Typuatꞌi Timoteu 3:1-17
3 Timoteu niatpo ti aru watoineꞌen wuatꞌi saꞌag nug haria eꞌat putꞌok e turan katupono imohey haria piat hoꞌopot hap eꞌat mekewat eꞌat pe.
2 Katupono mekewat eꞌat pe yt hegyiꞌat i rakaria tukupteꞌen kahato -Ewat uiatno yne iꞌatuꞌe. Uito poꞌog ekai e haria. Uito poꞌog atikuap ekai iꞌatuꞌe. Toꞌokyryꞌi kahato Tupana ete. Iꞌatuehay taꞌatuꞌywot taꞌatuty piat yt taꞌatumohey hin i. Etum neꞌen neꞌi ikahu rakat iꞌatuepiat hawyi -Waku yt iꞌatuꞌe hin i egyiꞌat hawe. -Yt kat i Tupana iꞌatuꞌe i.
3 Yt uwe etiat i iwese rakaria miꞌiria. Ehakyꞌeꞌi hap yt kuap i haria. Taꞌatumoweukaꞌi yn miitꞌin. Meremo wuꞌuka teran haria haiwot rakaria wakuap nug hat etiat ipyꞌahak takaria.
4 Taꞌatuwyriaꞌin maꞌatꞌi maꞌatꞌi hanuaria wo i tukupteꞌen. Iꞌatuhuhaiꞌi yn tukupteꞌen. -Uito poꞌog e hap yn iꞌatuwanetup hawe. Taꞌatuwepiit hap kape yn teꞌeruwanetup. Yt Tupana mowepiit hap yt kape i teꞌeruwanetup.
5 Teꞌeruwaꞌatunug Tupana motypot hamo maꞌato yt pywo pe i. Yt taꞌatukyꞌesat hin i Tupana esaika hap taꞌatumopakup i hamuat. Miꞌi ewywuaria ti aru pywo tukupteꞌen kahato. Miꞌi tupono o eroꞌoksep yn naꞌyn miꞌi haria pupi. Eiweꞌeg wo o miꞌi haria ewamiri pupi.
6 Haryporia yat pe yt weꞌeg i hat yat pe tuwehytꞌok yt uwe mikuap mo i wẽtup sehay wuat imuꞌe hamo imaꞌat hamuat haype. Taꞌatumaꞌat kuap kahato katupono mekewat haryporiaꞌin yt iꞌatoiat teran hin i taꞌatuminug yt taꞌatuweꞌeg i hap koꞌi. Miꞌi haryporia ikyꞌesat kahato tehakyeraꞌat Tupana piat hap maꞌato yt totiat teran hin i tominug yt naku i yt iweꞌeg i hap koꞌi pykai.
7 Pywuat sehay atikuap teran iꞌatuꞌe wen maꞌato yt taꞌatukuap i taꞌatumuꞌe kahato pykai.
8 Aikotã saꞌawyꞌi pywuat sehay pun haria mehin Iane iꞌewyte mehin Iãpere ewywuat gupteꞌen haria miꞌiria. Saꞌawyꞌi miꞌiria Muisei ehay pywuat yt taꞌatusat i. Miꞌi haria ewywuaria ti aru mesuwe tukupteꞌen aru. Yt teꞌeruwanetup kuap i pywuat sese sehay kape katupono taꞌatuepiat imohey saꞌawyꞌi wuat hap taꞌatupun neꞌi.
9 Aimaꞌatꞌi maꞌatꞌi hap kaipyi wuatꞌi miitꞌin tiꞌatukuap taꞌyn woꞌomaꞌat haria wo miꞌiria. Aikotã saꞌawyꞌi Iane Iãpere ewywuaria miꞌiria.
10 Maꞌato en yt miꞌiria ewywuat hin i Timoteu katupono en uhaipepiat kahato emuꞌe uhepiat hap ewy kahato nug hat en. Uiminug wakuat e hamuat ewy kahato nug hat en. Uipyꞌãtap upiat ewyry raꞌyn. Iesui mohey uhepiat hap upi hewyry motꞌi kahato rakat raꞌyn en. Yt uihyha i hap upi hin i ewyry en. Uhepiat miitꞌin kyꞌe hap upi uhepiat hoꞌopot hap kuap hamo ewyry raꞌyn.
11 Iꞌewyte etikuap kahato iꞌatumikyryꞌi uhatyꞌi hatyꞌi hap koꞌi. Saꞌawyꞌi karãpe areineꞌen tawa Atiokia pe tawa Ikuniu pe tawa Irita pe taꞌatumikyryꞌi saꞌag kahato uhete. Uhatyꞌi hatyꞌi uimosoꞌopot uimohakyꞌeꞌi maꞌato uiporerokosap neꞌi Uikaꞌiwat Iesui.
12 Uwe uwe topyhuꞌat teran Aikaꞌiwat Iesui ewy hewaku hap ewy miꞌi hat wyti miitꞌin mikyryꞌi hamo topyhuꞌat miitꞌin misatyꞌi satyꞌi wo topyhuꞌat.
13 Maꞌato miitꞌin saꞌag nug haria woꞌomaꞌatꞌi maꞌatꞌi haria ti aru poꞌog poꞌog tuwemoherep. Iꞌatuminug saꞌag kaipyi meiũran poꞌog saꞌag teꞌeropyhuꞌat. Miꞌi hawyi wuatꞌi maꞌat hamo teꞌeropyhuꞌat. Iꞌewyte miꞌi hawyi wuatꞌi miitꞌin maꞌat hatno teꞌeropyhuꞌat.
Timoteu Tehire Te Pyi Tupana Ehay Kuap Hat Toineꞌen
14 Maꞌato Timoteu yt atikyꞌesat i en miꞌi tã ereineꞌen. Maꞌato uhepiat emuꞌe hap ete aat kaꞌap ereineꞌen poꞌog poꞌog katupono saꞌawyꞌi te miꞌi hap ete pywo haty wo eremuꞌe. Miꞌi hap ewy te mesup etimohey te Timoteu katupono etikuap sese raꞌyn uiwẽ pywiat emuꞌe hap.
15 Katupono ehire pyi te etikuap Tupana ehay miwan miat hap ete pywuat sese hap kaipyi etipuẽti Ekaꞌiwat Iesui etiat kuap hamuat. Katupono yian mete taꞌatuhenoi Aikaꞌiwat Iesui etiat. Miꞌi hap kaipyi ti watipuẽti aiweꞌeg hap Iesui mohey hamuat. Miꞌi hawyi watomohey hawyi ahehakyeraꞌat hap topyhuꞌat.
16 Wuatꞌi yianmiat Tupana ehay miwan miat tuwẽtem hemiitꞌin wẽ pyi Tupana Paꞌãu ihay. Waku kahato aimuꞌe pywuat sehay wo. Ainapin kahato kat som waku watunug iꞌewyte aimuꞌe kahato saꞌag kaipyi aiporerokosap hamo wakuap yn nug hamo aimuꞌe.
17 Aimohãpyk kahato hamuat Tupana ainapin tehay wo. Toꞌe hap kaipyi Tupana tiꞌatumoesaika kahato teropat haria wuatꞌi sepap hap kuap yne hamo wuatꞌi wakuap nug hamo are epe eꞌywot uito Pauru.
