Iesui Potmuꞌeria 2:1-47
2 Miꞌi hawyi 50 eꞌat Iesui guꞌuro pyi hap ete Iuteuria enuk wato hap eꞌat putꞌok e tawa Ierusarẽi me yahig wato sakpuat tokokaꞌat hap eꞌat kapiat taꞌatuwatetup hamo. Taꞌatueko wuatꞌi anu piat hap ewy. Miꞌi hap tote Iuteu ywania teꞌeruwaꞌatunug kahato kat e hap yi kat e hap tama kaipyi. Iꞌewyte Iesui mohey haria teꞌeruwaꞌatunug wy itote Iuteu ywania miꞌiria pote.
2 Miꞌi hap tote putꞌok e Iesui mohey haria ete moehay ewywuat. Taꞌatukuap moehay wasere wato puehay ewy. Miꞌi kaipyi iꞌatuehay wuatꞌi ywania kape. Teke iꞌatupyꞌasetpe moehay hap ewy.
3 Miꞌi hawyi iraniaꞌin teꞌeraꞌakasa Iesui mohey haria apypeke ariãty ewy. Miꞌi putꞌok e Iesui mohey haria apypeke atipy kaipyi ariãty ewywuat.
4 Miꞌi ti Tupana Paꞌãu tuwehik Iesui mohey haria ete. Miꞌi kaipyi kat pusu kat pusu puo iꞌatuehay kahato Tupana Paꞌãu kaipyi. Iraniaꞌin pusu taꞌatusepap taꞌyn iꞌatuehay kuap taꞌyn yt taꞌatuwat taꞌatupusu pykai i kat pote Tupana Paꞌãu kaipyi pote taꞌatukuap. Taꞌi Tupana Paꞌãu ihay kahato iꞌatuwẽ pyi yt iꞌatumikuap wuat pykai. Katupono Tupana ihay iꞌatuewowi topusu puo.
Iꞌatupusu Miitꞌin Tikuap
5 Itote tawa Ierusarẽi me tukupteꞌen kahato Iuteuria aikope pyi aikope pyi mesuwat yi wato hap oktan teꞌeruwaꞌatunug Tupana mohey kahato haria.
6 Miꞌiria pyꞌasetpe Iesui mohey haria iꞌatuehay. Miꞌi kape õꞌẽ haria wuatꞌi pusu puat ihay rakaria teꞌeruwanetup kahato -Aikotã tupono som taꞌatukuap aimotag hap aheꞌyi pusu yt karãpe i teꞌeremuꞌe aiwywo pykai iꞌatuꞌe. Miꞌi hap kape teꞌeruwaꞌatunug kahato miꞌi hap kuap hamo. -Toꞌiro watuwanetup iꞌatuehay kape iꞌatuꞌe.
7 Miꞌi hawyi waꞌatunug haria teꞌerahaꞌat kahato Iesui mohey haria kape. Miꞌi hawyi teꞌerewanetup kahato -Aikotã aikotã tupono taꞌatukuap aipusu wẽtup tawa kaipywiaria pykai iꞌatuꞌe. Aikotã aiwemotag hap aheꞌyi pusu koꞌi taꞌatukuap iꞌatuꞌe. Uruikuap ti meimuẽwuaria yt karãpe i ikohyewyry aheꞌyi puo iꞌatuꞌe. Yne meimuẽwat yi Karireia piaria wemotag haria koꞌi iꞌatuꞌe.
8 Aikotã tupono som taꞌatusuꞌat kuap aipusu iꞌatuꞌe. Aikotã som taꞌatusepap kahato aimotag hap pusu aiꞌewywuaria iꞌatuꞌe. Aikotã hap kaipyi som Iesui mohey haria meiũpiaria tikuap kahato yne yne aipusu koꞌi iꞌatuꞌe toꞌope.
9 Aikotã hap kaipyi som pyno aimotag hap koꞌi yi Patui ywania pusu yi Metu ywania pusu yi Eramita ywania pusu yi Mesuputamia ywania pusu yi Iuteu ywania pusu yi Kapatusia ywania pusu yi Puntu ywania pusu yi Asia ywania pusu koꞌi taꞌatusepap iꞌatuꞌe.
10 Aikotã tupono som aimotag hap koꞌi yi Wiriteu pusu yi Pãwiria pusu yi Esitu ywania pusu koꞌi yi Iripia pusu yi Sirene popy etiaria pusu taꞌatukuap iꞌatuꞌe. Aikotã hap kaipyi taꞌatukuap iꞌatuꞌe. Iꞌewyte aipusu Humanu pusu taꞌatusepap iꞌatuꞌe.
11 Taꞌi taꞌatukuap kahato yi Kereta ywania pusu iꞌewyte yi Arapia ywania pusu taꞌatusepap. Aikotã taꞌatukuap aiꞌywania Iuteu pe rania pusu. Aikotã tupono som miꞌi tã iꞌatuꞌe. Katupono aito ti watikuap iꞌatumisepap koꞌi aimoherep hap pusu pote iꞌatuꞌe. Taꞌi Tupana motypot hap koꞌi ete iꞌatuehay kahato iꞌatuꞌe. Taꞌi Tupana minug wakuap koꞌi ete iꞌatuehay kahato iꞌatuꞌe.
12 Miꞌi hawyi teꞌeruwanetup poꞌog -Pyno aikotã taꞌatunug iꞌatuꞌe teꞌeruwewanetup hawe hawyi teꞌeroꞌe toꞌope -Aikotã som taꞌatukuap aipusu yt teꞌeruwemuꞌe i aiwywo pykai i iꞌatuꞌe toꞌope.
13 Maꞌato iraniaꞌin toꞌokyryꞌi kahato itote -Taꞌi mahy pono wyti iꞌatuwepẽꞌã wyti. Miꞌi pote iꞌatuehay saꞌag iꞌatuꞌe saꞌag kahato Iesui mohey haria ete.
Peteru Ihay Kahato Imohey Hap Etiat
14 Miꞌi hawyi Peteru ipoĩꞌam towyriaꞌin 11 ok takaria pyꞌasetpe. Miꞌi hawyi toꞌe tehay pirik wo ihay rakaria kape -Aito Iuteu ywania sese miꞌi pote uhehay teran ehewowi tawa Ierusarẽi miaria torannia eiperia e. Atikyꞌesat kahato ti eweikuap uiꞌe hap e. Pyno ewetum no ewuare kaꞌa uhowowi uiꞌe hap uhehay kuap hamo e.
15 Yt mahy pyno i wyti worohoꞌomuꞌe eiperia eipusu puo uiꞌywania katupono yt uwe i ahetama piaria aat tuwẽtem turan temahy u ahetama pe e. Pyno eiꞌe mahy pono wyti e hap yt hin i e. Pywo ti rat uruiꞌatumuꞌe eipe Tupana ehay kaipyi e. Uruiꞌatumuꞌe eiperia uruꞌywania wuatꞌi etama kaipywiaria e Peteru tawa Ierusarẽi miaria pe.
16 Kat e kat e saꞌawyꞌi wuat Tupana ehay enoi hat Iueu mienoi 2.28-32 pe hap ewy koitywy topyhuꞌat mesuwe e.
17 Mio tã e Tupana tehay moherep hat Iueu pe -Yt pya i raꞌyn yi kahuro hamuat hap eꞌat kape ti aru Uito ahytmoi kahato wuatꞌi ywania pe Uipaꞌãu e wuatꞌi miitꞌin miat pe. Ehaꞌyruꞌin ehakiꞌytꞌin timoherep kahato aru uhehay wuatꞌi ywania pe e. Mekewat eꞌat pe atum kahato aru Uipaꞌãu kurumꞌin me hawyi wyti aru teꞌeraꞌakasa taꞌatumuꞌetu wuat ewy Uipaꞌãu mienoi ewywuat e. Iꞌewyte ehaꞌaseꞌiꞌin me atum kahato aru Uipaꞌãu hawyi ti aru uiꞌe hap taꞌatumuꞌetu wuat ewy taꞌatumoherep wuatꞌi ywania pe e.
18 Iꞌewyte ti aru ihainiaꞌin haryporiaꞌin wuatꞌi uheropat haria pe atum kahato Uipaꞌãu Wakuat mekewat eꞌat pe. Miꞌi hawyi ti aru uhehay yianmiat hap ewy taꞌatumoherep wuatꞌi ywania pe e Tupana saꞌawyꞌi tehay moherep hat Iueu miwan me e Peteru.
19 Mekewat eꞌat pe ti aru atipy pe atunug iwato kahato miitꞌin mowanetup hamuat miitꞌin miat uikuap hamuat wuatꞌi moꞌakasa hamuat e Tupana. Miꞌi hawyi ti aru suu aat hap kape teꞌerahaꞌat e. Miꞌi hawyi ti aru atimoherep wuatꞌi ehamo aria ẽty iꞌewyte ywyhig miitꞌin akasa hamuat itote e.
20 Miꞌi hawyi ti aru yt heremo i raꞌyn aat iꞌewyte yt heremo i waty e. Waty ti aru suu ewy raꞌyn ihup topyhuꞌat e. Miꞌi hap saipe pe ti aru Uimipoꞌoro Wuatꞌi Porekuat nuat sese raꞌyn putꞌok e teiam ikahu kahato rakat puo tuut tomotypot hawe raꞌyn putꞌok e. Heꞌat raꞌyn ikahu rakat e.
21 Miꞌi tupono uwe uwe hẽtup uhepe Tupana pe -Uhehakyeraꞌat ro En e uhepe haria wyti aru atiꞌatuehakyeraꞌat kahato e Tupana saꞌawyꞌi ahaꞌaseꞌi Iueu pe e Peteru Ierusarẽi miaria pe.
22 Miꞌi hawyi Peteru toꞌe haty wo itotiaria pe -Uikuap to eipe uhytꞌiꞌin manaꞌin eweikuap to uhehay uiꞌywania e. Mesup taꞌyn Tupana tunug naꞌyn toꞌe hap ewy e. Pywo ti rat toipoꞌoro raꞌyn Temiit Iesui tawa Nasare piat Aiporekuat nuat e. Iesui ti Tupana Mipoꞌoro ahehakyeraꞌat hamuat e. Pywo ti rat Tupana timoherep taꞌyn ahepe tomiꞌairo sese mesup e. Tominug wakuap yt uwe minug ewywuat i Iesui timoherep kahato ahepe. Iesui wakuat sese e Tupana wuatꞌi pe e. Miꞌi Miit timoherep Tupana esaika hap ahepe e. Yne tutunug ahehamo wuatꞌi ehamo e. Miꞌi kape eweiꞌakasa raꞌyn katupono ehehamo hewyry mesuwe e.
23 Tupana Mipoꞌoro eweiꞌauka raꞌyn ariaꞌyp posak saꞌag ete yt kat i saꞌag tutunug pykai e. Yt naku i kahato ewetunug tope maꞌato Tupana tum naꞌyn Tosaꞌyru ehepe iꞌauka hamo katupono iꞌauka hap toikuap yian mete e. Taꞌi ariaꞌyp posak ete neꞌi eweiꞌauka Haꞌyru. Yt nakuaria i ehay upi eweiꞌauka Imipoꞌoro Aiporekuat nuat maꞌato ikuꞌuro hawyi Tupana tihep i raꞌyn guꞌuro pyi. Totiõtem i raꞌyn Iesui e Peteru Iuteuria pe.
24 Taꞌi uiꞌe hap ewy Tupana tihep taꞌyn guꞌuro po pyi urukaꞌiwat. Toineꞌen i raꞌyn uiwyriaꞌin e. Yt ipohepap i guꞌuro ete e. Yt guꞌuro tipyhyp kuap i urupotypot e. Iesui poꞌog hesaika guꞌuro kai pote meremo guꞌuro ipohep Iesui ete pyi e.
25 Haꞌawyte kahato morekuat Tawi toꞌe -Uiporekuat heremo kahato uipyꞌa pe e. Taꞌi Miꞌi toineꞌen uipo sese kai wuatꞌi eꞌat pe miꞌi pote ti yt karamuo i arekenꞌẽ e.
26 Miꞌi tupono uiwepiit yn uipyꞌa pe. Iꞌewyte uhehay wepiit kahato rat katupono atomohey kahato Uipotypot e. Yt karamuo i ti aru Tupana tiꞌatoiat Uikaꞌiwat guꞌuro hap eiam me e.
27 Iꞌewyte ti aru yt karamuo i Uikaꞌiwat piit nem nakatno topyhuꞌat aru ikuꞌuro hawyi e. Yt karamuo i aru Uikaꞌiwat topyhuꞌat aria wato hoꞌopot hap tote e Tawi saꞌawyꞌi.
28 Uhewyry uheineꞌen ne turan Uikaꞌiwat timoherep kahato uhepe topuꞌap sese wuatꞌi eꞌat piat uheineꞌen hap kapiat muap e. Miꞌi tupono ti uiwepiit yn kat pote eꞌyatype aru areineꞌen wuatꞌi eꞌat pe Tupana e Morekuat Tawi haꞌawyte tomiwan me Saumu 16.8-11 pe e Peteru toꞌywania tawa Ierusarẽi miaria pe.
29 Uiwyriaꞌin uhehay hãpyk teran eiwywo e. Ahaꞌaseꞌi Morekuat Tawi wyti ikuꞌuro raꞌyn paĩ e. Nimo raꞌyn ti taꞌatusyp taꞌyn meiũpe e. Mio ti toĩ naꞌyn iwat woꞌosyp hap meiũpe tawa Ierusarẽi me e. Taꞌi wataꞌakasa raꞌyn iwat woꞌosyp hap kape aito katupono toineꞌen mesup meiũpe. Ikag koꞌi tukupteꞌen ne mesuwat woꞌosyp hap tawa pe are uhytꞌiꞌin manaꞌin e Peteru.
30 Aikotã aikotã Tupana mikuap ewy Tawi tiwan towepy hawuo -Tupana toꞌe uhepe saꞌawyꞌi -Tawi e meiũran emiariru kaipywiat wyti aru atimoherep esaipepiat Uimipoꞌoro Miitꞌin Potypot no sese e uhepe e Tawi yian mete Iesui piat pe.
31 -Taꞌi esaipepiat Uimipoꞌoro ikuꞌuro hawyi yt karãpe i ipiit nem nakat topyhuꞌat e Tupana Tawi pe. Yt atoiat hin i aria pe Uimipoꞌoro maꞌato tuwẽtem aru guꞌuro pyi Miꞌi Miit e. Ipiit yt topyhuꞌat i aru yi pe e. Ikuꞌuro hawyi toineꞌen pakup i aru e Tupana ahaꞌaseꞌi Tawi pe. Miꞌi pote toiwan miꞌi e hap ahepe Iesui ieineꞌen pakup i hap etiat e Peteru.
32 Manaꞌin Uhytꞌiꞌin gaꞌatpo Tupana tomoieineꞌen pakup i raꞌyn Tomipoꞌoro Iesui e. Pywo ti rat ipiit wẽtem guꞌuro pyi hap kape urutaꞌakasa i raꞌyn urutoria yne e. Pywo ti uruehamo Iesui tuwẽtem naꞌyn guꞌuro pyi e. Ipiit sese kape urutaꞌakasa uruto paĩ.
33 Taꞌi Tupana timowato kahato ti Tomipoꞌoro Iesui e. Miꞌi pe tutum Topaꞌãu Wakuat iꞌewyte mesup ti Iesui tum Ipaꞌãu uruepe aikotã eiꞌakasa hap ewy. Eimikuap hap ewy ti mio tutum Topaꞌãu Wakuat uruepe e.
34 Miꞌi hap ete Tawi toꞌe saꞌawyꞌi kahato tuwepy hawe -Uipotypot toꞌe Uikaꞌiwat pe -Taꞌi woromowato kahato poꞌog torannia kai e. Miꞌi pote eraꞌapyk to uipo sese kai Mehin katupono atimoherep teran wuatꞌi pe Uimimotypot poꞌog torannia kai En hap e.
35 Koran ti atiꞌatumoperupꞌi kahato yne yne ahewanikaptia e. Miꞌi pote epy ywytꞌokpype hap ewy atiꞌatuꞌakit yne ahewanikaptia e. Miꞌi turan waku eraꞌapyk to meiũpe uiꞌyatype Uimimotypot no uipo sese kawiatno e Tupana Uikaꞌiwat pe e Tawi tomiwan me e Peteru. Taꞌi yt tuwepiat i Tawi ihay tomiwan me Saumu 110.1 pe maꞌato Tokaꞌiwat etiat ihay e.
36 Uhytꞌiꞌin Manaꞌin pywo pe ti aiꞌywania tiꞌauka raꞌyn Tupana Mipoꞌoro ariaꞌyp posak ete e. Maꞌato eimiꞌauka Tupana tipoꞌoro Aiporekuat no. Miꞌi hap toimoherep ahepe mesup katupono toihep Miꞌi Miit hyp hawyi e. Miꞌi Miit ti Tupana Miꞌairo te Wuatꞌi Porekuat nuat e Peteru toꞌywania pe.
37 Mio tã e Peteru hawyi paa iꞌatuꞌe kahato raꞌyn. Taꞌatuhatyꞌu kahato raꞌyn. Miꞌi hawyi teꞌeroꞌe Peteruꞌin me -Yt naku i kahato urutunug Tupana Mipoꞌoro ete iꞌatuꞌe. Kat som pyno waku urutunug Tupana mowepiit hamuat iꞌatuꞌe haty wo 12 ok takaria pe.
38 Miꞌi hawyi Peteru tiꞌatuwesat -Eweipun no eiminug yt naku i hap koꞌi hawyi eiwemorem no Tupana kape hawyi eiwesetꞌok to urukaꞌiwat set upi e. Miꞌi hawyi meremo Tupana tiporop yne eiminug saꞌag koꞌi e.
39 Miꞌi ewetunug mote ti aru Tupana tum naꞌyn Topaꞌãu Wakuat ehepe aikotã saꞌawyꞌi toꞌe hap ewy tutum naꞌyn tomikyꞌesat ewy ehepe e. Mio Tupana hytmoĩ teran Topaꞌãu Wakuat ehepe. Mio tã e hap wyti topyhuꞌat ahepe iꞌewyte ahemiariruꞌin me e. Taꞌi yne imohey haria pe tutum neran Topaꞌãu Wakuat wuatꞌi ywania pe aikope aikope tukupteꞌen mesuwat mytyyp tote hap oktan tutum neran Topaꞌãu hãpyk takat. Uwe uwe hẽtup miꞌi hap koꞌi pote tutum neran tomiꞌairoria pe e.
40 Miꞌi hawyi Peteru ihay kahato topyꞌa pyi itotiaria pe -Uruꞌywania worohoꞌonapin neran haty wo e. Tupana tiꞌatuꞌapiheg kahato aru Tomipoꞌoro Aiporekuat nuat auka haria e. Miꞌiria ti aru hoꞌopot haria sese wo aru tukupteꞌen wuatꞌi eꞌat pe e Tupana. Miꞌi pote uiwyriaꞌin eiweꞌeg wo o Tupana eiꞌapiheg sese hap pupi e. Iraniaꞌin iꞌauka haria tuwat kahato aru taꞌatuꞌapiheg Tupana piat hap kape e. Yt eweiwat reiꞌo miꞌiria upi e. Waku paa eweiꞌe Tupana kape hawyi eweiꞌaipok to Tupana kape eiminug saꞌag hap kaipyi e Peteru haty wo itotiaria pe.
41 Miꞌi hawyi Peteru pe teꞌeroꞌe -Pywo kahato eꞌe hap mehin iꞌatuꞌe. Koitywy ti uruimohey raꞌyn Iesui Tupana miꞌairo uruehakyeraꞌat hanuat hap uhyt iꞌatuꞌe. Mekewat eꞌat pe 3 miu miit Iesui mohey haria ipakup takaria teꞌeropyhuꞌat itote. Miꞌi hawyi ipotmuꞌeria tiꞌatusetꞌok kahato raꞌyn yꞌy wo imohey pakup i haria.
42 Miꞌi hawyi ipotmuꞌeria tiꞌatunapin aat kaꞌap taꞌyn imohey pakup i haria yne Iesui e hap nug hamuat hap ete taꞌatuꞌatumuꞌe kahato. Miꞌi hawyi teꞌeruwaꞌatunug kahato toꞌoehay hamo. Miꞌi hawyi imohey haria tiꞌatumoꞌẽ kahato taꞌatumiꞌu toꞌope iꞌewyte teꞌeruwaꞌatunug kahato Tupana wywo toꞌoehay hamo.
43 Miꞌi hawyi Iesui potpoꞌororia 12 ok takaria tunug kahato Tupana mimoherep koꞌi yt miitꞌin minug kuap i koꞌi ewywuat taꞌatumoherep miitꞌin ehamo imohey hamuat. Iwato kahato taꞌatumoherep Tupana esaika hamo miitꞌin ehamo. Miꞌi hawyi iraniaꞌin teꞌeruwanetup kahato imohey haria mimoherep wakuap koꞌi kape hawyi yt kat iꞌatuꞌe kuap i.
44 Miꞌi hawyi Iesui mohey haria wẽtup ehay yn naꞌyn teꞌeropyhuꞌat itote. Wẽtup miit ewy taꞌatumohey. Miꞌi hawyi Iesui mohey haria tiꞌatumoꞌẽ toꞌope taꞌatuekat koꞌi.
45 Taꞌatueꞌyi taꞌatuweneru raꞌyn hawyi taꞌatumoꞌẽ yi saꞌup toꞌope aikotã waku hap ewy miitꞌin ehakyꞌeꞌi hap oktan hap ewy. Kat koꞌi kat koꞌi taꞌatuweneru raꞌyn hawyi iꞌewyte taꞌatumoꞌẽ taꞌatuekat saꞌup toꞌope aikotã waku hap ewy miitꞌin ehakyꞌeꞌi hap oktan.
46 Yne eꞌat pe raꞌyn Iesui mohey haria teꞌeruwaꞌatunug kahato Tupana motypot yat koro Ierusarẽi miat rote e. Wẽtup miit ewy kahato tukupteꞌen itote. Iꞌewyte yne eꞌat pe taꞌatunug kahato man pik pik hamuat tuwat tuereto toꞌoꞌyat kape. Iꞌewyte taꞌatumiꞌu taꞌatumoꞌẽ toꞌope. Miꞌi hawyi iꞌatuwepiit kahato tukupteꞌen toꞌope teꞌeruwete toꞌowese kahato. Iꞌatupyꞌa wasu kahato itote.
47 Teꞌeruwehum kahato haype Tupana kape aat kaꞌap. Miꞌi pote iraniaꞌin Ierusarẽi miaria teꞌeruwehum miꞌiria kape -Taꞌi Iesui mohey haria ti waku pe tukupteꞌen iꞌatuꞌe. Taꞌi miꞌiria hegyiꞌat rakaria paĩ iꞌatuꞌe. Miꞌi pote ti Aipotypot Iesui tiꞌatuwyꞌinug kahato yne eꞌat tomohey haria tomiehakyeraꞌat pakup i koꞌi.
