Iesui Potmuꞌeria 10:1-48
10 Mekewat eꞌat pe toineꞌen tawa Sesareia pe wẽtup ok suraraꞌin akag Kuneriu e hap het rakat. Typyꞌi kahato iwat hesuraraꞌin. Mekewat Itaria ywania esuraraꞌin akag wo toineꞌen tawa Sesareia pe.
2 Surara koro Kuneriu ti waku nug kahato hat toineꞌen iꞌewyte topyꞌa pywiat Tupana mohey hat sese toineꞌen. Yne iꞌyat piaria imepytꞌin iharyꞌi Tupana mohey haria tukupteꞌen itote. Surara Kuneriu timoꞌẽ kahato tekat koꞌi Iuteu ywania ihakyꞌeꞌi rakaria pe. Ihay kahato aat kaꞌap Tupana wywo topyꞌa pyi miꞌi miit.
3 Wẽtup eꞌat pe surara Kuneriu topotpap kahu raꞌyn hawyi wãtymꞌi kape taꞌakasa raꞌyn tomuꞌetu Tupana mipoꞌoro atipy kaipywiat hap kape. Miꞌi hawyi atipy kaipywiat suut hat toꞌe -Surara Kuneriu ereineꞌen apo e.
4 Miꞌi pote Kuneriu gytꞌe hawyi tehaꞌat kahato raꞌyn Tupana mipoꞌoro atipy kaipywiat kape hawyi toiwesat -Areineꞌen meiũpe Uikaꞌiwat e. Kat e hap som Tupana tikyꞌesat atunug hap e. Miꞌi pote mekewat atipy kaipywiat tiwesat -Mehin e pywo ti rat ehay tewowiat hap kape ti Tupana tuwehum kahato e. Iꞌewyte emimoꞌẽ ihakyꞌeꞌi rakaria powyro hap koꞌi Tupana mowepiit kahato hap topyhuꞌat mehin e. Tuwehum kahato tomotypot hap eminug koꞌi ete mehin e.
5 Miꞌi tupono toikyꞌesat etipoꞌoro epotpoꞌororia tawa Iope kape hap e. Miꞌi totepyi toikyꞌesat etiꞌatukay kay temiitꞌin Simau Peteru ewowi mehin e.
6 Hemiit Peteru ti toineꞌen wẽtup ok Simau yat pe yꞌy Ukyt Koro hy ẽpekiat ieineꞌen hat yat pe e. Miat pe mokãꞌã nug hat yat pe toineꞌen mekewat yꞌy wato ẽpekiat tote e. Pyno etikay kay ro mekewat Peteru ewewowi mehin emuꞌe hamo katupono Tupana tikyꞌesat etunug hap e atipy piat surara akag Kuneriu pe.
7 Mio tã toꞌe hawyi taꞌaipok i raꞌyn atipy kape. Miꞌi hawyi surara akag Kuneriu tikay kay tuwewawi typy ok temiitꞌin sese iꞌewyte temiit sese surara kawiat Tupana mohey kahato hat toikay kay.
8 Toiꞌatukay kay tuwewawi temiitꞌin sese myẽꞌym ok hawyi toimoherep tomuꞌetu wuat iꞌatuepe. Miꞌi hawyi -Pyno mukiꞌite worohoꞌopoꞌoro tawa Iope kape mekewat Peteru kat hamo e iꞌatuepe.
Peteru Muꞌetu Hap Etiat
9 Ihatꞌok hawyi tuwat raꞌyn Peteru kat hamo. Atposake porap turan putꞌok iꞌatuꞌe raꞌyn mekewat yꞌy wato ẽpekiat yt pya hin i mekewat Simau yat ete. Miꞌi turan Peteru taꞌam naꞌyn getap akipy ywaiti rakat rote Tupana wywuat tehay hamo e.
10 Miꞌi tote hesyꞌat kahato Peteru tomiꞌu nug Simau miat turan. Miꞌi hawyi tomuꞌetu wuat ewy taꞌakasa. Miꞌi turan tehaꞌat atipy kape.
11 Miꞌi hawyi taꞌakasa ikaꞌa atipy pe okenꞌypy ewywuat. Miꞌi puo mysop iwato rakat ikytsig nakat ewywuat taꞌakasa ikaꞌa pyi taꞌapyk yi kape hap taꞌakasa 4 haity iꞌapy etiat rakat taꞌakasa.
12 Miꞌi mysop kytsig muo Peteru taꞌakasa kat koꞌi kat koꞌi miꞌu puꞌi koꞌi yt naku i toꞌywania miꞌu wuat rakat kape taꞌakasa. Moĩ koꞌi uruwu koꞌi gaꞌapy piat ipyt etiat hewyry rakat koꞌi yt naku i Iuteuria miꞌu wuat rakat koꞌi kape taꞌakasa tomuꞌetu.
13 Iꞌewyte toikuap sehay atipy kaipyi -Peteru e epoĩꞌam no hawyi etiꞌatuꞌuka ro meimewat miꞌu emiꞌu wo mehin e. Ehuꞌu ro uimiium emiꞌu wuat miꞌu puꞌi e.
14 Maꞌato Peteru tiwesat -Yt naku i rat miꞌi ewywuat uimiꞌu puꞌi Uikaꞌiwat e katupono meimewat ipuꞌi yt naku i aimiꞌu wo aito Iuteuria ywania pote Mehin e. Taꞌi uimotag hap upi mesup te yt karãpe i miꞌi tã meimewat miꞌu puꞌi ewywuat atuꞌu paĩ Uhyt e. Yt naku i miꞌi aimiꞌu wo e.
15 Miꞌi hawyi toikuap pakup i sehay atipy kaipywiat -Waĩ mio tã ere teiꞌo e katupono kat koꞌi kat koꞌi puꞌi Tupana tiꞌatumowaku kahato miꞌi pote waku kahato yne aimiꞌu wo e.
16 Myẽꞌym mo taꞌakasa tomuꞌetu wuat ewywuat hawyi taꞌaipok i raꞌyn mekewat sokpe kawiat miat eiam.
Peteruꞌin Putꞌok Iꞌatuꞌe Tawa Seserua Pe
17 Miꞌi hawyi Peteru tuwanetup kahato -Kat e hap som Tupana toꞌe teran uimuꞌetu e. Kat koꞌi som toimoherep teran uhepe e tuwepe tuwanetup kahato hawe. Miꞌi turan surara Kuneriu miꞌatupoꞌororia wẽtup ywania putꞌok iꞌatuꞌe raꞌyn itote. Maꞌato miꞌi ywania wywo yt karãpe i Iuteuria iꞌatuehay.
18 Miꞌiria okenꞌypyke pyi teꞌeruwatka -Simau Peteru toineꞌen apo meiũpe iꞌatuꞌe.
19 Miꞌi turan Peteru tuwanetup tumuꞌetu wuat kape hawyi Tupana Paꞌãu toꞌe tope
20 -Pyno ereto ro iꞌatuewowi e. Yt erekenꞌẽ teiꞌo iꞌatupupi katupono uimipoꞌororia yne meimuẽwuaria e Tupana Peteru pe.
21 Miꞌi hawyi Peteru taꞌapyk getap akipy ywaitiat kaipyi yi kape. Miꞌi hawyi toꞌe iꞌatuepe -Uito ti meiũ eimikat e. Kat hamo uikat eipe e iꞌatuepe.
22 Miꞌi hawyi taꞌatuwesat -Taꞌi urukaꞌiwat Kuneriu urupoꞌoro ewowi uhyt iꞌatuꞌe. Urukaꞌiwat ti 100 ok surara akag wo ieineꞌen hat urupoꞌoro mehin iꞌatuꞌe. Iꞌewyte uruꞌakag ni Tupana mohey kahato hat toineꞌen iꞌatuꞌe. Toimotypot Etupana yn iꞌatuꞌe. Waku kahato urupoꞌoro hat. Hãpyk yn nug wuatꞌi eꞌat piat hat uhyt iꞌatuꞌe. Yne eꞌywania Iuteuria uruetawa totiaria ikuap urukaꞌiwat Kuneriu ewaku hap iꞌatuꞌe. Gaꞌatpo ti Tupana Paꞌãu Wakuat ihay kahato urukaꞌiwat pe -Etikay kay ro uhemiit Peteru eꞌyat kape enapin hamo e uruꞌakag Kuneriu pe iꞌatuꞌe. Miꞌi pote mesup ti urupoꞌoro ewowi toikyꞌesat ereto tewowiat hap mehin iꞌatuꞌe Peteru pe.
23 -Pyno meiũpe ro ehewãtym hawyi mukiꞌite waku watuwat eikaꞌiwat yat kape e. Pyno eiwehytꞌok to uhytꞌiꞌin e Peteru meimuẽwat tawa Iope pe. Ihatꞌok hawyi toto raꞌyn Peteru iꞌatuupi iꞌewyte Iesui potmuꞌeria tawa Iope piaria iraniaꞌin tuwat Peteru upi.
24 Wẽtup eꞌat pe tuwat hawyi putꞌok iꞌatuꞌe raꞌyn tawa Sesareia pe. Miꞌi tote mehin Kuneriu hekatup kahato raꞌyn Peteru ihay kuap hamo. Miꞌi pote toiꞌatunug yne kahato toꞌywotꞌin totyꞌin towyriaꞌin toiꞌatukay kay Peteru ehay kuap hamo toꞌyat kape.
25 Miꞌi hawyi Peteru putꞌok e Kuneriu yat eꞌokenꞌypyke hawyi meremo Kuneriu tuwepỹꞌãtutuk howa kape tepiat Peteru motypot hamo maꞌato Peteru timopoĩꞌam neꞌi.
26 Miꞌi hawyi toꞌe -Waĩ yt uimotypot teiꞌo Tupana ewy mehin kat pote uito miit kawiat eꞌewywuat e.
27 Miꞌi hawyi iꞌyat pe Peteru teke toꞌoehay toꞌoehay popuo. Miꞌi hawyi putꞌok iꞌatuꞌe raꞌyn akipy koro tote hawyi Peteru tehaꞌat hawyi iꞌatu kahato miitꞌin tukupteꞌen itote Itaria ywania.
28 Miꞌi hawyi Peteru tuwẽpowat iꞌatuewowi -Uhytꞌiꞌin manaꞌin e yt naku i wyti uruto Iuteu ywania iraniaꞌin ywania wywo toꞌoewaku iꞌatuꞌe ti urueko enoi haria uruepe e. Haꞌawytepyi mio tã iꞌatuꞌe uruepe urumuꞌe haria are wen maꞌato gaꞌatpo Tupana tomoherep uhepe tehay sese miꞌi hap ete. Mio tã toꞌe -Peteru e yt etimohit reiꞌo wẽtup ywania e. Yt naku i eiꞌywania yt ere teiꞌo iraniaꞌin ywania pe e uhepe e. Yt Tupana miꞌairoria eiꞌywania yt ere teiꞌo wẽtup ywania pe e Tupana uhepe e.
29 Miꞌi tupono ti ariot meremo ehewowi mesup eimikyꞌesat ewy e. -Yt naku i areto eiꞌyat kape yt areꞌe hin i uikay kay haria pe e. Yt urueko ewy i pykai ariot raꞌyn mehinꞌin manaꞌin e. Maꞌato kat hamo uikay kay hap yt atikuap hin i te e. Pyno ewehenoi ro kan hamo uikay kay meikowo hap e Peteru surara Kuneriu ywania pe.
30 Miꞌi hawyi Kuneriu tiwesat -Mehin Peteru e gaꞌatpuo rẽ gaꞌatpo wãtymꞌi uhehay Tupana wywo meiũpe uiꞌyat pe turan araꞌakasa wẽtup ok miit hesokpe mehit kahato rakat kape e.
31 Miꞌi miit toꞌe uhepe atipy kaipyi -Kuneriu e Tupana tikuap kahato raꞌyn ehay tewowiat hap e. Taꞌi Tupana tikuap taꞌyn ihakyꞌeꞌi rakaria piat ekareꞌen moꞌẽ hap mehin e.
32 Miꞌi pote waku etipoꞌoro emiitꞌin tawa Iope kape Tupana emiit Simau Peteru kat hamo e. Miꞌi miit toineꞌen wẽtup ok Simau yꞌy wato hy ẽpekiat ieineꞌen hat miat pe mokãꞌã hap nug hat yat pe e ti uhepe atipy kaipywiat e.
33 Miꞌi hawyi meremo worokay kay uruewawi Tupana mikyꞌesat ewy e. Pywo ti rat waku kahato eriot hap mehin e. Miꞌi pote ti urutuwaꞌatunug kahato meiũpe mesup ehay kuap hamo mehin e. Iꞌewyte ti uruikuap taꞌyn Tupana toineꞌen meiũpe hap e. Miꞌi pote ehenoi ro uruepe aikotã som yne yne imikyꞌesat ewywuat hap e surara Kuneriu Peteru pe.
34 Miꞌi hawyi Peteru toꞌe tehay wo -Mehinꞌin manaꞌin e mesup ti atikuap sese raꞌyn Tupana wuatꞌi ywania kyꞌe hat koro toineꞌen hap e. Taꞌi toiꞌatukyꞌe wuatꞌi miitꞌin paĩ e. Saꞌawyꞌi uruto Iuteu ywania Tupana mikyꞌe koꞌi tukupteꞌen hap kape yn arewanetup e maꞌato koitywy atikuap taꞌyn aikotã toꞌoꞌewyꞌewy toiꞌatukyꞌe wuatꞌi pusu kuap haria topyꞌa pe urukyꞌe hap oktan ne hap atikuap taꞌyn e Peteru surara Kuneriu Itaria ywania pe.
35 Taꞌi Tupana tuwehum kahato yne tama kaipywiaria tomohey haria ete. Wakuap nug haria ete tuwehum hap atikuap taꞌyn e.
36 Mesup taꞌyn Tupana tipoꞌoro raꞌyn uruꞌywania pe temiit Iesui wuatꞌi ywania ehakyeraꞌat hanuat e Peteru. Koitywy ti Tupana Mipoꞌoro topyhuꞌat aipuꞌap Tupana kapiat hat e. Mesup mio tã e Tupana wuatꞌi pe -Koitywy waku raꞌyn eweiõꞌẽ uhowowi katupono Uhaꞌyru Iesui tunug naꞌyn aiwoꞌopiat woꞌowese hap e. Taꞌi mesup ti aiwoꞌoewaku hap tutunug naꞌyn e. Saꞌawyꞌi te ti uruepe Isareu ywania pe yn mio tã e maꞌato mesup wuatꞌi ywania pe mio tã e -Uhemiit Iesui ti atunug naꞌyn Wuatꞌi Porekuaria Porekuat no e Tupana wuatꞌi pusu kuap haria pe e Peteru.
37 Taꞌi eweikuap taꞌyn ni yne Iesui tawa Nasare piat ieineꞌen hat etiat e katupono saꞌawyꞌi yne tawa Iuteu kaipywiaria henoi kahato raꞌyn heineꞌen i hap ehepe e. Saꞌawyꞌi ahetꞌok hat Iuwãu hetꞌok Iesui. Miꞌi hawyi Iesui haꞌawynug naꞌyn topotpap hap uruetama Karireia pe e. Miꞌi hap etiat yne eweikuap taꞌyn e.
38 Miꞌi tote saꞌawyꞌi Tupana tum naꞌyn yne tesaika hap. -En ni Uimiꞌairo miitꞌin yne Ehakyeraꞌat hanuat e. Miꞌi pote woromoieineꞌen Uipaꞌãu Wakuat no e Tupana saꞌawyꞌi Iesui tawa Nasare piat pe e. Miꞌi hawyi hewyry kahato urumuꞌe hamo urumoehãite hamo uruwoꞌoewaku hamo wakuap yn nug hamo ahiagnia yne atusiu hamo katupono Tupana Paꞌãu Wakuat toineꞌen iwywo uhytꞌiꞌin manaꞌin e Peteru.
39 Iesui tawa Nasare kaipywiat kape ti urutaꞌakasa kahato raꞌyn manaꞌin uhytꞌiꞌin e. Pywo ti Miꞌi Miit ehay yne ti uruikuap taꞌyn yi Iuteu piaria etama pe tawa Ierusarẽi me hewyry hap upi e. Miꞌi tote ti taꞌatuꞌauka saꞌag naꞌyn ariaꞌyp posak ete Tupana emiit e. Yt naku i kahato ti taꞌatunug uruwy pe e.
40 Maꞌato miitꞌin miꞌauka Tupana tomopoĩꞌam i raꞌyn guꞌuro pyi paĩ e. Taꞌi myẽꞌym eꞌat toineꞌen guꞌuro piat hawyi tuwẽtem i raꞌyn Haꞌyru e. Taꞌi heremo kahato paĩ are katupono tuwẽtem guꞌuro pyi hawyi ti ipiit sese kape araꞌakasa yne uito e Peteru.
41 Miꞌi Miit Iesui tuwemoherep uruepe e. Urutaꞌakasa raꞌyn urutoria yne imiꞌairo koꞌi sese. Ipiit saꞌawyꞌi wuat ihãite kahato i raꞌyn e. Maꞌato ti iraniaꞌin yt imohey i haria pe yt tuwemoherep i e. Miꞌi pote yt yne i miitꞌin teꞌeraꞌakasa Iesui tuwẽtem hawyi maꞌato uruto ipotmuꞌeria sese urutaꞌakasa kahato Iesui piit sese kape e. Urutenuk taꞌyn iwywo paĩ. Urutuwesapoꞌu raꞌyn iwywo toineꞌen i raꞌyn hawyi paĩ e Peteru.
42 Manaꞌin mehinꞌin mio tã e Tupana ahepe mesup -Koitywy atimopyhuꞌat Uhaꞌyru wuatꞌi miitꞌin eropoꞌok hanuat e. Uhaꞌyru ewaku hap yn putꞌok e uwe waku uwe yt e hap enoi uhepiat hamo e. Uhaꞌyru yn waku wuatꞌi ywania patꞌok patꞌok hamo sio uhemiit sese sio yt e hamo e. Katupono meiũran map haria iꞌewyte ihãite rakaria teꞌeropyhuꞌat Uhaꞌyru po puo irane uimohey haria sese sio yt hap enoi hamo e Tupana e Peteru. Koitywy Tupana urupoꞌoro ehewowi mehinꞌin manaꞌin katupono toikuap teran eipe Tosaꞌyru mohey haria wo sio yt hap. Miꞌi haype Tupana urupoꞌoro Tosaꞌyru moherep uruehay wuat hamo ehewowi wẽtup ywania pe e Peteru.
43 Miꞌi pote yne tomohey haria minug saꞌag koꞌi toipuruk kuap taꞌyn aikotã saꞌawyꞌi wuaria Tupana ehay enoi haria mienoi ewy -Atipoꞌoro aru Iesui Wuatꞌi Ywania Ehakyeraꞌat hanuat iꞌatuꞌe hap ewy e Kuneriuꞌin me.
Tupana Paꞌãu Putꞌok E Kuneriu Emiitꞌin Ete
44 Mio tã e Peteru turan Tupana Paꞌãu Wakuat putꞌok e raꞌyn ikuap haria pe.
45 Miꞌi hawyi ipotmuꞌeria Peteru wywo hewyry rakaria Iuteu ywania teꞌeruwanetup kahato hawyi -Pywo ti rat Tupana tum naꞌyn Topaꞌãu Wakuat surara Kuneriu ywania pe yt uruꞌywania hin i miꞌiria pykai iꞌatuꞌe teꞌeruwanetup hawe.
46 Tupana Paꞌãu Wakuat teke hawyi iꞌatuehay wẽtup pusu puo. Wẽtup pusu puo raꞌyn Tupana Paꞌãu Wakuat kaipyi iꞌatuehay itotiaria. Miꞌi hawyi itotiaria timotypot kahato raꞌyn Tupana.
47 Miꞌi hawyi Peteru toꞌe toꞌywania Iuteuria pe -Eweiꞌakasa ro aikotã mesup Tupana tum naꞌyn Topaꞌãu Wakuat Itaria ywania piat hap e aikotã tutum ahepe saꞌawyꞌi wuat hap ewy mehinꞌin manaꞌin e. Miꞌi tupono apo waku watiꞌatusetꞌok miꞌiria yꞌy wo sio yt e Peteru toꞌywania pe. Miꞌi hawyi -Waku iꞌatuꞌe.
48 Miꞌi pote Peteru toꞌe surara Kuneriuꞌin me -Mesup taꞌyn waku worohoꞌosetꞌok Iesui set no uhytꞌiꞌin manaꞌin e Peteru. Miꞌi hawyi toiꞌatusetꞌok Iesui mohey haria. Miꞌi hawyi iꞌatuꞌe Peteru pe -Eropyhuꞌat ro meiũpe uruwywo mehin mimi iꞌatuꞌe. Miꞌi hawyi Peteru toineꞌen porapꞌi itote wẽtup ywania wywo.
