Iesui Potmuꞌeria 3:1-26
3 Wẽtup eꞌat pe wãtymꞌi turan Peteru Iuwãu tuwat Tupana motypot yat koro kape Tupana wywuat taꞌatuehay hamo.
2 Miꞌi hawyi itote taꞌatupuẽti wẽtup ok miit toty kaipywiat wemoherep hat yt hewyry kuap i rakat. Mekewat ipy kĩꞌã kahato rakat toineꞌen Tupana motypot yat koro eꞌokenꞌypy kai mekewat Okenꞌypy Kahu e hap het rakat tote toineꞌen yne eꞌat pe. Miꞌi tote sẽtup sẽtup e hat sese wo topyhuꞌat haꞌawytepyi. Mekewat miit ipy yt ikahu hin i rakat ti. Ityꞌin terut yne eꞌat pe Tupana yat eꞌokenꞌypy kape. Itote wuatꞌi miitꞌin õꞌẽ haria kaipyi toikyꞌesat yt kat saꞌup i taꞌatuium tepiat hap koꞌi.
3 Miꞌi hawyi Peteru Iuwãu tuwehytꞌok mekewat Tupana motypot yat pe turan mekewat ipy kĩꞌã rakat hẽtup taꞌyn Peteru Iuwãu me -Mehinꞌin e ewehoꞌoium no uhepe ehetineiru e.
4 Miꞌi hawyi teꞌerahaꞌat kahato yt hewyry kuap i rakat kape hawyi teꞌeroꞌe tope -Erahaꞌat ro uruewawi uhyt iꞌatuꞌe.
5 Miꞌi hawyi tehaꞌat iꞌatuewowi iꞌatumiium tepiat hap ekatup haype katupono tohẽtup hawyi tuwanetup -Taꞌatuhoꞌoium aru uhepe e.
6 Maꞌato Peteru toꞌe hẽtup hat pe -Pywo ti rat yt kat i sese uruekat uhyt e. Iꞌewyte yt kat i uruetineiru uru kawiat parata kawiat mehin e. Yt hekat rakaria hin i ti uruto wen maꞌato kat som toineꞌen uruwatnuat rakat atum yne epe mehin e. Miꞌi hawyi toꞌe ipytyt i rakat pe -Tupana Mipoꞌoro Aiporekuat nuat Iesui tawa Nasare piat wemotag hat set no woromoehãite teran mesup mehin e. Miꞌi tupono epoĩꞌam no ewyry ro uhyt e ipy kĩꞌã sese rakat pe.
7 Miꞌi hawyi Peteru timopoĩꞌam naꞌyn ipo sese ete. Miꞌi hawyi meremo ipy waku raꞌyn topyhuꞌat hesaika kahato ipy.
8 Miꞌi hawyi peso pesoꞌe raꞌyn. Miꞌi hawyi teke raꞌyn Tupana motypot yat koro pe Peteru Iuwãu wywo -Waku sese Tupana waku poityꞌi Tupana e tuwehum haype.
9 Miꞌi hawyi itotiaria yne teꞌeraꞌakasa peso pesoꞌe hap waku Tupana e hap.
10 Miꞌi hawyi teꞌeroꞌe toꞌope -Taꞌi watikuap uwe meke miit iꞌatuꞌe. Taꞌi miꞌi ti mekewat okenꞌypy ikahu rakat rotiat sẽtup sẽtup hat wyti iꞌatuꞌe toꞌope. Saꞌawyꞌi ahepiat ahekat ẽtup hat raꞌyn wyti meke toineꞌen iꞌatuꞌe toꞌope. Aikotã som pyno mio hewyry kuap kahato iꞌatuꞌe. Iwato kahato raꞌyn ni ipy mohãpyk hap iꞌatuꞌe toꞌope. Aikotã som pyno mio waku pe i raꞌyn hewyry iꞌatuꞌe teꞌeruwanetup kahato haype.
Tupana Motypot Hap Yat Pe Peteru Ihay
11 Miꞌi hawyi mekewat ipy pakup takat iporokaꞌat Peteru Iuwãu py ete -Uiwepiit kahato e uiwepiit kahato e iꞌatuepe. Miꞌi hap kape wuatꞌi kaipyi raꞌyn teꞌeruwaꞌatunug kahato teꞌerahaꞌat hamo. Miꞌi hawyi typyꞌi rakaria õꞌẽ haria tukupteꞌen itote mekewat morekuat Sarumau eꞌokenꞌypyke. Miꞌi hawyi teꞌeruwanetup kahato mekewat Tupana mimoehãite kape.
12 Miꞌi hawyi Peteru ihaꞌat kahato tewowiat sehaꞌat haria kape wanetup kahato haria kape hawyi toꞌe iꞌatuepe -Kat poteĩ ewehehaꞌat kahato uruewawi urumotypot kahato hap wywo e aikotã ten uruewaku hap kaipyi uruimoehãite mesuwat saꞌawyꞌi wuat ipy kĩꞌã rakat e. Yt naku i urumotypot miꞌi miit moehãite hap ete katupono yt uruwat uruewaku hap kaipyi i ti imoehãite hap toineꞌen mesup e Peteru. Yt uruwat uruesaika hamo i miꞌi miit topyhuꞌat ipy kahu rakatno e. Taꞌi aheTupana ti imoehãite meiẽwat miit e. Tomipoꞌoro Iesui mohey hap upi wyti toimoehãite meiũwat saꞌawyꞌi wuat ipy kĩꞌã rakat are uhytꞌiꞌin manaꞌin e.
13 Ahaꞌaseꞌiꞌin Aparãu Isaki Iako eTupana mimoehãite ti meiũwat miit e. Eweikuap apo kat pote Tupana timoehãite ipy kĩꞌã rakat ehehamo e. Pyno ahenoi ehepe. Toikyꞌesat kahato temiit sese Iesui motypot hap haype wyti e. Taꞌi aheTupana tikyꞌesat kahato raꞌyn wyti eimikuasa te Iesui motypot hap e. Morekuat Piratu ti yt iꞌauka teran i wen maꞌato eipe ti eweikyꞌesat iꞌauka hap -Yt naku i Iesui eweiꞌe morekuat pe itote saꞌawyꞌi e. -Etiꞌauka ro pyno Iesui eweiꞌe kahato morekuat Piratu pe e.
14 -Wakuat sese Uito Tupana ewywuat e Iesui wen maꞌato miꞌi pykai -Yt kan hamo i Iesui eweiꞌe. Miꞌi hawyi woꞌoꞌauka hat Parapa eweikyꞌesat poꞌog Iesui kai. -Yt etiꞌauka teiꞌo Parapa eweiꞌe itote maꞌato mekewat poꞌog poꞌog wakuat wuatꞌi kawiat rakat Iesui pe ti -Etiꞌauka ro etiꞌauka ro Miꞌi Miit eweiꞌe saꞌag Piratu pe e. -Yt naku i kahato wyti watiꞌauka raꞌyn Iesui e Piratu pykai -Etiꞌauka ro etiꞌauka ro Miꞌi Miit eweiꞌe ti raꞌyn itote eipe. Yt naku i kahato eiminug saꞌag e Peteru.
15 Taꞌi miitꞌin moieineꞌen wuatꞌi eꞌat piat hat auka haria sese eipe paĩ maꞌato miꞌi pykai eimiꞌauka Tupana tomoieineꞌen i raꞌyn e. Toihep i raꞌyn wyti Tomiꞌairo guꞌuro pyi paĩ. Miꞌi hap ti uruikuap kahato raꞌyn katupono heineꞌen pakup i hap kape urutaꞌakasa motꞌi kahato uruto e Peteru.
16 Koitywy wyti Tupana timoehãite raꞌyn mesuwat saꞌawyꞌi wuat ipy kĩꞌã rakat katupono toikyꞌesat Tomipoꞌoro Iesui set motypot hap mesuwe pote e. Iesui set kawiat mohag wo toimoehãite miꞌi miit ehehamo katupono toikyꞌesat kahato eipe yne Tosaꞌyru mohey haria wo hap e. Uruimohey Iesui hawyi waku raꞌyn topyhuꞌat mesuwat saꞌawyꞌi wuat ipy kĩꞌã rakat. Mesup Tupana mimohãpyk wo raꞌyn toineꞌen naꞌyn ehehamo manaꞌin uhytꞌiꞌin e. Iesui set esaika hap wywo Tupana timoehãite mesuwat miit e.
17 Taꞌi uiꞌywania atikuap kahato aikotã yt eiweꞌeg i hap wywo eweiꞌauka Iesui nagnia ehay upi hap e.
18 Haꞌawyte yian mete raꞌyn Tupana ehay enoi haria henoi kahato aikotã aru aikotã aru wataꞌakasa mesuwe hamuat hap e. Miꞌi hap ewy wyti saꞌawyꞌi te yne Tupana ehay enoi haria henoi ti raꞌyn yian mete Iesui miꞌauka wuat hap etiat e. Miꞌiria piat henoi kahato raꞌyn uruporekuat piat hoꞌopot hamuat e. Miꞌi henoi hap ewy ti ewetunug naꞌyn mesup Tupana e hap ewy e.
19 Aikotã Tupana henoi yian mete hap ewy ti topyhuꞌat mesup. Miꞌi pote waku mio tã eweiꞌe ro Tupana pe -Koitywy paa urutoꞌe ewowi Tupana katupono yt naku i kahato urutunug Esaꞌyru ete eweiꞌe pote meremo waure wo topyhuꞌat eiminug saꞌag ete e. Miꞌi hawyi waku pe i raꞌyn iwywo eweikupteꞌen mehinꞌin manaꞌin e. Miꞌi hawyi ti aru Tupana mimowepiit koꞌi wo i raꞌyn wuatꞌi eꞌat pe eweikupteꞌen katupono tutum ehepe Topaꞌãu Wakuat eimoesaika hamuat hap hawyi e. Taꞌi eiwemorem Tupana kape i raꞌyn pote waku pe iwywo eweikupteꞌen e Peteru.
20 Miꞌi hawyi ti aru tuwekaipyi toipoꞌoro i raꞌyn ehewowi Iesui e. Saꞌawyꞌi sese raꞌyn Tupana tiꞌairo Miꞌi Miit Eikaꞌiwat nuat e. Pyno eiwemorem howawi hawyi ti aru toipoꞌoro i raꞌyn Tosaꞌyru Paꞌãu ehewowi e.
21 Mio ti toineꞌen Iesui atipy pe e. Mio itote tohekatup topoꞌoro i meiko wuat hap eꞌat e. Mio tã iꞌatuꞌe Tupana ehay moherep haria saꞌawyꞌi wuaria -Tuut wyti aru wẽtup eꞌat pe aikotã Tupana tunug mesuwat yi saꞌawyꞌi wuat hap ewy tutunug i irane e miwan me e. Miꞌi hap eꞌat wyti aru Tupana tunug mesuwat mytyyp ikahu ipakup takat saꞌawyꞌi wuat ikahu hap ewy iꞌatuꞌe yianme Iesui toineꞌen Wuatꞌi Porekuat nuat hap kape iꞌatumuꞌetu e Peteru.
22 Aikotã ahaꞌaseꞌi Muisei henoi saꞌawyꞌi Iesui etiat hap ewy. Mio tã e -Wẽtup eꞌat pe wyti aru Tupana tipoꞌoro ehewowi wẽtup ok uiꞌewywuat kahato rakat e. Miꞌi Miit ti Tupana Miꞌairo sese Wuatꞌi Porekuat nuat e. Taꞌi Miꞌi Miit wyti aru toineꞌen eipyꞌasetpe Tupana Ehay Moherep sese hatno aikotã uiꞌewy maꞌato poꞌog uikai e Muisei saꞌawyꞌi tomiwan me. Miꞌi Miit wyti aru eiꞌywania suu kawiat tuwemoherep uiꞌewy e. Putꞌok e eipyꞌasetpe hawyi eweikuap yne o imienoi e. Kat e kat e wyti aru ihay ehepe. Ewetunug no yne yne iꞌe hap oktan e Muisei.
23 Maꞌato uwe uwe Tupana Ehay Moherep hat sese ehay pun haria ti aru tukupteꞌen Tupana mimoweityk koꞌi wo e. Ewetunug no yne imienoi ewywuat. Maꞌato yt ewetunug i pote yt Tupana ywania wo hin i eweikupteꞌen aru e Muisei saꞌawyꞌi ahowawi e Peteru.
24 Uiꞌywania yne ti saꞌawyꞌi wuaria Tupana ehay enoi haria mio tã iꞌatuꞌe yianme Iesui etiat aikotã Muisei toꞌe hap ewy e Peteru. Wẽtup ehay yn iꞌatuehay e saꞌawyꞌi wuat Tupana ehay moherep haria e. Taꞌi saꞌawyꞌi wuat ahaꞌaseꞌi Samueu iꞌewyte ihay yian mete Iesui ete iꞌewyte yne yne Samueu saipepiaria Tupana ehay moherep haria wẽtup ehay yn iꞌatuehay e. Mesuwiat Aikaꞌiwat Iesui etiat yn iꞌatuehay yianme e.
25 Eiperia ti Tupana ehay moherep haria emiariru koꞌi paĩ e. Kat iꞌatuꞌe kat iꞌatuꞌe saꞌawyꞌi Iesui etiat taꞌatumoherep ehepe e. Saꞌawyꞌi ahaꞌaseꞌiꞌin me Tupana ihay kahato aikotã aru tutunug hap ete ihay e. Ahaꞌaseꞌiꞌin tiwan kahato iꞌe hap aimuꞌe hamo. Koitywy aipo pe raꞌyn mesup Tupana e hap iꞌe hap ewy e. Aikotã saꞌawyꞌi te Tupana toꞌe ahaꞌaseꞌi pot Aparãu me hap ewy tutunug mesup ehehamo e. Saꞌawyꞌi mio tã e Aparãu me -Uiwy meiũran aru wẽtup ok emiariru epuꞌi kaipywiat tuwemoherep yi tote e. Miꞌi Miit esaipepiat sese wo aru atiꞌatupoityro wuatꞌi ywania mesuwat yi wato hap oktan e Tupana Aparãu me Iesui piat pe.
26 Pyno Tupana tunug naꞌyn mio tã toꞌe Aparãu miat hap are katupono mesup taꞌyn toipoꞌoro Temiit Iesui aiꞌywania kape aimowepiit hamo ahehakyeraꞌat hamo aiminug yt nakuap i kaipywiat aiporeraꞌaipok hamo toipoꞌoro Iesui e Peteru Tupana motypot yat koro totiaria pe.
