Iesui Potmuꞌeria 14:1-28
14 Miꞌi hawyi putꞌok iꞌatuꞌe tawa Ikuniu pe hawyi tuwehytꞌok Tupana motypot hawe. Miꞌi hawyi itote Pauruꞌin tiꞌatumuꞌe kahato Tupana ehay wo. Miꞌi hawyi Iuteuria tomohey kahato Tupana ehay. Iꞌewyte iraniaꞌin ywania yt Iuteuria i imohey raꞌyn wy. Miꞌi hawyi miitꞌin sok topyhuꞌat Iesui mohey pakup i haria.
2 Maꞌato yt imohey haria i Iuteuria teꞌeroꞌe -Toꞌiro watipugha Pauruꞌin iꞌatuꞌe. Yt naku i ti miꞌiria iꞌatuꞌe. Yt eweimohey teiꞌo meimuẽwaria iꞌatuꞌe yt Iuteuria i pe.
3 Maꞌato Tupana tiꞌatumoesaika poꞌog naꞌyn. Miꞌi hawyi taꞌatunug taꞌatupo wo raꞌyn wakuap miitꞌin wanetup hamo. Miꞌi hawyi itote tukupteꞌen motꞌi raꞌyn katupono taꞌatumohey kahato raꞌyn itote Tupana ehay. Miꞌi hawyi Pauru Panape tiꞌatumuꞌe kahato Tupana woꞌokyꞌe teꞌen neꞌi tuwekaipywiat hap ete.
4 Miꞌi hawyi tawa Ikuniu piaria yt toꞌoksat i hin i katupono yt toꞌowanetup hap ewy i kahato. Ipatꞌok Iesui mienoi upi ipatꞌok Iuteuria mienoi upi.
5 -Toꞌiro watiꞌatumaꞌat sehay wo iꞌatuꞌe. Miꞌi hawyi watiꞌatuꞌuka mak mak wo nu wo iꞌatuꞌe Iuteuria toꞌope taꞌatuꞌakag koꞌi wywo.
6 Miꞌi hawyi Pauru Panape tikuap taꞌyn taꞌatuꞌauka teran hap hawyi teꞌeropopy raꞌyn. Miꞌi hawyi tuwat tawa Irikaunia kape. Miꞌi hawyi itote ikohyewyry tawa hit koꞌi upi tawa Irita tawa Tepe upi iꞌatukohyewyry.
7 Miꞌi tote taꞌatuhenoi kahato Tupana ehay.
8 Miꞌi hawyi tawa Irita tote taꞌatupuẽti yt karãpe i hewyry rakat apyk pe. Toty kaipywiat wemoherep hat ipy kĩꞌã rakat.
9 Miꞌi tote Pauru henoi Iesui etiat turan mekewat yt hewyry kuap i rakat tikuap ihay. Miꞌi hawyi Pauru ihaꞌat howawi hawyi toikuap taꞌyn tuwanetup hawe -Iesui mohey hap uimoehãite kuap e tuwanetup.
10 Miꞌi hawyi Pauru toꞌe tehay wo -Epoĩꞌam no uhyt e. Miꞌi hawyi mekewat saꞌawyꞌi wuat yt hewyry kuap i rakat pesoꞌe hawyi hewyry raꞌyn.
11 Miꞌi hawyi Ikuniu piaria teꞌerahaꞌat kahato ipy kĩꞌã rakat moehãite Pauru piat hap kape. Miꞌi pote taꞌatuehay pirik wo teꞌeroꞌe -Tupanaria miitꞌin kawiat atipy kaipywiaria eipe iꞌatuꞌe Pauru Panape pe taꞌatupusu puo.
12 Miꞌi hawyi Panape tupana Seusi iꞌatuꞌe maꞌato Pauru tupana Hemi iꞌatuꞌe katupono -Aimuꞌe hat poꞌog Pauru miꞌi iꞌatuꞌe.
13 Miꞌi turan tawa okenꞌypy kawiatno toineꞌen tupana Seusi yat. Miꞌi kaꞌiwat paꞌi terut Wewato ahup koꞌi ipaiꞌat okenꞌypy kape. Miꞌi miitꞌin tiꞌauka teran tupana Pauru Panape motypot hamuat. Ipohyt kawiat hewahi rakat Wewato ahup.
14 Miꞌi taꞌatukuap hawyi Pauruꞌin yt iꞌatuwepiit hin i raꞌyn. Yt taꞌatukyꞌesat i taꞌatumotypot hap. Miꞌi pote teꞌeruwesokpe hiot neꞌi raꞌyn miitꞌin tok pe.
15 -Waĩ urumotypot rẽ Tupana eipe. Kan hamo ten urumotypot Tupana wo eipe iꞌatuꞌe. Katupono yt naku i miitꞌin me Tupana en eweiꞌe e Tupana iꞌatuꞌe. Waĩ ne iꞌatuꞌe. Yt naku i tupanaria eipe eweiꞌe uruepe. Eweiꞌatoiat ro meimuẽwat ehetupana koꞌi hawyi eweiꞌaipok to Tupana sese kape mekewat wuatꞌi eꞌat piat ieineꞌen hat kape uhytꞌiꞌin manaꞌin iꞌatuꞌe. Yt kan hamo i eweimohey ehetupanaria katupono Tupana sese ti ainug hat yꞌy nug hat wuatꞌi yꞌy piaria nug hat e. Pyno Tupana sese kape eweiꞌaipok to hawyi eweipun no ehetupanaria saꞌag koꞌi iꞌatuꞌe Panape Pauru.
16 Saꞌawyꞌi Tupana yt toꞌe i -Uito yn waku Ehetupana wo yt e i te ehepe wẽtup ywania eipe pote. Maꞌato mesup ti -Waĩꞌe raꞌyn. Yt atikyꞌesat i poꞌog ehetupana koꞌi e. Yt atikyꞌesat i poꞌog yt eiweꞌeg i hap uhetiat mesup e Tupana ehepe.
17 Saꞌawyꞌi te ti yt watikuap i Tupana sese etiat maꞌato ti mesup wakuap tutum neꞌen neꞌi ahepe yt kat saꞌup i. Koitywy yne ywania pe yne miitꞌin me tuwemoherep teran. Iꞌewyte iꞌaman tutum yne pe. Iꞌewyte miitꞌin yne pe hewo iminug kaipyi wakuap. Miꞌi tã ti Tupana yne tokuap ahepiat hamo e. Miꞌi tã ti tutunug aimowepiit hamo e Pauruꞌin tawa Irita piaria pe.
18 Porap taꞌatuꞌauka Wewato ahup turan naꞌyn Pauruꞌin waĩꞌiꞌatuꞌe haty wo. Miꞌi pote yt taꞌatuꞌauka i raꞌyn Wewato ahup koꞌi Pauruꞌin motypot Tupana ewywuat hamo.
Taꞌatuꞌauka Teren Pauru
19 Miꞌi hawyi putꞌok iꞌatuꞌe Iuteuria Pauru ewanikaptia tawa Antiokia pyi tawa Ikuniu pyi tõꞌẽ. Miꞌi hawyi ti itotiaria iraniaꞌin taꞌatumoꞌakagꞌaia raꞌyn -Eweiꞌauka ro nu wo Pauru iꞌatuꞌe. Miꞌi hawyi nu wo mak mak iꞌatuꞌe howawi iꞌauka hamo. Miꞌi hawyi taꞌatuherep haity pe yi upi tawa pyi. -Ikuꞌuro raꞌyn koitywy Pauru iꞌatuꞌe teꞌeruwanetup hawe.
20 Miꞌi hawyi ipotpoꞌororia teꞌeruwaꞌatunug Pauru piit kape. Miꞌi hawyi maꞌato iꞌapeꞌokꞌam i raꞌyn iꞌatupyꞌasetpe. Miꞌi hawyi taꞌaipok i raꞌyn toꞌauka hap tawa kape. Heꞌihatꞌok pe hawyi tuwat Panape wywo tawa Tepe kape.
21 Miꞌi hawyi itote sehay wakuat taꞌatuhenoi Iesui etiat. Miꞌi hawyi taꞌatuꞌatunapin aat iꞌatuepiat ikuap kahato hamo. Miꞌi hawyi itote pyi teꞌeraꞌaipok i raꞌyn tawa Irita kape tawa Ikuniu kape tawa Antiokia kape Iesui mohey haria pakup tiaria kape.
22 Miꞌi hawyi Pauruꞌin tiꞌatunapin kahato itotiaria ipakup tiaria iꞌatumoesaika hamo iꞌatuepiat imohey kahato hamo. Mio tã iꞌatuꞌe -Eiweꞌeg wo o katupono meiũran ti ewehoꞌopot kahato mesuwe Tupana etama kapiat muap upi iꞌatuꞌe imohey pakup i haria pe.
23 Miꞌi hawyi itote Pauruꞌin tiꞌairo Iesui mohey haria napin hamuaria. Miꞌi hawyi Panape Pauru yt kat i iꞌu aat katupono hẽtup kahato Tupana kape -Tupana iꞌatuꞌe epo pe raꞌyn ti meiũpiaria uruikyꞌesat emohey haria ipakup takaria katupono urutuwat irane meiũpepyi iꞌatuꞌe taꞌatuhẽtup Tupana pe.
24 Miꞌi hawyi tuwat yi Pisitia sakpo yi Pãwiria sakpo.
25 Miꞌi hawyi putꞌok iꞌatuꞌe tawa Pekere pe hawyi taꞌatuhytpok kahato raꞌyn Iesui ehay itote. Miꞌi hawyi tuwat hẽpype tawa Ataria kape.
26 Miꞌi hawyi yara wato puo raꞌyn tuwat tawa Antiokia kape taꞌatumipoꞌororia kape. Teꞌeraꞌaipok i raꞌyn aikope saꞌawyꞌi tuwat Iesui ehay sytpok hamo hap kape. Miꞌi hap kape teꞌeraꞌaipok i raꞌyn. Taꞌatupotpap kahu raꞌyn hawyi teꞌeraꞌaipok i raꞌyn. Aikope Panape Pauru powyro hamuat taꞌatuhẽtup Tupana pe hap kape i raꞌyn teꞌeraꞌaipok.
27 Putꞌok taꞌatuꞌe itotiat hawyi taꞌatukay kay yne Iesui mohey haria. Miꞌi hawyi aikotã Tupana tunug muap upi iꞌatupo wo miꞌi hap ewy yne taꞌatumoherep itotiaria pe -Koitywy ti Tupana tomoherep taꞌyn Iesui yt aiꞌywania pe yn i raꞌyn iꞌatuꞌe Iuteuria pe. Taꞌi mio raꞌyn ti yt Iuteuria yn i raꞌyn imoherep iꞌatuꞌe.
28 Miꞌi hawyi itotiaria imohey haria wywo tukupteꞌen motꞌi raꞌyn Panape Pauru.
