Iesui Potmuꞌeria 11:1-30
11 Miꞌi hawyi iraniaꞌin 12 ok takaria tikuap taꞌyn aikotã wẽtup ywania timohey Tupana ehay Peteru wẽ pywiat hap. Miꞌi hawyi meremo yne yi Iuteu piaria Iesui mohey haria -Pywo ti rat mesup taꞌyn iraniaꞌin ywania Tupana ehay taꞌatukuap hawyi Tupana mohey haria teꞌeropyhuꞌat iꞌatuꞌe.
2 Miꞌi hawyi taꞌaipok Peteru tawa Ierusarẽi kape yi Sesareia kaipyi hawyi iraniaꞌin Iesui mohey haria Iuteu ywaniaria sese iꞌatupyꞌahak Peteru ete katupono toiꞌatumuꞌe raꞌyn iraniaꞌin ywania pote.
3 Putꞌok e Peteru hawyi taꞌatuewaĩ kahato -Kat pote som ewyry iraniaꞌin ywania wywo uhyt iꞌatuꞌe. Iꞌewyte kat hamo erenuk wẽtup ywania wywo uhyt iꞌatuꞌe Peteru pe.
4 Miꞌi hawyi Peteru henoi kahato tewyry yne raꞌyn hap iꞌatuepe.
5 Mio tã e toiꞌatuwesat -Uhytꞌiꞌin manaꞌin waku kahato Tupana katupono tawa Iope pe toimoherep uhepe tehay. Gaꞌatpo areineꞌen tawa Iope piat turan areto uhehay Tupana wywuat hamo e. Miꞌi hawyi itote herewe kahato araꞌakasa uimuꞌetu atipy kaipywiat sokpe iwato rakat kawiat heiam 4 haity hẽpe etiat rakat. Miꞌi taꞌapyk uhowowi atipy kaipyi saity koꞌi upi. Miꞌi hap kape araꞌakasa uimuꞌetu.
6 Miꞌi hawyi arahaꞌat hawyi araꞌakasa mekewat mysop puo miat topyyt wuat hewyry rakat koꞌi. Miꞌi koꞌi yt naku i yne aimiꞌu wo aito Iuteu ywania pote. Miꞌi hap koꞌi kape araꞌakasa. Arahaꞌat hawyi itote moĩ koꞌi iꞌewyte weita koꞌi hawyi uruwu koꞌi yt naku i aimiꞌu wuat rakat koꞌi kape araꞌakasa.
7 Miꞌi hawyi atikuap sehay -Peteru e epoĩꞌam no hawyi etiꞌatuꞌuka ro emiꞌu wo uimiium koꞌi hawyi etuꞌu ro e.
8 Miꞌi hawyi atiwesat -Uikaꞌiwat yt naku i atuꞌu miꞌi koꞌi are katupono yt naku i watuꞌu miꞌi aito Iuteu ywania pote e. Yt atikyꞌesat hin i miꞌu puꞌi meimuẽwat koꞌi Uikaꞌiwat are itote uimuꞌetu. Taꞌi yt karãpe i miꞌu puꞌi yt naku i rakat miꞌi atopag uiwẽ pe are uimuꞌetu e Peteru.
9 Miꞌi hawyi toꞌe i uhepe ywaiti pyi sehay -Waku emiꞌu wo e Tupana epe pote waku etuꞌu mehin e uhepe e. Yt miꞌu i yt ere teiꞌo Tupana mimowaku koꞌi kape e katupono toiꞌatumowaku raꞌyn meimuẽwat koꞌi e.
10 Miꞌi ewywuat ti araꞌakasa myẽꞌym mo herewe uimuꞌetu hawyi teꞌeraꞌaipok i raꞌyn miat saꞌag koꞌi yt aiꞌywania miꞌu ewy hin i koꞌi e.
11 Uimuꞌetu tokosap hawyi meremo araꞌakasa myẽꞌym ok miit kape okenꞌypy tote putꞌok iꞌatuꞌe Simau yat pe yi Sesareia kaipywiaria surara akag Kuneriu miꞌatupoꞌoro koꞌi uhowowi e.
12 Miꞌi hawyi Tupana Paꞌãu toꞌe uhepe uipyꞌa pe -Ereto ro iꞌatuwywo Peteru e. Yt erekenꞌẽ teiꞌo iꞌatupupi e. Yt ereꞌe teiꞌo epyꞌa pe -Yt naku i areto wẽtup ywania wywo yt ere teiꞌo. Miꞌi hawyi areto mekewat wẽtup ywania wywo. Iꞌewyte Iesui mohey haria itotiaria tipoꞌoro 6 ok aiꞌywania uheꞌywytꞌin uhupi. Miꞌi hawyi meiũran putꞌok urutoꞌe tawa Sesareia pe e Peteru.
13 Miꞌi hawyi Kuneriu henoi raꞌyn aikotã atipy kaipywiat henoi tepiat hap -Etikay kay ro tawa Iope piat Simau Peteru e hap.
14 Miꞌi ti aru henoi ehepe Ehehakyeraꞌat hat etiat iꞌewyte emepytꞌin me hawyi eꞌyat piaria pe tohenoi Ehehakyeraꞌat hanuat etiat e Kuneriu uhepe atipy kaipywiat henoi tepiat hap etiat.
15 Miꞌi hawyi itote atiꞌatumuꞌe surara Kuneriu ywania turan Tupana Paꞌãu putꞌok e kahato iꞌatuewowi hawyi teke iꞌatupiit puo iꞌatupyꞌa puo aikotã saꞌawyꞌi ahowawi putꞌok e hap ewy aikotã saꞌawyꞌi wuat aito Iuteuria kapiat hap ewy putꞌok e toꞌewy Tupana Paꞌãu meimuẽwat wẽtup ywania puo e.
16 Miꞌi hawyi miꞌi hap kape araꞌakasa hawyi atikuap meremo Aikaꞌiwat Iesui mienoi saꞌawyꞌi wuat aikotã hap e mio tã e -Iuwãu ni ehetꞌok yꞌy wo mesup e. Maꞌato meiũran wyti aru Tupana raꞌyn ehetꞌok Topaꞌãu Wakuat no raꞌyn e hap atikuap i raꞌyn e Peteru.
17 Aikotã aiꞌywania pe Topaꞌãu tutum hap ewy te ti miꞌiria ywania pe tutum naꞌyn Topaꞌãu Wakuat paĩ e. Taꞌatumohey raꞌyn Aiporekuat Aikaꞌiwat Iesui hawyi tutum naꞌyn Topaꞌãu iꞌatuepe e. Miꞌi tupono ti yt naku i aipyhyp neꞌi Tupana miium iꞌatuepiat e Peteru Iesui mohey haria Iuteu ywania pe.
18 Taꞌatukuap taꞌyn Peteru mienoi hawyi iꞌatupoꞌinik taꞌyn. Miꞌi hawyi teꞌeroꞌe -Waku kahato En Tupana iꞌatuꞌe katupono etum naꞌyn eieineꞌen hap wuatꞌi eꞌat piat wẽtup ywania pe iꞌatuꞌe. Yt uruepe yn i katupono wẽtup ywania iꞌewyte etiꞌatumorem naꞌyn yt naku i hap kaipyi iꞌatuꞌe Iuteu ywania Tupana pe.
19 Saꞌawyꞌi mekewat Etewãu auka hap eꞌat pe mekewat Iesui mohey haria hoꞌopot kahato hap eꞌat saꞌawyꞌi miitꞌin Iesui mohey haria teꞌeropopy kahato taꞌatuꞌatuꞌuka hap pupi. Tuwat tuwat kahato kat etawa kat etawa kape teꞌeruwesytpok kahato wuatꞌi tama kape. Iraniaꞌin tuwat yi ywypyiꞌa yꞌy wato pyꞌasetpiat Sipiri kape. Iraniaꞌin tuwat tawa Antiokia kape. Iraniaꞌin tuwat tama Wenisia kape. Putꞌok taꞌatuꞌe hawyi taꞌatuhytpok kahato sehay wakuat Iesui etiat aikope aikope tuwat tuwat hap upi wen maꞌato iraniaꞌin ywania itotiaria pe yt taꞌatuhenoi hin i. Taꞌatuꞌywania Iuteu ywania pe yn taꞌatuhenoi Iesui etiat -Yt naku i watiꞌatumuꞌe iraniaꞌin ywania iꞌatuꞌe toꞌope saꞌawyꞌi pote e.
20 Maꞌato wẽtup eꞌat pe Iesui mohey haria tawa Sirene piaria iꞌewyte yi a Sipiri totiaria tuwat kahato tawa Antiokia kape. Putꞌok iꞌatuꞌe hawyi taꞌatuhenoi raꞌyn Kereku pusu kuap haria pe -Iesui ti Tupana Mipoꞌoro Aiporekuat nuat sese iꞌatuꞌe.
21 Miꞌi hawyi Aikaꞌiwat Iesui tiꞌatupowyro kahato tuwemoherep hamuat hap ete. Miꞌi tupono ti Kereku ywania pusu kuap haria teꞌeruwemorem kahato raꞌyn Ahehakyeraꞌat hat Iesui kape. Miꞌi hawyi typyꞌi kahato raꞌyn imohey pakup i haria wẽtup ywania Kereku pusu kuap haria tukupteꞌen tawa Antiokia pe.
22 Miꞌi hawyi Ierusarẽi miaria Iesui mohey haria tikuap taꞌyn aikotã Kereku ywania i raꞌyn Iesui mohey hap. Miꞌi hawyi mehin Panape taꞌatupoꞌoro tawa Antiokia kape.
23 Putꞌok toꞌe hawyi iwepiit kahato topyhuꞌat -Taꞌi Tupana tiꞌatukyꞌe kahato mesuwat ywania aikotã toiꞌatukyꞌe uruꞌywania hap ewy kahato e Panape tuwepe -Taꞌi tutum neꞌen neꞌi Topaꞌãu mesuwat wẽtup ywania pe aikotã tutum uruꞌywania piat pe hap ewy te e toꞌywania Iuteu pe. Miꞌi hawyi toꞌe Tupana pe haty wo -Waku kahato ti rat En Tupana e. Pywo ti rat yt uwe i poꞌog hegyiꞌat rakat ekai Tupana e Panape. Miꞌi hawyi Panape topyhuꞌat potꞌi tawa Antiokia pe hawyi toiꞌatunapin kahato Iesui mohey haria ipakup takaria -Mehinꞌin manaꞌin e eweimohey ro eikuꞌuro hap kape Aipotypot Iesui eipyꞌa pe e. Yt eiwemoti teiꞌo Aikaꞌiwat ehay pupi e Kereku pusu kuap haria pe.
24 Miꞌi hawyi itotiaria iꞌatupap kahato Iesui upi. Katupono teꞌeraꞌakasa raꞌyn aikotã Tupana Paꞌãu toineꞌen kahato uhyt Panape ete hap e. Miꞌi pote -Waku kahato rakat ti aiwy Panape iꞌatuꞌe. Taꞌi toimohey kahato Iesui iꞌatuꞌe. Miꞌi pote teꞌeruwehik kahato Panape mienoi ete Iesui etiat. Taꞌi tawa Antiokia piaria ahyt timohey Iesui itote.
25 Miꞌi pote mehin Panape toto meremo raꞌyn tawa Tasu kape towy Sauru kat hamo.
26 Toipuẽti hawyi totioto towy tawa Antiokia kape miitꞌin muꞌe hamo iwywo. Miꞌi hawyi itote wẽtup iꞌaman motpe tukupteꞌen miitꞌin atumuꞌe Iesui etiat haype. Miꞌi hawyi Iesui mohey pakup i haria teꞌeruwaꞌatunug kahato itote hawyi mehin Panape mehin Sauru tiꞌatunapin kahato Iesui mienoi nug hamuat hap ete. Miꞌi hawyi tawa Antiokia piaria Iesui mohey haria tiꞌatumuꞌe kahato iraniaꞌin itotiaria -Iesui ti Tupana Mipoꞌoro sese Aipotypot nuat iꞌatuꞌe. Miꞌi pote -Taꞌi Iesui mohey haria ti Taꞌatukaꞌiwat Iesui ewywuat kahato tukupteꞌen iꞌatuꞌe tawa Antiokia piaria. Miꞌi hawyi -Pyno waku wẽtup set wywo uruiꞌatusetꞌok eipe iꞌatuꞌe. Pyno ehet pakup ti Tupana Mipoꞌoro koꞌi iꞌatuꞌe Iesui mohey haria pe.
Iesui Mohey Haria Poi Hamo
27 Miꞌi hawyi mekewat eꞌat pe tuwat tawa Antiokia kape tawa Ierusarẽi kaipyi Tupana ehay moherep haria.
28 Wẽtup ok Tupana ehay moherep hat ti mehin Akapu. Miꞌi tiꞌatumuꞌe kahato itotiaria -Pywo ti rat meiũran irane ti yt kat i hin i hamuat iꞌaman yne mesuwat yi tote toineꞌen e. Miꞌi hawyi ti aru mikoi koꞌi topap kahato hawyi yt kat hin i eimiꞌu topyhuꞌat aru e Tupana uhepe e Akapu. Miꞌi hap ewy topyhuꞌat kahato aikotã toꞌe hap ewy mekewat morekuat Kautiu topyhuꞌat morekuat pakup mo hap eꞌat pe ikahuro raꞌyn iꞌaman yne yi wato hap oktan.
29 Miꞌi pote Iesui potmuꞌeria tawa Antiokia piaria teꞌeroꞌe toꞌope -Yt naku i aiwyriaꞌin Iesui mohey haria yi Iuteu totiaria topap yne yt kat i iꞌatumiꞌu pote iꞌatuꞌe. Pyno waku watiꞌatunug kahato aheꞌuꞌi iꞌewyte ahekareꞌen koꞌi hawyi waku watimoꞌẽ ahekat Iesui mohey haria tawa Iuteu ywania ihakyꞌeꞌi poityꞌi rakaria pe iꞌatuꞌe.
30 Miꞌi hawyi taꞌatuꞌatunug naꞌyn taꞌatuekat taꞌatueꞌuꞌi hawyi taꞌatupoꞌoro raꞌyn Ierusarẽi kape. -Mehin Panape mehin Sauru waku kahato eheroto mesuwat urumiium Iesui mohey haria Ierusarẽi miaria kape katupono eiperia ti uruꞌapykok haria sese iꞌatuꞌe. Miꞌi hawyi taꞌatuꞌatupoꞌoro raꞌyn mekewat taꞌatumiium Iesui mohey haria akag koꞌi kape tawa Ierusarẽi kape yara puo mehin Panape mehin Sauru upi.
