Typuatꞌi Timoteu 2:1-26
2 Timoteu Aipotypot Iesui hegyiꞌat kahato tesaika hap ium ahepiat hamo. Miꞌi hap kaipyi ereineꞌen hemiit hesaika kahato rakatno hap wẽtup piit ieineꞌen hap ewy raꞌyn ereineꞌen iwywo.
2 Uimienoi kuap kahato hat en uhaꞌyru katupono uiwywo yn ereineꞌen uipotmuꞌe turan. Yt etiwaure teiꞌo uiꞌe hap maꞌato etomoherep yne o Iesui mohey kahato haria pe -Imohey hap yt atoiat hin i haria pe. Ahaipepiaria piat uimienoi moherep hanuat ereineꞌen.
3 Aikotã surara tuwemosoꞌopotꞌi hap ewy eremosoꞌopot uhaꞌyru. Surara sese ewy o ereineꞌen Iesui emiit wakuatno.
4 Katupono ti topotpap hawe ti surara tikyꞌesat topoꞌoro hat mowepiit hap yn toikyꞌesat. Miꞌi pote toto topoꞌoro hat mikyꞌesat nug hamuat. Saꞌawyꞌi wuat tekat koꞌi kape yt tuwewanetup i raꞌyn maꞌato tuwanetup surara akag miat topoꞌoro hap kape yn. Miꞌi hap ewy ro ereineꞌen Aipotypot piat epoꞌoro hap ewy.
5 Karãpe aheput hap ete watoꞌoiãꞌãg hap ewy uwe poꞌog ihyha hap kuap hamo waku hãpyk kahato rakat morekuat piat ainapin hap ewy waku watunug. Yt miꞌi hap ewy i pote yt uwe i miꞌi poꞌog iꞌatuꞌe ahepe aihyha pykai. Maꞌato iꞌe hap ewy wateput miꞌi pote miitꞌin mimotypot no watoineꞌen. Miꞌi hap ewy ti waku watoineꞌen hãpyk kahato imohey hap ete toꞌoꞌewywuat seput kahato haria ewy Timoteu.
6 Karãpe -Aiwesoꞌopotꞌi popuo watikoi aiko watoꞌe miꞌi rakirẽ ti maꞌato karãpe haat hawyi aiwatno topyhuꞌat saꞌawyꞌi te wuat haat. Miꞌi hap ewy ti Iesui ehay upi waku watuwesoꞌopotꞌi popuo watuwepotpap.
7 Erewanetup to uimienoi kape Timoteu. Miꞌi pote ti aru Aikaꞌiwat tum epiat wuatꞌi etiat kuap hamo.
8 Timoteu ewatetup o Aikaꞌiwat Iesui kape. Taꞌi miꞌi ti morekuat Tawi emiariru Emiariru sese. Miꞌi Miit Tupana mimoieineꞌen pakup i raꞌyn hat ahenoi wuatꞌi puo.
9 Miꞌi mienoi upi ti ahoꞌopot te. Uipoꞌi poꞌi raꞌyn haity wo woꞌoꞌauka hat ewy. Uito uipyhik kuap maꞌato Tupana ehay ti yt uwe i ipyhik kuap yt uwe i iꞌakit kuap.
10 Maꞌato yt uiwẽpohep hin i Iesui mohey hap ete waĩꞌiꞌatuꞌe pykai. Uiꞌauka pote uiꞌauka maꞌato yt uipohep hin i te. Katupono Tupana tiꞌatuehakyeraꞌat teran kahato tomiꞌairoria ahoꞌopot kahato Iesui mohey iꞌatuepiat hamuat pykai. Miꞌi hap kaipyi Tupana tiꞌatuehakyeraꞌat miꞌiria. Miꞌi hawyi Iesui kahu hap ewywuaria raꞌyn tukupteꞌen iwywo wuatꞌi eꞌat pe raꞌyn.
11 -Uikuꞌuro pote uikuꞌuro maꞌato yt woroꞌatoiat Tupana watoꞌe pote watoineꞌen iwywo wuatꞌi eꞌat pe waku watoꞌe. Hãpyk kahato sehay miꞌi.
12 -Iwywo wahoꞌopot pote iwywo morekuat no watoineꞌen waku watoꞌe maꞌato -Atoiat Iesui mohey hap watoꞌe pote iꞌewyte -Yt uimohey hat i meiẽ e ahepe e.
13 Watoiat pykai yt aiꞌatoiat hin i. Yt aiꞌatoiat i kat pote yt heso i. -Yt karãpe i ti aru worohoꞌoꞌatoiat e. Miꞌi e hap koꞌi ti aimimohey wuat watoꞌe waku kahato.
Tupana Yt Karãpe I Aiꞌatoiat
14 Timoteu etiꞌatunapin no haty wo epotmuꞌeria -Tupana yt tikyꞌesat i wyti aiwoꞌoewanikap hap neꞌi watunug tehay enoi turanuat hap. Yt kan hamo i watuꞌuka sehay hit kuap hap ete e maꞌato aiwuꞌuka i pote ti yt kat i aiwoꞌowehik hap itote ere o. Eweꞌeg wo o miꞌi hap pupi katupono Tupana toineꞌen aipyꞌasetpe aiwaꞌatunug turan.
15 Eremuꞌe kahato aat kaꞌap Tupana ehay enoi hãpyk hamuat hap ete. Yt epohep hin i o Tupana mikyꞌesat nug hamuat. Miꞌi hawyi -Waku kahato epotpap uhepiat hap e Tupana epe. Miꞌi hawyi yt eremoti hin i Tupana pupi hãpyk kahato epotmuꞌe tehay sese wuat pote.
16 Waku watoiat kahato yt aiweꞌeg i hap aiwoꞌoꞌehay wuat wuꞌuka hap aiwoꞌomuꞌe turanuat hap katupono miꞌi hap yt kan hamo i maꞌato watunug miꞌi neꞌi pote Tupana tuwemoti aipupi iꞌewyte watiꞌatuputsit neꞌi iraniaꞌin Tupana kuap teran hap kaipyi.
17 Uhyt Imeneu uhyt Wiretu miꞌiria tuꞌuka kahato sehay wo aiwoꞌomuꞌe turan. Yt ikahu hin i iwuꞌuka hap. Haty kahato aiwoꞌokyꞌe hap ete. Topyhuꞌat aikotã ahepihi haty kahato hap ewy. Sehay wuat iwuꞌuka hap miitꞌin woꞌoꞌatoiat hap ewy. Yt kan hamo i watuꞌuka sehay wo.
18 Haꞌawyte aimuꞌe haria uhyt Imeneu uhyt Wiretu pywo sehay upiat haria tukupteꞌen wen maꞌato mio ti taꞌatuꞌatoiat raꞌyn. Miꞌi hawyi wẽtup sehay kape -Tupana tiꞌatuhymut kahu raꞌyn map haria iꞌatuꞌe. Mio tuwat raꞌyn yne raꞌyn Iesui upi iꞌatuꞌe. Mio tã iꞌatuꞌe pote aimogyt kahato ahepiat imohey hap etiat waure watoꞌe pote. Iꞌatuepiat aimuꞌe hap toineꞌen aikotã hepihi wato yt uwe i imog kuap hap ewywuat are. Satꞌe raꞌyn iraniaꞌin ete hap ewy.
19 Maꞌato aito yt watoiat hin i te pywuat sehay mohey hap katupono Tupana saꞌyruꞌin sakiꞌytꞌin aito. Watunug iꞌyat iheg nakatno pote yt taꞌat i. Miꞌi hap ewy watomohey kahato. Pywo kahato pote yt watoiat i. Aikotã Tupana toꞌe saꞌawyꞌi hap ewy -Worohoꞌokuap ti eipe uimepytꞌin e. Iꞌewyte uwe uwe toꞌe -Uito Tupana watno e miꞌi hat pe -Pyno eminug saꞌag etoiat yne e Tupana.
20 Hekat rakat yat koro pe tukupteꞌen kahato seiam koꞌi yt toꞌoꞌewywuat ewywuat rakaria i. Iraniaꞌin wuatꞌi eꞌat piat ahenuk hap maꞌato iraniaꞌin aiwyriaꞌin sese poi hap ewy tukupteꞌen. Miꞌi koꞌi yt wẽtup kawiat yn i irania kuiꞌa kawiat irania yi kawiat irania hekat rakat kawiat imehit rakat. Miꞌi koꞌi heiam watipuẽti getap wato pe.
21 Watoiat yne saꞌag nug hap pote hekat rakat kuiꞌa ewy watoineꞌen ekuiꞌa wo iꞌyat koro pe ikahu kahato imowepiit kahato hamo. Miꞌi hawyi -Waku ti rat uimikyꞌesat nug hamo en e ahepe Tupana. Miꞌi hawyi Tupana emiit sese wo watoineꞌen. Miꞌi hawyi kat koꞌi kat koꞌi imikyꞌesat yn naꞌyn watunug.
22 Timoteu yt erewanetup teiꞌo emotag hap turan epiit mikyꞌesat saꞌag nug hamuat kape maꞌato meremo o etoiat. Erepik meremo o miꞌi hap kaipyi hãpyk nug hap kape Tupana mohey hap kape woꞌokyꞌe hap kape woꞌowese nug hap kape iraniaꞌin Iesui mohey haria upi urupowyro Tupana e haria upi wanetup kahu haria upi.
23 Uhaꞌyru tukupteꞌen kahato ti sehay wuat wuꞌuka teran haria yt kan nuat i ihay rakaria. Miꞌiria pe waku u paĩ u an watoꞌe yn naꞌyn iꞌatuehay pe. Yt watiꞌatuwesat i raꞌyn iwuꞌuka hap sehay enoi pote.
24 Katupono yt uwe i Aikaꞌiwat eropat hat wakuat wuꞌuka hatno toineꞌen. Maꞌato hemiit sese ti iwese yne miitꞌin ete. Woꞌomuꞌe kuap kahato hat yt ipyꞌahak hin i maꞌato hepama ikuap haria ete Tupana eropat hat.
25 Hepama towese popuo toiꞌatunapin kuap kahato ipyꞌahak teran tetiat rakaria. Etiꞌatumuꞌe mio tã iraniaꞌin mote meiũran Tupana tum kuap iꞌatuepe paa iꞌatuꞌe hamuat taꞌatuꞌatoiat mono taꞌatuminug saꞌag -Pywo raꞌyn taꞌatuꞌe haype.
26 Miꞌi hap kaipyi ti aru teꞌeraꞌaipok taꞌyn taꞌatumoweꞌeg hap kape. Miꞌi hawyi ti aru toiꞌatuehakyeraꞌat raꞌyn ahiag ewamiri pyi aikope ahiag mikyꞌesat yn taꞌatunug. Miꞌi hap kaipyi watiꞌatumuꞌe wanikaptia aiwese kahato hap wywo watiꞌatumuꞌe. Miꞌi hap ewy waku watunug Timoteu are uito eꞌywot Pauru.
