Iesui Potmuꞌeria 13:1-52
13 Miꞌi hawyi tawa Antiokia pe tukupteꞌen Iesui mohey haria. Iꞌewyte iꞌatumuꞌe haria Tupana ehay wuat ihay rakaria tukupteꞌen. Wẽtup ok mehin Panape hawyi wẽtup ok Simeãu iꞌatuwẽpowat Tapaiunꞌã iꞌatuꞌe hap. Wẽtup Irusiu tawa Sirene kaipywiat. Wẽtup ok Manaꞌẽ morekuat Eroti ty mepyt watꞌypꞌi hawyi wẽtup ok Pauru mekewat saꞌawyꞌi Iesui mohey haria auka hat miꞌi hawyi toran naꞌyn itotiaria atumuꞌe haria.
2 Miꞌi hawyi wẽtup eꞌat pe yt kat i miꞌu taꞌatukyꞌesat. Taꞌatuehay Tupana wywuat hap yn taꞌatukyꞌesat. Miꞌi hawyi mekewat eꞌat pe Tupana Paꞌãu wakuat toꞌe iꞌatuepe -Ewetum no uhepe Panape Pauru e. Atiꞌatupoꞌoro mono miitꞌin atumuꞌe hamo pya wuaria kape. Aikotã saꞌawyꞌi ahenoi iꞌatuepe hap ewy te ti atikyꞌesat mesup e Tupana Iesui mohey haria pe.
3 Miꞌi hawyi yt kat i taꞌatuꞌu hawyi teꞌereponug mehin Panape Pauru ete. Miꞌi hawyi taꞌatuhẽtup Tupana kape iꞌatuwat hamo.
4 Miꞌi hawyi Panape Pauru wywo tuwat raꞌyn tawa Sereusia kape Tupana Paꞌãu mikyꞌesat ewy. Miꞌi tote tuwehytꞌok yara wato pe raꞌyn tawa Sipiri kape yꞌy toꞌoran miat yi kape. Maꞌato Iuwãu Maku mekewat Tupana ehay wan nug hat taꞌatuereto taꞌatupowyro hamo. Miꞌi hawyi Sereusia tote tuwehytꞌok taꞌyn yara wato pe tawa Sipiri kapiat tuwat hamo yꞌy toꞌoran miat yi kape.
5 Miꞌi hawyi putꞌok iꞌatuꞌe tawa Saramina pe. Miꞌi tote tuwat Tupana motypot yat kape Iuteuria watnuat Tupana ehay moherep hamo. Iꞌewyte Maku toineꞌen iꞌatupowyro hamo.
6 Miꞌi hawyi ikohyewyry raꞌyn yne tawa koꞌi upi yꞌy toꞌoran miat yi sakpo tuwat yi upi. Miꞌi hawyi putꞌok iꞌatuꞌe tawa Pawu pe. Itote taꞌatupuẽti wẽtup ok Iuteu Iesui ran e hap het rakat. Miꞌi ti paini kahato iꞌatuꞌe. -Uito ti Tupana ehay enoi hat e hat maꞌato heso rakat. Toimoherep kahato topo wo maꞌato yt pywo piat i. Erima iꞌatuꞌe teꞌeruwẽpowat. Paini sese iꞌatuꞌe.
7 Itotiat yi porekuat ti Sesiu Pauru e hap toineꞌen. Miꞌi e paini ti Iesui ran e hap morekuat pohag nug hat. Itotiaria aiporekuat wyti tuweꞌeg moityꞌi iꞌatuꞌe. Miꞌi hawyi putꞌok e itote hawyi morekuat tikay kay -Atikyꞌesat kahato ti atikuap Tupana ehay hap uhytꞌiꞌin e Panape Pauru pe. Maꞌato paini toꞌe morekuat pe.
8 -Yt reiꞌo yt etikuap teiꞌo mekewat sehay Iesui etiat katupono yt toikyꞌesat i morekuat tomohey Iesui hap e.
9 Miꞌi hawyi Pauru tehaꞌat howawi paini kape haty wo Tupana Paꞌãu esaika hap wywo. Miꞌi hawyi toꞌe paini pe.
10 -En wyti miitꞌin atumaꞌat kahato hat e. Ahiag saꞌyru ti en e. Eso kahato ti en yne wakuaria ewanikap ti en e. Karapeĩ putꞌok e miitꞌin etiꞌatupyhyp kahato Tupana kapiat hamuat e.
11 Miꞌi pote ti atipoꞌoro Tupana po eha pysasep hamo e. Mio wyti aru yt eraꞌakasa i aat e Pauru paini pe. Miꞌi hawyi meremo ihapytig sasep hap putꞌok e paini ete. Miꞌi hawyi toꞌe -Iypyryp taꞌyn uhete uiꞌykesat ro eipe e.
12 Miꞌi pote morekuat taꞌakasa hawyi tuwanetup kahato -Tupana mienoi rat hesaika kahato rat paĩ e. Miꞌi hawyi toimohey raꞌyn Iesui.
Iuwãu Hawyi Maku Teꞌeruweꞌaipok Ierusarẽi Kape
13 Miꞌi hawyi tuwat raꞌyn Pauru towyriaꞌin nywo tawa Pawu pyi yi Pãwiria kape yara wato puo. Miꞌi hawyi putꞌok iꞌatuꞌe raꞌyn tawa Pekere pe. Miꞌi hawyi putꞌok taꞌatuꞌe hawyi Iuwãu Maku tohokꞌiwat raꞌyn Ierusarẽi kape.
14 Miꞌi hawyi Pauru iꞌewyte Panape tuwat i raꞌyn tawa Pisitia kape tawa Antiokia kape ikohyewyry miitꞌin muꞌe Iesui etiat hamo. Putꞌok taꞌatuꞌe hawyi Sapatu eꞌat pe tuwehytꞌok mekewat Iuteu ywania woꞌomuꞌe hawe. Miꞌi tote teꞌeraꞌapyk Tupana motypot hamo.
15 Miꞌi tote mekewat Tupana yat piat miitꞌin akag tomowẽpap Muisei woꞌonapin yianmiat Tupana mienoi toimowẽpap. Miꞌi hawyi toiꞌatukay kay Pauruꞌin -Uiwyriaꞌin eweiꞌatupoꞌoro ro wẽtup ok eipyꞌasetpiat urumuꞌe Tupana ehay wuat hamo e Pauruꞌin me.
16 Miꞌi hawyi Pauru ipoĩꞌam hawyi topoha hawyi toꞌe -Ihatꞌok uiꞌywania e. Pyno aito Isareu ywania Tupana motypot haria. Miꞌi pote eweikuap to uimienoi Tupana ehay uhytꞌiꞌin e. Aikotã Ahaꞌaseꞌiꞌin tukupteꞌen saꞌawyꞌi wuaria hap ti ahenoi hamuat ehepe e.
17 Tupana sese tiꞌairo ahaꞌaseꞌi Isareu. Toiꞌairo hawyi ti toimowato hemiariru aitoria e. Taꞌi Tupana ti tuwehum kahato aiꞌywania ete e. Taꞌi saꞌawyꞌi te ti Esituꞌin po pe watukupteꞌen maꞌato ti Tupana aheraꞌaipok tesaika hamo wanikaptia po pyi uhytꞌiꞌin e.
18 Miꞌi hawyi 40 anu ti tukupteꞌen aiꞌywania yahig wato tote tama Kanaꞌã kape iꞌatukohyewyry e Pauru.
19 Miꞌi hawyi 7 ywania Tupana timoma hawyi tutum iꞌatueꞌyi Kanaꞌã ahepe e.
20 Miꞌi hawyi ti itote watukupteꞌen motꞌi kahato 450 anu itote. Miꞌi hawyi Tupana tum ahepe temiitꞌin ainapin hanuaria. Taꞌi Tupana ehay moherep hat Samueu kape tukupteꞌen ainapin hanuaria Tupana miium e Pauru.
21 Miꞌi hawyi ahaꞌaseꞌiꞌin hẽtup Tupana pe taꞌatuporekuat nuat. Miꞌi hawyi Kisi saꞌyru Sau tutum iꞌatuepe aseꞌi Pesami emiariru miꞌi. Miꞌi hawyi 40 anu toineꞌen itote morekuat no e.
22 Miꞌi hawyi Tupana tihep Sau hawyi Tawi i raꞌyn toimoherep aiꞌywania porekuat no saꞌawyꞌi. Miꞌi hawyi Tupana toꞌe miitꞌin me Tawi etiat -Uimipuẽti wakuat ti Iuse saꞌyru Tawi e. Miꞌi ti uimikyꞌesat ewywuat nug hat e miitꞌin me. Miꞌi ti uipyꞌa ewywuat e Tupana Tawi etiat.
23 Taꞌi morekuat Tawi emiariru emiariru ti Tupana tomoherep Isareu ywania pe Ahehakyeraꞌat hanuat e. Tawi kaipywiat wyti Iesui e Pauru. Aikotã yianme toꞌe Tupana miꞌi hap ewy mesup tutunug e.
24 Saꞌawyꞌi te Iuwãu henoi ahepe -Taꞌi eweiꞌatoiat ro yt nakuap i eiminug hap koꞌi hawyi eweiꞌaipok to Tupana kape. Miꞌi waku hawyi ti aru worohoꞌosetꞌok e ahepe.
25 Miꞌi hawyi ti Iuwãu mienoi upi teꞌeropyhuꞌat porapꞌi. Miꞌi hawyi toꞌe -Uhytꞌiꞌin uito ti yt eimiekatup i te katupono ti wẽtup ok tuut irane uhaipe pe poꞌog wuat uikawiat waku rakat e. Pywo ti rat uhewaku hap yt putꞌok e hin i Miꞌi Miit py sokpe saity pok hamo e. Miꞌi ti eimiekatup e Iuwãu Woꞌosetꞌok hat.
26 Mehinꞌin aito ti Aparãu emiariruꞌin Tupana mohey haria aito. Iꞌewyte eiperia wẽtup ywania kaipywiaria Tupana mohey haria wo eweikupteꞌen. Taꞌi ahepe ti Tupana tipoꞌoro tehay ahehakyeraꞌat hamo e Pauru Tupana motypot yat piaria pe.
27 Taꞌi tawa Ierusarẽi miaria akag koꞌi iꞌewyte yt ikuap i mekewat wakuat Miit. Taꞌi yne Sapatu eꞌat pe taꞌatumowẽpap yianmiat Iesui ieineꞌen hamuat hap etiat maꞌato yt taꞌatumohey i putꞌok e hawyi. Yt taꞌatukuap i Miꞌi hawyi taꞌatuhekatup aikotã miat iꞌaparap hap iꞌauka hamo maꞌato yt toiꞌaparap hin i e.
28 Miꞌi hawyi morekuat Piratu po pe raꞌyn taꞌatupag iꞌauka hamo yt kat e hin i pykai e.
29 Taꞌatunug yne aikotã yianmiat mienoi ewy. Miꞌi hawyi taꞌatumoꞌapyk taꞌyn ariaꞌyp posak ete pyi ipiit ikuꞌuro hawyi. Miꞌi hawyi taꞌatusyp nu kaꞌa pe e.
30 Miꞌi hawyi ti maꞌato Tupana tomoherep pakupꞌi guꞌuro pyi iꞌatumisyp e.
31 Miꞌi hawyi toineꞌen motꞌi i raꞌyn towyriaꞌin Karireia piaria wywo Ierusarẽi me. Miꞌiria ti mesup tukupteꞌen Iesui ieineꞌen i hap enoi haria e Pauru.
32 Uruto ti iꞌewyte henoi haria te e. Yt heso hin i ti Tupana saꞌawyꞌi aiꞌywania pe. Aikotã saꞌawyꞌi te Tupana toꞌe miꞌi hap ewy ti mesup tutunug naꞌyn e.
33 Saꞌawyꞌi te Tawi toꞌe tomiwan me tuwepy puo Tupana toꞌe -En ni Uhaꞌyru sese e. Pyno woromoieineꞌen pakup i aru e Tupana Iesui etiat Tawi tuwepy hawe mekewat Saumu 2.7 pe. Pyno aikotã saꞌawyꞌi toꞌe hap ewy ti mesup toimoherep taꞌyn Tosaꞌyru paĩ e Pauru itotiaria pe.
34 Iꞌewyte ti mekewat Tawi wepy hawe aikotã morekuat Tawi pe Tupana toꞌe hap ewy te ti mesup ti totiõtem i raꞌyn guꞌuro pyi Aipotypot Iesui e. Ipiit yt nem i tuwẽtem naꞌyn guꞌuro pyi e. Pyno ti aikotã Tupana toꞌe saꞌawyꞌi Isaia 55.3 pe hap ewy ti raꞌyn mesup tutunug e.
35 Pyno ti Iesui piit yt iꞌokpuk hin i are aikotã Tupana toꞌe Tawi wepy hawe miwan miat hap ewy -Yt karãpe i aru Uhaꞌyru sese nem rakatno neꞌi topyhuꞌat toꞌe hap ewy e Tawi wepy hawe Saumu 16.10 pe.
36 Yt morekuat Tawi etiat i mio tã e maꞌato Tupana ihay Tosaꞌyru sese etiat mekewat morekuat Tawi saipepiat sese wuat etiat ihay are katupono mekewat aiporekuat saꞌawyꞌi wuat Tawi ikuꞌuro raꞌyn hawyi taꞌatusyp iꞌywotꞌin syp hawe hawyi ikag koꞌi heremo te itote e. Tupana ihay wẽtup ok etiat Tosaꞌyru Iesui etiat ihay yian mete e.
37 Miꞌi Miit ti Tupana tihymut raꞌyn guꞌuro pyi e. Yt nem hin i ipiit e Pauru.
38 Uiwyriaꞌin Muisei waĩꞌe hap ti waku kahato wen maꞌato ti yt aimohãpyk kuap i Tupana wywo e.
39 Pywo pe ti rat areꞌe uiwyriaꞌin mekewat Miit sese yt nem i rakat yn ni wyti aimohãpyk kuap Tupana wywo e. Imohey haria toiꞌatumohãpyk kuap tuwewawi e Pauru.
40 Saꞌawyꞌi wuat Tupana ehay enoi hat toꞌe mio tã e -Eiweꞌeg wo yt uimohey i haria e. Eimitum mo o uhehay etiat wekyryꞌi i haria e. Katupono yt uimohey i hap ti aru eiꞌatuꞌuka e.
41 Katupono ti aru mekewat eꞌat pe uito atunug eipyꞌasetpe wakuap iwato kahato yt wẽtup ewywuat i iwato rakat atunug maꞌato eweiꞌakasa hawyi ti aru iꞌewyte eweikuap hawyi ti aru maꞌato yt eweimohey i e Tupana saꞌawyꞌi e. Taꞌi yian mete ti Tupana henoi ehetiat uiꞌywania Apakuki 1.5 pe tohenoi e Pauru Iuteuria pe.
42 Miꞌi hawyi Pauru tuwẽtem Tupana motypot hap yat pyi towyriaꞌin wywo. Miꞌi hawyi iraniaꞌin itotiaria yt Iuteuria i teꞌeroꞌe -Uhyt iꞌatuꞌe wẽtup semana hawyi o eraꞌaipok i raꞌyn o urumuꞌe hamo meiũpe iꞌatuꞌe.
43 Tuwat yne raꞌyn Tupana motypot yat pyi hawyi iraniaꞌin itotiaria Iuteuria iꞌewyte yt Iuteuria i koꞌi teꞌeruwehik taꞌyn uhyt Panape uhyt Pauru ete. Miꞌi hawyi Pauru Panape tiꞌatunapin miꞌiria muap upi -Eweiwat ro haty wo eikyꞌe hat Tupana upi iꞌatuꞌe. Yt eweiꞌatoiat rẽ Tupana piat eikyꞌe hap iꞌatuꞌe.
Panape Hawyi Pauru Tuwat Raꞌyn Kereku Ywania Kape
44 Miꞌi hawyi Sapatu eꞌat pe i raꞌyn hawyi kahupyt i raꞌyn tawa piaria teꞌeruwaꞌatunug i raꞌyn. Taꞌatukuap teran Tupana ehay iꞌatukaipyi haype.
45 Miꞌi hawyi Iuteuria potnagnia teꞌeraꞌakasa miitꞌin typyꞌi kahato Pauru upi. Miꞌi pote iꞌatuehayꞌywyi tuete. Miꞌi hawyi -Taꞌi eheso kahato iꞌatuꞌe. Etiꞌatumaꞌat neꞌi rat miitꞌin Tupana ete iꞌatuꞌe.
46 Maꞌato miꞌi hawyi Pauru Panape wywo iꞌatuehay hesaika poꞌog miitꞌin kape. Yt teꞌeruwemoti hin i. Miꞌi hawyi teꞌeroꞌe Iuteuria yt imohey i haria pe -Taꞌi Tupana tum neran ni ieineꞌen hap yt ikahuro rakat i maꞌato imiium ni eweipun neꞌi eipe iꞌatuꞌe. Pyno ti saꞌawyꞌi uruhenoi teran ehepe e maꞌato yt eweimohey i miꞌi pote ti wẽtup ywania pe raꞌyn uruhenoi.
47 Katupono saꞌawyꞌi Tupana toꞌe Tosaꞌyru pe -Woronug En aikotã iypyryp wiat ariãty ewy e. Yne ywania akasa hamuat e. Yne mesuwat yi totiaria ehakyeraꞌat hamo e Tupana Isaia 49.6 pe iꞌatuꞌe Pauruꞌin.
48 Miꞌi pote iraniaꞌin yt Iuteuria i raꞌyn iꞌatuwepiit kahato Tupana ehay ete. Miꞌi hawyi teꞌeruwehum kahato -Waku sese ehay Tupana iꞌatuꞌe. Miꞌi hawyi tomiꞌairoria pe tomohey haria pe yn naꞌyn Tupana tum toieineꞌen hap yt ikahuro rakat i.
49 Miꞌi hawyi miꞌiria raꞌyn imoꞌẽ Taꞌatukaꞌiwat pakupꞌi mienoi wuatꞌi tawa piaria pe.
50 Miꞌi hawyi Iuteuria nagnia tiꞌatunug iwatoꞌin nakaria haryporiaꞌin ihainiaꞌin hawyi tuꞌisaria taꞌatuꞌatukay kay. Miꞌi hawyi teꞌeroꞌe miꞌiria pe -Waku ti watiꞌatusatyꞌi satyꞌi raꞌyn Pauruꞌin iꞌatuꞌe. Miꞌi hawyi Pauru Panape taꞌatuporenoꞌẽ raꞌyn taꞌatuetawa pyi.
51 Tuwenoꞌẽ hawyi Pauru Panape teꞌeruwepypitpitꞌok kahato Tupana etiat yt iwese i rakaria piat ikuap hamo. Miꞌi hawyi tuwat i raꞌyn wẽtup tawa Ikuniu kape.
52 Maꞌato ipakuptia Iesui mohey haria teꞌeropyhuꞌat itote yt iwese i rakaria pyꞌasetpe tawa Antiokia pe. Miꞌiria iꞌatuwepiit kahato itote Tupana Paꞌãu wywo.
