Iesui Potmuꞌeria 5:1-42
5 Miꞌi hawyi wẽtup eꞌat pe Panape ewywuat Iesui mohey hat mehin Anania tiweneru raꞌyn teꞌyi teharyꞌi Sawira wat wywo te.
2 Miꞌi hawyi yi saꞌup taꞌatuewyi ipatꞌok katupono yt taꞌatuium yne teran i Tupana pe. Miꞌi hawyi maꞌato -Urueꞌyi saꞌup urutum yne Tupana pe waku watoꞌe 12 ok takaria pe iꞌatuꞌe toꞌope. Miꞌi hawyi toto Anania 12 ok takaria kape hawyi -Heno uhyt e meiko raꞌyn urueꞌyi saꞌup toran naꞌyn atum neran Tupana pe e maꞌato yt pywo pe i.
3 Miꞌi hawyi Peteru toꞌe Anania pe -Kat pote som Tupana Paꞌãu Wakuat pe eso teran e. Taꞌi ahiag ehay pyi wyti eso teran e. Taꞌi ipatꞌok yn wyti etum uipo pe maꞌato -Atum yne Tupana pe ere uruepe pykai e.
4 Saꞌawyꞌi te ti toran epo pe mekewat yi toineꞌen e. Iꞌewyte koitywy etiweneru hawyi epo pe te mekewat yi saꞌup topyhuꞌat e. Kat poteĩ pyno -Atum yne raꞌyn wyti meiko Tupana pe ere uruepe. Taꞌi ipatꞌok te ti topyhuꞌat epo pe -Atum yne ere pykai e. Yt naku i are e. Taꞌi yt uhepe i wyti eso hap uhyt e maꞌato Tupana pe wyti eso hap e Peteru Anania pe.
5 Mio tã e hawyi taꞌat raꞌyn yi tote heso rakat hawyi ipyhu tekꞌe raꞌyn. Miꞌi kapiat akasa haria teꞌerokenꞌẽ kahato raꞌyn ipupi.
6 Miꞌi hawyi itotiaria kurum iwasuria terut raꞌyn sokpe kytꞌi huwy hamuat hawyi taꞌatusuwy ipiit hawyi taꞌatusyp taꞌyn Anania.
7 Miꞌi rakirẽ Anania piit taꞌatusyp taꞌyn. Miꞌi turan myẽꞌym ora hap ewy tokosap hawyi iharyꞌi putꞌok e raꞌyn Peteru ete. Yt toikuap hin i te teꞌaito kuꞌuro hap.
8 Miꞌi hawyi Peteru toꞌe tope -Mana Sawira e toran ni raꞌyn apo eheꞌyi saꞌup ewetum Tupana pe sio yt e. Pywo apo eꞌaito tum yne ti raꞌyn eheꞌyi saꞌup mana sio yt e. Miꞌi hawyi toiwesat -Pywo ti an mimi e tutum yne ti raꞌyn urueꞌyi saꞌup Tupana pe e mana Sawira Peteru pe.
9 Miꞌi hawyi -Yt naku i e Peteru katuponoĩ eiwoꞌoꞌewy eheso e. Kat poteĩ ewehãꞌãg neran urukaꞌiwat Paꞌãu Wakuat eheso hamo e. Pyno erahaꞌat ro oken kape mana Sawira e katupono tõꞌẽ raꞌyn eꞌaito syp kahu hawyi kurumꞌi wasuria koꞌi e. Mana e mio ti ewat epiit ikuꞌuro rakat iꞌewyte raꞌyn taꞌatuereto irane hyp hamo eꞌaito ewy e Peteru.
10 Miꞌi hawyi meremo mana Sawira iꞌewyte ikuꞌuro itote hawyi taꞌat raꞌyn Peteru py yatype hawyi ipyhu tekꞌe raꞌyn. Miꞌi hawyi kurum iwasu koꞌi teꞌerahaꞌat okenꞌypykiat turan -Ikuꞌuro raꞌyn wyti iharyꞌi iꞌatuꞌe. Miꞌi hawyi taꞌatuereto raꞌyn ipiit heꞌaito syp hap kape hyp hamo. Miꞌi hawyi taꞌatusyp heꞌaito ywyt puo.
11 Miꞌi hawyi waꞌatunug haria Iesui mohey haria teꞌerokenꞌẽ kahato raꞌyn typy ok heso rakaria ikuꞌuro iꞌatuehamo hawyi. Iꞌewyte iraniaꞌin ikuap hawyi teꞌerokenꞌẽ kahato taꞌatuꞌauka Tupana piat hap pupi.
Iesui Potmuꞌeria Iꞌatu Misepap Hap Taꞌatunug
12 Miꞌi hawyi 12 ok takaria po pe iwato kahato topyhuꞌat Tupana esaika hap. Miꞌi hawyi taꞌatunug moityꞌi raꞌyn iwato kahato Tupana ewy yt miitꞌin minug kuap i koꞌi taꞌatumoherep miitꞌin pyꞌasetpe.
13 Yt iraniaꞌin minug kuap i koꞌi ewywuat raꞌyn taꞌatunug Tupana po wo. Miꞌi pote -Aikotã som miꞌiria inug miꞌi tã iꞌatuꞌe iraniaꞌin. Taꞌi waku kahato ti Iesui mohey haria tunug iꞌatuꞌe iraniaꞌin toꞌope wen maꞌato -Watokenꞌẽ kahato iꞌatupupi iꞌatuꞌe. Arewanetup yt naku i watuwat miꞌiria upi katupono sio watuwat iꞌatuupi hawyi mehin Anania eharyꞌi Sawira ewywuat watopyhuꞌat iꞌatuꞌe toꞌope. Miꞌi hawyi Iesui mohey haria teꞌeruwaꞌatunug kahato yne eꞌat pe morekuat Sarumau eꞌoken note Tupana motypot yat koro pe.
14 Iꞌewyte ikyꞌesat haria typyꞌi sese Iesui mohey hanuaria ipakup i ihainiaꞌin haryporiaꞌin tokokaꞌat Aikaꞌiwat Iesui kape. Mekewat eꞌat pe tuwehytꞌok kahato raꞌyn imohey haria pakuptia iꞌatuꞌyatype.
15 Miꞌi hawyi iꞌahuu rakaria taꞌatueꞌyni iãti wẽtup sok yn toꞌotote tote tukupteꞌen muap ẽpe upi -Peteru paꞌãu mono tokosap uruhoꞌopot poityꞌi pote urupohag nug hamo iꞌatuꞌe. Miꞌi hawyi mono uruehãite i raꞌyn iꞌatuꞌe iꞌahuu rakaria toꞌope.
16 Iꞌewyte tawa Ierusarẽi popy etiaria tawa hit popy wuaria teꞌeruwaꞌatunug Ierusarẽi kape. Miꞌi kape taꞌatuerut iꞌahuu rakaria iꞌewyte miitꞌin ahiag ipiit piat rakaria taꞌatuerut. Miꞌiria yne Tupana tiꞌatumoehãite 12 ok takaria po wo.
17 Miꞌi pote paꞌi koro tomierohik koꞌi wywo iꞌatuehayꞌywyi kahato raꞌyn Iesui mohey haria ete. Miꞌi hawyi iꞌatusaiwot kahato neꞌi raꞌyn -Waku watiꞌatumoma yne Iesui mohey haria iꞌatuꞌe toꞌope.
18 Miꞌi pote taꞌatupyhik taꞌyn yne Iesui potpoꞌororia 12 ok takaria yt nakuaria i pyhik hawe.
19 Maꞌato wãtym hake turan putꞌok e Tupana mipoꞌoro atipy kaipywiat iꞌatuꞌokenhypꞌok hamuat. Miꞌi upi tuwat iheg myi.
20 Miꞌi hawyi itote toꞌe iꞌatuepe -Eweiwat ro Tupana motypot yat koro kape hawyi eweikupteꞌen no wuatꞌi miitꞌin pyꞌasetpe hawyi ewehenoi henoi kahato ro -Iesui ti tuwẽtem i raꞌyn guꞌuro pyi eweiꞌe ro itote e. Iesui mohey hap yn ni muap Tupana kapiat eweiꞌe i ro iꞌatuepe e. Iesui yn wyti aimoieineꞌen wuatꞌi eꞌat piat kuap hat eweiꞌe ro itotiaria pe e atipy kaipywiat suut hat Iesui potpoꞌororia pe.
21 Miꞌi hawyi tuwat raꞌyn 12 ok takaria hawyi teꞌeruwehytꞌok hunete Tupana motypot yat koro pe. Miꞌi hawyi taꞌatuꞌatumuꞌe kahato i raꞌyn itotiaria.
Miꞌi turan paꞌi koro toto raꞌyn towyriaꞌin wywo morekuaria yat koro kape. Miꞌi hawyi toiꞌatukay kay raꞌyn tuwewawi woꞌonapin haria temiitꞌin Isareu ywania etuꞌisaria toiꞌatukay kay. Teꞌeruwaꞌatunug yne raꞌyn hawyi taꞌatupoꞌoro tesuraraꞌin 12 ok takaria poreraꞌat hamo woꞌopyhyp hap kape.
22 Miꞌi hawyi tuwat raꞌyn suraraꞌin wen maꞌato yt uwe i taꞌatupuẽti Iesui potmuꞌeria itote. Miꞌi hawyi teꞌeraꞌaipok i raꞌyn henoi hamo.
23 -Taꞌi okenhyp koꞌi iheg me yne uruipuẽti iꞌatuꞌe iꞌewyte suraraꞌin tukupteꞌen yne okenꞌypyke iꞌatuꞌe. Taꞌi okenhyp koꞌi iheg me yne tukupteꞌen iꞌatuꞌe. Miꞌi hawyi uruhoꞌoꞌokenhypꞌok 12 ok takaria wywuat akipy wen maꞌato itote yt uwe hin i raꞌyn uruipuẽti eimipyhik koꞌi paĩ iꞌatuꞌe.
24 Miꞌi hawyi Tupana motypot yat koro kaꞌiwaria surara akag koꞌi paꞌi koro koꞌi teꞌeruwanetup kahato hawyi teꞌeroꞌe -Aikowo som teꞌeropopy Iesui potmuꞌeria taꞌatupyhik hap pyi iꞌatuꞌe toꞌope. Aikotã aru waku watunug miꞌiria ete iꞌatuꞌe toꞌope.
25 Miꞌi turan putꞌok e wẽtup ok miit toꞌe hamo -Tuꞌisaria e mio wyti eimipyhik koꞌi Iesui potmuꞌeria tukupteꞌen Tupana motypot yat koro pe i raꞌyn e. Miꞌi tote taꞌatuꞌatumuꞌe kahato miitꞌin Taꞌatukaꞌiwat ete e morekuaria pe.
26 Mio tã e hap taꞌatukuap hawyi suraraꞌin sem tuwat i raꞌyn iꞌatueropoꞌok hamo. Miꞌi hawyi toꞌe suraraꞌin akag muap upi temiitꞌin me -Eimitum mo o e yt eweiꞌatusatyꞌi satyꞌi teiꞌo mekewat Pauru e hap het rakat mesuwe miitꞌin sem ipotmuꞌeria typyꞌi tok pe e kat pote meremo ti aru miitꞌin sem aiꞌatuꞌuka nu wo e. Eiweꞌeg wo o e. Miꞌi hawyi suraraꞌin tiꞌatukay kay Iesui emiitꞌin.
27 Miꞌi hawyi taꞌatuereto morekuat yat kape. Taꞌatuerut hawyi taꞌatupag woꞌomuꞌe haria akag pyꞌasetpe i raꞌyn.
28 Miꞌi hawyi paꞌi koro toꞌe -Kat pote som eweiꞌatumuꞌe wuatꞌi miitꞌin Iesui ete yt urumikyꞌesat ewy i iꞌatuꞌe. Saꞌawyꞌi ti -Yt ewehenoi i ran o Iesui etiat iraniaꞌin me urutoꞌe raꞌyn ehepe wen maꞌato ti mio yne miitꞌin tawa Ierusarẽi miaria tikuap kahato mekewat Iesui etiat e. Taꞌi Tupana Mipoꞌoro Aiporekuat nuat auka haria ti paꞌi koꞌi eweiꞌe ti uruepe e paꞌi koro. Yt naku i kahato eipe e.
29 Miꞌi hawyi Peteru tiꞌatuwesat -Morekuaria e waku kahato urutunug wuatꞌi eimikyꞌesat ewy wen maꞌato karãpe eipe urupoꞌoro yt Tupana mikyꞌesat ewywuat nug hamo i miꞌi pote ti poꞌog waku urutunug Tupana mikyꞌesat oktan waĩꞌeweiꞌe pykai e Peteru.
30 Aiwat ahaꞌaseꞌiꞌin Etupana timoehãite i raꞌyn eimiꞌauka ariaꞌyp posak etiat Iesui uhytꞌiꞌin e.
31 Miitꞌin Potypot no Tupana tikyꞌesat kahato urukaꞌiwat Iesui e. Mio tã e Tupana saꞌawyꞌi -Miꞌi Miit ti Uipo sese kawiat ieineꞌen hat e. Miꞌi Miit ti wuatꞌi miitꞌin ehakyeraꞌat hanuat e Tupana saꞌawyꞌi miwan me e Peteru. Taꞌi Iesui ti henoi ahepe mekewat muap aiminug yt naku i hap kaipywiat aihep hamuat e. Miꞌi Miit yn ni muap Tupana kapiat hat e. Miꞌi Miit yn ni aiꞌywania Isareu ywania wanetup saꞌag hap mohãpyk kuap hat e. Toikyꞌesat yne aiꞌywania tomiehakyeraꞌat koꞌi wuat hap e.
32 Yt uruto yn i ti mio tã urutoꞌe maꞌato Tupana Paꞌãu Wakuat iꞌewyte mio tã e aat kaꞌap uruꞌe hap ewy te e Peteru. Mio wyti Tupana tum neran Topaꞌãu Wakuat tomikyꞌesat nug haria pe paĩ e. Miꞌi Miit etiat ri urumikuap uruimoherep miitꞌin me ehepe uhytꞌiꞌin e. Miꞌi Miit yn ahehakyeraꞌat kuap hat e Peteru woꞌonapin haria akag koꞌi pe.
Paꞌi Kororia Pyꞌasetpe Tukupteꞌen Iesui Potmuꞌeria
33 Mio tã e Peteru hawyi woꞌonapin haria iꞌatupyꞌahak kahato Iesui potpoꞌororia ete. Miꞌi hawyi -Waku watiꞌatuꞌuka miꞌiria iꞌatuꞌe toꞌope.
34 Miꞌi hawyi itote toineꞌen paꞌi kororia pyꞌasetpe wẽtup ok miit iꞌatunapin hat akag koro. Miꞌi miit poꞌog iꞌatumimotypot. Miꞌi ti Muisei waĩꞌe hap moherep hat. Miꞌi miit set Kamarieu e hap het rakat. Miꞌi hawyi ipoĩꞌam naꞌyn iꞌatupyꞌasetpe yne napin hamo -Uimimuꞌeria e atikyꞌesat eweiꞌatupoꞌoro porapꞌi meimuẽwaria 12 ok takaria suraraꞌin upi wẽtup yat kape e.
35 Tuwat yne ipotmuꞌeria hawyi toꞌe woꞌomuꞌe hat Kamarieu itotiaria pe -Uipotmuꞌeria e eiweꞌeg wo o e. Eiwanetup o kat aru pyno watunug Iesui mohey haria ete e.
36 Haꞌawyte wẽtup surara Teuta tuwemowato meiũpe tawa Ierusarẽi me e. Miꞌi hawyi 400 suraraꞌin tuwat hupi e. Miꞌi turan ni ikuꞌuro raꞌyn Teuta taꞌatuꞌauka raꞌyn e. Miꞌi hawyi yt kat i raꞌyn topyhuꞌat iwat hemiit. Tuwat yne raꞌyn iwat haipepiaria e. Mesup yt uwe i mekewat Teuta emiit mesuwe e Kamarieu Isareu ywania pe.
37 Iꞌewyte gaꞌatpo tama Karireia piat uhyt Iuta e hap het rakat tuwemowato meiũpe e. Miꞌi hawyi tuwat kahato miitꞌin hupi typyꞌi kahato hesuraraꞌin wo e. Miꞌi hawyi mekewat woꞌosetpuruk hap eꞌat pe toiꞌatukay kay yne tesuraraꞌin tuwewawi hawyi taꞌatuꞌatuꞌuka kahato mesuwe maꞌato miꞌi turan ikuꞌuro raꞌyn Iuta hawyi teꞌeruwesytpok taꞌyn Iuta saipepiaria torannia e Kamarieu.
38 Miꞌi pote areꞌe mio ehepe waku ti aipohep taꞌyn Iesui saipepiaria ete e. Waku waure wo yn naꞌyn aito iꞌatukai e Kamarieu. Iꞌatuwat iꞌatueko miitꞌin watnuat neꞌi pote ti aru ikahuro raꞌyn topyhuꞌat e.
39 Maꞌato iꞌatuehay pywuat Tupana watnuat pote ti aru yt karamuo i watimoma kuap iꞌatuehay e. Pyno Tupana etiatno watuꞌuka pote imiꞌakit koꞌi wo aru watopyhuꞌat uhytꞌiꞌin e Kamarieu paꞌi koro emiitꞌin me.
40 -Pywo kahato tig urunapin mehin Kamarieu iꞌatuꞌe itotiaria. Miꞌi tã ti aru epiat urunapin hap ewy ti aru pyno urutunug uhyt iꞌatuꞌe paꞌi koro kapiat waꞌatunug haria. Miꞌi hawyi taꞌatukay kay 12 ok takaria teꞌeruwewawi. Miꞌi hawyi taꞌatuꞌahyk ahyk saity saꞌag wo Iesui potmuꞌeria. Taꞌatuꞌapiheg kahato hawyi waĩꞌiꞌatuꞌe -Yt ewehenoi poꞌog i raꞌyn o miitꞌin me Iesui etiat iꞌatuꞌe. Yt ewehenoi teiꞌo iraniaꞌin me Iesui etiat iꞌatuꞌe. Maꞌato poꞌog ewetunug mote poꞌog aru saꞌag uruiꞌatuꞌapiheg eipe iꞌatuꞌe. Pyno waku eweiwat i raꞌyn eiꞌyat koꞌi kape iꞌatuꞌe 12 ok takaria pe.
41 Miꞌi hawyi tuwat i raꞌyn morekuaria yat koro pyi. Tuwat hawyi iꞌatuwẽpapꞌi kahato itote -Tupana iꞌatuꞌe urutuwehum kahato raꞌyn eete iꞌatuꞌe. Koitywy urumosatyꞌi satyꞌi saꞌag kahato itote Esaꞌyru mohey haria uruto pote iꞌatuꞌe. Maꞌato ti waku uruhoꞌopot Esaꞌyru Iesui set poꞌypyi iꞌatuꞌe.
42 Miꞌi hawyi ipotmuꞌeria tiꞌatumuꞌe aat kaꞌap yne iꞌatuꞌyat puaria. Iꞌewyte taꞌatuꞌatumuꞌe Tupana motypot yat koro totiaria. Yt iꞌatuwẽpohep hin i maꞌato -Iesui ti Tupana tipoꞌoro Aiporekuat nuat iꞌatuꞌe taꞌatuehay pirik wo.
