Iesui Potmuꞌeria 21:1-40
21 Miꞌi hawyi urutuwenoi yne raꞌyn hawyi urutuwat i raꞌyn yara wato puo. Miꞌi hawyi hãpyk urutuwat tawa Kui kape. Heꞌihatꞌok pe urutuwat tawa Hutei kape. Itote pyi urutuwat yi Patara kape.
2 Miꞌi hawyi uruipuẽti itote wẽtup yara wato yi Wenisia kapiat. Miꞌi pe urutuwehytꞌok hawyi urutuwat raꞌyn.
3 Miꞌi turan urutaꞌakasa ywypyiꞌa wato Sipiri e hap. Miꞌi hawyi urutuwat moran kai yi Siria kape. Miꞌi hawyi putꞌok urutoꞌe tawa Tiro tote. Miꞌi tote taꞌatuenotem yne taꞌatuekareꞌen.
4 Tawa Tiro tote uruipuẽti Iesui mohey haria hawyi urutukupteꞌen itote 7 eꞌat. Miꞌi hawyi itotiaria teꞌeroꞌe Pauru pe -Waĩ yt ereto teiꞌo tawa Ierusarẽi kape mehin iꞌatuꞌe Tupana Paꞌãu mienoi puo.
5 Tokosap mekewat eꞌat koꞌi hawyi urutuwat i raꞌyn. Yne Iesui mohey haria tuwat yne uruwywo ihainiaꞌin haryporiaꞌin hirokaria pya raꞌyn tawa kai. Miꞌi tote urutuwepỹꞌãtutuk yi kytꞌok tote. Miꞌi hawyi itote uruehay Tupana wywo.
6 Urutuwenoi uruwoꞌope hawyi urutuwehytꞌok i raꞌyn yara wato pe. Miꞌi hawyi teꞌeraꞌaipok i raꞌyn taꞌatuꞌyat kape.
Pauru Sesareia Tote Raꞌyn
7 Miꞌi pykai urutuwat raꞌyn tawa Puturemaita kape tawa Tiro pyi. Miꞌi tote urutoꞌopuẽti raꞌyn uruwyriaꞌin Iesui mohey haria wywo. Itote urutukupteꞌen wẽtup eꞌat iꞌatuwywo.
8 Heꞌihatꞌok pe urutuwat i raꞌyn tawa Sesareia kape. Putꞌok urutoꞌe itote hawyi urutuwat Tupana ehay sytpok hat Wiripi yat kape. Saꞌawyꞌi wuat 7 ok takaria Wiripi yat kape.
9 Miꞌi hawyi Wiripi sakiꞌytꞌin itote tukupteꞌen 4 ok haryporia makuptiaria Tupana ehay moherep haria.
10 Miꞌi tote urutukupteꞌen turan putꞌok e yi Iuteu kaipywiat wẽtup ok miit Tupana ehay moherep hat Akapu e hap het rakat.
11 Tuut uruewawi hawyi totat Pauru weꞌok kytyt hap. Miꞌi hawyi toikytyt topy koꞌi topo koꞌi Pauru weꞌok kytyt hamo. Miꞌi hawyi toꞌe Pauru pe -Meiko tã eĩ uhepe Tupana Paꞌãu henoi e. Meiko tã aru Iuteuria Ierusarẽi miaria ekytyt aru ereto tawa Ierusarẽi kape hawyi e. Miꞌi hawyi ti aru taꞌatuium naꞌyn iraniaꞌin ywania suraraꞌin me e Tupana ehay moherep hat Akapu Pauru pe.
12 Miꞌi hawyi -Waĩ yt ereto teiꞌo Ierusarẽi kape mehin urutoꞌe Pauru pe. Iꞌewyte itotiaria waĩꞌiꞌatuꞌe.
13 Maꞌato Pauru uruwesat -Waĩ yt eweiwak teiꞌo katupono haty ti uipyꞌa pe e. Tupana tikyꞌesat uipyhik hap pote iꞌewyte uito atikyꞌesat e. Yt arekenꞌẽ i uiꞌauka hap pupi tawa Ierusarẽi note Uikaꞌiwat Iesui set motypot hap ete.
14 Miꞌi pote urutoꞌe Pauru pe -Pyno yt eropyhuꞌat teran i uruehay upi miꞌi pote etunug no Aikaꞌiwat mikyꞌesat ewy mehin urutoꞌe.
15 Tokosap mekewat eꞌat koꞌi Wiripi yat piat hawyi urutunug waku yne hawyi urutuwat raꞌyn Ierusarẽi kape.
16 Miꞌi hawyi muap upi iraniaꞌin Iesui mohey haria tawa Sesareia pywiaria tuwat uruwywo Ierusarẽi kape. Iꞌewyte wẽtup miit Manasũ e hap het rakat tawa Sipiri piat yianmiat Iesui mohey hat tuut iꞌatuwywo wy e. Miꞌi pote teꞌeroꞌe -Miꞌi yat pe som waku watopyhuꞌat iꞌatuꞌe.
17 Putꞌok urutoꞌe Ierusarẽi note hawyi itotiaria Iesui mohey haria teꞌeroꞌe -Eiwehytꞌok to iꞌatuꞌe taꞌatuwepiit popuo.
Pauru Putꞌok E Tawa Ierusarẽi Me
18 Heꞌihatꞌok pe Pauru toto uruwywo Tiaku owa kape. Miꞌi rakirẽ itote teꞌeruwaꞌatunug yne Iesui mohey haria akagnia.
19 Miꞌi hawyi waku kahato sig worohoꞌopuẽti mehinꞌin e. Miꞌi hawyi Pauru henoi kahato aikotã Tupana tunug wakuap iraniaꞌin ywania yt Iuteuria i hakyeraꞌat hap ete.
20 Pauru mienoi taꞌatukuap hawyi -Waku kahato iꞌatuꞌe Tupana pe Tiakuꞌin. Miꞌi hawyi teꞌeroꞌe Pauru pe -Uhyt iꞌatuꞌe mio wyti typyꞌi kahato Iesui mohey haria meiũpe Iuteuria aiꞌywania. Miꞌiria ti imohey kahato Iuteuria eko.
21 Maꞌato miꞌiria ti yt ikuap i kahato etiat kat ere etiꞌatumuꞌe Iuteuria ywania iraniaꞌin pyꞌasetpiaria hap. -Eweiꞌatoiat ro Muisei einapin hap koꞌi eꞌe iꞌatuꞌe. Miꞌi hawyi waĩ yt ewehemurui ãpytek teiꞌo esaꞌyruꞌin eꞌe hap koꞌi iꞌatuꞌe. Waĩ yt ereke teiꞌo Iuteuria eko pe eꞌe hap iꞌatuꞌe Pauru pe.
22 Aikotã aru pyno watunug katupono taꞌatukuap ti aru putꞌok e e hap. Miꞌi hawyi ti aru tõꞌẽ kahato enapin hamo iꞌatuꞌe Pauru pe.
23 Pyno poꞌog waku etunug no urueko ewy uhyt iꞌatuꞌe. Katupono uruto wuaria pyꞌasetpe tukupteꞌen 4 ok ihainiaꞌin. Miꞌiria ti aru inug taꞌatupyꞌa piat -Urutunug aru taꞌatuꞌe Tupana piat hap.
24 Pyno erepukpukꞌok kahato ro iꞌatuwywo Iuteuria eko ewy. Miꞌi hawyi waku etum miꞌi hap saꞌup iꞌatuꞌe. Miꞌi hawyi ti aru waku eraꞌateneg iꞌatuꞌe. Miꞌi tã etunug mote ti aru meremo ekuap urueko nug hat en hap iꞌatuꞌe Pauru pe. Miꞌi pote ti aru aheko ewy raꞌyn Pauru tunug iꞌatuꞌe toꞌope taꞌatunapin.
25 Taꞌi uruhenoi raꞌyn saꞌawyꞌi iraniaꞌin ywania pe Iesui mohey haria pe. Yt ewetuꞌu teiꞌo yne tupanaria iãꞌãkap piat miium miꞌu puꞌi koꞌi urutoꞌe. Iꞌewyte huu sapo wo yt naku i aimiꞌu wo urutoꞌe. Iꞌewyte miꞌutꞌyp nik piat miꞌauka puꞌi yt naku i watuꞌu urutoꞌe. Iꞌewyte ihainia iwary wary haryporia heꞌaito heꞌaito yt naku i urutoꞌe. Miꞌi hawyi iraniaꞌin Iuteuria eko waku eweiwaure urutoꞌe saꞌawyꞌi urumiwan me iraniaꞌin ywania pe uhyt iꞌatuꞌe Ierusarẽi miaria.
Pauru Taꞌatupytyk Hamo
26 Miꞌi hawyi heꞌihatꞌok pe Pauru toto 4 ok ihainia wywo. Miꞌi hawyi teꞌeruwepitpitꞌok yne hawyi tuwehytꞌok taꞌyn Tupana motypot hawe. Taꞌatuhenoi teran kat eꞌat pe waku taꞌatuium Tupana pe taꞌatuhũ suu taꞌatuwepitpitꞌok hap enoi hamo -7 eꞌat aru urutunug uruꞌe hap ewy hap enoi hamo.
27 Putꞌok e irane raꞌyn iꞌatupitpitꞌok hap eꞌat. Miꞌi hawyi tõꞌẽ Iuteuria yi Asia kaipyi. Putꞌok iꞌatuꞌe hawyi teꞌeraꞌakasa Pauru Tupana motypot hawe. Miꞌi hawyi taꞌatumoꞌakagꞌaia Ierusarẽi miaria Pauru etiat iꞌatupyꞌahak hamo. Miꞌi hawyi taꞌatupytyk taꞌyn Pauru.
28 Miꞌi hawyi teꞌeroꞌe taꞌatuehay pirik wo -Suraraꞌin urupowyro ro eipe meiũwat miit pyhik hamo iꞌatuꞌe. Kat pote wuatꞌi puo yt naku i sehay enoi hat meiũ iꞌatuꞌe taꞌatuehay pirik wo. Taꞌi aiꞌywania ete aheko ete Tupana yat ete ihay saꞌag hat wyti meiũ miit iꞌatuꞌe. Kereku ywania kawiaria ti totopag Tupana motypot hawe. Miꞌi pote toimohun kahato meiũwat seiam wakuat iꞌatuꞌe Pauru piat pe.
29 Saꞌawyꞌi teꞌeraꞌakasa uhyt Towimu tawa Ewesu kaipywiat Pauru wywo Ierusarẽi me. Miꞌi hawyi teꞌeruwanetup yt pywo pe i -Taꞌi Pauru tioto raꞌyn ti mekewat wẽtup ywania Tupana yat kape iꞌatuꞌe teꞌeruwanetup yt pywo pe i.
30 Miꞌi hawyi toꞌowenka wenka Ierusarẽi miaria yne hawyi taꞌatupytyk Pauru hawyi taꞌatuherep yi upi hawyi taꞌatuꞌokenhyp taꞌyn Tupana motypot hap yat.
31 Miꞌi hawyi taꞌatuꞌauka teran naꞌyn maꞌato putꞌok e raꞌyn iꞌauka teran hat suraraꞌin akag ete. Taꞌi tuꞌuka irane ti yne Ierusarẽi miaria iꞌatuꞌe suraraꞌin me. Miꞌi hawyi surara akag koro teropoꞌok tesuraraꞌin iꞌatuꞌakag koꞌi wywo.
32 Miꞌi hawyi tuwehytꞌok meremo ipyꞌahak takaria pyꞌasetpe. Suraraꞌin akag koro teꞌeraꞌakasa hawyi meremo iꞌatupohep taꞌyn Pauru pok pok haria.
33 Miꞌi hawyi putꞌok e suraraꞌin akag koro hawyi tokosap Pauru kape. Miꞌi hawyi toꞌe temiitꞌin me -Ewetat ro mesuwat miit e. Eweipoꞌi poꞌi ro typy saity iheg nakat wo e. Miꞌi hawyi apo apo e -Uwe keĩ e pyno meiũ e. Kat keĩ tutunug pyno e.
34 Miꞌi hawyi iraniaꞌin typyꞌi rakaria haty wo yt toꞌoꞌewy i taꞌatuwesat. Miꞌi pote surara akag koro yt tikuap i aikotã hamuat hap. Miꞌi hawyi toꞌe temiitꞌin me -Ewetioto ro meiũwat aiꞌyat iheg nakat kape e Pauru piat pe.
35 Miꞌi hawyi tuwat raꞌyn hawyi putꞌok iꞌatuꞌe raꞌyn. Miꞌi hawyi suraraꞌin hupit taꞌatuꞌokpe tote Pauru miitꞌin pyꞌahok typyꞌi poityꞌi pote.
36 Miꞌi hawyi miitꞌin typyꞌi rakaria tuwat hupi taꞌatuehay pirik wywo -Eweiꞌauka ro eweiꞌauka ro iꞌatuꞌe.
37 Miꞌi hawyi Pauru taꞌatuereto irane raꞌyn suraraꞌin yat kape turan toꞌe iꞌatuꞌakag koro pe -Uhehay teran ewywo uhyt e Pauru iꞌatupusu puo Kereku pusu puo. Miꞌi hawyi surara akag koro toꞌe
38 -Etikuap apo pyno urupusu Kereku ehay e. En apo pyno yt Esitu piat i e. Nimuat miitꞌin mopyꞌahak morekuat etiat hat i apo en. Yt 4 miu woꞌopotꞌauka haria akag i apo en e Pauru pe ikoro.
39 Miꞌi hawyi Pauru tiwesat -Uito rat Iuteu e tawa Tasu piat yi Sirisia piat. Taꞌi tawa ypy wakuat piat uito e. Pyno uhehay teran kahato meimuẽwaria miitꞌin typyꞌi rakaria kape e Pauru surara akag koro pe.
40 Miꞌi hawyi -Waku uhyt e Pauru pe. Miꞌi turan Pauru yꞌam me toineꞌen am hap tote.
