Myẽꞌym Muat Iuwãu 1:1-14
1 Pyno uito ti Iuwãu Iesui potmuꞌe sese Uito. Iꞌewyte imikyꞌe kahato uito. Waku kahato ti en mehin Kaiu. Miꞌi pote atipoꞌoro mesup uimiwan ewowi worokyꞌe kahato haype.
2 Uhekatuwy sese en. Miꞌi pote ahẽtup kahato Tupana pe ewowi -Etipoityro kahato uiwy Kaiu are. Atikyꞌesat kahato ipiit ihãite hap aikotã ihãite topyꞌa pe Tupana wywo hap ewy are Tupana pe.
3 Gaꞌatpo putꞌok iꞌatuꞌe meiũpe aiwyriaꞌin Iesui mohey haria. Miꞌi hawyi taꞌatuhenoi sehay etiat aikotã Tupana ehay pywuat upi ereineꞌen motꞌi imohey hap ete hap etiat taꞌatuhenoi. Miꞌi hap atikuap hawyi uimowepiit kahato en.
4 Karapeĩ uimepytꞌin tukupteꞌen pywuat sehay upi hap uimowepiit kahato. Mesuwarotiat yt kat i poꞌog uimowepiit hap miꞌi kai. Atikuap uimepytꞌin hãpyk kahato tukupteꞌen hawyi uimowepiit hap sese toineꞌen.
5 Uiwy kahato en Kaiu. Waku ti ereineꞌen motꞌi Tupana potpap we. Iesui mohey haria eropat kahato hat en ereineꞌen. Iꞌewyte Iesui mohey hat yt emikuap koꞌi i eropat kahato hat en.
6 Miꞌi pote Iesui mohey haria meiũpe taꞌatuhenoi kahato toꞌope toꞌope aikotã ereineꞌen hap. -Woꞌopotkyꞌe hat toineꞌen itote iꞌatuꞌe toꞌope toꞌope. Miꞌiria tuwat Iesui etiat enoi miitꞌin miat hamo wẽtup tawa piaria atumuꞌe hamo sakpuaria muꞌe hamo tuwat aru. Waku o eweiꞌatupowyro o miꞌiria iꞌatupotpap ete. Eweiꞌatupowyro o iꞌatupuꞌap saꞌup ete Tupana motypot hamo Tupana mikyꞌesat nug hamo are.
7 Tuwat raꞌyn miꞌiria yt kat haꞌup wywo i. Iꞌewyte yt taꞌatukyꞌesat i saꞌup iraniaꞌin kaipyi yt Iesui mohey i haria kaipyi katupono Aipotypot eropat haria miꞌiria pote. Miꞌi pote taꞌatukyꞌesat Iesui kaipyi yn iꞌatupuꞌap saꞌup. Tuwat raꞌyn yt kat saꞌup wywo i Aikaꞌiwat potpap nug hamo.
8 Aito ti Aipotypot emiit miꞌi pote waku watiꞌatupowyro hemiitꞌin Aikaꞌiwat ehay sytpok haria. Miꞌiria watiꞌatupowyro pote meiũran Aikaꞌiwat tum ahepe iꞌatuwat iꞌatusaꞌup oktan tutum ahepe are. Katupono miꞌiria tuwat sehay pywuat sytpok hamo tuwat.
Teotewe Toineꞌen Uimiwan Akit Hatno
9 Saꞌawyꞌi atiwan uhehay Iesui mohey haria kape tawa piaria kape maꞌato itote uhyt Teotewe toineꞌen uhehay akit hat. -Yt watuwewaure kaꞌa teiꞌo Iuwãu piat ainapin hap kape e hat. Waku poꞌog uhehay kape eweiwanetup e hat toineꞌen itote. Katupono toikyꞌesat kahato tuwenug iꞌatuꞌakag wo. Miꞌi pote toipun uimiwan. Miꞌi pote areto ewowi hawyi ahenoi iminug saꞌag ehepe.
10 Putꞌok are itote hawyi atiꞌapiheg miꞌi. Ahenoi aru iminug saꞌag koꞌi. Ahenoi aru iꞌe hap heso hap koꞌi katupono ihay aat kahato ahete yt pywo piat sehay i. Yt naku i kahato miꞌi. Toipyhyp Tupana Mipoꞌoro tehay sytpok hanuaria. Yt karãpe i -Ereke e Tupana ehay sytpok haria pe. Yt iwese hin i Iesui mohey haria ete. Yt toikyꞌesat i Iesui mohey haria eke toꞌyat piat hap. Yt toikyꞌesat i aimipoꞌororia toꞌyat piat hap. Iꞌewyte yt toikyꞌesat i aimipoꞌororia eke Iesui mohey haria yat piat hap. Waĩꞌe iꞌatupuꞌap tote. Miꞌi hawyi karãpe aimipoꞌororia tuwehytꞌok Tupana motypot yat pe hawyi tohytpok hytpok neꞌi. Yt iweꞌeg hin i. Miꞌi pote areto iꞌapiheg hamo.
11 Uiwy are yt ereineꞌen teiꞌo miꞌi ewy neꞌi. Kat pote miꞌi saꞌag nug hat kahato are.
12 Atikyꞌesat en wakuat nug hatno ereineꞌen katupono wakuat nug hatno yn Tupana watnuat. Uwe uwe inug saꞌag miꞌi hat yt Tupana kuap i hat sese. Yt karãpe i Tupana toineꞌen ipyꞌa pe. Maꞌato toineꞌen wẽtup ok eipyꞌasetpe Temetiu e hap het rakat yne Iesui mohey haria mimotypot. Miꞌi wyti pywuat sehay iãꞌãkap yne pywuat sehay enoi haria mimotypot miꞌi. Iꞌewyte uimimotypot miꞌi. Uruimotypot kahato miꞌi are.
13 Ahenoi teran poꞌog poꞌog epe mehin Kaiu maꞌato yt atunug neran hin i popera tote.
14 (14-15) Miꞌi pote areto irane meremo ewowi. Uhehay teran ewywo haype. -Tupana etum o uiwy Kaiu pe iwepiit hap are Tupana pe. 15 Pyno yne meiũpiaria tipoꞌoro kuekatu e hap ewowi. Iꞌewyte uruipoꞌoro kuekatu e hap koꞌi ehewowi uruwyriaꞌin itotiaria kape uruipoꞌoro uruepiat iꞌatukyꞌe haype. Pyno wuatꞌi aiwyriaꞌin me atipoꞌoro uhehay -Worohoꞌokyꞌe kahato e hap atipoꞌoro are.
