Iesui Potmuꞌeria 6:1-15
6 Miꞌi hawyi ipotmuꞌeria timoherep kahato miitꞌin me yne Iesui etiat. Mekewat eꞌat pe imohey pakup i haria teꞌeruwemotypyi kahato itote. Imohey pakup i haria typy pusu kuap haria tukupteꞌen. Miꞌiria yne Iuteuria maꞌato typy pusu kuap haria miꞌiria tukupteꞌen. Wẽtup ywania Kereku pusu kuap haria maꞌato wẽtup ywania Epereu pusu kuap haria. Miꞌi hawyi wẽtup eꞌat pe Kereku pusu kuap haria teꞌeroꞌe toꞌope -Kat pote Epereu pusu kuap haria poꞌog imoꞌẽ taꞌatuehiwuria pe aito wuaria kai iꞌatuꞌe.
2 Miꞌi hawyi 12 ok takaria tikuap mio tã iꞌatuꞌe hap hawyi taꞌatuꞌatukay kay raꞌyn torannia hawyi teꞌeroꞌe Iesui mohey haria typyꞌi rakaria pe -Maꞌato ti yt naku i uruiꞌatoiat Tupana ehay hiwu koꞌi piat miꞌu moꞌẽ hamo iꞌatuꞌe. Uruto ti yt urupotputꞌokꞌe i typy motpap nug hamo iꞌatuꞌe. Yt urupotputꞌokꞌe i Tupana ehay moherep aat kaꞌap hamo iꞌewyte hiwu poi hamo aat kaꞌap iꞌatuꞌe. Niatpo kahato typy motpap nug hamo aat kaꞌap iꞌatuꞌe.
3 Miꞌi tupono waku eweiꞌairo 7 ihainia wakuat rakat hiwu sese koꞌi piat miꞌu moꞌẽ hamo iꞌatuꞌe. Waku eweiꞌairo iweꞌeg kahato rakaria iꞌatuꞌe. Waku eweikat Iesui mohey sese haria inug hamo iꞌatuꞌe. Waku Tupana Paꞌãu Wakuat mikyꞌesat ewywuat nug kuap haria eweiꞌairo iꞌatuꞌe. Eweiꞌairo ro wakuaria miitꞌin mimotypot koꞌi iꞌatuꞌe. Miꞌiria ewywuat yn ni waku watipoꞌoro urupotpap nug hamo miꞌu moꞌẽ hiwu koꞌi piat hamo iꞌatuꞌe 12 ok takaria Iesui mohey haria pe.
4 Maꞌato uruto wyti Tupana ehay moꞌẽ haria wo yn ni urutukupteꞌen aru aat kaꞌap uruto iꞌatuꞌe. Iꞌewyte Tupana wywo yn uruto uruehay teran aat kaꞌap iꞌatuꞌe.
5 Miꞌi hawyi wuꞌuka haria teꞌeroꞌe -Pyno waku watunug eiꞌe hap ewy iꞌatuꞌe taꞌatuwesat 12 ok takaria. Miꞌi hawyi taꞌatuꞌairo 7 ihainia. Saꞌawyꞌi taꞌatuꞌairo mekewat Iesui mohey kahato hat mehin Etewãu katupono Tupana Paꞌãu Wakuat eiam kahato topyhuꞌat miꞌi miit. Taꞌi Tupana mikyꞌesat ewy yn tutunug. Miꞌi hawyi taꞌatuꞌairo wẽtup ok mekewat mehin Wiripi. Miꞌi hawyi taꞌatuꞌairo mehin Pokuru iꞌewyte mehin Nikanu. Miꞌi hawyi mehin Timau iꞌewyte mehin Pamena taꞌatuꞌairo. Miꞌi hawyi mekewat mehin Nikurau yt Iuteu ywania i mekewat tawa Antiokia piat taꞌatuꞌairo. Miꞌi hawyi torannia meimuẽwat 7 ok taꞌyn tukupteꞌen itote.
6 Miꞌi hawyi taꞌatumiꞌairoria 7 ok takaria taꞌatuerut 12 ok takaria kape. Miꞌi hawyi teꞌeruweponug naꞌyn hawyi -Tupana etiꞌatupoityro kahato miꞌiria iꞌatuꞌe. Etum o meikorania pe esaika hap epotpap nug hamo iꞌatuꞌe 12 ok takaria.
7 Miꞌi hawyi hãpyk kahato meimuẽwat 7 ok takaria timoꞌẽ miꞌu hiwu sese koꞌi pe. Miꞌi pote Iesui potmuꞌeria sese 12 ok takaria tiꞌatumuꞌe aat kaꞌap miitꞌin yne Iesui mikyꞌesat nug hap ete. Miꞌi hawyi yne tawa Ierusarẽi miaria pe taꞌatumoꞌẽ kahato Tupana ehay. Miꞌi pote typyꞌi kahato raꞌyn imohey pakup i haria itote tukupteꞌen. Iꞌewyte iꞌatu kahato Iesui mikyꞌesat yn nug haria tukupteꞌen itote. Miꞌi turan paꞌiria sem iꞌewyte teꞌeropyhuꞌat Iesui mohey haria wo raꞌyn itote.
Etewãu Tohenoi Kahato Saꞌawyꞌi Wuat Hap Etiat
8 Miꞌi hawyi mekewat mehin Etewãu timoherep kahato raꞌyn miitꞌin me Tupana esaika hap -Taꞌi Tupana mikyꞌe kahato ti miꞌi iꞌatuꞌe. Taꞌi Tupana ti tuwehum kahato Etewãu ete iꞌatuꞌe toꞌope itote. Tupana ti hum kahato tewaku hap hawyi toimoherep kahato topo wo Tupana yn inug kuap hap koꞌi. Yt miit minug kuap i koꞌi tutunug Tupana esaika hamo.
9 Maꞌato meiũran iraniaꞌin Iuteu ywania paꞌi koꞌi Tupana yat kaipywiat õꞌẽ haria iꞌatupyꞌahak kahato Etewãu ete Taꞌi taꞌatuꞌakit reran neꞌi taꞌatuehay wo maꞌato yt taꞌatuꞌakit kuap i katupono miꞌi Tupana Paꞌãu kaipyi raꞌyn ihay. Miꞌi pote Etewãu ehay ete iꞌatupyꞌahak sese raꞌyn woꞌomuꞌe haria yi Sireneu pywiaria tawa Aresãtere pywiaria yi Sirisia pywiaria yi Asia pywiaria iꞌatupyꞌahak kahato Etewãu ete. -Taꞌi uruto urutuwepoꞌoro iꞌatuꞌe. Yt uwe i urupoꞌoro kuap haria iꞌatuꞌe. Taꞌi miitꞌin mipoꞌi poꞌi saity porap haria koꞌi uruto iꞌatuꞌe Etewãu me.
10 Miꞌi hawyi taꞌatunug Tupana motypot yat tawa Ierusarẽi me. Miꞌi hawyi taꞌatusetꞌok taꞌatuꞌyat Miitꞌin porenotem wanikaptia po pywiat hap yat iꞌatuꞌe. Miꞌiria Etewãu tiꞌatuwesat hãpyk kahato katupono Tupana Paꞌãu kaipyi raꞌyn ihay. Iweꞌeg kahato poꞌog poꞌog iꞌatuweꞌeg hap kai. Miꞌi pote yt taꞌatuwesat kuap i. Yt kat iꞌatuꞌe kuap i Etewãu me.
11 Yt taꞌatuwesat kuap i pote teꞌeroꞌe toꞌope -Waku watipoꞌoro heso rakaria morekuaria kape heso hap Etewãu etiat enoi hamo. Waku mio tã iꞌatuꞌe heso rakaria -Etewãu ni ihay saꞌag kahato Tupana ete e hamo iꞌatuꞌe. Tupana etiat wekyryꞌi hat neꞌi iꞌewyte ahaꞌaseꞌi Muisei ete ihay saꞌag kahato e hamo iꞌatuꞌe ipyꞌahak takaria.
12 Miꞌi hawyi tuwat raꞌyn Etewãu etiat taꞌatueso hamo. Miꞌi hawyi nagnia tikuap taꞌyn hawyi yt iꞌatuwese hin i raꞌyn Etewãu ete. Miꞌi pote nagnia iꞌewyte miwan enoi haria tuwat raꞌyn suraraꞌin wywo. Miꞌi hawyi haty wo taꞌatupytyk Etewãu. Miꞌi hawyi yi upi taꞌatuekyi morekuaria yat kape ihay kuap hamo pywo apo sio yt hap kuap hamo.
13 Miꞌi hawyi henoi hanuaria iꞌatupoĩꞌam taꞌatueso hap teꞌeroꞌe hamo -Meiũwat Etewãu ti aimoweukaꞌi Tupana yat ete aiꞌywania napin hap ete iꞌatuꞌe.
14 Meiũwat Tupana yat wato ti Iesui tipuruk irane e wyti iꞌatuꞌe. Saꞌawyꞌi wuat aheko yne ainapin Muisei piat hap ti Iesui tawa Nasare piat timoma irane e ti Etewãu iꞌatuꞌe.
15 Miꞌi hawyi itotiaria teꞌerahaꞌat Etewãu kape hawyi -Are paĩ iꞌatuꞌe iwat howa ti hẽtyhot raꞌyn atipy piat owa hẽtyhot hap ewy raꞌyn iꞌatuꞌe toꞌope typyꞌi rakaria.
