Typuatꞌi Kurintiu 8:1-24
8 Pyno koitywy ahenoi teran ehepe aikotã yi Masetunia piaria koitywy tukupteꞌen Tupana mipoityro koꞌi wo tukupteꞌen. Tegyiꞌat hap kaipyi toiꞌatukyꞌe miꞌiria. Pywo wuat miꞌiria Tupana tiꞌatupoitynug poꞌog poꞌog neꞌi. Saꞌawyꞌi taꞌatumohey hawyi itotiaria miitꞌin weukaꞌi kahato haria miꞌiria. Taꞌi ihakyꞌeꞌi kahato rakaria wo teꞌeropyhuꞌat itote miꞌiria. Aikotã yt iꞌatuekat hin i rakaria ewy tukupteꞌen.
2 Maꞌato miꞌi pykai iꞌatuwepiit hap yn topyhuꞌat. Miꞌi pykai taꞌatumoꞌẽ taꞌatuepiat ekat hit yne iraniaꞌin me. Poꞌog iꞌatuegyiꞌat hekat rakaria kai taꞌatumoꞌẽ yne pote. Katupono taꞌatumoꞌẽ yne miitꞌin powyro hamo.
3 Teꞌeruwepyꞌa pyi taꞌatuium neꞌen neꞌi. Yne taꞌatuium kuap hap oktan ihakyꞌeꞌi rakaria tawa Ierusarẽi miaria powyro hamo. Yt uheso i rat katupono iꞌatuegyiꞌat sese miꞌiria.
4 -Uruipowyro kahato teran Aikaꞌiwat mohey haria tawa Ierusarẽi miaria iꞌatuꞌe uhepe uruiꞌatukyꞌe kahato miꞌiria pote iꞌatuꞌe. Miꞌi pote urumowepiit kahato etioto urumiium koꞌi hawyi iꞌatuꞌe yn uhepe typua i typua i. Saꞌawyꞌi urutoꞌe uruwoꞌope -Pyno taꞌatuium aru kurin taꞌatumiium oktan. Miꞌi hawyi watioto tawa Ierusarẽi kape urutoꞌe uruwoꞌope. Maꞌato yt heĩpyt hin i taꞌatuium poꞌog uruwanetup hap kai.
5 Katupono -Tupana iꞌatuꞌe urutum neran urupiit epe iꞌatuꞌe. Miꞌi hawyi urupotpap hap kaipyi urutum neran yne ewowi. Miꞌi hawyi urutum yne Pauruꞌin me imiereto tawa Ierusarẽi miaria kapiat hamo iꞌatuꞌe Tupana pe. Miꞌi hawyi taꞌatunug Tupana piat taꞌatuꞌe hap ewy.
6 Saꞌawyꞌi uruipoꞌoro mehin Titu -Toꞌiro watiꞌatunug tawa Ierusarẽi miaria ihakyꞌeꞌi rakaria powyro hamo e. Pyno uruikuap mekewat yi Masetunia piaria iꞌatuegyiꞌat kahato hap ete hawyi urutoꞌe -Pyno waku watipoꞌoro i raꞌyn mehin Titu imohey haria tawa Kurintiu piaria napin aikotã waku watum ihakyꞌeꞌi rakaria pe hap etiat hamo urutoꞌe. Waku watunug imohey i haria yi Masetunia piaria ewy e hamo iꞌatuegyiꞌat hap wywo urutoꞌe. Miꞌi hawyi uruipoꞌoro i raꞌyn ehewowi.
7 Uruiꞌatumohey kahato eipe uruwanetup hawe. Eweikuap kahato aikotã waku hãpyk nug hap ete. Howapy kahato imohey hap wywo eipe. Tupana Paꞌãu ihay hesaika kahato eikaipyi. Tupana kuap haria sese eipe. Yt eipohep hin i Tupana mikyꞌesat nug hap ete. Iꞌewyte wekyꞌe hap ete eweikuap kahato. Taꞌi yne miꞌi hap koꞌi ete poꞌog wakuaria wo eweikupteꞌen. Pyno koitywy wahãꞌãg sio eipe poꞌog hegyiꞌat rakaria sio yt hap kuap hamo.
8 Pyno -Ewetum no yt areꞌe i haty wo ehepe. Yt ewetum i pote yt naku i yt areꞌe kuap i ehepe. Eipyꞌa pyi ewetum ihakyꞌeꞌi rakaria tawa Ierusarẽi miaria piat hap iꞌewyte iꞌatukyꞌe kahato wywo hap uruikyꞌesat. Miꞌi hawyi Tupana tikuap ehegyiꞌat hap tokyꞌe kahato hap. Waku watimoherep imohey haria yi Masetunia ewy ehegyiꞌat hap.
9 Eipotypot Iesui aikyꞌe kahato. Miꞌi hap eweikuap taꞌyn maꞌato ahenoi teran i raꞌyn. Hegyiꞌat kahato Miꞌi aikotã hekat sese rakat timoꞌẽ yne tekareꞌen ihakyꞌeꞌi rakaria pe hap ewy Aikaꞌiwat hegyiꞌat kahato. Saꞌawyꞌi sese yne kareꞌen topyhuꞌat ipo pe atipy pe. Miꞌi hawyi ahowawi tuut atipy kaipyi. Miꞌi Miit ihakyꞌeꞌi rakat topyhuꞌat. Toimoꞌẽ yne tewaku hap ahowawi aikyꞌe haype. Miꞌi hap koꞌi watikuap taꞌyn. Maꞌato waku watopyhuꞌat aikotã hegyiꞌat hap ewy uhekatuwyria are.
10 Gaꞌatpuat anu -Waku watiꞌatunug hawyi watipoꞌoro ihakyꞌeꞌi rakaria tawa Ierusarẽi miaria imohey haria kape eweiꞌe wuatꞌi Iesui mohey haria iraniaꞌin eꞌyian mete.
11 Pyno koitywy worohoꞌonapin eipe -Ewetunug no aikotã eweiꞌe hap ewy. Eweiꞌatunug o eimiium koꞌi eimikyꞌesat ewy. Taꞌi eiwepiit hap wywo wyti ewetum eimikyꞌesat oktan. Waku watum aimiium Tupana kapiat haty wo iꞌatukyꞌe hap wywo. Waku watum aipap hap wywo. Waku wahoꞌoium ahekat koꞌi aimikyꞌesat ewy.
12 Pyno kat koꞌi kat koꞌi watum Tupana kape aipyꞌa pyi ikyꞌe hap wywo miꞌi hawyi ewepiit kahato. Iwato sio yt hap kape yt tuwanetup i miꞌi koꞌi kape. Tupana tikyꞌesat watum kuap hap oktan tope. Yt toikyꞌesat i watum yt watum kuap i hap oktan.
13 Yt naku i watum yne ahekat ihakyꞌeꞌi rakaria pe hawyi aito watoineꞌen ihakyꞌeꞌi rakaria wo neꞌi hap. Waku poꞌog watimoꞌẽ iꞌatuepe hawyi yne aito ahekat topyhuꞌat.
14 Pyno waku watimoꞌẽ ahekat iꞌatuepe katupono aiwat iꞌatu kahato pote maꞌato iꞌatuwat yt kat i i pote. Meiũran aru putꞌok e ehepiat hoꞌopot hap eꞌat. Miꞌi hap eꞌat pe waku miꞌiria aipowyro aikotã aito watimoꞌẽ saꞌawyꞌi hap ewy.
15 Aikotã Tupana toꞌe saꞌawyꞌi miwan me -Yt naku i yt hegyiꞌat rakaria wo i watoineꞌen uiatno yne e haria wo neꞌi. Yne aito hegyiꞌat rakaria wo watoineꞌen pote watimoꞌẽ aiwoꞌope. Miꞌi hawyi aiwoꞌoꞌewy ewy hekat rakaria wo watoineꞌen e Muisei tomiwan Esutu 16.18 piat pe.
Titu Toineꞌen Wy Tawa Kurintiu Piaria Kyꞌe Hatno
16 Uruwyriaꞌin tawa Kurintiu piaria uruiꞌatukyꞌe kahato eipe. Koitywy aiwy Titu eikyꞌe aikotã urukyꞌe hap ewy. Eipowyro hap yn iwanetup hawe. Tupana tunug naꞌyn Titu eikyꞌe kahato hatno. Miꞌi pote waku wahewaku Tupana kape.
17 Wẽtup eꞌat pe watoꞌe mehin Titu pe -Waku eraꞌaipok tawa Kurintiu kape urutoꞌe. -Areto teran ni rat e hawyi toto yt uruipoꞌoro poꞌoro poꞌog pykai i. Tuwepyꞌa pyi toto. Ipap kahato pote poꞌog torannia kai.
18 Miꞌi hawyi wẽtup ok uruipoꞌoro mehin Titu wywo. Miꞌi ti aimuꞌe kuap kahato Tupana ehay wakuat etiat rakat. Wuatꞌi puat mikuap Iesui mohey haria mikuap kahato miꞌi are. Miꞌi pe ti -Wakuat kahato miꞌi iꞌatuꞌe.
19 Taꞌi torannia Tupana motypot yat piaria miꞌairo ti meiũwat miit mekewat aimiium ereto tawa Ierusarẽi kapiat hamuat. Miꞌi hamuat iꞌatumiꞌairo iꞌatumiium iꞌatuegyiꞌat hap moherep hamuat ium hamuat. Miꞌi urutum ihakyꞌeꞌi rakaria imohey haria tawa Ierusarẽi miaria pe. Miꞌi hawyi teꞌeruwehum kahato Aikaꞌiwat Iesui kape. Miꞌi hawyi iꞌatuwepiit kahato taꞌatukuap taꞌatukyꞌe kahato ehepiat hap hawyi.
20 Iwato kahato aimiium urutioto. Miꞌi pote urutioto meiũwat miit eimiꞌairo miium koꞌi ereto hamo. Yt urutioto teran i katupono yt uruikyꞌesat i kahato iraniaꞌin toꞌope -Meiẽ Pauru ihoꞌosat aimiium koꞌi muap upi tawa Ierusarẽi kapiat aimipoꞌoro koꞌi e hap yt uruikyꞌesat i. Miꞌi pote eimiꞌairo tioto are.
21 Hãpyk kahato yn areineꞌen neran wuatꞌi miitꞌin wanetup hawe iꞌewyte Tupana wanetup hawe. Miꞌi pote yt atioto teran i mesuwat wuatꞌi miium wato koꞌi kat pote yt atikyꞌesat i miitꞌin teꞌeruwanetup saꞌag uhowowi sio tohoꞌosat sio yt iꞌatuꞌe hap ete.
22 Miꞌi pote eimiꞌairo po pe yne urutum hereto hamo. Eimiꞌairo waku kahato uruipuẽti aiwy sese. Yt karãpe i topotmaꞌat nimo pyi te aipowyro hat. Uruhãꞌãg kahato yne ete maꞌato yt karãpe i urumaꞌat. -Areto teran tawa Kurintiu kape e. Atiꞌatumohey kahato miꞌiria e imohey haria tawa Kurintiu piaria katupono taꞌatuium aru poꞌog watuwanetup hap oktan e uruepe.
23 Uito hawyi mehin Titu aikotã wẽtup miit ewy yn urutukupteꞌen eheropat hamo. Uiwy kahato mehin Titu are. Koitywy atipoꞌoro miꞌi iraniaꞌin wywo ehewowi. Tuwat yne hawyi areto. Miꞌiria uheꞌyianme tuwat. Waku eweiꞌatumohey miꞌiria katupono Iesui mohey haria yne. Tupana motypot yat piaria mipoꞌoro kat pote Aikaꞌiwat motypot haria sese iꞌatuꞌairo. -Eiwehytꞌok eweiꞌe o iꞌatuepe aikotã eimikuap sese koꞌi piat ewy are.
24 Eweiꞌatukyꞌe sese iꞌatumipoꞌoro koꞌi pote -Imohey haria Kurintiu piaria iwese sese rakaria iꞌatuꞌe aru teꞌeraꞌaipok taꞌatuetawa kape hawyi. -Waku imohey haria Kurintiu piaria iꞌatuꞌe Pauruꞌin e hap ewy aikyꞌe kahato haria miꞌiria iꞌatuꞌe aru are.
