Iesui Potmuꞌeria 22:1-30
22 Miꞌi hawyi Pauru ihay haty wo toꞌywania Iuteuria pe topusu puo -Uiꞌywotꞌin uheꞌywytꞌin e mesup ahenoi teran uhetiat sehay ehepe e. Miꞌi pote eweikuap to uhehay e toꞌauka teran haria pe.
2 Taꞌatukuap taꞌyn ihay taꞌatupusu puo Epereu pusu puat hawyi poꞌog iꞌatupoꞌinik taꞌyn poꞌog iꞌatuewaure kaꞌa. Miꞌi hawyi toꞌe i Pauru miitꞌin sem me.
3 -Uito rat eiꞌewy Iuteu ywania kawiat e. Uiꞌywãꞌĩ wyti tawa Tasu pe yi Sirisia pe e. Maꞌato uitag meiũwat tawa Ierusarẽi me. Meiũpe woꞌomuꞌe hat Kamarieu uimoweꞌeg hat yatype areineꞌen. Miꞌi hawyi yne woꞌonapin hap nimuat koꞌi aiꞌywania koꞌi watnuat wo uimuꞌe hãpyk kahato. Miꞌi koꞌi atunug naꞌyn haty wo Tupana ewowi aikotã ewetunug mesup hap ewy te atunug e.
4 Saꞌawyꞌi uipotpap kahato mesuwat mimohey pakup moma hamo. Miꞌi pote haty wo atiꞌatupoꞌi poꞌi ihainiaꞌin haryporiaꞌin muap pakup mohey haria. Miꞌiria atiꞌatumohan kahato. Areto raꞌyn iꞌatupyhik pyhik hamo iꞌatuꞌuka hamo e.
5 Uiminug koꞌi paꞌi koro tikuap yne. Iꞌewyte yne nagnia ikuap e. Iꞌatukaipyi ti saꞌawyꞌi atat popera hẽ to e hap aiꞌywania tawa Tamaku piaria kapiat nuat.
6 Miꞌi hawyi areto tawa Tamaku kape e. Yt pya i raꞌyn turan atposake irane turan iũteꞌen atipy kaipyi hẽtyhot kahato uiꞌapypueri wo e.
7 Miꞌi pote araꞌat yi tote. Itote atikuap ihay toꞌe uhepe -Sauru Sauru kat poteĩ uhatyꞌi hatyꞌi en e.
8 Miꞌi hawyi apo are -Uweĩ en kat eĩ eset Uhyt are. Miꞌi hawyi uiwesat -Uito ti meiũ Iesui tawa Nasare piat emisatyꞌi satyꞌi e.
9 Uiwywuat wat haria teꞌeraꞌakasa hẽtyhot hap kape maꞌato yt taꞌatukuap i ihay uiwywuat hap. Miꞌi hawyi apo are
10 -Kat aru atunug pyno Uikaꞌiwat are. Miꞌi hawyi uiwesat -Pyno erepoĩꞌam no hawyi ereto ro tawa Tamaku kape e. Itote ti aru wẽtup ok henoi epe kat koꞌi kat koꞌi uimikyꞌesat koꞌi eminug wuat e uhepe e Pauru.
11 Miꞌi tote ti yt uhehapytig i raꞌyn ariãty hot hap poityꞌi hawyi. Miꞌi hawyi ti uiꞌykesat eroto raꞌyn Tamaku kape uiwywuat wat haria e.
12 Miꞌi hawyi putꞌok are e Pauru. Miꞌi hawyi itotiat wẽtup ok uhyt Anania Tupana woꞌonapin hap nug hat toineꞌen itotiaria Iuteuria mimotypot kahato.
13 Wuatꞌi Iuteuria mimotypot miꞌi putꞌok e uheineꞌen hap tote uhowakai hawyi toꞌe -Ehapytig i ro uheꞌywyt Sauru e. Mio tã e hawyi meremo uhehapytig i raꞌyn hawyi arahaꞌat raꞌyn howawi e.
14 Miꞌi hawyi toꞌe uhepe Anania -Ahaꞌaseꞌiꞌin Etupana ti eꞌairo raꞌyn tomikyꞌesat kuap hamo. Toikyꞌesat wyti eraꞌakasa hãpyk takat miit kapiat hap e uhepe.
15 Toikyꞌesat etikuap iwẽ pyi ihay e. Meiũran aru etimoherep akasa hap koꞌi emikuap koꞌi wuatꞌi miitꞌin me hap uhyt e.
16 Koitywy kat poteĩ ereineꞌen motꞌi mesuwe e. Epoĩꞌam no hawyi eresetꞌok to e. Ehẽtup to Ekaꞌiwat pe -Uiminug saꞌag koꞌi etikoho yne ro mehin ere ro e Anania uhepe.
17 Meiũran araꞌaipok i raꞌyn Ierusarẽi kape tawa Tamaku pyi. Miꞌi hawyi Tupana motypot hap yat pe areineꞌen. Itote araꞌakasa uimuꞌetu.
18 Araꞌakasa ihay uiwywuat rakat -Erẽtem no merep tawa Ierusarẽi myi katupono ti aru yt taꞌatumohey i ehay uhetiat emienoi e uhepe.
19 Miꞌi hawyi atiwesat -Maꞌato mehin taꞌatukuap kahato uhetiat meiũpe aikotã saꞌawyꞌi atiꞌatupyhik atiꞌatupok pok emohey haria wuatꞌi woꞌomuꞌe hawiaria hap taꞌatukuap taꞌyn.
20 Iꞌewyte taꞌatukuap taꞌyn aikotã saꞌawyꞌi ehay enoi hat Etewãu suu okpun turan uito itote hẽ to waku eweiꞌauka ro are hap taꞌatukuap. Taꞌi iꞌauka haria esokpe uipo pe toineꞌen itote taꞌatuꞌauka Etewãu turan. Miꞌi hap taꞌatukuap uhyt are Uikaꞌiwat pe e Pauru.
21 Maꞌato uiwesat -Motoro e katupono woropoꞌoro pya kahato yt Iuteuria i muꞌe hamo e uhepe e Pauru Iuteuria pe.
Pauru Woꞌopehig Hawe Iraꞌyn
22 Mio tã e pote iꞌatuehay pirik kahato Pauru ete. Katupono sehay yt Iuteuria i muꞌe hamo e hap ete. Miꞌi hawyi teꞌeroꞌe -Yt naku i ti mio tã eꞌe hap iꞌatuꞌe taꞌatuehay pirik wo.
23 Miꞌi hawyi taꞌatuekamisa hep hawyi taꞌatuporokpun. Miꞌi hawyi yi wo mak mak iꞌatuꞌe ywaipe. Taꞌatupyꞌahak Pauru etiat haype.
24 Miꞌi pote suraraꞌin akag koro tiꞌatupoꞌoro temiitꞌin Pauru erut suraraꞌin yat koro kapiat hamo. Miꞌi hawyi toiꞌatupoꞌoro temiitꞌin Pauru pok pok hamo. Toikyꞌesat kat e Pauru topusu puo Iuteuria mopyꞌahak hap toikuap hamo.
25 Miꞌi hawyi taꞌatupoꞌi poꞌi Pauru saity miat pe kawiatno. Miꞌi turan Pauru apo e wẽtup ok surara akag me -Waku apo som uiꞌahyk ahyk yt morekuat ehay upi i katupono uito Humanu ywania pote yt naku i uipok pok Humanu ywania morekuat wywuat yt ahehay rakirẽ i te morekuat yt ehay pyi i te e Pauru surara akag me.
26 Tepiat ikuap hawyi toto henoi hamo suraraꞌin akag koro kape. Miꞌi hawyi toꞌe -Mehin eweꞌeg wo o katupono meiẽ ihainia ti sio Humanu ywania e.
27 Miꞌi hawyi tuut raꞌyn ikoro apo toꞌe Pauru piat hamo -Pywo apo en Humanuꞌin e. Miꞌi hawyi toiwesat -Taꞌi miꞌi ti rat uito e.
28 Miꞌi hawyi ikoro toꞌe -Taꞌi uito ti iꞌewyte atikyiꞌat wyti Humanuꞌin set haꞌup woity kahato e Pauru pe. Miꞌi hawyi Pauru tiwesat -Uito ti Humanu ywania uiꞌywot kaipywiat e. Uito yt atikyiꞌat i e katupono uiꞌywot Humanu e.
29 Miꞌi hap suraraꞌin tikuap hawyi teꞌeruwepik meremo Pauru yatypepyi ipok pok teran haria. Miꞌi hawyi ikoro tokenꞌẽ kahato kat pote tehay pywiat Pauru poꞌi poꞌi pote. Yt naku i roso Humanuꞌin watipoꞌi poꞌi iꞌatuꞌe.
30 Heꞌihatꞌok pe ikoro tikat kahato sehay kat pote Pauru Iuteuria tiꞌauka teran kahato hap. Miꞌi hawyi toipoꞌi poꞌi hawyi toiꞌatuwenka paꞌi kororia woꞌonapin haria. Miꞌi hawyi toterut kary Pauru. Miꞌi hawyi toimoherep iꞌatuepe.
