Typuatꞌi Timoteu 4:1-22
4 Pyno Timoteu woronapin kahato haty wo Tupana ehamo Aipotypot Iesui ehamo -Etimohey kahato o Tupana ehay ereꞌe o epotmuꞌeria pe. Yt ewẽpohep hin i neiꞌo miꞌi hap ete. Yt epohepap pykai i yt epohep teiꞌo iꞌatumuꞌe hap ete. Katupono tuut irane Aikaꞌiwat uwe waku uwe yt naku i rakaria hap enoi hamo ihãite rakaria kape iꞌewyte map haria kape.
2 Yt etoiat reiꞌo ihay moherep hap. Waĩ ere o miitꞌin minug saꞌag koꞌi ete. Yt eweipun neiꞌo ehepiat imohey hap ere o wuatꞌi pe. Eiwepiit ro ere o epotmuꞌeria pe. Yt kat i iꞌatumopyꞌahak hap wywo maꞌato hepama perupꞌi wo etiꞌatuekyi kahato ro emienoi wo Tupana kape katupono tuut irane wuatꞌi Porekuat no emienoi wo.
3 Pywo ti aru meiũran aimimuꞌeria yt tikyꞌesat i kahato taꞌatumuꞌe hãpyk takatnuat hap. Miꞌi haype ti aru -Waĩꞌiꞌatuꞌe yt he i iꞌatuꞌe yt watuwanetup teran i mio tã e hap kape iꞌatuꞌe aimuꞌe ihãite rakat etiat hap ete. Miꞌi hawyi ti aru taꞌatumikyꞌesat ewywuat taꞌatumuꞌe haria taꞌatukat.
4 Iꞌatuewaure kaꞌa yt kat i raꞌyn sehay pywuat kape. Taꞌatukyꞌesat yt taꞌatuweꞌeg i hap haype.
5 Maꞌato en Timoteu eweꞌeg wo o mio tã iꞌatuꞌe hap kai. Yt eremoehamanaꞌi teiꞌo maꞌato Tupana ehay pywuat sese po pe ereineꞌen o. Epiat hoꞌopot pykai yt ewẽpohep teiꞌo. Maꞌato en worokyꞌesat wuatꞌi puat Tupana ehay wakuat sytpok hamo. Etimoehãite yne o epotpap Tupana miium epiat uhaꞌyru.
Waku Surara Ewy Watoineꞌen Tupana Motpap Hap Ete
6 Aikotã aihũ watiꞌauka Tupana motypot hamo hap ewy uito porap putꞌok e raꞌyn uikuꞌuro hap Tupana motypot hamuat hap paĩ.
7 Surara wakuat ewy uipotpap uiꞌakag Iesui mikyꞌesat ete. Seput hap etiat poꞌog ihyha rakat ewy areineꞌen. Iraniaꞌin taꞌatukuꞌuro hap pupi teꞌerokenꞌẽ kahato i maꞌato uito yt miꞌi hat i. Iraniaꞌin aipok haria neꞌi maꞌato uito putꞌok are aheput hap ete. Miꞌi hap ewy areineꞌen imohey hap mywo.
8 Karãpe wateput turan seput hat akag toꞌe -En poꞌog ihyha rakat e wuatꞌi ehamo. Miꞌi hap ewy ti meiũran Aiꞌakag Iesui toꞌe irane uhepe -En ni wakuat kahato Tupana wanetup hawe e irane uhepe maꞌato yt uhepe yn i maꞌato iꞌewyte uwe uwe tokyꞌe haria pe torannia -Atiꞌatukyꞌesat Iesui taꞌaipok i e haria pe.
9 Timoteu atikyꞌesat kahato eriot uhowowi. Miꞌi tupono yne esaika hap mywo eriot meikowo uhaꞌyru.
10 Katupono aiwy Tema uiꞌatoiat raꞌyn. Kat pote tekat poꞌog kyꞌesat Tupana kawiat haype. Miꞌi pote tawa Tesaronika kape toto. Aiwy Kesente toto yi Karasia kape. Titu ti toto raꞌyn tawa Taumasia kape miꞌi tupono waku eriot meikowo.
11 Maꞌato aiwy Iruka yn ti topyhuꞌat uiwywo. Timoteu atikyꞌesat etikat o aiwy Maku miꞌi hawyi eterut ewywo eꞌuut turan katupono miꞌi waku raꞌyn aipowyro aipotpap etiat hamo.
12 Uhyt Tikiku ti atipoꞌoro tawa Ewesu kape.
13 Timoteu atoiat uhekamisa wato uipysop uhyt Kapu yat pe tawa Turate piat. Miꞌi atikyꞌesat eterut hap eꞌuut tuwywo. Iꞌewyte miwan koꞌi itote tukupteꞌen. Miꞌi iꞌewyte eterut o wy. Atikyꞌesat poꞌog ipe totiat miwan.
14 Uhyt Aresãtere yne imehit rakat tupanaria iãꞌãkap koꞌi nug hat etiat uimaꞌat kahato hat. Uimosoꞌopot kahato miꞌi. Taꞌi haiwot kahato aipotmuꞌe hap ete. Toimoma teran uipotmuꞌe hap.
15 Pyno eweꞌeg wo o ipupi. Waku wahẽtup Tupana kape -Etipoepyk to Aresãtere iminug saꞌag oktan urumaꞌat hap oktan haꞌup iminug saꞌag waku watoꞌe Tupana pe.
16 Miꞌi hap eꞌat pe yt iꞌatuwese hin i uhemiitꞌin ran koꞌi. Yt uipowyro i haype. Yt naku i atipuẽti sehay wuat haria uhemiitꞌin uiꞌatoiat yne. Miꞌi hawyi uiꞌatoiat uiwyriaꞌin wanikaptia pyꞌasetpe uito waku sio yt e hamo. -Tupana waure wo ereineꞌen uiwyriaꞌin uiꞌatoiat haria kai are Tupana pe.
17 Uiꞌatoiat maꞌato Aikaꞌiwat yt uiꞌatoiat hin i. Tutum uhepe tesaika hap tehay wakuat enoi hamuat. Taꞌi Tupana uhehakyeraꞌat uiꞌauka tet pupi aikotã aihũ watikawiatno awyato pupi hap ewy.
18 Taꞌi Aikaꞌiwat uheroꞌok kuap kahato uiꞌauka teran haria po pyi uimaꞌat teran haria tok pyi. Miꞌi hawyi uiꞌãuka iꞌatu pupi. Tetama atipy piat pe uhereto. -Arehum aat kaꞌap ewowi Tupana. Ekahu kahato En are aru wuatꞌi eꞌat pe. Taꞌi miꞌi tã wyti pyno.
Kuekatu Toipoꞌoro Iesui Mohey Haria Pe
19 Uhekuekatu atipoꞌoro mehin Akira kape iharyꞌi Pisira kape. Iꞌewyte kuekatu mehin Onesiwuru pe torannia iꞌyatypiaria kape.
20 Uhyt Eratu topyhuꞌat tawa Kurintiu pe. Aiwy Towimu atimopyhuꞌat tawa Miretu pe kat pote iꞌahuu pote.
21 Atikyꞌesat eriot mesup uhowowi Timoteu iꞌaman mot ewakai te. Eꞌykeꞌetꞌin Iesui mohey haria Eupuru Putenti Irinu iꞌewyte mana Kautia iꞌewyte torannia meiũpiaria Iesui mohey haria kuekatu iꞌatuꞌe ewowi.
22 Atikyꞌesat ihãite kahato ehepiat imohey hap. Miꞌi hap ahẽtup Tupana pe -Etum o Timoteu pe egyiꞌat hap are ti Tupana pe.
