Iesui Potmuꞌeria 15:1-41
15 Miꞌi hawyi ti Iuteuria tõꞌẽ tõꞌẽ raꞌyn tawa Antiokia totiaria Iesui mohey haria muꞌe hamo raꞌyn -Ewetunug no Muisei woꞌonapin hap yne pote ti aru Tupana ehehakyeraꞌat kuap maꞌato yt eiwemurui ãpy sokpe tek hap pote ti aru yt ehehakyeraꞌat i iꞌatuꞌe.
2 Miꞌi hawyi itote Pauru Panape tuꞌuka aat kahato taꞌatuehay wo. Miꞌi hawyi yt toꞌowese hin i itotiaria toꞌope. Miꞌi hawyi teꞌeroꞌe toꞌope -Pyno waku ti watiꞌatupoꞌoro raꞌyn Pauru Panape iraniaꞌin wywo Ierusarẽi kape saꞌawyꞌi wuaria Iesuiꞌin 12 ok takaria kape itotiat piat iꞌatuehay kuap hamo iꞌatuꞌe. Aikotã Muisei eko aikotã watunug hap kuap hamo iꞌatuꞌe.
3 Miꞌi hawyi Iesui mohey haria tawa Antiokia piaria tiꞌatupoꞌoro Pauru Panape Ierusarẽi kape iraniaꞌin nywo. Miꞌi hawyi tuwat raꞌyn tawa Antiokia pyi. Miꞌi hawyi Iesui mohey haria pe yi Wenisia piaria pe yi Samaria piaria pe taꞌatuhenoi aikotã iraniaꞌin yt Iuteu ywania i timohey raꞌyn Iesui hap koꞌi. Miꞌi pote teꞌeruwehum kahato Tupana ete itotiaria.
4 Miꞌi hawyi putꞌok iꞌatuꞌe raꞌyn Ierusarẽi me. Miꞌi tote yiannote wuaria 12 ok takaria tukupteꞌen. Iꞌewyte Iesui mohey haria akagnia tukupteꞌen. Miꞌiria teꞌeroꞌe -Pyno eiwehytꞌok to uhytꞌiꞌin iꞌatuꞌe Pauruꞌin me. Miꞌi hawyi Pauruꞌin tomoherep iꞌatuepe aikotã Tupana tunug wuatꞌi tawa puaria piat hap koꞌi.
5 Miꞌi hawyi iraniaꞌin Iesui mohey haria woꞌonapin haria teꞌeroꞌe -Pyno waku eiwemurui ãpy sokpe tek to watoꞌe iꞌatuepe. Waku yne Muisei waĩꞌe hap ewetunug watoꞌe ro yt Iuteuria i pe iꞌatuꞌe.
6 Miꞌi hawyi yne taꞌatuꞌatunug 12 ok takaria Iesui mohey haria akagnia wywo teꞌeruwaꞌatunug aikotã mekewat yt Iuteuria i napin hap kuap hamo.
7 Miꞌi hawyi yt toꞌoehay sat i aat hawyi mehin Peteru ipoĩꞌam iꞌatupyꞌasetpe iꞌatunapin hamo -Uheꞌywytꞌin Iesui mohey haria e eipe ti eweikuap taꞌyn aikotã saꞌawyꞌi Tupana uiꞌairo yt Iuteu ywania i napin hamuat hap e. Uito yn ni saꞌawyꞌi areto sehay wakuap enoi hamo yt aiꞌywania kape e. Uiwẽ pyi ti saꞌawyꞌi taꞌatumohey haꞌawyte wuaria e Peteru.
8 Taꞌi Tupana tikuap yne wyti miitꞌin wanetup taꞌatupyꞌa piat hap e. Yt aiwanetup hap yn i ti Tupana tikuap e. Taꞌi tutum naꞌyn ti iꞌatuepe Topaꞌãu Wakuat aikotã ahepe tutum hap ewy te ti e. Miꞌi tã toimoherep taꞌyn ahepe tomohey iꞌatuepiat hap e Peteru.
9 Taꞌi toimohãpyk yne wyti iꞌatuwanetup saꞌag hap koꞌi Tosaꞌyru mohey raꞌyn hawyi e.
10 Pyno kat hamoĩ mesup eweikyꞌesat Muisei eko yrysakag ipotyi aiꞌakag etiat hap ewywuat iraniaꞌin akag ete e. Pyno toimoherep taꞌyn ahepe iraniaꞌin ywania aiꞌewy raꞌyn toiꞌairo e Peteru. Ahaꞌaseꞌiꞌin wyti yt hupit i mekewat seko e. Iꞌewyte aito yt wahupit i raꞌyn. Kat hamoĩ pyno eweikyꞌesat aheko Iesui mohey haria wẽtup ywania ipakuptia ok pe tote e. Yt naku i ti Tupana wahãꞌãg e.
11 Taꞌi Iesui yn nyti ahehakyeraꞌat e. Iꞌewyte iraniaꞌin ywania Ehakyeraꞌat hat Iesui yn. Pyno aiwoꞌoꞌewy kahato e. Taꞌi Iesui mohey hap yn ahehakyeraꞌat kuap hap. Yt aiminug koꞌi kaipyi i wyti ahehakyeraꞌat hap toineꞌen e Peteru.
12 Miꞌi hawyi sehay wuat wuꞌuka haria atunik taꞌyn. Yt kat iꞌatuꞌe hin i raꞌyn miitꞌin sok. Miꞌi hawyi Panape Pauru timoherep aikotã yt Iuteuria i timohey raꞌyn Iesui hap koꞌi aikotã Tupana tum tesaika hap wakuap nug hamuat miꞌiria pe hap.
13 Miꞌi hawyi teꞌeruwanetup kahato raꞌyn. Yt kat iꞌatuꞌe i raꞌyn. Miꞌi hawyi Tiaku ihay -Uhytꞌiꞌin eweikuap to uimienoi e.
14 Pywo ti rat Simau henoi aikotã mio Tupana Paꞌãu teke kuap wuatꞌi ywania Tosaꞌyru mohey haria pya pe e. Toikyꞌesat yne ywania kaipywiat tomiꞌairo tomohey haria e.
15 Miꞌi hap ewy raꞌyn wyti mesup topyhuꞌat. Saꞌawyꞌi wuat Tupana e hap ewy e
16 -Mekewat eꞌat pe ti aru araꞌaipok hawyi atunug pakup i morekuat Tawi yat aat hat.
17 Miꞌi kape ti aru tõꞌẽ tõꞌẽ miitꞌin yne ywania uikuap haria. Wuatꞌi ywania ti aru atiꞌatukay kay yne uhet kuap haria. Miꞌi tã ti aru atunug e ti Tupana yian mete iwan me e Tiaku.
18 -Katupono Tupana tikuap aikotã mesup topyhuꞌat hamuat hap yian mete e.
19 Yt naku i arewanetup turan wahenoi niatpo rakat seko aiꞌywania ewywuat iraniaꞌin ywania Iesui mohey haria pakuptia pe e Tiaku.
20 Pyno waku kahato watipoꞌoro sehay iraniaꞌin ywania kape. Mio tã watoꞌe waku watiꞌatunapin -Waure wo ro meimuẽwat ehetupana iãꞌãkap koꞌi ete paĩ waku watoꞌe e. Iꞌewyte yt ewetuꞌu teiꞌo miꞌu miitꞌin miium taꞌatuetupanaria piat neꞌi watoꞌe iꞌatuepe. Iꞌewyte wẽtup ok wẽtup ok wywo teiꞌo ewary eꞌaito watoꞌe. Iꞌewyte yt naku i huu ehesapo wo. Yt naku i ewetuꞌu ipuꞌi huu wywo waku watoꞌe iꞌatuepe e Tiaku.
21 Saꞌawyꞌi pyi te ti yne tawa puo tukupteꞌen ne Muisei eko enoi haria. Mesup te yne Sapatu eꞌat pe ti Muisei mienoi taꞌatumowẽpap toran e Tiaku.
22 Miꞌi hawyi torannia Iesui mohey haria teꞌeroꞌe toꞌope 12 ok takaria wywo taꞌatuꞌakagnia wywo -Pyno waku aimiꞌairoria watiꞌatupoꞌoro uhyt Pauru uhyt Panape upi tawa Antiokia kape miꞌi aiꞌe hap enoi iraniaꞌin miat hamo iꞌatuꞌe. Miꞌi hawyi taꞌatuꞌairo uhyt Iuta Pasapa e hap het rakat hawyi uhyt Sira taꞌatuꞌairo miitꞌin wakuaria taꞌatupyꞌasetpiaria.
23 Miꞌi hawyi taꞌatuwan popera pe iꞌatumiereto wuat. Mio tã iꞌatuꞌe -Uruto ti Ierusarẽi miaria Iesui mohey haria torannia 12 ok takaria miꞌiria wywo uruꞌakagnia wywo Iesui mohey haria uruipoꞌoro miwan me ehewowi kuekatu uruꞌe hap popera pe wẽtup ywania kape tawa Antiokia piaria kape yi Siria piaria kape yi Sirisia piaria kape uruipoꞌoro miwan eweimoehãite ro kuekatu uruꞌe hap iꞌatuꞌe.
24 Haꞌawyte wyti tuwat ehewowi yt uruwat urumipoꞌororia i urutoꞌe. Miꞌiria ti eimoꞌakagꞌaia hanuaria urutoꞌe. Miꞌiria wyti uruikuap taꞌyn mesup. Urupyꞌasetpyi ti wyti tuwat maꞌato ti yt uruwat urumipoꞌororia i paĩ iꞌatuꞌe popera pe.
25 Taꞌi waku kahato uruipoꞌoro ehewowi meiũpepyi urumikuap sehay enoi hanuaria urutoꞌe. Taꞌi aiwyriaꞌin Panape Pauru upi waku kahato uruipoꞌoro ehewowi paĩ iꞌatuꞌe.
26 Taꞌi uhyt Panape uhyt Pauru yt teꞌerokenꞌẽ hin i taꞌatuꞌauka hap pupi. Miꞌi tupono tuwat raꞌyn Aiporekuat Aikaꞌiwat Iesui enoi miitꞌin miat hamo urutoꞌe paĩ iꞌatuꞌe.
27 Pyno uruipoꞌoro ehewowi miꞌiria upi mehin Iuta hawyi Sira ehepiat henoi hamo.
28 Uruwyriaꞌin Tupana Paꞌãu wyti urumuꞌe kahato kat e hap kat e hap koꞌi enoi ehepiat hamuat hap ete iꞌatuꞌe. Yt toikyꞌesat i wyti urueko ipotyi rakat neꞌi uruhenoi ehepiat hap.
29 Mio tã e ti maꞌato toikyꞌesat -Yt ewetuꞌu teiꞌo miitꞌin miium tupanaria iãꞌãkap koꞌi piat e. Miꞌi hap yt toikyꞌesat i iꞌatuꞌe. Iꞌewyte yt toikyꞌesat i wyti wẽtup ok wẽtup ok wywo seꞌaito hap iꞌewyte wary hap. Hutꞌyp nik piat miat puꞌi o yt etuꞌu teiꞌo. Iꞌewyte huu o yt etuꞌu teiꞌo e ti wy iꞌatuꞌe. Pyno urumienoi ewy ewetunug mote ti aru waku raꞌyn uruwyriaꞌin iꞌatuꞌe. Toran naꞌyn pyno uruꞌe hap mehinꞌin iꞌatuꞌe popera pe. Miꞌi hawyi taꞌatuium mekewat miwan taꞌatumipoꞌororia pe.
30 Miꞌi hawyi pyno waku eweiwat ro tawa Antiokia kape iꞌatuꞌe. Miꞌi hawyi tuwat raꞌyn. Putꞌok taꞌatuꞌe itote hawyi taꞌatuꞌatunug yne Iesui mohey haria. Miꞌi hawyi taꞌatuium mekewat mipoꞌoro popera itotiaria pe.
31 Miꞌi hawyi taꞌatumowẽpap hawyi iꞌatuwepiit kahato taꞌatunapin hap ete.
32 Miꞌi hawyi yianmiat Tupana ehay enoi haria uhyt Iuta uhyt Sira tiꞌatunapin kahato Iesui mohey haria tawa Antiokia piaria taꞌatuꞌatumoesaika imohey hap ete.
33 Miꞌi hawyi tukupteꞌen motꞌi itote hawyi teꞌeraꞌaipok teran i raꞌyn Ierusarẽi kape Iesui potpoꞌororia kape i raꞌyn. Miꞌi hawyi -Hẽto iꞌatuꞌe. Uruipoꞌoro teran ehupi uruekuekatu iꞌatuꞌe tawa Antiokia piaria.
34 Maꞌato Sira yt ipap i raꞌyn tawa Antiokia pyi. Miꞌi hawyi yt toto i.
35 Miꞌi hawyi Pauru Panapeꞌin tukupteꞌen motꞌi tawa Antiokia piaria muꞌe hamo. Taꞌatukaꞌiwat ehay enoi haype teꞌeropyhuꞌat Iesui mohey haria ahyt tok pe.
36 Tukupteꞌen motꞌi itote hawyi Pauru toꞌe Panape pe -Pyno waku apo uhyt wataꞌaipok i raꞌyn iraniaꞌin tawa koꞌi kape e. Katupono atiꞌatuepiok teran aikotã tukupteꞌen Iesui mohey haria pakup i koꞌi aikope saꞌawyꞌi watiꞌatumuꞌe hap kape mehin e Pauru Panape pe.
37 -Pyno waku watioto Iuwãu Maku e Panape Pauru pe.
38 Maꞌato -Yt naku i uhyt watioto Iuwãu Maku katupono saꞌawyꞌi miꞌi ti taꞌaipok neꞌi ahupi pyi Tupana potpap wyi yi Pãwiria pyi e Pauru Panape pe.
39 Maꞌato yt toꞌowanetup hap ewy hin i raꞌyn hawyi toꞌoehay tek hawyi toꞌoꞌatoiat raꞌyn. Miꞌi hawyi uhyt Panape uhyt Iuwãu Maku wywo yn naꞌyn tuwat yara puo taꞌatueꞌyi Sipiri kape.
40 Miꞌi hawyi uhyt Pauru tikyꞌesat uhyt Sira raꞌyn tekatuwy wo. Miꞌi hawyi Iesui mohey haria hẽtup Tupana pe -Tupana iꞌatuꞌe etiꞌatupowyro kahato aiwy Pauru aiwy Sira epotpap nug hamo iꞌatuꞌe. Etiꞌatukyꞌe ro yne muap upi. Miꞌi hap uruhẽtup epe waku iꞌatuꞌe. Miꞌi hawyi Pauru toto uhyt Sira wywo Iesui mohey haria moesaika hamo wuatꞌi ywania kape.
41 Miꞌi hawyi iꞌatuewyry yi Siria puo hawyi yi Sirisia puo iꞌatuewyry itotiaria Iesui mohey haria atumoesaika Tupana ehay wuat hamo.
