Typuatꞌi Kurintiu 9:1-15
9 Pyno koitywy yt kat hamo i -Waku kahato watiꞌatumoꞌẽ ahekat koꞌi imohey haria ihakyꞌeꞌi rakaria tawa Ierusarẽi miaria pe yt kat hamo i areꞌe katupono ewetum neran.
2 -Gaꞌatpuat anu urupotpap kahato hum hamo eweiꞌe uhepe. Meremo uruiꞌatunug urumiium muat ihakyꞌeꞌi rakaria imohey haria tawa Ierusarẽi miaria pe eweiꞌe. Mio tã eiꞌe hap ahenoi wuatꞌi imohey haria pe yi Masetunia piaria pe. Miꞌi hawyi teꞌeroꞌe -Pyno uruto wy urutum iꞌatuꞌe. Miꞌi hawyi taꞌatuium taꞌatukuap eipe ewetum irane hap hawyi. -Tawa Kurintiu piaria yi Akaia piaria ewy watum iꞌatuꞌe toꞌope.
3 Miꞌi pote atipoꞌoro mehin Tituꞌin uheꞌyianme eimiium sio waku sio yt i te hap kuap hamo. Maꞌato areto yt eweiꞌatunug i te turan wuat pote watoꞌomoti te hap topyhuꞌat -Urutunug aru eiꞌe yt ewetunug i te pote.
4 Katupono areto aru yi Masetunia piaria wywo maꞌato -Urutunug aru eiꞌe hap yt ewetunug i turan yt naku i putꞌok urutoꞌe ehetawa pe eimiium sat hamo. Yt kat i pote yi Masetunia piaria toꞌokyryꞌi sese taꞌatupyꞌa pe. -Kat pote -Urutunug aru iꞌatuꞌe pykai yt taꞌatunug i iꞌatuꞌe.
5 Miꞌi pote areꞌe mehinꞌin Tituꞌin me -Uheꞌyianmete eweiwat ro tawa Kurintiu kape are. Eweiꞌatunapin miꞌiria -Waku aiwepiit wywo watum e hap ete waku watum aipyꞌa pyi imohey haria ihakyꞌeꞌi rakaria tawa Ierusarẽi miaria pe e hamo. Pyno waku pe yne raꞌyn aimiium koꞌi taꞌatuereto hap eꞌyian mete tawa Ierusarẽi kapiat hamo waku eweiꞌe o tawa Kurintiu piaria pe are Tituꞌin me tawa Kurintiu piaria napin hamo. -Waku watum aipyꞌa pyi hap yn eweiꞌe o are mehinꞌin Tituꞌin me. -Yt naku i watum yt watum neran i pote waku eweiꞌe o are mehinꞌin Tituꞌin me.
Waku Watum Tupana Kape Aipyꞌa Pyi
6 Pyno ahenoi ehepe hãꞌãkap wuat aikotã waku watum Tupana kape hap ete. Uwe uwe tikoi yt iwato i miꞌi hat aikotã toikoi hap oktan toipuẽti. Maꞌato uwe uwe tikoi iwato miꞌi hat ipuẽti tepiat ikoi hap oktan. Miꞌi hap ewy karãpe watum Tupana kape yt ahegyiꞌat wywo i pote meiũran aru yt kat i watipuẽti yt ahegyiꞌat i pote.
7 Uiwyriaꞌin Tupana tikyꞌe kahato hegyiꞌat sese rakat. Topyꞌa pyi toikyꞌesat kahato tutum Tupana kape hat. Yt toikyꞌesat i watum tope yt watum neran i wywo watum hap. Iꞌewyte yt toikyꞌesat i -Etum no maꞌato yt pote yt naku i pe ereineꞌen e wẽtup ok hap upi neꞌi watum hap. Tupana tikyꞌesat aiwehum kahato wywo watum aipyꞌa pyi hap tewowiat hap toikyꞌesat. Toikyꞌesat aimiium muat watiꞌairo yian mete kat som watum hap koꞌi.
8 Tupana hegyiꞌat sese ahepe. Tutum kuap ahepe poꞌog poꞌog watuwanetup hap kai aipoityro kuap kahato aikyꞌe haype. Yt ahewaku hap upi i tutum neꞌen neꞌi maꞌato aikyꞌe hap yn wywo. Miꞌi pote karãpe watunug neran wakuap imikyꞌesat turan aimoesaika kahato inug hamuat poꞌog poꞌog watunug kuap kai. Tupana tikuap kahato ahepiat kat sepap hap kuap hamuat aimoweꞌeg hamo. Tutum kuap poꞌog ahepiat hum hap tepiat hap kai.
9 Miꞌi hap ete Tupana toꞌe miwan me -Ehehakyꞌeꞌi kahato uhepe. Yt worohoꞌoꞌewaure hin i eipe ihakyꞌeꞌi rakaria e. Atikuap haty ehete hap koꞌi e. Worohoꞌopowyro eipe wuatꞌi eꞌat pe e morekuat Tawi wepy 112.9 pe. Miꞌi hap kaipyi watikuap hegyiꞌat kahato hap.
10 Pywo ti rat aipoi kahato hat Tupana. Yne aimikoi nug hat saꞌawyꞌi kat koꞌi kat koꞌi watikoi Tupana inug hap kaipyi. Miꞌi pote yne miꞌi tuut Tupana po pyi. Tupana timowato yne aimikoi koꞌi aiko moehãite hat. Tupana tikuap kahato aikotã mowato hap aito hegyiꞌat rakaria watoineꞌen pote. Watimoꞌẽ hap oktan tutum ahepe.
11 Tupana timowato kuap ahekat koꞌi. Yne aiminug koꞌi toipoityro kuap watoineꞌen hegyiꞌat ahekat koꞌi wo pote. Watimoꞌẽ ihakyꞌeꞌi rakaria pe pote Tupana kape teꞌeruwehum ahegyiꞌat hap upi.
12 Pyno watipoꞌoro aimiium ihakyꞌeꞌi rakaria imohey haria tawa Ierusarẽi miaria kape hawyi -Waku kahato En Tupana iꞌatuꞌe aru. Yt wesok i te haria hin i tawa Kurintiu piaria iꞌatuꞌe aru ihakyꞌeꞌi rakaria powyro hamo. Koitywy uruikuap emohey haria tukupteꞌen iꞌatumiium kaipyi. Koitywy waku ahete kat pote tokosap taꞌyn ahehakyꞌeꞌi hap uruete Tupana iꞌatuꞌe haty wo torannia watimoꞌẽ ahekat koꞌi pote.
13 -Tupana iꞌatuꞌe Esaꞌyru ehay upiaria emohey haria tawa Kurintiu piaria iꞌatuꞌe aru. Emipoꞌoro Aiporekuat nuat ehay wakuat nug haria miꞌiria iꞌatuꞌe aru Tupana pe. Taꞌatumoꞌẽ uruepe hãpyk kahato iꞌatuꞌe. Yt uwe pe i poꞌog toꞌokupitu kupitu kahato hegyiꞌat sese rakaria ewy iꞌatuꞌe aru Tupana pe.
14 -Tupana tawa Kurintiu piaria emohey haria ekaipyi tukupteꞌen hegyiꞌat sese rakaria. Miꞌi pote etiꞌatupoityro o miꞌiria katupono koitywy uruikyꞌe kahato miꞌiria. Etimoherep iꞌatuepe aikotã uruiꞌatukyꞌe miꞌiria hap koꞌi iꞌatuꞌe aru Tupana pe. Eimipowyro koꞌi tawa Kurintiu piaria iꞌatuꞌe.
15 -Tupana yt uwe i poꞌog hegyiꞌat ekai. Emiium iwato poꞌog torannia kai urutoꞌe. Esaꞌyru wẽtup ok yn nakat etum pote Tupana urutuwehum ewowi urupyꞌa pyi. Maꞌato yt karãpe i uruehay putꞌok e emiium Esaꞌyru etiat enoi yne hamo urutoꞌe. Pyno waku kahato En urutoꞌe are. Uruto ti Esaꞌyru mohey haria are. Pyno waku are uito Pauru.
