Typuatꞌi Tesaronika 2:1-17
2 Pyno uruwyriaꞌin koitywy uruhenoi pakup i teran ehepe Aipotypot Aikaꞌiwat Iesui aipok hap etiat aikotã aikotã aiꞌatunug tuwewawi hap etiat uruhenoi teran ehepe.
2 Iraniaꞌin woꞌomuꞌe haria ti -Tuut kahu raꞌyn ti Iesui iꞌatuꞌe aimuꞌe yt pywo pe i maꞌato. Tuut kahu raꞌyn ti e ti Pauru miwan me iꞌatuꞌe eimoꞌakagꞌaia teran haype. Yt eweiꞌatuehay mohey teiꞌo mio tã e haria -Pywo ti Tupana ehay wahenoi iꞌatuꞌe haty wo pykai. Yt iꞌatumimaꞌaria wo teiꞌo eweikupteꞌen.
3 Aiweꞌeg wo o aimaꞌat iꞌatuepiat hap pupi katupono yt tuut i te rat Iesui. Yt heꞌat i te katupono ti aru Iesui mohey haria sok ihay atoiat haria tukupteꞌen aru huut hap owakai. Iꞌewyte huut hap eꞌyian me ti aru tuwemoherep Tupana ewanikap mekewat ahiagnia akag. Miꞌi ti yne saꞌag eiam tuwemoherep Iesui eꞌyian mete.
4 Miꞌi miit ti aru Tupana mohey hap moma miitꞌin kaipywiat hat. Miꞌi ti wuatꞌi puo Tupana kuap haria ewanikap mo toineꞌen -Uito ti wuatꞌi Tupana kawiat poꞌog nakat e. Miꞌi hawyi ti aru teke Tupana motypot yat koro pe tawa Ierusarẽi me taꞌapyk Tupana eiam note -Uito ti Tupana toꞌe hamo.
5 Yt eiwatetup i raꞌyn apo karania wo neꞌi raꞌyn ahenoi ehepe miꞌi miit etiat pykai are.
6 Maꞌato yt tuwemoherep kuap i te katupono topyhyp hawe te toineꞌen. Watikuap kahato raꞌyn ti uwe ipyhyp hat. Maꞌato meiũran teꞌat putꞌok e raꞌyn hawyi ti tuwemoherep hamuat wuatꞌi saꞌag sepap nug hat koro Iesui uut hap eꞌyian mete tuwemoherep.
7 Koitywy yt herep wyi i te ipotpap saꞌag nug hap ete. Hemiit yn heremo. Migꞌi pyi ipotpap maꞌato meiũran ti herep wyi hamuat raꞌyn ipotpap. Maꞌato koitywy yt tuwemoherep kuap i te hewaĩ hat toineꞌen ne pote.
8 Miꞌi hawyi tuwemoherep mekewat saꞌag nug hat koro maꞌato Aipotypot Iesui ti aru iꞌauka wẽtup tehay wo yn topyhu wo yn teẽtyhot kahato wywo tuut hap eꞌat pe.
9 Miꞌi miit saꞌag tuwemoesaika ahiag esaika hamo iwemoherep hap putꞌok e turan. Miꞌi hawyi ti aru miitꞌin maꞌat hap iwato kahato tutunug tesaika hap moherep hamo. Topo wo yt uwe miitꞌin minug ewy i tutunug miitꞌin miat tomotypot hamo teso hap koꞌi. Miꞌi hawyi miitꞌin teꞌeruwanetup kahato iminug koꞌi kape -Aikotã som tutunug iꞌatuꞌe aru.
10 Miꞌi hawyi ti aru hoꞌowasat rakaria wo miitꞌin toiꞌatumaꞌat kahato raꞌyn mekewat topo wuat tominug wo yt miitꞌin minug kuap i wo. Miꞌi hawyi imimaꞌat koꞌi tuwehytꞌok yne aria pe katupono taꞌatumohey kahato raꞌyn heso hap koꞌi poꞌog pywuat sese sehay kai. Yt taꞌatukyꞌesat i poꞌog taꞌatuehakyeraꞌat hanuat Tupana miium.
11 Yt taꞌatukyꞌesat i pywuat sehay pote miꞌi hawyi Tupana tiꞌatupoꞌoro heso rakaria iꞌatumuꞌe hamo. Miꞌi hawyi heso rakaria pe yn pywo iꞌatuꞌe.
12 Miꞌi tupono tukupteꞌen miꞌi haria wuatꞌi eꞌat pe Tupana miꞌapiheg wo katupono taꞌatupun naꞌyn pywuat sehay iꞌewyte taꞌatukyꞌesat taꞌatunug saꞌag hap yn.
13 Uruwyriaꞌin Tupana miꞌatukyꞌeria kahato eipe. Taꞌi urutuwehum kahato Tupana ete wuatꞌi eꞌat pe uruwatetup ehowawiat hawyi katupono Tupana miꞌairoria raꞌyn eipe. Tutum naꞌyn ni ehehakyeraꞌat hap ehepe pywuat sese tomohey hap upi. Miꞌi hawyi mio Tupana Paꞌãu esaika hap wywo yn naꞌyn eweikupteꞌen. Miꞌi hap ete urutuwehum kahato Tupana kape uruwyriaꞌin urutoꞌe.
14 Saꞌawyꞌi worohoꞌomuꞌe mekewat sehay wakuatno miꞌi hawyi eweikupteꞌen imohey haria wo. Miꞌi hap eꞌat pe toꞌe Tupana ehepe -Pyno worohoꞌonug eipe ikahu rakaria wo aikotã Uhaꞌyru ewywuat no.
15 Miꞌi tupono uruwyriaꞌin waku kahato ti motꞌi mekewat sehay pywuat eweimohey mekewat uruwẽ pywiat sehay urumiwan urumienoi koꞌi.
16 Uruhẽtup kahato Aipotypot Aikaꞌiwat Iesui pe iꞌewyte Aiꞌywot hegyiꞌat rakat kape -Etiꞌatumoesaika ro emohey haria tawa Tesaronika piaria yt kat pupiat i iꞌatuwuwu hamo urutoꞌe. Etiꞌatumoesaika ro miꞌiria wakuap nug hamo iꞌewyte wakuap enoi hamo.
17 Miꞌi yn uruhẽtup kahato aimiekatup kape yt kat pupiat i eikenꞌẽ hamuat hap ium hat kape uruhẽtup uruto Pauruꞌin.
