Iesui Potmuꞌeria 24:1-27
24 Miꞌi hawyi 5 eꞌat rakirẽ paꞌi koro Anania putꞌok e nagnia wywo iꞌatuehay enoi hat Teturu wywo. Miꞌi hawyi Teturu henoi morekuat Werisi pe Pauru etiat.
2 Taꞌatukay kay Pauru hawyi Teturu ihay saꞌag kahato Pauru mohit hamo. Toimoherep teran Pauru piat iꞌaparap hap itotiaria pe. Mio tã e -Morekuat Werisi e waku kahato en mehin e. Uruporekuat kahato en e miꞌi pote urutukupteꞌen waku pe kahato yne uruꞌywania wywo e. Taꞌi epo pe urutukupteꞌen mote poꞌog waku meiũpe torannia tawa kai e.
3 Nimo pyi te uruikuap kahato yne tawa puo ewaku hap mehin e.
4 Taꞌi urutuwehum kahato ete e. Maꞌato yt woromosero teran i uhehay wo pote meremo atimoherep uhehay epe epiat ikuap hamo mehin e.
5 Miꞌi miit Pauru wyti uruikuap kahato yt naku i hap ete e. Taꞌi sakpo e yt nakuat i miꞌi miit Pauru e. Miꞌi miit wuatꞌi Iuteuria wuatꞌi etawa puo Iuteuria toiꞌatumoꞌakagꞌaia tehay wo e. Pywo ti rat aiwuꞌuka hap nug hat miꞌi miit Pauru haꞌawytepyi e. Mekewat tawa Nasare piat yn waku Aipotypot e hat ehay enoi haria akag wyti miꞌi miit Pauru mehin e.
6 Gaꞌatpo uruipuẽti miꞌi miit Tupana motypot yat koro pe hawyi itote saꞌag kahato tutunug tuwekaipyi e. Miꞌi pote uruipytyk taꞌyn hawyi urutioto teran woꞌonapin hap kape apo urutoꞌe hamo sio waku tutunug sio yt urueko koꞌi ewy i hap kuap hamo e.
7 Maꞌato urutuwat turan tuut raꞌyn surara akag koro Irisia uruewawi e. Miꞌi hawyi tesuraraꞌin sok esaika hamo toihep urupo pyi meiũwat miit Pauru e.
8 Miꞌi pote mesup urutõꞌẽ ewowi -Pauru ti yt naku i kahato uruꞌe hamo mehin e Teturu morekuat Werisi pe.
9 Miꞌi hawyi iraniaꞌin Iuteuria -Pywo ti rat toꞌe hap ewy teꞌeroꞌe. Taꞌi yt naku hin i Pauru iꞌatuꞌe. Pywo kahato aiwy Teturu mienoi epiat mehin iꞌatuꞌe morekuat Werisi pe.
Pauru Ihay Raꞌyn Tomohey Hap Etiat
10 Miꞌi hawyi morekuat Werisi ipo merup raꞌyn Pauru kape waku ehay toꞌe hamo. Miꞌi hawyi Pauru ihay raꞌyn -Atikuap kahato etiat mehin katupono nimo pyi te urunapin hatno ereineꞌen. Miꞌi pote waku kahato ahenoi ehamo uiwetiat e.
11 Pyno atikyꞌesat etikuap aipok wo areto Ierusarẽi kape hap. Yt motꞌi hin i areineꞌen itote. Pywo pe ti 12 eꞌat yn areineꞌen Tupana motypot yat koro pe e.
12 Apo ere torannia itotiaria pe pote meremo taꞌatuhenoi epe aikotã perupꞌi puo areineꞌen itote hap e. Taꞌi itote ti yt uwe i uipuẽti yt naku i nug hap ete e. Yt kat areꞌe hin i itote miitꞌin nywo uhehay e. Yt atiꞌatumoꞌakagꞌaia hin i miitꞌin itote e. Waku pe areineꞌen itote. Yt miitꞌin wuꞌuka hamo i areineꞌen itote. Iꞌewyte yt tawa wato pe i wyti yt woꞌomuꞌe hawe i wyti atiꞌatumoꞌakagꞌaia paĩ e.
13 Maꞌato uikuasa iꞌatuepiat hap yt taꞌatumoheg kuap i e.
14 Pywo piat hap wẽtup yn taꞌatuhenoi uhetiat aikotã atimohey kahato mekewat tawa Nasare piat hap. Pywo kahato taꞌatuhenoi uhetiat aikotã mekewat uimimohey yn waku muap uruꞌywotꞌin Etupana kapiat hap. Miꞌi ti atimohey kahato. Miꞌi ete yn pywo iꞌatuꞌe e. Taꞌi atomohey kahato yne urueꞌaseꞌiꞌin mienoi Iuteu ywania watnuat miwan uruwoꞌonapin hap Tupana ehay e. Atomohey kahato wuatꞌi nimuaria miwan e. Miꞌi tã aru e hap Tupana ehay miwan miat atipywo yne mehin e Pauru morekuat Werisi pe wuatꞌi ehamo.
15 Atomohey kahato Tupana -Atunug aru e hap e. Taꞌi atomohey kahato ahehãite te aikuꞌuro rakirẽ wuat hap iꞌewyte miitꞌin wakuaria yt nakuaria i iꞌewyte teꞌeruwehymut rẽ aru e hap atomohey kahato uito e Pauru. Taꞌi iꞌewyte meimuẽwaria Iuteuria mimohey atimohey kahato mehin e.
16 Nimo pyi te mesup te yt atiꞌaparap teran i uhepiat imohey hap ete kat pote yt aremoti hin i uipyꞌa pe miitꞌin mupi e. Taꞌi Tupana tikuap pywo uiꞌe hap e.
17 Areineꞌen motꞌi iraniaꞌin nywo hawyi araꞌaipok tawa Ierusarẽi kape e. Myẽꞌym anu areineꞌen iraniaꞌin tama pe hawyi aterut urumiium wuat uruꞌywania kape Tupana piatnuat e.
18 Miꞌi turan iraniaꞌin Iuteuria yi Asia kaipywiaria uipuẽti Tupana motypot hamuat uiwepitpitꞌok hap turan e. Waku pe uipuẽti itote yt kat i myꞌahak hap ete areineꞌen turan e.
19 Yt kat i saꞌag nug hap ete areineꞌen itote uipuẽti turan e. Maꞌato uipuẽti hawyi iꞌatupyꞌahak kahato raꞌyn uhete yt kat i atunug pykai e. Miꞌi pote koityꞌi miꞌiria yt tõꞌẽ hin i meikowo mekewat sehay uhetiat enoi epiat hamo mehin e. Erahaꞌat ro e yt tõꞌẽ hin i miꞌiria kat pote teꞌeruwemoti kahato mesup yt nakuaria i pote e.
20 Maꞌato yne meiũwat Iuteuria uhehay kuap haria haꞌawytepyi te paĩ e. Wuatꞌi ehamo ahenoi uimimohey ete pote e. Miꞌi tupono waku teꞌeroꞌe epe kat koꞌi kat koꞌi som uiminug yt naku i hap koꞌi taꞌatukuap pote e. Maꞌato yt taꞌatukuap i pote yt tõꞌẽ i ewowi mehin e. Miꞌiria saꞌawyꞌi tukupteꞌen woꞌonapin hap tote uikuasa turan e.
21 Itote saꞌawyꞌi areꞌe iꞌatuepe haty wo aikuꞌuro rakirẽ watuwehymut i aru are uipyꞌa pyi mio tã are hawyi meremo iꞌatupyꞌahak uhete hawyi uiꞌauka teran e. Miꞌi uimimohey hap atomohey pote uherut mesup ewowi mehin katupono uiꞌauka teran atomohey kahato aikuꞌuro hawyi watoineꞌen i hap mehin e Pauru morekuat Werisi pe.
Pauru Ihay Werisi Hawyi Irisia Pyꞌasetpe
22 Miꞌi hawyi morekuat Werisi toꞌe -Porap atikuap yne eꞌe hap Pauru e. Miꞌi hawyi toꞌe iraniaꞌin me Pauru auka teran haria pe -Uiwyriaꞌin putꞌok e uhesuraraꞌin akag Irisia hawyi iwywo atikuap kahato yne mesuwat etiat uhytꞌiꞌin e iꞌatuepe katupono Werisi tikuap kahato haꞌawytepyi Pauru mimohey etiat aikotã wẽtup yn muap Tupana kapiat hap etiat. Miꞌi pote yt tutum i Pauru iꞌatuepe.
23 Miꞌi hawyi morekuat Werisi toꞌe woꞌopyhyp hat surara akag me -Etioto ro meiũwat Pauru ipyhik hamo uhyt e. Waku kahato etunug tuete. Waku iwyriaꞌin topiok hawyi taꞌatupoi itote e morekuat Werisi.
24 Heꞌihatꞌok heꞌihatꞌok tokosap rakirẽ morekuat Werisi tuut teharyꞌi Tusira Iuteu ywania piat wywo Pauru ehay kuap hamo. Miꞌi hawyi toikay kay Pauru tuwewawi katupono toikuap teran poꞌog Aipotypot Iesui mohey hap etiat.
25 Miꞌi hawyi itote Pauru henoi iꞌatuepe aikotã miꞌiria Tupana wywuat iꞌatupyhuꞌat hãpyk hamuat hap iꞌewyte aikotã waku waĩ watoꞌe aiwanetup saꞌag hawe hap katupono meiũran aru Tupana tomoherep uwe uwe temiitꞌin sese hap koꞌi uwe uwe yt temiitꞌin i hap ete Pauru henoi kahato iꞌatuepe. Miꞌi hawyi morekuat Werisi tokenꞌẽ imienoi pupiat haype toꞌe -Apuete Pauru yt uipohepap i te rat eꞌe hap kuap hamo e. Miꞌi pote meiũran aru worokay kay i raꞌyn miꞌi eꞌe hap kuap sese hamo e tokenꞌẽ toꞌapiheg aru Tupana piat hap pupi.
26 Maꞌato topyꞌa pe morekuat Werisi tohekatup Pauru kaipyi haꞌup nug hap -Pauru tum uhepe haꞌup iwato hawyi atihep miꞌi woꞌopyhyp hap pyi e tuwepe haype. Miꞌi pote toikay kay merepꞌe merepꞌe toꞌoehay iwywo hamo yne eꞌat pe saꞌup iwato hap kyewi.
27 Typy anu tokosap rakirẽ morekuat Posiu Wetu e hap het rakat topyhuꞌat morekuat Werisi saipe piatno. Miꞌi hawyi morekuat Werisi toto raꞌyn maꞌato totiat Pauru iheg me katupono toikyꞌesat tokyꞌe kahato Iuteuria piat hap poꞌog poꞌog tokyꞌe Tupana piat hap kai.
