Iesui Potmuꞌeria 25:1-27
25 Myẽꞌym eꞌat morekuat pakup Posiu Wetu toineꞌen morekuat no hawyi ipotꞌam tawa Ierusarẽi kape tawa Sesareia pyi.
2 Putꞌok e hawyi paꞌi kororia Iuteuria akagnia henoi raꞌyn morekuat Posiu Wetu pe aikotã aikotã Pauru miꞌaparap koꞌi.
3 Miꞌi hawyi taꞌatuhẽtup kahato morekuat Posiu Wetu pe -Mehin iꞌatuꞌe uruikyꞌesat kahato Pauru meiũpe uruetawa Ierusarẽi me i raꞌyn meremo iꞌatuꞌe morekuat pakup we katupono taꞌatuꞌauka teran Pauru muap totiat haype.
4 Maꞌato morekuat Posiu Wetu tiꞌatuwesat -Maꞌato Pauru iheg me kahato toineꞌen mesup uhetawa Sesareia pe e. Maꞌato meiũran wyti aru araꞌaipok i uhetawa kape.
5 Miꞌi hawyi waku eweiꞌatupoꞌoro ehetuꞌisaria uiwywo uhetawa Sesareia kape mekewat Pauru miꞌaparap koꞌi moherep itotiat hamo mehinꞌin e. Pauru yt naku i pote ti aru waku watiꞌapiheg kahato itote uhetawa Sesareia pe e tawa Ierusarẽi miaria akag koꞌi pe.
6 Miꞌi hawyi morekuat Posiu Wetu toineꞌen tawa Ierusarẽi me 8 eꞌat sio 10 eꞌat saĩke hawyi toto i raꞌyn tawa Sesareia kape. Miꞌi hawyi heꞌihatꞌok pe taꞌapyk sehay hap tote morekuat eiam note aikope morekuaria waku miꞌi miit iꞌatuꞌe sio yt naku i miꞌi miit iꞌatuꞌe hap tote taꞌapyk morekuat Posiu amyãtap tote. Miꞌi hawyi toꞌe tesurara akag me -Pyno waku eterut uhowowi mekewat uimipyhyp Pauru e.
7 Putꞌok e Pauru itote hawyi meimuẽwat Iuteuria akag koꞌi tawa Ierusarẽi kaipywiaria tiꞌapypueri Pauru hawyi taꞌatunug sehay saꞌag tuete maꞌato yt taꞌatumoheg kuap i Pauru kuasa hap.
8 Miꞌi hawyi Pauru taꞌam naꞌyn iꞌatupyꞌasetpe hawyi ihay kahato tuwenoi iꞌatuepe -Yt kat hin i ti rat saꞌag atunug e. Yt pywo pe i uikuasa e. Yt kat i atunug saꞌag eiꞌe hap ewy e. Yt karãpe i uhehay saꞌag atunug uiꞌywania Iuteuria woꞌonapin hap ete Tupana ainapin hap ete iꞌewyte yt karãpe i uhehay saꞌag atunug Tupana motypot yat koro ete iꞌewyte wyti yt karãpe i wẽtup sehay saꞌag atunug wuatꞌi porekuat koro mesuwat yi totiat Sesa ete e. Pywo ti rat yt kat ete i uhehay koꞌi koꞌi uhytꞌiꞌin eiꞌe hap ewy e Pauru haty wo tuwenoi.
9 Miꞌi hawyi morekuat Posiu Wetu topyhuꞌat teran Iuteuria upi. Toikyꞌesat kahato itotiaria towyriaꞌin wo hap toikyꞌesat kahato tuwemowato hap iꞌatuwanetup hawe. Miꞌi haype toꞌe Pauru pe -Uhyt Pauru e en apo epotꞌam neran Ierusarẽi kape. Itote wyti aru areꞌe epe sio en waku sio en yt naku i hap ete e morekuat Wetu Pauru pe.
10 Maꞌato Pauru tiwesat -Yt areto teran i raꞌyn Ierusarẽi kape mehin maꞌato wuatꞌi potypot koro Sesa po pe areineꞌen neran miꞌi piat uikuap hamo sio uito waku sio yt e hamo mehin e. Pywo ti rat etikuap taꞌyn yne uhetiat aikotã yt kat i uiminug saꞌag uiꞌywania Iuteuria ywania ete hap miꞌi pote yt areto teran i tawa Ierusarẽi kape miꞌiria upi maꞌato areto teran aiporekuat koro Sesa kape hawyi iwẽ pyi atikyꞌesat sehay pywuat sio uito waku sio yt e hap.
11 Uito yt nakuat i pote waku uiꞌapiheg maꞌato pywo ti rat yt kat i atunug saꞌag e. Pywo ti rat mekewat waĩꞌe hap iwato rakat ete atiꞌatuꞌaparap saꞌag mote pyno waku uiꞌauka uiminug saꞌag poꞌypyi. Maꞌato yt atunug i pote yt naku i uiꞌauka e Pauru. Maꞌato yt pywuat i uikuasa hap ete yt naku i uhum Ierusarẽi miaria pe e. Miꞌi pote koitywy uipopap kahato aiporekuat koro Sesa kape uikuap hamo waku sio yt e hamo e Pauru morekuat Wetu pe.
12 Miꞌi hawyi morekuat Wetu ihay raꞌyn tonapin haria wywo temiit poꞌog ikuap takaria wywo hawyi toiwesat Pauru pe -Pyno ereto teran aipotypot Sesa kape pote pyno waku woropoꞌoro Sesa kape toꞌe hap kuap hamo en waku sio yt e hamo e morekuat Posiu Wetu Pauru pe.
13 Heꞌihatꞌok heꞌihatꞌok pe morekuat Eroti Akipa teharyꞌi Perenisi wywo putꞌok iꞌatuꞌe tawa Sesareia pe tawa Ierusarẽi myi toꞌoehay toꞌopiat Wetu wywuat hamo.
14 Tukupteꞌen porapꞌi itotiat hawyi morekuat Wetu henoi raꞌyn iꞌatuepe yne Pauru etiat -Uheꞌyianmiat morekuat Werisi toto meiũpepyi turan totiat uipo pe wẽtup ok miit tomipyhik e.
15 Miꞌi hawyi areto tawa Ierusarẽi kapiat turan paꞌi kororia nagnia wywo tõꞌẽ uhowowi Pauru kuasa hamo e.
16 Taꞌatukyꞌesat uiꞌe Pauru piat hap iꞌauka hamo hap e maꞌato atiꞌatuwesat -Waĩ ne yt miꞌi tã i urutoria Humanuꞌin inug. Kat pote urueko ti miꞌi tã hap ete urutunug saꞌawyꞌi uruterut miit miꞌapiheg neran nakat ikuasa haria wywo morekuat kape iꞌatuehay kuap hamo pywo sio yt hap kuap hamo. Miꞌi tã ti urutunug uruto. Miꞌi hawyi waku iꞌatumikuasa henoi morekuat pe tewaku hap iꞌatuehamo are Iuteuria pe tawa Ierusarẽi notiaria pe e.
17 Miꞌi hawyi putꞌok iꞌatuꞌe toꞌowywo miꞌi hawyi meremo heꞌihatꞌok pe araꞌapyk morekuat ehay nug hap tote hawyi areꞌe -Eweterut ro mekewat ihainia Pauru e.
18 Irokirẽ iꞌatupoĩꞌam Pauru etiat ihay rakaria hawyi yt kat i taꞌatuhenoi iwato Pauru minug saꞌag uhepe maꞌato uimiekatup sehay yt teꞌeroꞌe hin i e.
19 Maꞌato Iuteuria wemohey hit hap etiat sehay koꞌi iꞌatueko etiat sehay yn taꞌatuhenoi uhepe. Mekewat miit Iesui e hap het rakat kuꞌuro hap etiat yn taꞌatuhenoi itote maꞌato Pauru toꞌe -Ikuꞌuro wen maꞌato ikuꞌuro sese hawyi ihãite i raꞌyn Iesui katupono tuwẽtem i raꞌyn guꞌuro pyi e iꞌatuepe e morekuat Wetu morekuat Eroti Akipaꞌin me.
20 Miꞌi hawyi uhehay teran waku sio yt e hap enoi hamo paĩ maꞌato yt kat are kuap i kat pote yt atikuap kahato i iꞌatueko hit koꞌi e. Miꞌi pote apo are Pauru pe -Epap apo tawa Ierusarẽi kape itotiaria piat ikuap kahato hamo wakuat en koitypuo yt e hap kuap hamo e.
21 Maꞌato Pauru toꞌe uhepe -Yt uipap i tawa Ierusarẽi kape maꞌato areto teran aiporekuat koro Sesa kape katupono miꞌi yn ni waku ikuap uhetiat e miꞌi pote uipap kahato howawi e uhepe. Miꞌi hawyi -Pyno waku eꞌe hap ewy areꞌe itote hawyi mesup meiũpe Pauru atimoheg naꞌyn e. Meiũran wyti atipoꞌoro teran wuatꞌi porekuat koro kape uiꞌe Iuteuria piat hap ewy e morekuat Wetu.
22 Miꞌi hawyi morekuat Akipa tiwesat -Uito iꞌewyte arewanetup teran meiẽwat Pauru ehay kape meiũpe mehin e. Miꞌi hawyi Wetu tiwesat -Pyno waku mehin e waku mukiꞌite aru pyno eweikuap mehin yne uimipyhik Pauru ehay e.
23 Heꞌihatꞌok pe hawyi tuut raꞌyn morekuat Akipa teharyꞌi Perenisi wywo morekuat Wetu yat wato kape mekewat miitꞌin woꞌonapin hap yat kape taꞌatuesokpe kahuria wywo tõꞌẽ. Teꞌeruwepainug kahato morekuaria ewy. Miꞌi hawyi tuwehytꞌok woꞌoehay hawe surara akagnia wywo. Wuatꞌi tawa Sesareia kaipywiaria tuꞌisaria wywo tuwehytꞌok. Miꞌi hawyi Wetu toꞌe tesurara koro pe -Eterut ro uhowowi uimipyhyp Pauru meikowo e. Miꞌi hawyi toterut Pauru hawyi toipag wuatꞌi õꞌẽ haria pyꞌasetpe.
24 Miꞌi hawyi Wetu toꞌe wuatꞌi ehamo -Morekuat Akipa uhehay teran ewywo iꞌewyte meiũpiat gupteꞌen haria wywo e. Eweiꞌakasa ro meiũwat ihainia Pauru kape e. Gaꞌatpo Iuteuria -Waku etiꞌauka miꞌi miit iꞌatuꞌe uhepe meiũpiaria Ierusarẽi kaipywiaria e.
25 -Maꞌato yt naku i are katupono yt kat i tutunug saꞌag sese iꞌauka hamo are. Miꞌi areꞌe hawyi Pauru toꞌe uhepe iꞌatuehamo -Uipap kahato aiporekuat koro Sesa kape uito waku uito sio yt naku i e hap kuap hamo e uhepe e.
26 Miꞌi pote atipoꞌoro aru areꞌe itote e Wetu. Pyno atipoꞌoro aru e maꞌato mesup te ti meiũwat miit etiat yt kat e hap kuap i te atiwan Sesa kape e. Pyno uipowyro ro kat som waku atiwan miwan me e. Pyno apo ereꞌe ro Pauru pe e Wetu Akipa pe katupono yt kat i tutunug saꞌag morekuat Sesa waĩꞌe hap ete e.
27 Pyno waku watiwan aiwanetup hap morekuat Sesa kape kat som kat som watipuẽti saꞌag Pauru minug hap oktan e. Miꞌi watunug hawyi waku pe areineꞌen Sesa wanetup hawe ahet yne wywo atipoꞌoro miwan hawyi e. Maꞌato atipoꞌoro uimipyhyp Pauru morekuat Sesa kape yt kan hamo i hawyi yt iweꞌeg hin i rakatno aru areineꞌen uiꞌakag wanetup hawe e morekuat Wetu morekuat Akipaꞌin me.
