pykai.
11 Uhytꞌiꞌin manaꞌin tawa Kurintiu piaria uruikyꞌe kahato eipe. Torannia eipe uruikyꞌe urutoꞌe. Yne uruwanetup hap uruimoherep ehepe. Eikyꞌe hap yt karãpe i yi kape neꞌi. Pywo ti rat uruikyꞌe kahato eipe.
12 Eipe ti urumepytꞌin uruiꞌatukyꞌe kahato aikotã ywot tikyꞌe tomepytꞌin hap ewy.
13 Maꞌato eipe aikotã yt taꞌatuꞌywot etiat i yt iwese i rakaria ewy. Iꞌewyte yt taꞌatuwesat i taꞌatuꞌywot rakaria ewy eweikupteꞌen. Uruiꞌatukyꞌe kahato eipe urutoꞌe hawyi yt kat eweiꞌe i uruwesat. Urumepytꞌin urukyꞌe pote ewehenoi ro uruepe.
14 Yt naku i watuwat yt naku i nug haria wyꞌinug hamo. Aikotã iꞌypyryp wywo hẽtyhot hap wywo yt toꞌosat i hap ewy. Miꞌi hap ewy yt naku i watoineꞌen yt naku i nug haria wywo wẽtup miit ewy iꞌatuminug saꞌag ete. Aikotã uꞌi maniꞌay karay wywo toꞌopype miꞌi hap ewy yt naku i watopyhuꞌat tupanaria motypot haria wywo iꞌatuetupanaria motypot hamo. Aito Iesui mohey haria pote wẽtup miit ewy watoineꞌen wakuat nug hap ete. Miꞌi pote Tupana mimowaku hanuaria yt toꞌosat kuap sese i yt naku i nug haria wywo yt toꞌoꞌewy hin i pote.
15 Aikaꞌiwat wywo ahiag wywo yt karãpe i toꞌowenka taꞌatupotpap wẽtup ehay yn hamo. Miꞌi hap ewy yt karãpe i aito Aikaꞌiwat mohey haria watoꞌosat sese Aikaꞌiwat etiat mikyryꞌi haria wywo. Yt karãpe i wẽtup miit ewy watopyhuꞌat iꞌatuwywo.
16 Saꞌawyꞌi mio tã e Tupana tomohey haria pe -Areineꞌen eiwywo uheiam eipe. Eiwywo uhewyry e. Ehetupana wo areineꞌen e. Uhemiit no eweikupteꞌen e saꞌawyꞌi miwan me. Miꞌi pote Tupana yat ewy watoineꞌen. Tupana toineꞌen aipiit pe pote wuatꞌi eꞌat piat ieineꞌen hat eiam aito. Yt mo wuat minug Tupana iãꞌãkap eiam hin i aito. Yt karãpe i Tupana iwese tupanaria wywo. Miꞌi pote yt naku i Tupana aipiit piat watioto tupanaria motypot yat kape iꞌatumotypot hamo e Tupana saꞌawyꞌi miwan me Irewitiku 26.12 pe.
17 Mio tã e saꞌawyꞌi Tupana tomohey haria pe -Eweiꞌatoiat ro tupanaria e. Yt eweikupteꞌen neiꞌo iꞌatuwywo e. Eweikupteꞌen pya iꞌatukai ro e. Yt eweiwat reiꞌo iraniaꞌin wywo iꞌatumotypot hamo e. Yt ewetemig neiꞌo miꞌiria katupono yt naku i kahato miꞌiria e Tupana. Uimikyꞌesat ewetunug mote uimepytꞌin wo eweikupteꞌen e. Iꞌewyte eiwehytꞌok uiꞌyat pe e Tupana ahepe Isaia 52.11 pe.
18 Eiꞌywot sese wo areineꞌen e. Miꞌi hawyi eipe uhaꞌyruꞌin uhakiꞌytꞌin wo e Tupana ahepe Esutu 4.22 pe.
