Iesui Potmuꞌeria 27:1-44
27 Miꞌi hawyi morekuat Wetu toꞌe tesurara koro Iuriu pe -Mehin e atipoꞌoro teran uimipyhik Pauru iꞌewyte iraniaꞌin uimipyhik koꞌi aipotypot koro Sesa kape ahetama Itaria kape e. Pyno etikay kay ro ahesuraraꞌin sem hawyi etum no Pauru iꞌewyte iraniaꞌin iꞌatuepe hawyi eweipoꞌoro ro miꞌiria yne aheꞌyara koro pe aipotypot Sesa kape ahetama Itaria kape e.
2 Miꞌi hawyi urutuwehytꞌok taꞌyn yara wato tawa Ãtamitinu kaipywiat pe. Miꞌi hawyi urutuwat yi Asia hypopy upi. Miꞌi hawyi urutuweꞌapun ihy pya kape. Uruwywo toto Aritaku yi Masetunia tawa Tesaronika kaipywiat.
3 Heꞌihatꞌok pe putꞌok urutoꞌe tawa Sitau me. Miꞌi hawyi surara koro Iuriu iwese kahato tomipyhik Pauru ete -Waku ereto ewyriaꞌin yat kape e. Waku erenuk itote e Pauru pe.
4 Miꞌi hawyi urutuwat i raꞌyn yara koro puo tawa Sitau myi maꞌato wasere yt urupowyro i kahato. Uruowa kape pote urutuwat yi hit yꞌy pyꞌasetpiat Sipiri kape wasere reꞌym me yityꞌok og muo urutuwat.
5 Yi hit Sipiri totepyi urutuwat yꞌy wato sakpo pya wuat yi Sirisia kape yi Pãwiria upi. Itote pyi putꞌok urutoꞌe tawa Mira yi Irisia tote.
6 Tawa Mira tote surara akag tipuẽti wẽtup yara wato tawa Aresãtere kaipywiat yi Itaria kapiat. Toipuẽti hawyi urupag yara wato pe.
7 Miꞌi hawyi urutuwat hepama karania eꞌat neꞌi urutuwat wasere owa kape yi hit yꞌy pyꞌasetpiat yi ywypyiꞌa Kereta kape. Miꞌi hawyi porap putꞌok urutoꞌe yi a tawa Nitu ete maꞌato wasere wato poityꞌi pote urutuwat yꞌy sakpo wasere ywyt puo yi a yꞌy pyꞌasetpiat Kereta kape urutuwat ywypyiꞌa Saumuna sakpo. Yityꞌok og muo urutuwat teran maꞌato niatpo kahato urutuwat.
8 Miꞌi hawyi putꞌok urutoꞌe wẽtup wã note misetꞌok wã wakuat e hap tote yt pya i tawa Iraseia pyi.
Yt Nakuaria I Teꞌeropyhuꞌat Muꞌap Tote
9 Miꞌi hawyi wasere poityꞌi yꞌy ete pote aipohari kahato itote. Iꞌaman mot hap eꞌat yt pya i pote wasere kahato toineꞌen yꞌy wato ete. Miꞌi hawyi yt uruewyry kuap i aat kaꞌap.
10 Miꞌi hawyi Pauru toꞌe yara wato piaria pe -Uhytꞌiꞌin e atikuap taꞌyn uipyꞌa pe yt naku i tuut ahewyry hap ete. Wahoꞌopot kahato irane ti. Taꞌi aipohari irane hap ti atikuap taꞌyn. Taꞌi yt naku i hamuat wyti ahekareꞌen koꞌi ete aheꞌyara koro ete iꞌewyte aheineꞌen hap ete tuut hamuat e Pauru yara piaria pe.
11 Maꞌato surara akag timohey poꞌog yara wato ãpokiat irokirẽ yara kaꞌiwat ehay poꞌog Pauru ehay kai. Maꞌato Pauru ehay yt totomohey hin i Tupana e hap pykai.
12 Miꞌi pote -Mekewat wã tote yt naku i iꞌaman mot pe watukupteꞌen mesuwe iꞌatuꞌe taꞌatuehay wo. Toꞌiro watuwat meiũpepyi iꞌatuꞌe porap yne. Miꞌi pote waku wahãꞌãg sio putꞌok watoꞌe yi Wenise tote sio yt iꞌatuꞌe. Itote waku kahato watokosap iꞌaman mot yi Kereta wã note iꞌatuꞌe. Kat pote mekewat wã kaipyi wataꞌakasa aat apyk hap kape aikope wasere yt tuut i hap kape iꞌatuꞌe toꞌope. Waikiru kawiat ariaꞌyp posak iãꞌãkap kape heremo pote itote waku aheꞌyara wato eiam mo iꞌatuꞌe. Miꞌi pote waku kahato katupono wasere yt iꞌauka kuap i aheꞌyara itote iꞌatuꞌe torannia yara koro akag koꞌi toꞌope. -Yt naku i rat watuwat mesuwepyi mehinꞌin e Pauru pykai -Toꞌiro iꞌatuꞌe yn.
13 Miꞌi hawyi wasere ran putꞌok e aat posak kaipyi urueꞌyara koro ete hawyi -Toꞌiro mesup taꞌyn waku watuwat iꞌatuꞌe. Miꞌi hawyi taꞌatuhep yꞌy pyi yara wato asaity nug hap. Miꞌi hawyi urutuwat i raꞌyn ihypopy upi yt pya i poꞌog yi ywypyiꞌa Kereta kai.
14 Miꞌi rakirẽ saĩke urutuwat hawyi wasere kahato i raꞌyn putꞌok e uruowa ete ihyemyiꞌa koro kaipywiat tuut urumogyt hap. Miꞌi hawyi teꞌeroꞌe toꞌope -Yt naku i kahato meiẽ wasere iꞌatuꞌe. Miꞌi hawyi poꞌog naꞌyn putꞌok e haty wo hawyi ywytu uato raꞌyn ikohyeput kahato uruewa ete mekewat aat sakpo hap kaipyi waikiru wato ieineꞌen hap kaipyi tuut.
15 Miꞌi hawyi mekewat ywytu uato teꞌeropun haty wo urueꞌyara koro. Miꞌi hawyi yt urutuwat kuap i wasere owa kape. Miꞌi pote urupohep yara wato mohãpyk hap ete hawyi uruereto wasere yn naꞌyn.
16 Miꞌi hawyi wẽtup yi ywypyiꞌa hit Karauta e hap het rakat og muo urutokokaꞌat. Niatpo kahato urutuwat wasere upi hawyi urutopag urueꞌyara hit urumiekyi saity upi urueꞌyara wato pe yꞌy pyi.
17 Miꞌi hawyi uruimoheg urueꞌyara hit iheg me hawyi uruipoꞌi poꞌi yne urueꞌyara koro saity wato wo ipik pik hap pupi yne ariaꞌyp moheg hamo. Miꞌi hawyi uruihep wasere eiam uruekyi hap wasere upiat yara wato moewyry hap esokpe wato katupono urutokenꞌẽ mekewat ywytu uato hesaika kahato rakat pupi. Koran tiꞌitu yt putꞌok urutoꞌe i teran yi og me miitꞌin u hap yi perup yꞌy kawiat hap pupi. Miꞌi hawyi meremo urutuwat wasere upi aikowo aikowo wasere mikyꞌesat ewy.
18 Miꞌi hawyi aat kaꞌap wasere wato tiꞌauka auka yꞌy pe urueꞌyara koro. Miꞌi hawyi heꞌihatꞌok pe hawyi ipotyi kahato hawyi -Urukuꞌuro hap yt pya hin i urutoꞌe urutoꞌope. -Pyno toꞌiro watipugha ahekareꞌen yne yꞌy pe yara koro pehoroꞌi hamo.
19 Myẽꞌym eꞌat hawyi uruipugha raꞌyn yꞌy pe yara wato asaity koꞌi uruipugha yne urupo wo ywytu uato ipoityꞌi pote.
20 Miꞌi hawyi karania eꞌat neꞌi raꞌyn urutukupteꞌen itote iꞌypyryp we yt uruikuap hin i. Yt tuwekuap i aat waikiru koꞌi hun moityꞌi pote. Itote ywytu uato pote wasere uato kahato aat kaꞌap. Miꞌi hawyi -Taꞌi watopap watopap irane wyti iꞌatuꞌe toꞌope itote. Yt uwe i meiũ aipowyro kuap hat iꞌatuꞌe yara wato apykok haria.
21 Karania eꞌat neꞌi raꞌyn itote yt kat i iꞌatumiꞌu yt teꞌerenuk i e. Miꞌi hawyi Pauru ipoĩꞌam iꞌatupyꞌasetpe hawyi toꞌe -Uhytꞌiꞌin pywo pe ti areꞌe saꞌawyꞌi ehepe -Yt eweiwat reiꞌo mesuwat wã pyi yꞌy koro kape areꞌe saꞌawyꞌi einapin hap are. Maꞌato uhehay upiat eweipyhuꞌat saꞌawyꞌi pote yt watuwat i saꞌawyꞌi yi ywypyiꞌa Kereta pyi mesuwat ahepiat hoꞌopot hamuat kape ahekat koꞌi pugha hamuat kape yt watuwat i e.
22 Maꞌato meiũ worohoꞌonapin i raꞌyn. Pyno eiwepiit ro katupono yt uwe i wyti eipe wuaria ikuꞌuro irane e Tupana e. Pywo ti rat aheꞌyara koro yn aru ikuꞌuro e Pauru yianme.
23 Kat pote muki meke atipy piat Tupana emiit putꞌok e tehay uhepiat hamo e. Pywo ti Tupana sese tipoꞌoro uhowowi temiit sese atipy kaipyi katupono uito hemiit sese e.
24 Muki Tupana mipoꞌoro toꞌe uhepe -Yt erekenꞌẽ teiꞌo Pauru katupono yt ekuꞌuro hin i ti aru mesup katupono woropoꞌoro en morekuat koro Sesa muꞌe hamo mehin e uhepe. Miꞌi pote ti aru Tupana tiehakyeraꞌat yne ewywuaria mesuwat yara koro piaria e uhepe muki Tupana mipoꞌoro e.
25 Uiwyriaꞌin uito atomohey kahato Tupana mienoi uhepiat aikotã Tupana toꞌe uhepe hap ewy wyti aru tutunug yne toꞌe hap ewy topyhuꞌat aru e. Miꞌi pote eiwemowepiit ro katupono Tupana ahehakyeraꞌat yne ywytu uato po pyi mesup toꞌe hap ewy.
26 Pywo wyti aru putꞌok watoꞌe yne wẽtup yi emyiꞌa ete e. Miꞌi tote wyti aru aheꞌyara koro ikuꞌuro sese maꞌato aito yt aikuꞌuro hin i e hap yn atikuap taꞌyn Tupana e hap ewy rẽ e Pauru yian mete.
27 Miꞌi hawyi 14 eꞌat turan wãtym muo ywytu uato popuo urukohyewyry kahato mekewat yara koro puo mekewat hyemyiꞌa koro Atiatiku e hap het rakat puo maꞌato yt min watoꞌe hin i. Miꞌi hawyi mekewat yara koro kaꞌiwaria tikuap taꞌyn yt pya i yi kawiat watoineꞌen hap.
28 Miꞌi hawyi taꞌatupun yꞌy hy pya hap iãꞌãg hap yꞌy pe. Mekewat nu saity etiat hap ihy pya sio yt kuap hamo. Miꞌi hawyi hãꞌãg hãꞌãg turan toineꞌen ihy pya hap 20 iãꞌãg hap yi kape. Tuwat poꞌog naꞌyn yianme hawyi taꞌatuiãꞌãg i maꞌato miꞌi hawyi 15 iãꞌãg hap yn naꞌyn ihy pya hap taꞌatupuẽti.
29 Miꞌi hawyi teꞌerokenꞌẽ kahato hawyi -Taꞌi putꞌok watoꞌe aru meremo yẽpe Enu wato ete iꞌatuꞌe haty wo. Tuweꞌauka ti aru urueꞌyara taꞌatuꞌe. Miꞌi pote taꞌatupun taꞌatueꞌyara etuꞌa pyi iꞌasaity ipotyi rakat imopyhuꞌat hap koꞌi. Miꞌi hawyi urueꞌyara topyhuꞌat iheg me tosaity koꞌi ete. Miꞌi hawyi merep taꞌyn taꞌatukyꞌesat kahato ihatꞌok hap.
30 Miꞌi hawyi yara koro kaꞌiwaria teꞌeropopy teran yara koro pyi taꞌatueꞌyara hit puo yt uwe ehamo i. Miꞌi pote taꞌatumoꞌapyk mekewat yara hit yꞌy pe. Miꞌi hawyi teꞌeroꞌe -Pywo pe ti iãpo uruimoheg neran ipotyi rakat iꞌasaity nug hap ete yara koro iꞌatuꞌe. Maꞌato iꞌatueso neꞌi teꞌeropopy teran haype.
31 Miꞌi hawyi Pauru toꞌe suraraꞌin akag me -Waĩ neiꞌo yara kaꞌiwaria e. Maꞌato eweiwat mekewat yara hit pe pote ti aru eweipap yne yne raꞌyn e Tupana uhepe e.
32 Miꞌi pote suraraꞌin titek taꞌyn yara hit asaity koꞌi. Miꞌi hawyi yara hit taꞌat raꞌyn yara koro pyi hawyi toto raꞌyn yꞌy upi yt uwe wywo i.
33 Miꞌi hawyi yt pya i raꞌyn ihatꞌok turan Pauru toꞌe iꞌatuepe -Mehinꞌin e toꞌiro watenuk e katupono koityꞌi 14 eꞌat raꞌyn yt kat i raꞌyn miꞌu ewetuꞌu kat pote muap upi ipoityꞌi pono yt ewehenuk teran i e.
34 Miꞌi pote worohoꞌonapin ewehenuk to uheꞌywytꞌin are katupono miꞌi ewetunug mote ehesaika i raꞌyn e. Pywo ti rat -Yt uwe i eipe ikuꞌuro meiũpe iꞌewyte yt kat i ti aru haty ehete e Tupana uhepe gaꞌatpo e Pauru yara piaria pe.
35 Miꞌi hawyi Pauru tat man topo pe hawyi toꞌe Tupana pe -Waku emiium uruꞌywot e hawyi toipatꞌok patꞌok wuatꞌi ehamo hawyi tutuꞌu saꞌawyꞌi wuatꞌi ehamo.
36 Miꞌi hawyi iꞌatuwepiit kahato itotiaria hawyi iꞌewyte teꞌerenuk taꞌyn Pauru wywo.
37 Miꞌi hawyi taꞌatumorania yne miitꞌin yara koro piaria hawyi taꞌatupuẽti itote 276 miit ipuo.
38 Miꞌi hawyi iꞌatuꞌok hawyi taꞌatupugha yne yara pytꞌat koꞌi miꞌu yꞌy pe aheꞌyara wato ipotyi kahato pote e.
39 Ihatꞌok hawyi teꞌeraꞌakasa yi kape yara wato pyi maꞌato yt taꞌatukuap i uwe etama toineꞌen itote hap. Miꞌi hawyi teꞌeraꞌakasa wẽtup ihy ypy hit. Miꞌi tote toineꞌen yi kyt. Miꞌi hawyi teꞌeroꞌe toꞌope -Toꞌiro yi kyt kape aheꞌyara koro ehakyeraꞌat hamo iꞌatuꞌe. Waku apo itote watiherep aheꞌyara iꞌatuꞌe toꞌope.
40 Miꞌi hawyi taꞌatutek taꞌatueꞌyara saity pytyk hap yꞌy piat hawyi taꞌatumaꞌam sokpe wato ariaꞌyp ete. Miꞌi hawyi -Toꞌiro wasere upi yi kyt kape iꞌatuꞌe. Miꞌi hawyi wasere tomoesaika hawyi urutuwat yi kyt kape wasere wato upi.
41 Miꞌi hawyi putꞌok urutoꞌe yara koro puo ihy esaika hap tote aikope yꞌy woꞌopuẽti hap tote. Itote hikꞌe kahato iheg me raꞌyn nu wato koꞌi tote topyhuꞌat iãpo yt hyryꞌe i raꞌyn. Iꞌywytꞌokpype ihy esaika tipik pik taꞌyn yara koro hetuꞌa ete.
42 Miꞌi hawyi suraraꞌin teꞌeroꞌe taꞌatukaꞌiwat pe -Toꞌiro watiꞌatuꞌuka yne yne aimipyhik koꞌi koran tiꞌitu teꞌeropopy teꞌeruweꞌyha wo taꞌatuꞌe toꞌope.
43 Maꞌato surara akag yt tikyꞌesat i tomipyhik Pauru auka hap pote yt eweiꞌatuꞌuka teiꞌo aimipyhik koꞌi paĩ e tesuraraꞌin me. Miꞌi hawyi toꞌe uruepe -Weꞌyha kuap haria pesoꞌeweiꞌe ro yꞌy pe. Putꞌok eweiꞌe mono yẽpe ete e.
44 Maꞌato iraniaꞌin yt weꞌyha kuap i haria waku eweiwat ro ariaꞌyp pemuꞌe hat tote e surara akag uruepe yara piaria pe. Miꞌi hawyi urutuwat raꞌyn yara wato pyi yẽpe kape ariaꞌyp koꞌi tote. Miꞌi hawyi putꞌok urutoꞌe torannia yẽpe ete yt wẽtup ok i ikuꞌuro yꞌy pe. Tupana tiꞌatuehakyeraꞌat yne yne uruto toꞌe hap ewy.
