Iesui Potmuꞌeria 17:1-34
17 Miꞌi hawyi Pauru Sira tuwat raꞌyn tawa Awipuri sakpo tawa Apurunia sakpo tuwat. Miꞌi hawyi putꞌok iꞌatuꞌe tawa Tesaronika pe raꞌyn. Itote toineꞌen Tupana motypot yat Iuteuria wat.
2 Miꞌi pe Pauru teke towat teko ewy raꞌyn nug hamuat. Miꞌi tote miwan Tupana ehay kaipyi Pauru tiꞌatumuꞌe. Miꞌi hawyi myẽꞌym Sapatu eꞌat toꞌowesat wesat Pauru wywo.
3 Miꞌi hawyi Tupana etiat miwan motꞌi kaipyi toiꞌatumuꞌe -Uiwyriaꞌin e Tupana Mipoꞌoro Aiporekuat nuat piat hoꞌopot hamuat hap tohenoi mesuwe miwan me e. Iꞌewyte ti tuwẽtem irane guꞌuro pyi hamuat hap tohenoi meikowat miwan me. Eweikuap uwe miꞌi tã hamuat e. Taꞌi Iesui uimimoherep ehepiat wyti mesuwe e. Tohenoi miꞌi ti Aiporekuat no e Pauru Iuteuria pe.
4 Miꞌi hawyi teꞌeruwanetup hawyi -Pywo iꞌatuꞌe iraniaꞌin. Miꞌi hawyi Pauruꞌin upiaria topyhuꞌat Kereku ywaniaꞌin Tupana motypot haria ahyt. Iꞌewyte haryporiaꞌin weꞌeg haria ahyt topyhuꞌat Iesui mohey haria wo raꞌyn itote.
5 Maꞌato iraniaꞌin Iuteuria yt imohey i Iesui. Miꞌi hawyi Pauruꞌin ete iꞌatuehayꞌywyi kahato. Miꞌi hawyi taꞌatukat muap upiaria yt ipotpap i rakaria yt nakuaria i wuꞌuka hap nug hamo. Miꞌi hawyi tuwat uhyt Iasũ yat kape. Miitꞌin typyꞌi kahato tuwat. Miꞌiria yne tõꞌẽ tõꞌẽ tawa piaria Pauruꞌin kupteꞌen hap kape Pauruꞌin etiat taꞌatuhoiro hamo. Miꞌi hawyi tuwehytꞌok haty wo Iasũ yat pe maꞌato Pauruꞌin yt uwe i taꞌatupuẽti.
6 Maꞌato Iasũ yn naꞌyn iraniaꞌin toꞌywytꞌin nywo taꞌatuꞌatupuẽti. Miꞌi hawyi Iasũꞌin taꞌatueropoꞌok iherep mo morekuat kape yi upi. Miꞌi hawyi taꞌatuputꞌok hawyi taꞌatukuasa taꞌatuehay wo -Yt naku i yt naku i miꞌiria woꞌomoꞌakagꞌaia haria miꞌiria iꞌatuꞌe. Mio ti tõꞌẽ ahetawa kape iꞌatuꞌe uhyt Iasũ yat pe iꞌatuꞌe.
7 Yt naku i miꞌiria iꞌatuꞌe. Morekuat Sesa woꞌonapin hap yt taꞌatunug i katupono wẽtup -Aipotypot Iesui yn ni waku iꞌatuꞌe miꞌiria taꞌatuehay pirik wo Iasũꞌin piat pe.
8 Miꞌi hawyi morekuaria itotiaria iꞌatupyꞌahak kahato Pauruꞌin ete.
9 Miꞌi hawyi iheg me taꞌatupag. Miꞌi hawyi meiũran tuwat yne hawyi taꞌatukay kay Iasũꞌin. Miꞌi hawyi morekuat toꞌe -Pyno waku eweiwat ro iꞌatuꞌe Iasũꞌin me.
10 Miꞌi pote Iesui mohey haria tiꞌatupowyro uhyt Pauru uhyt Sira iꞌatupopy hamo tawa Tesaronika pyi. Miꞌi hawyi tuwat tawa Pereia kape wãtym upi. Miꞌi hawyi Pauruꞌin putꞌok iꞌatuꞌe hawyi teꞌeruwehytꞌok Iuteuria Etupana motypot yat pe.
11 Tawa Pereia totiaria taꞌatuꞌatupuẽti poꞌog yt iꞌakag heg i rakaria tawa Tesaronika piaria kai. Miꞌiria ti Tupana ehay wakuat ikyꞌesat kahato. Miꞌiria ti teꞌeruwemuꞌe kahato wuatꞌi eꞌat pe saꞌawyꞌi wuat mienoi ete. Tupana etiat taꞌatukuap teran koitypuo pywo pe koitypuo yt Pauruꞌin henoi hap taꞌatukuap teran.
12 Miꞌi tupono ti itotiaria typyꞌi kahato Iesui mohey haria ipakuptia teꞌeropyhuꞌat Kereku ywania sok haryporiaꞌin wakuaria ihainiaꞌin wakuaria teꞌeropyhuꞌat Iesui mohey haria itote.
13 Miꞌi hawyi ti tawa Tesaronika piaria Iuteuria tikuap taꞌyn aikowo Pauruꞌin wat hap. Iꞌewyte taꞌatukuap taꞌyn tawa Pereia pe aikotã toiꞌatumuꞌe itotiaria Tupana ehay wuat hap taꞌatukuap. Miꞌi hawyi tuwat raꞌyn hupi Pauru etiat miitꞌin mopyꞌahak hamo.
14 Miꞌi hawyi Iuteuria tiꞌatumoꞌakagꞌaia miitꞌin sok tawa Pereia pe. Miꞌi hawyi Pauru ywytꞌin Iesui mohey haria tipoꞌoro taꞌatueykeꞌet Pauru meremo yꞌy wato kape. Miꞌi hawyi tuwat raꞌyn Pauru wywo iwyriaꞌin iꞌapykok hamo maꞌato Timoteu Sira topyhuꞌat tawa Pereia pe.
15 Putꞌok iꞌatuꞌe Atena pe hawyi Pauru apykok haria teꞌeraꞌaipok teran i raꞌyn. Miꞌi hawyi Pauru toꞌe iꞌatuepe -Pyno ewehenoi o uhehay uhytꞌiꞌin Timoteu uhyt Sira pe e. Atikyꞌesat tõꞌẽ merep meikowo hap o ewehenoi iꞌatuepe e Pauru. Miꞌi hawyi teꞌeraꞌaipok i raꞌyn tawa Pereia kape Pauru ehay enoi hamo.
16 Miꞌi hawyi itote tuweran naꞌyn Pauru toineꞌen towyriaꞌin ekatup hamo. Miꞌi turan itote Pauru taꞌakasa tupanaria iãꞌãkap yn muap upi hawyi toto mohaty kahato miitꞌin miat imohey saꞌag hap koꞌi.
17 Miꞌi hawyi ti yne eꞌat pe Pauru tiꞌatumuꞌe Iuteuria Kereku ywania wakuaria Tupana motypot yat pe. Iꞌewyte muap upiaria pe tohenoi ikyꞌesat haria pe.
18 Miꞌi hawyi itotiaria woꞌonapin hat potmuꞌeria tokokaꞌat Pauru kape ihay kuap hamo. Miꞌi hawyi teꞌeroꞌe toꞌope muap upi -Toꞌiro ihay aat kaꞌap takat ehay kuap hamo iꞌatuꞌe. Taꞌi miꞌi ti wẽtup ywania kawiat tupanaria moherep hat iꞌatuꞌe toꞌope katupono Pauru henoi itote Iesui etiat aikotã guꞌuro pyi tuwẽtem i hap etiat.
19 Miꞌi hawyi taꞌatuereto Pauru yityꞌok Areopaku e hap kape. Itote taꞌatuereke Pauru taꞌatupyꞌasetpe hawyi teꞌeroꞌe tope -Uhyt pyno ehenoi ro koitywy aikotã aikotã hap sehay pakup uruepe iꞌatuꞌe.
20 Yt karãpe i uruikuap ehay ewywuat ihay rakat. Miꞌi pote ti ehay ewy hap uruehay uruikyꞌesat iꞌatuꞌe.
21 Katupono Atena piaria tikuap teran kahato yne kaipywiat sehay kat e kat e hap enoi hap koꞌi iꞌatuꞌe. Iꞌewyte yne hewyry rakaria itotiaria tikat kahato sehay pakup itote.
22 Miꞌi hawyi iꞌatupyꞌasetpe ipoĩꞌam naꞌyn Pauru miꞌi hawyi toꞌe -Uhytꞌiꞌin worohoꞌokuap taꞌyn aikotã eipe tupanaria iãꞌãkap koꞌi neꞌi wyti eweimotypot e Pauru Atena piaria pe.
23 Taꞌi gaꞌatpo ti uhewyry ehetawa puo hap tote ti araꞌakasa kahato ehetupanaria iãꞌãkap koꞌi e. Wẽtup heiam me ti yt kat i tupana iãꞌãkap itote atipuẽti maꞌato itote toineꞌen iwan yn -Yt uwe mikuap i Tupana eiam mesup e itote. -Yt aiꞌakasa hap i Tupana motypot hap eiam mesup e iwan me itote e Pauru. Yt eweikuap i ti miꞌi eipe maꞌato ti eweimotypot miꞌi e. Miꞌi wyti mesup atomoherep ehepe.
24 Taꞌi miꞌi Tupana sese ti aipytyp nug hat. Taꞌi wuatꞌi mesuwarote iminug koꞌi toineꞌen e. Miꞌi ti atipy piat yi totiat morekuat sese. Taꞌi Tupana sese yt toineꞌen kuap i aipo wuat aiminug teiam me e.
25 Miꞌi wyti wuatꞌi ereko hat. Ikai ti tukup yne sekat. Yt kat i wyti iwat iweteweru hap ipo pe e. Ikaipyi ti watoineꞌen. Ikaipyi ahehãite hap. Torannia ikaipywiat koꞌi e. Taꞌi yt miitꞌin minug kaipyi i wyti Tupana toineꞌen e.
26 Wẽtup ok miit kaipywiat yn ni yne ywania tohytpok mesuwat yi totiaria tukupteꞌen e. Taꞌi saꞌawyꞌi te ti Tupana sese yne ywania ahyt eiam mesuwat yi totiat nug hat. Aikope aikope wuatꞌi ywania eꞌyi toineꞌen hap Tupana tunug saꞌawyꞌi tuwanetup hap kaipyi. Ikupteꞌen porap neꞌi mesuwat yi totiat hamuat hap tutunug tuwanetup hawe nimo te e Pauru.
27 Miꞌi tã tutunug tuwemoherep teran miitꞌin kapiat haype. Toikyꞌesat kahato ti miitꞌin ewowiat hap e. Toikyꞌesat wuatꞌi ywania tikat muap ewowiat hap e. Toikyꞌesat topuẽti hap e. Yt pya hin i ti Tupana toineꞌen miitꞌin kai.
28 Taꞌi Tupana sese kaipyi ti aheiam ahewyry hap aheineꞌen hap e. Aikotã saꞌawyꞌi wuat eimuꞌe haria pypyꞌe hap nug haria teꞌeroꞌe hap ewy -Tupana mepytꞌin aito e hap ewy.
29 Kat poteĩ eiwanetup hawyi uru kawiat Tupana toineꞌen eweiꞌe eiwanetup hap kaipyi neꞌi. Aito ti meime Tupana mepytꞌin koꞌi e. Aito ti Tupana iãꞌãkap koꞌi e. Yt parata kawiat i ti Tupana. Yt nu kawiat i ti Tupana e. Yt mo wuat minug i ti Tupana e.
30 Saꞌawyꞌi te ti miitꞌin yt weꞌeg i sese tepiat haria pe Tupana sese yt kat e i te. Maꞌato mesup ti eweiꞌatoiat ro yt weꞌeg i hap ehetupanaria e raꞌyn yne miitꞌin me Tupana.
31 Mio ti Tupana wat miitꞌin airo hat toineꞌen naꞌyn hãpyk kahato. Miꞌi ti aru meiũran miitꞌin airo Tupana watno sio yt e hat. Hãpyk kahato ti aru tohenoi Tupana pe e. Miꞌi tã hamuat wyti watikuap taꞌyn katupono guꞌuro pywiat Tupana mihep taꞌyn miꞌi e Pauru Atena piaria pe.
32 Mio tã e hawyi iraniaꞌin toꞌokyryꞌi kahato Pauru ete. Guꞌuro pywiat ieineꞌen i wat e hap ete. -Toran naꞌyn uhyt iꞌatuꞌe apuete. Taꞌi uruikuap ti aru wẽtup eꞌat pe mio eꞌe hap etiat iꞌatuꞌe iraniaꞌin Pauru pe.
33 Miꞌi hawyi Pauru toto raꞌyn iꞌatupyꞌasetpyi maꞌato wẽtup ok wẽtup ok tuwemuꞌe raꞌyn Pauru wywo.
34 Miꞌi hawyi wẽtup ok mehin Tiunisiu tawa Areopaku piat timohey raꞌyn Iesui. Iꞌewyte wẽtup ok mana tamara timohey raꞌyn Iesui iraniaꞌin nywo.
