Iesui Potmuꞌeria 26:1-32
26 Miꞌi hawyi morekuat Akipa toꞌe -Pauru e mesup taꞌyn waku ehay ewetiat uruepe e. Waku en pote etimoherep to ewaku hap uruepe e morekuat Akipa. Miꞌi hawyi Pauru tuwemopoĩꞌam tehay hamo toꞌywania Iuteuria eko ewywuat. Miꞌi pote itotiaria iꞌatupoꞌinik kahato.
2 Miꞌi hawyi Pauru ihay raꞌyn -Morekuat Akipa e waku kahato uruipuẽti en mehin katupono Iuteu ywania eko kuap kahato hat en. Haꞌawytepyi uruikuap uruwanetup hap kuap kahato hat en hap e. Miꞌi pote uhehay kuap kahato hatno aru ereineꞌen e. Miꞌi pote yt arekenꞌẽ hin i uhehay moherep epiat hamo uruꞌywania kyꞌe hat en mote e. Uiꞌywania Iuteu ywania iꞌatuehay koꞌi koꞌi kahato mesup uhete mehin maꞌato yt pywo pe i hap e.
3 Uimowepiit ro en katupono etikuap poꞌog iraniaꞌin kai Iuteuria eko koꞌi toꞌoehay awaĩ awaĩ hap koꞌi e. Miꞌi pote ehekatup kahato pyno uhehay mehin e katupono areineꞌen epo pe uheko kuap hamo sio uito waku rakat areineꞌen sio yt hap kuap hamo mehin e. Pyno ewetum no ehewaure kaꞌa koꞌi uhepe mehinꞌin manaꞌin e.
4 Taꞌi Ierusarẽi miaria Iuteu ywania uikuap kahato saꞌawyꞌi pyi uiꞌywãꞌĩ pyi te uitag hap uheineꞌen hap taꞌatukuap kahato torannia tawa Ierusarẽi miaria e.
5 Saꞌawyꞌi pyi te mesup te uikuap kahato uiꞌywania Iuteuria e. Miꞌi hap taꞌatuhenoi teran mote taꞌi taꞌatuhenoi kuap kahato katupono uimotag haria miꞌiria e. Haꞌawytepyi areineꞌen poꞌog iꞌatueko kuap kahato hatno torannia kai areineꞌen e. Taꞌi miꞌi pote uinug saꞌawyꞌi iꞌatueko yne moherep hat akag wo e. Taꞌi uhetꞌok itote saꞌawyꞌi uiꞌywania woꞌonapin hat koro iꞌatuꞌe saꞌawyꞌi e. Uiꞌywania tikuap kahato aikotã haꞌawytepyi wuatꞌi eꞌat pe iꞌatueko yne yne atunug aat kaꞌap hap.
6 Morekuat Akipa etikuap apo aikotã uruꞌywania iraniaꞌin woꞌonapin haria timohey kahato aikuꞌuro hawyi aipiit tuwẽtem i guꞌuro pyi hap e. Maꞌato iraniaꞌin uruꞌywania aikuꞌuro hawyi aikahuro sese raꞌyn wuatꞌi eꞌat pe e hap taꞌatumohey hap etikuap e. Pyno miꞌiria yt iꞌatuwese hin i uhete mehin katupono atimohey kahato aikuꞌuro hawyi Tupana aimoieineꞌen i aipiit wywo hap e. Taꞌi atimohey yne uipyꞌa puo katupono saꞌawyꞌi Tupana toꞌe uruꞌywania urueꞌaseꞌiꞌin me -Atimoieineꞌen aru eipiit eikuꞌuro hawyi e mesup te ahepe yne e.
7 Taꞌi uruꞌywania Iuteuria 12 ywania urutukupteꞌen are miꞌiria timohey kahato Tupana e hap -Worohoꞌomoieineꞌen aru e hap iꞌewyte uito atimohey kahato Tupana piat -Atimopakup i aru eipiit e hap uruꞌywania ewy e. Miꞌi pote ti rat iraniaꞌin -Urutoria yt imohey i haria -Waĩꞌiꞌatuꞌe uhepe aat kaꞌap e. Maꞌato atiꞌatumuꞌe te pote iraniaꞌin Iuteuria uipun neran uiꞌauka teran ehay pyi e. Morekuat Akipa e mesup taꞌyn koitywy ti putꞌok e raꞌyn Tupana piat -Atunug aru e hap. Gaꞌatpo toihep taꞌyn guꞌuro pyi Tosaꞌyru sese ipiit wywo e. Miꞌi uiꞌe hap monik hamo uiꞌauka teran mesup eipo wo uiwyriaꞌin e Pauru.
8 Kat poteĩ yt eweimohey i mekewat ikuꞌuro rakaria yne aru Tupana tiꞌatuhymut guꞌuro pyi e hap. Kat pote yt imohey haria wo i eweikupteꞌen eipe e. Kat poteĩ yt eweimohey i watoineꞌen ne aikuꞌuro hawyi e hap e katupono ainug hat Tupana aimoieineꞌen kuap katupono tohaꞌawynug naꞌyn toihymut raꞌyn Tosaꞌyru toꞌe hap ewy e. Miꞌi tupono eweimohey ro e.
9 Saꞌawyꞌi te maꞌato eiꞌewy yt atimohey hin i e. Mekewat eꞌat pe ti yt uiwese hin i areineꞌen yne imohey haria ete e. Pywo ti rat saꞌawyꞌi mekewat Iesui tawa Nasare kaipywiat ewanikap koro wo areineꞌen e. Mekewat eꞌat pe atiꞌatumoma teran Iesui set mesuwat yi totepyi e. Miꞌi haype atiꞌatumoweityk teran yne yne imohey haria e. Yt naku i yn atunug Iesui ete saꞌawyꞌi e.
10 Saꞌawyꞌi tawa Ierusarẽi me atiꞌatuꞌuka Iesui emiit yt naku i hap ewy atunug miꞌiria ete e. Iraniaꞌin atiꞌatupyhyp woꞌopyhyp hawe imohey haria wakuaria Tupana ewywuaria pykai e. Mekewat eꞌat pe paꞌi kororia -Waku watiꞌatuꞌuka miꞌiria sio yt iꞌatuꞌe uhepe. Miꞌi pote -Toꞌiro watiꞌatuꞌuka areꞌe yn. Miꞌi hawyi paꞌi kororia miꞌairo wo areineꞌen Iesui mohey haria moweityk tawa Ierusarẽi piat hamo e Pauru.
11 Karania wo wewuatꞌi atiꞌatupok pok imohey haria wuatꞌi Iuteuria wat yat Tupana motypot yat pe e. Atikyꞌesat kahato waureꞌiꞌatuꞌe mekewat iꞌatuepiat Iesui mohey hap ete hap e. Marakꞌa wo sese areineꞌen iꞌatuete. Iꞌatuehay saꞌag Tupana etiat hap atikyꞌesat kahato e. Saꞌawyꞌi tawa iraniaꞌin atiꞌatupugha atiꞌatuꞌapiheg imohey haria e.
12 Miꞌi hawyi areto tawa Tamaku kape imohey haria itotiaria atusatyꞌi satyꞌi hamo e. Uipo pe atioto miwan paꞌi kororia kaipywiat uipoꞌoro hap imohey haria yne apiheg hamuat hap e Pauru.
13 Miꞌi hawyi maꞌato atposake turan uito muap upi turan araꞌakasa ariãty hapyke kahato rakat kape poꞌog poꞌog aat hapyke hap kai hap kape arahaꞌat mehin e. Yt uheso hin i morekuat Akipa e katupono iraniaꞌin suraraꞌin uhupiaria tikuap yne mesuwat uiꞌe hap pywuat e hap katupono miꞌiria iꞌewyte teꞌeraꞌakasa yne mekewat muap upiat ariãty hapyke uhetiat hap kape e.
14 Miꞌi ariãty putꞌok e kahato uhete hawyi araꞌat kahato raꞌyn yi kape hawyi atikuap sehay uity pusu puo mekewat uruꞌywania Epaiku pusu puo -Sauru Sauru e kat e hap upi kat e hap upi uimosatyꞌi satyꞌi kahato en mehin e. Karãpe watiꞌatumoewyry aihũria Kawaru koꞌi moryꞌa koro iãi wo hawyi tuwat meremo maꞌato aihũ yt toto teran i hawyi tuꞌuka toꞌopy wywo mekewat moryꞌa ete. Miꞌi hawyi poꞌog poꞌog haty hap toipuẽti e. Miꞌi e hap ewy ereineꞌen. Miꞌi pote poꞌog haty raꞌyn eete mehin e uhepe mekewat ariãty toineꞌen kahato uhete turan e.
15 Miꞌi hawyi apo are -Uweĩ En Uikaꞌiwat are.
16 Miꞌi hawyi uiwesat -Uito ti Iesui emiꞌapiheg apiheg e hawyi erepoĩꞌam no Sauru e katupono woronug neran en uheropat hatno e. Mesup woroꞌairo en uhemiit no uhehay moherep hamo uimoherep wuatꞌi ywania kapiat hamo woroꞌairo mesup Sauru e uhepe. Atikyꞌesat etimoherep miitꞌin me ewaꞌakasa mesuwiat hap iꞌewyte atikyꞌesat etimoherep miitꞌin me yne uhepiat emoꞌakasa mesuwiat hap mehin e uhepe e.
17 Waku eꞌywania kape iꞌewyte iraniaꞌin ywania kape woropoꞌoro maꞌato areineꞌen aru ewywo ewanikaptia po piat ereineꞌen turan. Epowyro hat areineꞌen aikope aikope ereto hap upi e uhepe.
18 Woropoꞌoro en wuatꞌi miitꞌin kape e. Miꞌiria tukupteꞌen aikotã yt ihapytig i rakaria ewy katupono yt karãpe i teꞌeraꞌakasa te Tupana taꞌatupyꞌa pe yt taꞌatumohey i pote. Miꞌi pote woropoꞌoro en iꞌatumoehapytig hamo mekewat iꞌypyrywiat hap kaipyi uheꞌariãty hot kapiat iꞌatumoꞌakasa hamo e. Mesuwarotiaria yt uimohey i te haria yne ahiag po pywiaria tukupteꞌen e. Miꞌi pote woropoꞌoro en ahiag pohari hamo e. Miꞌi hawyi ti aru uipo piaria wo raꞌyn miꞌiria tukupteꞌen uhyt e uhepe itote e. Miꞌi hawyi ti aru wakuaria uimepytꞌin no raꞌyn teꞌeropyhuꞌat e. Uimohey haria ti aru uhaꞌyruꞌin uhakiꞌytꞌin sem koꞌi myꞌasetpe ahytmoi wuatꞌi eꞌat pe etiꞌatumuꞌe uhetiatno hawyi e uhepe. Miꞌi tã ti aru atunug uhyt e uhepe mekewat muap upi tawa Tamaku kapiat uhewyry turan e Pauru.
19 Morekuat Akipa e miꞌi hawyi uimiẽtup atipy kaipywiat sehay yt atiwaure hin i mehin e. Taꞌi toꞌe uhepe e hap ewy atunug aat kaꞌap haꞌawytepyi mesup te miꞌi yn atunug mehin e. Taꞌi atunug naꞌyn Tupana mimoherep imikyꞌesat oktan e.
20 Miꞌi hawyi areto raꞌyn tawa Tamaku kape hawyi itote atiꞌatumuꞌe kahato itotiaria -Eweiꞌatoiat ro yne eiminug saꞌag koꞌi hawyi eweiꞌaipok to Tupana kape hawyi ewetunug no eipyꞌa pyi wakuat miitꞌin me eimimohey moherep wuatꞌi piat hamo are yn tawa Ierusarẽi miaria pe. Iꞌewyte yi Iuteu totiaria iꞌewyte aikope aikope iraniaꞌin ywania tukupteꞌen hap totiaria atiꞌatumuꞌe urukaꞌiwat ete e.
21 Miꞌi hap upi gaꞌatpo iraniaꞌin uiꞌywania Iuteuria tawa Ierusarẽi miaria iꞌatupyꞌahak kahato uhete hawyi taꞌatupoꞌoro suraraꞌin uiꞌauka hamo e.
22 Maꞌato Tupana uhehakyeraꞌat raꞌyn porap uiꞌauka hap turan iꞌatupo pyi e. Taꞌi uihep esuraraꞌin iꞌatupo pyi e. Waku kahato rasig Tupana katupono mesup areineꞌen mesuwe ihay moherep hamo toꞌe hap ewy e. Wẽtup ehay yn ahenoi kahato ihakyꞌeꞌi rakaria pe hekat rakaria pe. Wẽtup ehay yn ahenoi henoi mekewat saꞌawyꞌi wuat sehay Tupana mimoherep yianmiaria ehay nimuaria ehay ewywuat Muisei ehay ewywuat yn ahenoi henoi wuatꞌi pe iꞌewyte ehepe e Pauru.
23 Aikotã yianme taꞌatuhenoi -Aipotypot Tupana Mipoꞌoro tuut aru hoꞌopot hamo guꞌuro pywiat wẽtem saꞌawyꞌi wuat hanuat iꞌatuꞌe hap ewy areꞌe yn e. Aikotã saꞌawyꞌi Tupana ehay moherep haria taꞌatuhenoi hap ewy aikotã Tupana Mipoꞌoro topyhuꞌat aru hẽtyhot rakat ewy Iuteu ywania pe iꞌewyte iraniaꞌin ywania pe iꞌypyryp hap hep hamo hap taꞌatuhenoi yianme hap ewy yn uhehay e.
24 Saꞌawyꞌi wuaria mienoi ewywuat yn ahenoi kahato te mesup morekuat Akipa e Pauru turan morekuat Wetu ihay tek taꞌyn tehay pirik wo -Pauru esoꞌok kahato raꞌyn uhyt e. Taꞌi eremoesoꞌok taꞌyn eremuꞌe poityꞌi pote e Wetu.
25 Maꞌato Pauru tiwesat -Yt uhesoꞌok hin i pykai i morekuat wakuat Wetu e. Maꞌato ti ahenoi ehepe pywuat sese sehay. Yt hesoꞌok takat ehay ewy i uhehay e.
26 Taꞌi morekuat Akipa tikuap kahato pywuat uiꞌe hap yne katupono miꞌi pote yt aremoti hin i uhehay pupi katupono yt migꞌi wo hin i Iesui tuwẽtem guꞌuro pyi e. Iꞌatu kahato Iesui kapiat akasa haria Ierusarẽi me e. Iꞌewyte morekuat Akipa tiꞌatukuap kahato yne Miꞌi Miit etiat are e Pauru morekuat Wetu pe.
27 Miꞌi hawyi Pauru toꞌe -Morekuat Akipa etipywo apo Tupana ehay moherep haria saꞌawyꞌi wuaria mienoi koꞌi Miꞌi Miit etiat e. Taꞌi atikuap kahato uipyꞌa pe imohey hat ereineꞌen hap e Pauru.
28 Miꞌi hawyi morekuat Akipa tiwesat -Paĩ porap uinug Iesui mohey hatno en e Pauru pe.
29 Miꞌi hawyi Pauru tiwesat -Miꞌi hap yn ahẽtup Tupana pe e. Atikyꞌesat kahato yne eipe urupotypot Iesui mohey haria uiꞌewy hap yn ahẽtup aat kaꞌap Tupana pe. Waku pe kahato Tupana Mipoꞌoro mohey sese haria eweikupteꞌen uiꞌewy hap paĩ. Atikyꞌesat uipyꞌa pe yne eipe uiꞌewy hap e. Maꞌato yt atikyꞌesat i eipe woꞌopyhyp hawe uito ewy hap e. Toran naꞌyn uiꞌe hap mehinꞌin manaꞌin e Pauru.
Pauru Toto Teran Huma Kape Pote Iheg Me Te Toineꞌen
30 Miꞌi hawyi morekuat Wetu ipoĩꞌam morekuat Akipa eharyꞌi Perenisi wywo hawyi yne itotiaria iꞌatupoĩꞌam hawyi tuwat yne raꞌyn Pauru pyi.
31 Morekuaria tuweran hawyi -Pywo ti rat yt kat e i toiꞌaparap iꞌatuꞌe toꞌope. Yt naku i miꞌi miit ewywuat woꞌopyhik hawe iꞌatuꞌe toꞌope. Yt kan hamo i watiꞌauka miꞌi miit Iuteu ywania mikyꞌesat ewy katupono yt toiꞌaparap hin i iꞌatuꞌe morekuaria toꞌope Pauru piat pe.
32 Miꞌi hawyi morekuat Akipa toꞌe morekuat Wetu pe -Meiẽwat emipyhyp Pauru waku pe toineꞌen uiwanetup hawe e. Pyno waku etihep mekewat woꞌopyhyp hap wyi. Etikyꞌesat pote waku raꞌyn mipoꞌi pok wen maꞌato toto teran morekuat koro Sesa kape pote waku watipoꞌoro miꞌi miit imikyꞌesat ewy e morekuat Akipa morekuat Wetu pe.
