Iesui Potmuꞌeria 28:1-31
28 Miꞌi hawyi putꞌok urutoꞌe mekewat yẽpe ete yi kyt rote. -Waku kahato urutoꞌe yt wẽtup i aito ikuꞌuro yꞌy wato pe waku kahato urutoꞌe. Miꞌi hawyi tõꞌẽ miitꞌin uruewawi mekewat yi a etawa kaipywiaria hawyi -Kat eĩ eiwat eheꞌyi a set urutoꞌe iꞌatuepe hawyi -Yi a Mauta urueꞌyi a set mesuwe iꞌatuꞌe.
2 Miꞌi hawyi waku kahato uruipuẽti meimuẽwuaria yi ywypyiꞌa Mauta totiaria. Iꞌatuwese kahato itote urupowyro kahato. Meremo taꞌatuꞌuhu aria wato mekewat yi kyt yẽpeke hawyi -Eiwemope ro meikowo mehinꞌin iꞌatuꞌe uruepe katupono uruenaꞌak kahato yꞌy wato pyi urutuwẽtem e. Iꞌewyte iꞌaman hewo kahato itote pote iraꞌak kahato topyhuꞌat. Miꞌi pote itotiaria meremo aria wato taꞌatunug uruwemope hamo. Iꞌatuwese kahato yi ywypyiꞌa Mauta wẽtup ywania uruto pykai waku kahato uruipuẽti.
3 Miꞌi hawyi Pauru toto aria kat hamo. Toterut wẽtup apeman aria hawyi toiporokpun yne aria wato pe turan wẽtup moĩ miit auka rakat tuwẽtem aria apeman kaꞌa pyi hawyi iporokaꞌat Pauru po ete haty wo. Miꞌi hawyi ipo ete iheg me kahato topyhuꞌat.
4 Miꞌi hawyi ywypyiꞌa totiaria mekewat Mauta piaria teꞌeraꞌakasa moĩ Pauru po etiat hãi heg hap kape hawyi teꞌeroꞌe toꞌope -Pywo ti ewy rat meiẽwat miit woꞌopotꞌauka hat toineꞌen iꞌatuꞌe. Yt ikuꞌuro hin i yꞌy koro pe maꞌato mesup iminug saꞌag saꞌawyꞌi wuat tuut howawi iꞌauka hamo iꞌatuꞌe.
5 Miꞌi hawyi meremo Pauru tipun topo ete pyi mekewat moĩ aria wato pe hawyi yt haty i tuete ipo ete.
6 Miꞌi hawyi itotiaria teꞌerahaꞌat kahato Pauru kape katupono taꞌatuekatup ipuk aru hawyi aru ikuꞌuro meremo hap mekewat moĩ yt naku i kahato rakat taꞌatukuap pote maꞌato taꞌatuekatup potꞌi pykai yt kat i haty Pauru ete. Miꞌi pote wẽtup upi teꞌeruwanetup -Pauru ti Tupana iꞌatuꞌe.
Paru Toineꞌen Pupiriu Miꞌapykok Wo
7 Mekewat eꞌat pe yt pya i yẽpe kai tukupteꞌen go wato koꞌi yi ywypyiꞌa akag Pupiriu e hap het rakat wat. -Waku kahato urukaꞌiwat uruporekuat Pupiriu iꞌatuꞌe itotiaria ywypyiꞌa piaria. Ihatꞌok hawyi urutuwat raꞌyn morekuat Pupiriu yat wato kape. Putꞌok urutoꞌe itote hawyi meremo -Eiwehytꞌok to e uruepe. Miꞌi hawyi Pupiriu wywo urutokosap myẽꞌym eꞌat. Urutukupteꞌen waku kahato itote.
8 Miꞌi hawyi uruipuẽti itote morekuat ywot iꞌahuu kahato itote iꞌokpysu kahato rakat ipiit sakup hap wywo. Miꞌi hawyi Pauru toto taꞌakasa hamo hawyi -Tupana e etimoehãite Pupiriu ywot hap ahẽtup epe e hawyi tuwepoporokpun iꞌahuu kahato rakat rote hawyi meremo ihãite i raꞌyn.
9 Morekuat Pupiriu ywot moehãite hap iraniaꞌin tikuap hawyi tõꞌẽ tõꞌẽ Pauru kape iꞌahuu rakaria ywypyiꞌa piaria. Miꞌi hawyi iꞌewyte Tupana tiꞌatumoehãite yne itotiaria Pauru po wo.
10 Miꞌi hawyi itotiaria imotypot kahato Pauru. Miꞌi pote urutuwat hap eꞌat pe taꞌatuhytmoĩ kahato urueꞌyara pe urumiereto muap upiat urumiꞌu wuat kat koꞌi kat koꞌi urumikyꞌesat oktan.
11 Myẽꞌym ewaty urutukupteꞌen ywypyiꞌa Mauta tote hawyi urutuwat i raꞌyn wẽtup yara koro puo mekewat yara wato tawa wato Aresãtere kaipywiat eꞌyara puo heiꞌaman mot ywypyiꞌa Mauta e hap totiat rakat puo. Miꞌi yara wato set ti Tupana mepyt paat e hap het rakat. Miꞌi puo urutuwat yi Mauta pyi.
12 Miꞌi hawyi putꞌok urutoꞌe tawa wato Sirakusa tote. Miꞌi tote urutopyhuꞌat myẽꞌym eꞌat.
13 Miꞌi hawyi urutuwat i yi ẽpeke pyi wẽtup tawa kape hawyi putꞌok urutoꞌe aat upi mekewat tawa Iresiu tote. Heꞌihatꞌok pe wasere aat posak pyi. Miꞌi pote urutuwat i raꞌyn wasere upi. Typy eꞌat hawyi meremo putꞌok urutoꞌe raꞌyn tawa Puteuri tote.
14 Miꞌi hawyi Tawa Puteuri totiaria Iesui mohey haria uruiꞌatukat. Miꞌi hawyi iꞌatuwese kahato uruete -Eweipyhuꞌat ro uruwywo uruywytꞌin iꞌatuꞌe. Miꞌi pote urutukupteꞌen 7 eꞌat iꞌatuꞌyat rote. Miꞌi hawyi urutuwat i raꞌyn tawa Puteuri totepyi tawa koro Huma kape mekewat muap yi upi.
15 Miꞌi hawyi Iesui mohey haria tikuap taꞌyn putꞌok urutoꞌe tawa Huma piat hap. Miꞌi hawyi tõꞌẽ tõꞌẽ kahato uruewawi urukat hamo. Miꞌi hawyi mekewat tawa hit Apiu eꞌoken note urutoꞌopuẽti mekewat myẽꞌym ok weneru i weneru i e hap het rakat rote. Miꞌi hawyi Pauru taꞌakasa Iesui mohey haria sem ewowiat hawyi -Waku e Tupana pe tuwehum kahato iwepiit i raꞌyn.
Pauru Toineꞌen Huma Pe
16 Tawa Huma piat putꞌok urutoꞌe hawyi surara akag toꞌe Pauru pe -Woroꞌatoiat en uhesurara wywo Pauru e. Uimipyhik sese ereineꞌen ne maꞌato waku uhesurara wywo ereineꞌen wuatꞌi eꞌat pe aikope aikope emikyꞌesat ewy e Pauru pe surara koro.
17 Miꞌi hawyi Pauru toineꞌen Tawa koro Huma tote myẽꞌym eꞌat rakirẽ toiꞌatukay kay tuwewawi toꞌywania meimuẽwat Iuteuria akagnia toiꞌatukay kay tuwewawi tuwenoi hamo. Teꞌeruwaꞌatunug yne hawyi Pauru toꞌe iꞌatuepe -Uiꞌywania e yt kat no i ti atomaꞌat aiꞌywaniaria tawa Ierusarẽi miaria pykai uipyhik taꞌyn itote uiꞌauka teran haype e. Iꞌewyte aiꞌywotꞌin eko ewy atunug torannia uimotag hap koꞌi mesup te e. Miꞌi pykai uipyhik pe ariot ehewowi tawa Ierusarẽi myi. Humanuꞌin esurara po pe areineꞌen ne e Pauru Iuteuria pe.
18 Iuteuria akagnia tawa Ierusarẽi miaria yt naku i iꞌatuꞌe uhepe -Eweiꞌauka ro Pauru iꞌatuꞌe Iuteuria akagnia Humanu ywania morekuaria pe. Miꞌi hawyi Humanu ywania porekuaria apo apo iꞌatuꞌe uhepe. Taꞌatukat uiminug saꞌag koꞌi itote wen maꞌato yt kat i saꞌag uhetiat taꞌatupuẽti taꞌatuꞌatukat kahato pykai e Pauru.
19 Miꞌi hawyi iꞌatupohep teran maꞌato waĩ yt eipohep teiꞌo iꞌatuꞌe aiꞌywania Iuteuria Humanu porekuaria pe uiꞌauka teran haype. Miꞌi pote -Areto teran pyno morekuat koro Sesa kape waku apo uito sio yt kuap hamo are yn itote. Miꞌi hawyi morekuaria uipoꞌoro meikowo taꞌatuꞌakag Sesa kape uiꞌe hap ewy. Miꞌi pote uhehay irane ikoro wywo e. Maꞌato uiwetiat yn ahenoi morekuat Sesa pe e. Yt kat areꞌe i aru saꞌag ehetiat uiꞌywania iꞌewyte yt kat areꞌe i aiꞌywania tawa Ierusarẽi piaria etiat ikoro pe e Pauru.
20 Miꞌi tupono morohoꞌokay kay eipe meikowo mesup uiꞌywania eiꞌakasa hamo uhehay kuap hamo katupono uiꞌywania eipe pote e. Uiwyriaꞌin aiꞌywania timohey kahato Tupana Mipoꞌoro Aiporekuat nuat Ahehakyeraꞌat kuap hat e. Miꞌi pote mesup aito watomohey kahato. Iꞌewyte Miꞌi Miit yn uimiekatup katupono atimohey kahato Miꞌi e. Miꞌi aimimohey etiatno mesup uipyhik hawe areineꞌen ehehamo e Pauru toꞌywania Iuteuria pe tawa koro Huma totiaria pe.
21 Miꞌi hawyi taꞌatuwesat Pauru -Yt kat i miwan saꞌag taꞌatupoꞌoro uruewawi yi Iuteu kaipyi uhyt iꞌatuꞌe. Yt uwe i tuut iꞌewyte meikowo etiat enoi saꞌag hamo iꞌatuꞌe.
22 Pyno uruikyꞌesat ehenoi uruepe emikuap pakup i koꞌi Miꞌi Miit etiat katupono teke aru wuatꞌi ywania pe miitꞌin muo mekewat emimohey e. Miꞌi pote iraniaꞌin -Yt naku i watomohey Miꞌi Miit iꞌatuꞌe torannia mekewat piat pe iꞌatuꞌe Pauru pe.
23 Miꞌi hawyi Pauru tiꞌatuwesat -Waku kahato worohoꞌomuꞌe uimimohey oktan e. Waku eweiꞌatukay kay aiꞌywania hawyi worohoꞌomuꞌe Aimiekatup ete e. Miꞌi hawyi -Pyno waku iꞌatuꞌe toꞌope hawyi tuwat.
Miꞌi hawyi mekewat eꞌat putꞌok e hawyi tõꞌẽ tõꞌẽ kahato Pauru ywania sem iꞌyat sese kape. Miꞌi hawyi hune pyi te wãtymꞌi kape Pauru yn ihay aat toꞌywania pe. Toiꞌatumuꞌe kahato aikotã topyhuꞌat Tupana Aiporekuat no hap ete. Toikyꞌesat itotiaria -Pywo ti rat uruimohey Iesui Tupana Mipoꞌoro sese ahehakyeraꞌat hanuat iꞌatuꞌe hap. Miꞌi pote Muisei miwan myi iꞌewyte Tupana ehay moherep haria yianmiaria ehay pyi tohenoi yne Aipotypot Iesui etiat.
24 Miꞌi hawyi ipatꞌok itotiaria timohey raꞌyn Pauru ehay Iesui etiat maꞌato iraniaꞌin -Yt rat iꞌatuꞌe.
25 Miꞌi hawyi itote sehay wo tuꞌuka hap topyhuꞌat itote. Iraniaꞌin -Pywo ti rat Iesui ti Tupana Mipoꞌoro Aimiekatup iꞌatuꞌe maꞌato iraniaꞌin -Yt pywo pe i rat aimuꞌe iꞌatuꞌe. Miꞌi hawyi yt imohey i haria teꞌeruwenoi Pauru pe -Urutuwat raꞌyn mio iꞌatuꞌe haty wo.
26 Miꞌi hawyi Pauru toꞌe -Pywo ti saꞌawyꞌi te Tupana Paꞌãu henoi kahato aiꞌywotꞌin me ehetiat e. Mio tã e Isaia pe -Woropoꞌoro en eꞌywania Iuteuria muꞌe hamo e. Miꞌi hawyi ehenoi ro iꞌatuepe uhehay -Ehewaure kaꞌa tukupteꞌen maꞌato uhehay yt teke kuap i ehewaure kaꞌa pe ereꞌe ro eꞌywania pe e. Taꞌi eweikuap uhehay wen maꞌato yt eweikuap kahato i katupono yt teke i eipyꞌa pe eiwanetup hawe pote ereꞌe ro eꞌywania pe e. Iꞌewyte eheha pe toĩ yne yne heremo kahato wen maꞌato yt eweiꞌakasa i te katupono yt teke i te eipyꞌa pe eiwanetup hawe eiwaꞌakasa hap koꞌi. Kat pote yt uimohey sese i te pote ereꞌe ro eꞌywania pe e.
27 -Eipyꞌa heg kahato ti ereꞌe ro iꞌatuepe. Ehewaure kaꞌa puo ewehẽtup aat kaꞌap wen maꞌato yt eweikuap hin i te katupono eipyꞌa pe yt eweiꞌakasa teran i pote e. Taꞌi yt ewehẽtup teran hin i ehewaure kaꞌa puo uhehay. Miꞌi pote yt ewetunug neran i eipyꞌa pe e. Miꞌi pote ti yt kat i eimopakup i hap e. Miꞌi pote ti yt worohoꞌoehakyeraꞌat kuap i e ti Tupana saꞌawyꞌi aiꞌywotꞌin me ehetiat pe tehay moherep hat Isaia miwan me e Pauru Iesui pun haria pe.
28 Miꞌi hawyi tuwat yt imohey i haria turan Pauru toꞌe -Eiwanetup to uiꞌe hap kape e. Tupana henoi raꞌyn ehepe mesuwat sehay wakuat ehehakyeraꞌat hanuat etiat maꞌato yt ewetat i miꞌi pote mio iraniaꞌin ywania yt Iuteu ywania i pe raꞌyn Tupana henoi teran tehay wakuat eimipun e. Miꞌiria ti aru haat raꞌyn e. Pywo ti rat miꞌiria wyti aru imohey haria sese wo raꞌyn tukupteꞌen e Pauru toꞌywania tehay pun haria pe.
29 Mio tã e hawyi tuwat tuwat raꞌyn iꞌywania Iuteuria Pauru yat pyi maꞌato tuwat turan tuꞌuka toꞌope sehay wo.
Pauru Woꞌopyhik Hawe Toineꞌen Huma Pe Typy Anu Turan
30 Miꞌi hawyi typy iꞌaman mot pe Pauru tokosap itote tawa koro Huma pe towat toꞌyat pe tomipuru saꞌup ete rakat pe toineꞌen surara piat topyhyp hawe. Itote toiꞌatumuꞌe kahato miitꞌin. -Waku eweihytꞌok Pauru kape e suraraꞌin wuatꞌi miitꞌin me. Miꞌi hawyi itote toiꞌatukyꞌe yne topuẽti haria -Eiwehytꞌok to e yn torannia tehay kuap teran haria pe towyriaꞌin me.
31 Miꞌi tote tohenoi kahato aikotã Tupana topyhuꞌat Aipotypot no wuatꞌi pe yt tokenꞌẽ wywo hin i tohenoi. Yt uwe kuap i waĩꞌe Pauru pe. Itote toiꞌatumuꞌe muꞌe aat Aikaꞌiwat Iesui ete Tupana Mipoꞌoro Aiporekuat nuat ete. Uito ti Iruka uimiwan waku raꞌyn Toran are.
