Iesui Potmuꞌeria 18:1-28
18 Miꞌi hawyi Pauru tuwẽtem naꞌyn tawa Atena pyi. Miꞌi hawyi putꞌok e tawa Kurintiu pe raꞌyn.
2 Miꞌi hawyi itote toipuẽti wẽtup ok Iuteu uhyt Akira e hap het rakat tawa Puntu kaipywiat. Katupono miꞌi kaipyi saꞌawyꞌi yi Itaria kape toto Akira. Mekewat eꞌat pe maꞌato toineꞌen morekuat Kautiu itote. Miꞌi morekuat maꞌato yt iwese i Iuteuria ete. Miꞌi pote toiꞌatupoꞌoro raꞌyn tetawa Huma pyi. Miꞌi pote uhyt Akira teharyꞌi Pisira wywo tuwat raꞌyn tawa Kurintiu kape.
3 Miꞌi tote ipotpap sokpe kawiat getap nug hap ete. Miꞌi hawyi Pauru tiꞌatupuẽti itote raꞌyn tomisepap nug hap ete. Miꞌi hawyi topyhuꞌat iꞌatuꞌyat pe raꞌyn iꞌatupowyro hamo. Miꞌi turan iꞌatupotpap kahato itote sokpe kawiat getap nug hap ete.
4 Maꞌato itote yne Sapatu eꞌat pe Pauru toto Tupana motypot yat kape toꞌywania atumuꞌe hamo. Toiꞌatuporerokosap teran tehay wo Kereku ywania Iuteu ywania Iesui kape.
5 Miꞌi hawyi uhyt Sira uhyt Timoteu putꞌok e itote yi Masetunia kaipyi. Itote taꞌatupuẽti hawyi Pauru ihay kahato topyꞌa pyi -Iesui ti Tupana Mipoꞌoro Aiporekuat nuat e.
6 Miꞌi pote Pauru ete iꞌatuhoiro kahato. Waĩ waĩꞌiꞌatuꞌe Iuteuria. Yt naku i urumuꞌe miꞌi tã iꞌatuꞌe. Miꞌi hawyi Pauru tekamisa wato hep hawyi toipehuruk pehuruk iꞌatuewowi. Miꞌi hawyi toꞌe iꞌatuepe -Eiwepyi kahato ti eiwemoewasat eipe. Pyno yt uhehay pyi i raꞌyn wyti aria kape eweiwat e. Miꞌi hawyi ti aru iraniaꞌin ywania kape raꞌyn pyno areto iꞌatuepiat henoi hamo e Pauru Iuteuria pe.
7 Miꞌi hawyi toto Pauru iraniaꞌin ywania muꞌe hamo. Miꞌi hawyi toto tekatuwy uhyt Titu wẽtup set Iutu yat kape imuꞌe hamo. Katupono miꞌi Tupana mohey hat toineꞌen. Iꞌewyte torannia iꞌyat piaria tuwat kahato Tupana motypot yat mekewat Iuteu ywania wat kape.
8 Meiũran Tupana motypot yat kaꞌiwat uhyt Kiripu tomohey raꞌyn Iesui yne toꞌyat piaria wywo. Iꞌewyte ipoityꞌi raꞌyn tawa Kurintiu piaria imohey haria. Miꞌi hawyi teꞌeruwesetꞌok yne raꞌyn.
9 Miꞌi hawyi wãtym muo imuꞌetu Pauru pe toꞌe Aikaꞌiwat -Yt erekenꞌẽ teiꞌo miitꞌin mupi. Yt epoꞌinik teiꞌo. Etiꞌatumuꞌe o haty wo e.
10 Taꞌi Uito areineꞌen ewywo. Yt uwe kuap i esatyꞌi satyꞌi mehin e katupono ti ipoityꞌi meiũwat tawa pe uimohey hanuaria e Iesui Pauru pe imuꞌetu.
11 Miꞌi pote wẽtup anu hawyi 6 ewaty Pauru tiꞌatumuꞌe kahato tawa Kurintiu piaria Tupana ehay wo.
Pauru Kiru Pyꞌasetpe Toineꞌen
12 Miꞌi hawyi itote toineꞌen wẽtup ok yi Akaia etuꞌisa Kariu e hap het rakat. Miꞌi hawyi Iuteuria Pauru ete iꞌatupyꞌahak i raꞌyn. Miꞌi hawyi taꞌatuereto raꞌyn Kariu kape Pauru hãꞌãg hamo.
13 -Meiũwat miit wyti waĩꞌaiꞌe hap yt ewy i inug kahato iꞌatuꞌe. Aiwat aheko yt ewy hin i toikyꞌesat miitꞌin miat Tupana motypot hap iꞌatuꞌe Iuteuria Kariu pe Pauru piat pe.
14 Miꞌi hawyi Pauru ihay teran maꞌato Kariu apuete e. Miꞌi hawyi toꞌe Iuteuria pe Kariu -Miitꞌin yt nakuat i sese koꞌi pyhyp hat ti uito e. Yt atikyꞌesat hin i eweterut uhewowi -Miꞌi miit yt hãpyk i uruwanetup hawe katupono urueko yt tutunug i kahato eweiꞌe hap het rakat e.
15 Eiperia eiwuꞌuka kahato sehay poꞌypyi set poꞌypyi seko poꞌypyi. Yt atikuap teran hin i waĩꞌeiꞌe hap koꞌi e Iuteuria pe. Pyno koitywy eipo pe raꞌyn eiwuꞌuka sehay wuat hap e Kariu.
16 Miꞌi hawyi toiꞌatuporenoꞌẽ raꞌyn toꞌyat pyi.
17 Maꞌato tuwat turan itotiaria Kereku ywania topytyk Iuteu Tupana motypot yat kaꞌiwat uhyt Sotene. Miꞌi hawyi Kariu ehamo taꞌatuꞌahyk ahyk itote. Maꞌato Kariu yt waĩꞌe hin i iꞌatuepe.
18 Miꞌi hawyi mekewat eꞌat pe toineꞌen motꞌi Pauru toꞌywytꞌin Iesui mohey haria yatype. Miꞌi hawyi Pauru tuwenoi iꞌatuepe hawyi toto raꞌyn yara puo yi Siria kape. Maꞌato totioto toꞌywyt Akira iharyꞌi Pisira wywo. Miꞌi hawyi putꞌok iꞌatuꞌe tawa Sẽkeia pe. Miꞌi hawyi itote Pauru toꞌe Tupana pe -Atunug wyti aru uiꞌe epiat hap Uikaꞌiwat e. Miꞌi pote atiꞌateneg pywo ti aru atunug uiꞌe hap kuap epiat hamo e.
19 Miꞌi hawyi tuwat i raꞌyn tawa Ewesu kape. Miꞌi hawyi itote totiat Akira teharyꞌi Pisira.
20 Miꞌi hawyi itotiaria teꞌeroꞌe -Uruikyꞌesat en ereineꞌen motꞌi meiũpe urumuꞌe hamo iꞌatuꞌe. Maꞌato Pauru yt tikyꞌesat i.
21 Miꞌi hawyi toꞌe -Pyno areꞌe ehepe Tupana tikyꞌesat pote ti aru araꞌaipok te ehewowi uiwyriaꞌin e Pauru. Miꞌi hawyi tuwenoi mehin Akira mana Pisira pe iraniaꞌin me hawyi teke yara wato pe hawyi toto raꞌyn tawa Ewesu pyi.
22 Miꞌi hawyi toto i raꞌyn tawa Sesareia kape i raꞌyn. Miꞌi hawyi putꞌok toꞌe hawyi tuwẽpowat Iesui mohey haria kape. Miꞌi hawyi toto i raꞌyn tawa Antiokia kape yi upi. Miꞌi hawyi itote toineꞌen motꞌi porapꞌi hawyi toto i raꞌyn.
23 Miꞌi hawyi yi Karasia puo yi Wiriteu puo hewyry i raꞌyn yne Iesui mohey haria atumoesaika hamo.
Pauru Hawyi Aporu Tawa Ewesu Pe
24 Wẽtup eꞌat pe hawyi mehin Apauru putꞌok e tawa Ewesu pe Aresãteria piat iꞌywaĩꞌĩ rakat saꞌawyꞌi te wuat Tupana etiat miwan kuap hat putꞌok e.
25 Miꞌi hawyi ihay se kahato ihay itote iwanetup hap hesaika kahato. Miꞌi ti Iuteu ywania. Topyꞌa pyi toiꞌatumuꞌe itote haty wo Iesui ete. Toikuap yne Iuwãu woꞌosetꞌok hat piat miitꞌin setꞌok hap koꞌi maꞌato miꞌi yn toikuap.
26 Miꞌi hawyi wẽtup eꞌat pe Tupana motypot hawe toiꞌatumuꞌe haty wo. Itote mehin Akira mana Pisira tipuẽti. Miꞌi hawyi taꞌatuereto taꞌatuwywo Tupana piat henoi poꞌog hãpyk hamo.
27 Miꞌi hawyi Apauru toto teran yi Akaia kape pote Iesui mohey haria tawa Ewesu piaria tunug popera Apauru miereto wo yi Akaia piaria Iesui mohey haria kape. Miꞌi tã wyti iꞌatuꞌe miwan me -Mehinꞌin ereke ro uhyt eweiꞌe o Apauru pe iꞌatuꞌe. Kat pote Apauru ti aiꞌewywuat Iesui mohey hat. Miꞌi tupono waku eiꞌyatype toineꞌen urutoꞌe iꞌatuꞌe mekewat miwan me. Miꞌi hawyi Apauru toto Akaia kape tawa Kurintiu kape. Putꞌok e itote hawyi toiꞌatupowyro kahato Tupana wehum hap kaipywiat Iesui mohey haria.
28 Toimoherep kahato Iuteuria pe Tupana ehay saꞌawyꞌi te wuat kaipyi aikotã aikotã Tupana tipoꞌoro Iesui Miitꞌin Porekuat no hap etiat toimoherep yne miitꞌin ehamo. Saꞌawyꞌi toꞌoꞌewy e maꞌato tohenoi yne hawyi yt kat iꞌatuꞌe kuap i raꞌyn. Miꞌi tã mehin Apauru tiꞌatumuꞌe topyꞌa pyi.
