Iesui Potmuꞌeria 4:1-37
4 Itote mio tã e Peteru turan miitꞌin tok pe tõꞌẽ tõꞌẽ ipyꞌahak takaria paꞌiria Tupana motypot yat piaria akag koꞌi wywo Peteru Iuwãu satyꞌi satyꞌi hamo. Taꞌatukuap Peteruꞌin Iesui wẽtem guꞌuro pywiat hap taꞌatuhenoi miitꞌin me hawyi -Waĩꞌiꞌatuꞌe Peteru Iuwãu me. Yt naku i ewehenoi miitꞌin me Iesui tuwẽtem guꞌuro pyi hap iꞌatuꞌe katupono uruikuap taꞌyn aikuꞌuro hawyi ti yt karãpe i watoineꞌen pakup i hap iꞌatuꞌe saꞌag.
2 Yt naku i eweiꞌatumuꞌe miitꞌin aikotã Iesui tuwẽtem guꞌuro pyi hap ete iꞌatuꞌe. Waĩ neiꞌo iꞌatuꞌe. Pyno yt naku i eweiꞌatumuꞌe miitꞌin iꞌatuꞌe.
3 Miꞌi hawyi paꞌiria tiꞌatupyhik Peteru Iuwãu woꞌopyhik hawe. -Yt naku i kahato eipe iꞌatuꞌe. Yt naku i eweipotmuꞌe iꞌatuꞌe. Wãtym naꞌyn mote yt naku i uruiꞌapiheg eipe mesup maꞌato pywo ti rat mukiꞌite putꞌok e hawyi uruiꞌapiheg kahato eipe morekuat tikuap ehehay saꞌag koꞌi hap hawyi iꞌatuꞌe Peteru Iuwãu me.
4 Maꞌato Tupana motypot yat koro totiaria Peteru Iuwãu mimuꞌeria timohey kahato iꞌatumienoi Iesui etiat. Miꞌi hawyi taꞌatumorania karania Iesui mohey pakup i haria tukupteꞌen itote hap e. Miꞌi hawyi taꞌatupuẽti itote porap 5 miu ihainia imohey pakup i haria Peteru Iuwãu miekyi koꞌi.
Peteru Hawyi Iuwãu Morekuaria Pyꞌasetpe Tukupteꞌen
5 Miꞌi hawyi mukiꞌite ihatꞌok hawyi Peteru Iuwãu apiheg teran haria teꞌeruwaꞌatunug kahato paꞌi koro Ierusarẽi me. Miꞌi tote iꞌatuehay kahato paꞌiria wywo nagnia wywo Iuteu ywania waĩꞌe hap moherep kuap kahato haria wywo Peteru Iuwãu kuasa hap ete.
6 Miꞌi hawyi paꞌi koro Anai e hap putꞌok e tosaꞌyruꞌin paꞌi Kaꞌiwasi paꞌi Iuwãu paꞌi Aresãtere wywo. Iꞌewyte yne tosaꞌyruꞌin wywo.
7 Miꞌi hawyi Peteru Iuwãu taꞌatuenotem woꞌopyhik hap pyi hawyi taꞌatuhytmoĩ taꞌatupyꞌasetpe hawyi apo iꞌatuꞌe Peteru Iuwãu me -Uwe ehay pyi kahu ewetunug miꞌi tã gaꞌatpo Tupana motypot yat koro pe iꞌatuꞌe. Uwe eipoꞌoro miꞌi tã nug hamo iꞌatuꞌe Peteru Iuwãu me.
8 Miꞌi hawyi Tupana Paꞌãu putꞌok e kahato Peteru piit pe hawyi Tupana wẽ wo ihay kahato itote -Uruporekuaria worohoꞌowesat reran kahato e. Nagnia eweikuap to uhepiat eiwesat hap e. Eweikuap teran uwe ehay pyi mesuwat saꞌawyꞌi wuat ipy kĩꞌã rakat topyhuꞌat ipy waku raꞌyn hap e.
9 Pyno ahenoi ehepe uwe sese mesuwat saꞌawyꞌi wuat ipy kĩꞌã rakat moehãite hat.
10 Taꞌi Iesui tawa Nasare piat mimoehãite wyti ipy pakup takat e. Taꞌi Iesui ehay upi wyti uruimoehãite mekewat ipy kĩꞌã rakat gaꞌatpo e. Saꞌawyꞌi Tupana tipoꞌoro Temiit ahowawi Aipotypot nuat wen maꞌato Imipoꞌoro Wakuat eweiꞌauka raꞌyn ariaꞌyp posak saꞌag ete. Yt naku i kahato ewetunug maꞌato ikuꞌuro hawyi Tupana tomoieineꞌen pakup i guꞌuro pyi e. Pywo ti rat toineꞌen i Iesui katupono mesup taꞌyn toimoehãite meiũwat miit e. Ewehaꞌat ro pyno imimoehãite kape katupono hewyry raꞌyn ehehamo e.
11 Iesui ti Nu Wakuat kahato ewy e. Miꞌi Nu wo Tupana tunug naꞌyn toꞌyat koro sese e. Pywo ti rat Nu iheg kahato rakat ewy kahato Iesui e. Miꞌi waku uiꞌyat koro nug hamuat e Tupana saꞌawyꞌi morekuat Tawi miwan me Saumu 118.22 pe e ehepe wen maꞌato mekewat Nu pun haria wo kahato eweikupteꞌen mesup eiperia e. Yt naku i kahato e. Maꞌato Eimipun wo ti Tupana haꞌawynug naꞌyn toꞌyat sese e.
12 Wẽtup miit yn ni ahehakyeraꞌat kuap hat e. Miꞌi Miit set ti Iesui e. Yt uwe i miꞌi rẽ mesuwarotiat wuatꞌi Ehakyeraꞌat kuap hat e. Iesui mohey hap upi yn ni ahehakyeraꞌat kuap Tupana e Peteru haty wo.
13 Miꞌi hawyi morekuaria itotiaria teꞌeroꞌe toꞌope -Kat pote som aipupi yt teꞌerokenꞌẽ hin i Peteru Iuwãu iꞌatuꞌe. Yt karãpe i ti miꞌiria teꞌerupotmuꞌe kahato woꞌomuꞌe hap wato sese puo. Aiꞌewy wen maꞌato miꞌi pykai iꞌatuehay kuap kahato rakaria ewy. Pira pytyk haria miꞌiria miitꞌin eropat haria yn miꞌiria maꞌato iꞌatuehay poꞌog ikahu woꞌomuꞌe haria akag koꞌi kai iꞌatuꞌe toꞌope nagnia. Uwe pyno iꞌatumuꞌe mio tã e hap nug hamo iꞌatuꞌe toꞌope. Teꞌeruwanetup hawyi -Taꞌi Iesui tiꞌatumuꞌe miꞌiria haꞌawytepyi tomikuap koꞌi ete. Miꞌi pote mesup Taꞌatukaꞌiwat Iesui ewy kahato taꞌatunug iꞌatuꞌe toꞌope.
14 Miꞌi hawyi itotiaria teꞌerahaꞌat kahato ipy pakup takat yꞌam miat Iuwãu Peteru pyꞌasetpiat kape hawyi teꞌeruwanetup kahato taꞌatupyꞌa pe hawyi yt kat iꞌatuꞌe kuap i -Wakuap yn taꞌatunug mote aikotã watiꞌatuꞌapiheg miꞌiria iꞌatuꞌe taꞌatuwanetup hawe.
15 Miꞌi hawyi taꞌatupoꞌoro porapꞌi Peteru Iuwãu taꞌatuꞌyatypepyi hawyi teꞌeroꞌe toꞌope -Aikotã aru watunug miꞌiria wywo iꞌatuꞌe. Yt naku i watiꞌatuꞌapiheg miꞌiria katupono waku kahato taꞌatunug mekewat ipy kĩꞌã rakat pe iꞌatuꞌe.
16 Taꞌi heremo kahato raꞌyn iꞌatuminug wakuap iꞌatuꞌe. Yne tawa Ierusarẽi miaria ikuap taꞌyn waku hap ipy kĩꞌã rakat moehãite hap miꞌi pote yt naku i Peteru yt naku i Iuwãu yt watoꞌe kuap i miitꞌin me katupono yt miitꞌin minug kuap i hap ewy taꞌatunug naꞌyn iꞌatuꞌe.
17 Pyno waku waĩ watoꞌe iꞌatuepe -Yt ewehenoi teiꞌo miitꞌin me poꞌog mekewat Iesui etiat waku watoꞌe iꞌatuepe maꞌato ewehenoi wẽtup ok pe Iesui etiat pote ti aru uruiꞌatusatyꞌi satyꞌi eipe waku watoꞌe iꞌatuepe iꞌatuꞌe. Yt naku i ti Iesui eweimoherep miitꞌin me waku watoꞌe ro Iuwãu Peteru pe iꞌatuꞌe toꞌope itotiaria miitꞌin akag koꞌi paꞌi kororia. Miꞌi pote ti aru yt iwato i miitꞌin ikuap mekewat Iesui etiat iꞌatuꞌe toꞌope.
18 Miꞌi hawyi Peteru Iuwãu taꞌatukay kay waĩ taꞌatuꞌe hamo -Waku raꞌyn toran naꞌyn wyti mio iꞌatuꞌe. Poꞌog o yt ewehenoi i raꞌyn Iesui etiat iraniaꞌin me iꞌatuꞌe. Iwat het wyti mio yt eweiꞌe teiꞌo wẽtup ok pe iꞌatuꞌe.
19 Miꞌi hawyi Peteru Iuwãu tiꞌatuwesat -Kat som pyno poꞌog waku urutunug sio Tupana mikyꞌesat sio eiwat eimikyꞌesat mehinꞌin iꞌatuꞌe.
20 Maꞌato ti urutaꞌakasa ti raꞌyn howawi paĩ iꞌatuꞌe. Taꞌi uruikuap ti raꞌyn urumuꞌe hat iꞌatuꞌe. Miꞌi tupono ti yt uruwẽpohep kuap i ti raꞌyn urumuꞌe hat moherep hap ete pyi iꞌatuꞌe Peteru Iuwãu waĩꞌe haria pe.
21 Maꞌato iraniaꞌin -Tupana wyti imowaku ipy kĩꞌã rakat iꞌatuꞌe. Miꞌi pote ti nagnia yt tiꞌatuꞌapiheg kuap i maꞌato teꞌeroꞌe iꞌatuepe -Ewetunug ne pote ti aru uruiꞌatuꞌapiheg naꞌyn eipe iꞌatuꞌe paꞌi kororia.
22 -Taꞌi Tupana ti waku kahato katupono 40 anu yt hewyry kuap i rakat mio waku raꞌyn tutunug. Iwato poityꞌi raꞌyn wakuap iminug iꞌatuꞌe iraniaꞌin.
23 Miꞌi hawyi iꞌatuwẽpohep taꞌyn Peteru Iuwãu ete. Miꞌi hawyi tuwat raꞌyn taꞌatuwyriaꞌin Iesui mohey haria kape. Itote taꞌatuhenoi henoi raꞌyn kat iꞌatuꞌe kat iꞌatuꞌe paꞌi kororia ehay enoi haria nagnia ehay enoi haria taꞌatuepiat hap -Yt ewehenoi poꞌog i raꞌyn o miitꞌin me Iesui etiat uruepe iꞌatuꞌe -Maꞌato ewehenoi poꞌog ne mote ti aru uruiꞌapiheg sese raꞌyn eipe iꞌatuꞌe uruepe Uhytꞌiꞌin manaꞌin iꞌatuꞌe.
24 Miꞌi taꞌatukuap hawyi tuwat raꞌyn Tupana kape taꞌatuehay toꞌoꞌewyꞌewy hamo -Tupana uruꞌywot Atipy piat iꞌatuꞌe. En ni wuatꞌi waikiru nug hat iꞌatuꞌe. Urupytyp nug hat sese En iꞌatuꞌe. Tupana En ni wuatꞌi puat yꞌy nug hat iꞌatuꞌe. Taꞌi wuatꞌi piat yi nug hat En iꞌatuꞌe.
25 Taꞌi saꞌawyꞌi wuat urueꞌaseꞌi Tawi mienoi ewy ti mio taꞌatunug saꞌag naꞌyn uruete Tupana iꞌatuꞌe. Emienoi Epaꞌãu Wakuat kaipyi mio tã e Tawi epe saꞌawyꞌi tuwepy hawuo iꞌatuꞌe -Kan hamo som kan hamo som iꞌatupyꞌahak kahato wuatꞌi ywania ete Tupana e. Kat pote som toꞌonapin saꞌag neꞌi Emipoꞌoro uruporekuat nuat ete e Tawi saꞌawyꞌi miwan me. Mesup ehay ewy kahato taꞌatunug saꞌag kahato morekuaria Emiꞌairo Iesui ete meiũpe Tupana iꞌatuꞌe.
26 Mesup miitꞌin akag koꞌi paꞌi akag koꞌi yt tikyꞌesat hin i wyti Emipoꞌoro Iesui Taꞌatuporekuat nuat hap iꞌatuꞌe. Taꞌi aiwy Tawi wepy ewowiat hap morekuat Tawi wepy 2.12 hawe ewywuat kahato taꞌatunug mesup Tupana iꞌatuꞌe.
27 Katupono mesup taꞌyn teꞌeruwaꞌatunug kahato meiũpe tawa Ierusarẽi me Emipoꞌoro Iesui etiat saꞌag taꞌatuehay hamo iꞌatuꞌe. Tupana iꞌatuꞌe mesup taꞌyn morekuaria teꞌeruwaꞌatunug toꞌonapin saꞌag neꞌi Emiꞌairo uruporekuat nuat Iesui mohit hamo mesuwe iꞌatuꞌe. Uruꞌywot mesup taꞌyn mekewat morekuat Eroti iꞌewyte morekuat Pũsiu Piratu teꞌeruwaꞌatunug Isareu ywania iraniaꞌin ywania wywo toꞌonapin saꞌag neꞌi hamo iꞌatuꞌe. Koitywy tawa Ierusarẽi me taꞌatukat aat kaꞌap aikotã aikotã waku eropat sese haria Iesui mohey haria yne moma hamo taꞌatukat toꞌonapin saꞌag hap tote Tupana iꞌatuꞌe.
28 Tupana iꞌatuꞌe uruikuap wen maꞌato yt kat i saꞌag taꞌatunug kuap Esaꞌyru ete uruete waĩꞌere pote iꞌatuꞌe. Pywo ti rat yne porekuaria mesuwarotiaria epo piaria tukupteꞌen hap uruikuap iꞌatuꞌe. Uruikuap taꞌyn morekuaria yne emiꞌairo tukupteꞌen sio waku sio yt hap uruikuap iꞌatuꞌe. Tupana epo pe urutukupteꞌen miꞌi pote yt kat i saꞌag taꞌatunug kuap uruete sio waĩꞌere iꞌatuepe pote iꞌatuꞌe. Tupana etunug o emikyꞌesat ewy morekuaria po wo uruete emotypot hamuat iꞌatuꞌe katupono uruikuap taꞌyn morekuaria tunug ehay etiatno aikotã yianme emienoi iꞌatuepiat hap ewy yn taꞌatunug kuap iꞌatuꞌe.
29 Koitywy mesuwe miitꞌin akag koꞌi aiꞌakit reran kahato iꞌatuꞌe. Miꞌi pote Tupana urumoesaika kahato esaika hamo ehay Iesui etiat moherep torannia miitꞌin miat hamo iꞌatuꞌe.
30 Miꞌi hawyi -Tupana iꞌatuꞌe urumoesaika o Iesui po wo miitꞌin moehãite kahato hamo aikotã Esaꞌyru Iesui tunug saꞌawyꞌi wuat ewy yt uwe miit misepap nug hap ewy i etunug o urupo wo miitꞌin mowanetup kahato hamo iꞌatuꞌe haty wo Peteru Iuwãu wywo Tupana kape.
31 Mio tã iꞌatuꞌe pote tyryꞌe kahato meiẽwat iꞌatuwaꞌatunug hap getap. Miꞌi hawyi Tupana Paꞌãu Wakuat tiꞌatumoesaika kahato raꞌyn itotiaria iꞌatumiẽtup ewy. Miꞌi kaipyi yt teꞌerokenꞌẽ hin i raꞌyn wanikaptia pupi. Miꞌi hawyi Tupana ehay yn naꞌyn iꞌatuehay wo.
32 Miꞌi hawyi Iesui mohey haria woꞌokyꞌe kahato haria tukupteꞌen itote aikotã wẽtup miit ewy kahato iꞌatupyꞌa wasu hap. Taꞌi wẽtup miit ewy yn iꞌatuwanetup hap. Miꞌi hawyi iꞌatuegyiꞌat kahato rakaria wo tukupteꞌen itote. Miꞌi hawyi yt uwe i itote -Uiatnuat yn uhekat e hat topyhuꞌat iꞌatupyꞌasetpe katupono taꞌatumoꞌẽ kahato toꞌope kat koꞌi kat koꞌi iꞌatuekat e. -Taꞌi aiwatnuat topyhuꞌat yne uhekat yne uruekat mesup iꞌatuꞌe toꞌope katupono taꞌatukyꞌe kahato saꞌawyꞌi Iesui mohey haria itote.
33 Iesui ti tuwẽtem naꞌyn guꞌuro pyi iꞌatuꞌe kahato Iesui potpoꞌororia 12 ok takaria wuatꞌi miitꞌin me. Hesaika kahato iꞌatuehay Iesui ete topyhuꞌat itote. Miꞌi hawyi miitꞌin teꞌeruwanetup kahato iꞌatuehay kape. Miꞌi hawyi tuwepyi Tupana tuwehum kahato iꞌatuete.
34 Miꞌi hawyi getap kaꞌiwaria yi kaꞌiwaria iweneiru raꞌyn taꞌatuꞌyat taꞌatueꞌyi.
35 Miꞌi hawyi taꞌatueꞌyi saꞌup ti taꞌatuium 12 ok takaria pe. Miꞌi hawyi taꞌatumoꞌẽ mekewat saꞌup ihakyꞌeꞌi rakaria pe. Miꞌi hawyi yt wẽtup ok i iꞌatupyꞌasetpe toineꞌen ihakyꞌeꞌi rakat.
36 Miꞌi hawyi wẽtup ok mehin Iuse yi Sipiri kaipywiat wyti teꞌyi saꞌup hum yne raꞌyn 12 ok takaria pe. Iuse ti ahaꞌaseꞌi saꞌawyꞌi wuat Irewi ywania ti.
37 Miꞌi Iuse taꞌatuꞌe hawe ti teꞌeruwẽpowat -Aipowyro hat iꞌatuꞌe maꞌato Iuteu ywania -Mehin Panape iꞌatuꞌe taꞌatupusu puo.
