Typuatꞌi Kurintiu 7:1-16
7 Eiꞌywot areineꞌen e Tupana ahepe. Worohoꞌomuꞌe eipe uimepytꞌin wo aheTupana Koro e. Miꞌi pote uimikyꞌe koꞌi eweipyhuꞌat e Tupana ahepe. Pyno waku watuwehik kahato Tupana ete imepytꞌin aito pote. Waku watimotypot kahato Aiꞌywot Koro yt kat i aiminug saꞌag wywo. Waku watokenꞌẽ ahepiat inug saꞌag hap pupi kat pote Tupana ehamo watoineꞌen pote. Yt naku i watuwat aipiit mikyꞌesat saꞌag upi neꞌi iꞌewyte aiwanetup saꞌag hap upi neꞌi. Yt naku i watuwanetup poꞌog ahetupanaria saꞌawyꞌi wuat kape neꞌi. Waku watoꞌe Tupana pe -Uiminug saꞌag koꞌi aikotã uipiit ipit pit sese hap ewy. Miꞌi hap ewy uiwanetup hap ipit pit kahato. Uipiit pit ok hap pote aremoti kahato uiminug saꞌag pupi waku watoꞌe Tupana pe.
Pauru Toineꞌen Kahato Tawa Kurintiu Piaria Kyꞌe Hatno
2 Uiwyriaꞌin tawa Kurintiu piaria yne eꞌat pe uruiꞌatukyꞌe kahato poꞌog saꞌawyꞌi kai. Miꞌi pote urukyꞌe aikotã uruiꞌatukyꞌe eipe hap ewy. Yt karãpe i uruiꞌatumaꞌat eipe. Iꞌewyte yt karãpe i eipiit kyewi hawyi ehekareꞌen koꞌi kyewi neꞌi urutukupteꞌen eipyꞌasetpe. Iꞌewyte yt karãpe i uruiꞌatupohari eipe katupono eikyꞌe kahato haria uruto.
3 Taꞌi urutuwanetup yn ehewowi yt kat i eimohit hap neꞌi uruwanetup hawe urukuꞌuro eikyꞌe haype.
4 Uimowepiit haria kahato eipe are. Uruimohey kahato eipe are. -Iesui mohey haria tawa Kurintiu piaria waku kahato rakaria urutoꞌe wuatꞌi miitꞌin me. Uruhoꞌopot kahato mesuwe maꞌato urutuwanetup ehewowi hawyi urumowepiit kahato eipe. Miꞌi hawyi yt kat i uruꞌarot neꞌi hap.
Titu Putꞌok E Masetunia Piaria Mowepiit Hamo
5 Saꞌawyꞌi putꞌok urutoꞌe mesuwe yi Masetunia pe turan uruhoꞌopot kahato. Yt urukyꞌe hin i itote. Iꞌatuehay saꞌag uruete yne tawa piaria. Urutokenꞌẽ itote kat pote sio uruꞌauka sio yt hap urutuwanetup pote. Iraniaꞌin tuꞌuka kahato uruete. Yt ikahu hin i uruwanetup hawe. Yt urutuwemohey kuap i. Miꞌi hawyi yt uruikyꞌesat i poꞌog yi kape sese uruto urutukupteꞌen.
6 Maꞌato miꞌi turan aimowepiit hat Tupana tipoꞌoro raꞌyn urupowyro hat mehin Titu are. Putꞌok e hawyi urumowepiit kahato.
7 Miꞌi hawyi mehin Titu urumuꞌe kahato -Waku kahato miꞌiria e ehetiat. Uipowyro kahato miꞌiria e. Taꞌatukyꞌesat kahato Tupana ehay e ehetiat tohenoi. Taꞌatukuap emiwan hawyi paa iꞌatuꞌe taꞌatuminug saꞌag ete e Titu uhepe. Uruikyꞌe kahato te Pauru iꞌatuꞌe uhepiat pe. Miꞌi hawyi urumowepiit kahato mio tã mehin Titu henoi ehetiat hawyi. Pyno typy urumowepiit hap mehin Titu putꞌok e hawyi tohenoi waku kahato ehetiat hawyi.
8 Saꞌawyꞌi wuat uimiwan ehowawiat eiꞌapiheg kahato hap eimoꞌarot kahato hap paa eweiꞌe kahato hap. Miꞌi turan areꞌe uiwepe -Yt naku i kahato uimiwan are. Poꞌog waku yt karãpe i atipoꞌoro uimiwan are uiwepe. Maꞌato mio waku kahato atipuẽti uimiwan katupono eweiꞌaipok taꞌyn Tupana kape paa eweiꞌe hap. Saꞌawyꞌi wuat einapin hap eiꞌapiheg hap yt he hin i eweipuẽti yt eimowepiit hin i pote. Maꞌato koitywy eimowepiit poꞌog poꞌog. Miꞌi hawyi koitywy eweiwat raꞌyn einapin uhepiat hap upi. Pyno koitywy uimiwan saꞌawyꞌi wuat ehowawiat uimowepiit kahato.
9 Waku kahato uimiwan saꞌawyꞌi wuat katupono miꞌi kaipyi eiwemorem kahato Tupana kape. Maꞌato saꞌawyꞌi ti haty yn eweipuẽti. Mekewat uimiwan eiꞌapiheg kahato hap ewy topyhuꞌat. Miꞌi hawyi paa eweiꞌe kahato eiminug saꞌag ete. Miꞌi kaipyi woꞌowese hap eweipuẽti Tupana wywo. Miꞌi pote uimowepiit hap ewy uimiwan saꞌawyꞌi wuat ehowawiat haty rakat pykai.
10 Karãpe watuwemoti aiminug saꞌag ete Tupana ehamo iꞌewyte karãpe paa watoꞌe aiwanetup hap saꞌag ete miꞌi hawyi wataꞌaipok aiminug saꞌag myi Tupana kape. Miꞌi hawyi ahehakyeraꞌat raꞌyn. Watuwemorem Tupana kape hawyi waku kahato ahete. Toiwaure raꞌyn aiminug saꞌag koꞌi. Miꞌi hawyi aimowepiit kahato hap yn topyhuꞌat. Toiwaure yne aiminug saꞌag koꞌi. Miꞌi pote yt kat i poꞌog aimoti te hap topyhuꞌat. Miꞌi hawyi -Paa watoꞌe hap tokosap taꞌyn watoꞌe are. Miꞌi hawyi -Waku kahato ahehakyeraꞌat hat watoꞌe. Maꞌato yt wataꞌaipok i aiminug saꞌag kaipyi pote yt watuwemoti hin i e hamo. Miꞌi pote yt karãpe i ahehakyeraꞌat hap toineꞌen. Aiꞌapiheg hap wuatꞌi eꞌat piat yn topyhuꞌat aikuꞌuro sese hap. Miꞌi hawyi mesuwe yi tote yt karãpe i watipuẽti mekewat aimowepiit hap. Tupana tiwaure aiminug saꞌag hawyi yt kat i haty hap ahete aimowanetup hawe aiminug saꞌawyꞌi wuat etiat. Maꞌato yt pote haty hap topyhuꞌat aheineꞌen hap oktan yt aimowepiit hin i.
11 Pywo ti rat karãpe watiꞌaparap sese yt Tupana mikyꞌesat ewy i hawyi wahatyꞌi aiwanetup hawe watuwemoti kahato itote. Miꞌi hap Tupana tikyꞌesat kahato. Miꞌi hap ewy topyhuꞌat ehete eiwemoti hap mekewat eipyꞌasetpiat hewaire waire rakat. Miꞌi hap atimoherep ehepe hawyi paa eweiꞌe kahato Tupana mikyꞌesat ewy. Miꞌi hawyi eweikupteꞌen ipyꞌahak takaria wo iminug saꞌag ete. -Yt urumikyꞌesat ewy i eweiꞌe tope. Urutokenꞌẽ kahato eminug saꞌag pupi. Yt naku i ti rat eweiꞌe haty wo tope. Etoiat ro eminug saꞌag hawyi ereineꞌen no Tupana emiit sese wo. Mio tã eweiꞌe hawyi yne ikuap yt Tupana mikyꞌesat ewy i tutunug saꞌag hap. Koitywy miitꞌin tikuap yt miꞌi tã nug haria i eipe hap. -Yt etunug poꞌog i raꞌyn o typua i eweiꞌe hawyi.
12 Eiweikuap kat pote uimiwan saꞌawyꞌi atipoꞌoro ehewowi einapin haty wuat hap. Pyno ahenoi ehepe worohoꞌokyꞌe kahato moherep hamuat. Yt uheso hin i are. Taꞌi Tupana ehamo yt uheso hin i are. Pywo piat sese worohoꞌokyꞌe eipe hap. Yt atipoꞌoro i saꞌawyꞌi mekewat miwan eipyꞌasetpiat iꞌaparap hap mohit hamo iꞌewyte imimaꞌat koꞌi mohit hamo wy. Maꞌato eiꞌywot ewy areineꞌen worohoꞌonapin perup i popuo eikyꞌe haype are.
13 Pyno saꞌawyꞌi mehin Titu toto ehowawiat turan yt towepiit hin i wywo toto. Maꞌato putꞌok e turan imowepiit kahato haria wo eweikupteꞌen. Miꞌi hawyi koitywy iꞌewyte uruto uruwepiit kahato mehin Titu henoi yne aikotã aikotã eweikupteꞌen hap etiat hawyi urumowepiit haria eipe.
14 Saꞌawyꞌi atipoꞌoro mehin Titu ehowawiat turan areꞌe tope -Aikaꞌiwat mohey haria tawa Kurintiu piaria waku kahato rakaria are tope. Taꞌaipok hawyi tohenoi ehetiat aikotã areꞌe hap ewy tohenoi. Miꞌi hawyi pywo ti rat are. Taꞌi pywo are atiꞌatumohey kahato miꞌiria. Aikotã urutoꞌe saꞌawyꞌi pywo e hap ewy. Kurintiu imohey haria waku kahato rakaria are Titu pe.
15 Koitywy mehin Titu eikyꞌe kahato hat poꞌog poꞌog saꞌawyꞌi wuat kai. Miꞌi pote ehewowi yn iwanetup hap. -Taꞌi miꞌiria Tupana mikyꞌesat nug haria e yn uruepe ehepiat pe. Yt toiwaure kuap i ehowawiat tuwanetup hap. -Uimotypot kahato miꞌiria e. Yt toimoto hin i tuwanetup hawe. Aikotã paa e haria ewy eweikupteꞌen itote -Ereke mehin ereke mimi eweiꞌe yn tope. -Hegyiꞌat kahato rakaria e yn uruepe ehepiat pe. Miꞌi hawyi ehewowi yn tuwanetup kahato.
16 Pyno worohoꞌomohey kahato eipe. Yt karãpiat i aru uimaꞌat haria eweipyhuꞌat. Ehewaku hap yn topyhuꞌat uiwanetup hawe.
