Iesui Potmuꞌeria 7:1-60
7 Miꞌi hawyi paꞌi koro apo e Etewãu me -Pyno apo mio tã iꞌatuꞌe hap pywo sio yt e.
2 Miꞌi hawyi toiwesat -Eiwanetup to meikowo mehinꞌin e uhaꞌaseꞌiꞌin uiꞌywania e waku sakpo e ti aheTupana. Nimo raꞌyn ti tuwemoherep ahaꞌaseꞌi Aparãu me yi Mesuputamia pe.
3 Miꞌi hawyi wẽtup eꞌat Tupana toꞌe -Aparãu e erẽtem no ewat eꞌyi pyi eꞌywotꞌin yatypepyi e. Atimoherep teran wyti epe wẽtup yi e Aparãu me e.
4 Miꞌi hawyi totiat raꞌyn tetawa Kauteu hawyi toto pya tetawa pyi mekewat tawa Arã kape toto wẽtup yi kape toto. Miꞌi hawyi toineꞌen tawa Arã tote. Toꞌywot ikuꞌuro hawyi Aparãu toto i raꞌyn aikope aikope Tupana timoherep muap hap upi toto. Miꞌi hawyi putꞌok e mesuwe aikope mio watoineꞌen hap kape toto e Etewãu. Mesuwat aheꞌyi tote hewyry motꞌi hawyi Tupana toꞌe tope -Aparãu e mesuwat yi yne wyti aru atum epe uiwy e. Pywo ti mesuwat yi wato hap oktan atum yne epe iꞌewyte ewat emiariru emiariruꞌin wuatꞌi eꞌat piaria pe atum mesuwat eꞌyi e.
5 Mio tã e ti saꞌawyꞌi Tupana ahaꞌaseꞌi Aparãu me yt wẽtup i imepyt sese te turan. -Atimotypyꞌi kahato ti aru esaꞌyruꞌin e. Taꞌi mesuwat yi yne atum mesup epe e yt kat i hin te Aparãu eꞌyi meiũpiat te turan e. Yt ipyãtap oktan i te heꞌyi turan e Etewãu.
6 Miꞌi hawyi Tupana toꞌe Aparãu kape -Emiariruꞌin wyti aru 400 eꞌat iꞌaman mot turan naꞌyn ikohyewyry kahato wanikaptia eꞌyi tote e. Itote ti aru esaipe piaria hoꞌopot kahato. Motpap wyti aru taꞌatunug yt kat saꞌup i e. Taꞌi taꞌatuhoꞌopot kahato wanikaptia pyꞌasetpe e Tupana ahaꞌaseꞌi Aparãu me e.
7 Maꞌato emiariru koꞌi atimoehakyꞌeꞌi haria ti aru atiꞌatuꞌapiheg kahato e. Aikope aikope emiariru koꞌi tukupteꞌen wanikaptia po pe turan areineꞌen iꞌatukawiatno kahato hamo e. Yne yne esaipepiaria ewanikaptia atiꞌatuꞌapiheg kahato aru e Tupana. Miꞌi hawyi atiꞌatuporenoꞌẽ ti aru wanikaptia po pyi. 400 eꞌat iꞌaman mot hap ete atiꞌatukay kay aru miꞌiria meikowo mesuwat eꞌyi kape i raꞌyn e. Miꞌi hawyi ti aru tõꞌẽ tõꞌẽ kahato esaipepiaria yne meikowo uimotypot hamo e Tupana saꞌawyꞌi ahaꞌaseꞌi Aparãu me e Etewãu.
8 Miꞌi pote atikyꞌesat yt kat i emusin sokpe e. Atikyꞌesat yne esaipepiaria esaꞌyruꞌin emiariruꞌin toꞌoꞌewy wẽtup ywania yn e. Miꞌi pote eremusin sokpe tekꞌe. Iꞌewyte etitek esaꞌyru Isaki emusin sokpe e. Miꞌi tã eipiit eweimoherep pote uweꞌin esaipepiaria hap tuwekuap yt kat i hemusin sokpe hap ete e. Miꞌi hawyi ti aru uwe eꞌywania sese kuap hap topyhuꞌat e Tupana Aparãu me saꞌawyꞌi sese e Etewãu. Miꞌi hawyi Aparãu haꞌyru raꞌyn Isaki tuwemoherep e. Aparãu saꞌyru Isaki 8 eꞌat wemoherep hap hawyi toimusin sokpe tekꞌe taꞌyn aikotã Tupana mienoi ewy e. Miꞌi hawyi Isaki saꞌyru raꞌyn Iako aiꞌywania ywot pot tuwemoherep 12 ok haꞌyru rakat raꞌyn topyhuꞌat e Etewãu. Iako saꞌyruꞌin 12 ok takaria saipepiaria kaipyi ti mesup watoineꞌen 12 ok ywania aito hap watikuap taꞌyn e. Miꞌi hawyi wẽtup Iako saꞌyru ti Iuse e.
9 Saꞌawyꞌi Iuse ete iykeꞌetꞌin teꞌeruwemoehayꞌywyi kahato miꞌi pote taꞌatuweneru raꞌyn tama Esitu piaria pe. Itote itotiaria toiꞌatueropat yt kat saꞌup i taꞌatuium pykai. Miꞌi hawyi itote Iuse tuweran toineꞌen maꞌato Tupana yt iꞌatoiat hin i Esitu pe e.
10 Tupana tikawiatno kahato Iuse hoꞌopot hawiat heineꞌen hap ete e. Itote toimoweꞌeg kahato poꞌog Esitu ywania kai. Miꞌi pote yi Esitu piat morekuat Warãu tikyꞌe kahato Iuse. Toikyꞌesat kahato toꞌyat piaria torannia akag wo hap hawyi yi Esitu piat tuꞌisa koro wo raꞌyn totopag Iuse temiitꞌin poꞌog torannia kai e. Tuwehum kahato morekuat Warãu Iuse ete e.
11 Mekewat eꞌat pe yt kat i hin i itote iꞌaman yi Esitu pe iꞌewyte yi Kanaꞌã pe yt kat i hin i miꞌi pote yꞌy yt kat i. Yt naku i kahato itote katupono topap taꞌyn yne mikoi iꞌewyte iꞌatuhũria miꞌu. Miꞌi hawyi aiꞌywania ahaꞌaseꞌiꞌin ete yt naku i topyhuꞌat. Meiũran uꞌi yne ikahuro raꞌyn ahaꞌaseꞌi Iako saꞌyruꞌin yat rote.
12 Miꞌi hawyi ahaꞌaseꞌi Iako tikuap taꞌyn uꞌi kahato yi Esitu pe e hap toikuap hawyi toiꞌatupoꞌoro raꞌyn tosaꞌyruꞌin Iuse eꞌykeꞌetꞌin uꞌi kyiꞌat hamo e.
13 Miꞌi hawyi iꞌatumierut uꞌi yt kat i hawyi toiꞌatupoꞌoro i raꞌyn poꞌog uꞌi kyiꞌat hamo. Miꞌi hawyi putꞌok iꞌatuꞌe yi Esitu pe hawyi tuwehytꞌok morekuat wato emiit akag Iuse yat pe. Miꞌi hawyi Iuse tuwemoherep taꞌyn toykeꞌetꞌin kape -Uito ti eheywyt sese Iuse toꞌe hamo e. Miꞌi hawyi Iuse tomoherep toeykeꞌetꞌin yi Esitu piat morekuat koro Warãu kape ikuap hamo e.
14 Waku yne hawyi toikay kay toꞌywot Iako tuwewawi tama Esitu kape. Miꞌi hawyi tuwat raꞌyn itotiaria Iako wywo 75 miit tuwat raꞌyn ahaꞌaseꞌiꞌin nimuaria mepytꞌin e Etewãu toꞌauka teran haria pe.
15 Pyno uhytꞌiꞌin ipotꞌapyk taꞌyn ahaꞌaseꞌi saꞌawyꞌi wuat Iako tama Kanaꞌã pyi tama Esitu kape e. Taꞌi watikuap aikotã Iako toineꞌen motꞌi yi Esitu tote hawyi itote ikuꞌuro raꞌyn hap watikuap e. Iꞌewyte ahaꞌaseꞌiꞌin nimuat Iako saꞌyruꞌin 12 ok takaria wyti yne topap yi Esitu tote e.
16 Maꞌato miꞌiria yt taꞌatusyp hin i Esitu pe maꞌato taꞌatusyp taꞌyn yi Kanaꞌã pe aikope saꞌawyꞌi Aparãu syp hawe mekewat tawa Sikeĩ e hap tote. Taꞌatusyp yne aheꞌyian miaria aikope saꞌawyꞌi Aparãu tikyiꞌat nu kaꞌa uhyt Emu saꞌyruꞌin kai saꞌup mo yi Kanaꞌã pe e.
17 Miꞌi hawyi ahaꞌaseꞌiꞌin emiariru koꞌi teꞌeruwetypyi kahato aito wuaria nimuaria yi Esitu tote. Miꞌi hawyi ti teꞌeraꞌaipok teran i raꞌyn yi Kanaꞌã kape aikotã saꞌawyꞌi Tupana toꞌe Aparãu me hap ewy raꞌyn e.
18 Meiũran wẽtup ok morekuat i raꞌyn topyhuꞌat yi Esitu pe morekuat pakup. Miꞌi ti yt ikuap i raꞌyn ahaꞌaseꞌi Iuse etiat e.
19 Taꞌi tuweukaꞌi kahato raꞌyn saꞌawyꞌi wuat aito wuaria ete -Yt naku i kahato typyꞌi eimepytꞌin meiũpe e aiꞌywania pe e. Miꞌi pote o eweipugha raꞌyn ehaꞌyruꞌin iꞌatuꞌywaĩꞌĩ turan iꞌatukuꞌuro hamo e morekuat pakup ahaꞌaseꞌi Muisei ywãꞌĩ hap eꞌat pe e.
20 Miꞌi hawyi Muisei ywãꞌĩ hap eꞌat topyhuꞌat maꞌato teꞌeraꞌakasa ikahu kahato raꞌyn hap kape hawyi iꞌywot ity tomotag naꞌyn iheg me myẽꞌym ewaty taꞌatuꞌyat pe e.
21 Wẽtup eꞌat pe taꞌatupag Muisei hire turan wato pe yꞌy hit owa tote. Taꞌatumoto iꞌanam me aikope yt uwe i ipuẽti kuap hap tote taꞌatupag e. Maꞌato morekuat koro sakiꞌyt tipuẽti Muisei tuwei turan tuwak tuerut e. Miꞌi hawyi totat raꞌyn Muisei hawyi -Uimepyt raꞌyn e. Miꞌi hawyi morekuat koro sakiꞌyt tomotag naꞌyn Muisei tomepyt no raꞌyn e.
22 Meiũran morekuat timoweꞌeg kahato Muisei. Toimuꞌe kahato tosaipepiatno. Toiꞌatumuꞌe kahato aikotã Esitu ywania morekuaria mikuap koꞌi yne toiꞌatumuꞌe e. Miꞌi hawyi Muisei itag hawyi -Taꞌi tohepap kahato morekuat ewy iꞌatuꞌe Esitu ywania Muisei pe e.
23 Toikuap yne hãpyk hap hawyi 40 iꞌaman mot pe tokosap hawyi Muisei toꞌe tuwepe -Are paĩ uhewyry teran naꞌyn uiꞌywania kape uiwaꞌakasa hamo. Isareu ywania kape araꞌakasa teran e Muisei e.
24 Miꞌi hawyi taꞌakasa tewyry hap upi Esitu ywania esurara kape wẽtup ok toꞌywania ahyk hat kape taꞌakasa. Miꞌi hawyi Muisei ipyꞌahak taꞌyn hawyi Esitu ywania esurara toiꞌauka raꞌyn towyꞌok poꞌypyi e.
25 -Taꞌi uiꞌywania tikuap hawyi ti aru uikyꞌe raꞌyn e tuwepe. Taꞌi Tupana mipoꞌoro ti en wanikaptia po piat hat wyti en iꞌatuꞌe wyti aru uiꞌywaniaꞌin e tuwanetup hawe tuwepe Muisei. Maꞌato yt pywo pe hin i katupono miꞌi hawyi wẽtup eꞌat i raꞌyn toto hawyi toipuẽti toꞌywania typy ok wuꞌuka haria e.
26 Miꞌi hawyi tokosap iꞌatumoperup i hamo -Uheꞌywytꞌin e waĩ eiwuꞌuka teiꞌo e katupono wẽtup ok yn ahaꞌaseꞌi kaipywiat aito wẽtup ywania yn eipe pote yt naku i eiwuꞌuka eiwoꞌope e.
27 Miꞌi hawyi mekewat wuꞌuka hap nug hat toꞌe Muisei pe -Motoro meiũpepyi e katupono yt uruporekuat hin i en e. Uwe pyno epoꞌoro meikowo urunapin hamo e Muisei pe.
28 Uiꞌauka teran en e aikotã gaꞌatpo etiꞌauka morekuat esurara hap ewy apo e Muisei pe.
29 Mio tã e pote Muisei tokenꞌẽ raꞌyn morekuat pupi hawyi topopy raꞌyn pya yi Esitu pyi e Etewãu. Miꞌi hawyi mekewat yahig wato tote Muisei hewyry raꞌyn 40 anu tohũria apykok hap upi hewyry.
30 Miꞌi tote toipuẽti teharyꞌi e. Miꞌi tote typy ok haꞌyru raꞌyn tuwemoherep e. Wẽtup eꞌat pe Muisei toto raꞌyn yityꞌok Sinai kape hawyi itote taꞌakasa hu yp wuk hap.
31 Miꞌi hawyi aria pyꞌasetpe atipy piat miit ewywuat tuwemoherep e. Miꞌi hawyi tokosap ikuap hamo.
32 Miꞌi hawyi toikuap Tupana ehay itote -Uito ti ewat eꞌaseꞌiꞌin eTupana e. Uito ti eꞌaseꞌi Aparãu Isaki Iako eTupana e Muisei pe. Miꞌi pote Muisei iwuwu kahato hawyi yt taꞌakasa poꞌog neran i howawi -Arahaꞌat Tupana sese kape pote meremo uikuꞌuro e tuwepe.
33 Miꞌi hawyi Tupana toꞌe Muisei pe -Etihep to epy sokpe uimotypot hamo katupono meiũpe uimotypot hap eꞌyi tote ewyry e.
34 Ariot atipy kaipyi aiꞌywania ehakyeraꞌat wanikaptia po pywiat hamo e. Yt naku i kahato taꞌatuhoꞌopot yi Esitu pe e. Araꞌakasa raꞌyn yne yi Esitu piaria kape e. Iꞌatuehakyꞌeꞌi kahato yi Esitu pe hap kape araꞌakasa e. Iꞌatumikyryꞌi kahato itote iꞌatuete uhehamo e. Taꞌi iꞌatuwoꞌokakꞌi hap atikuap hawyi ti ariot atipy kaipyi iꞌatuehakyeraꞌat hamo e Muisei pe. Woropoꞌoro mesup yi Esitu kape uhemiitꞌin poreraꞌat wanikaptia po pywiat hamo e aheTupana Muisei pe e Etewãu.
35 Pyno tomiꞌairo Muisei Tupana tipoꞌoro temiitꞌin ehakyeraꞌat hamo e. Taꞌi toipoꞌoro Muisei yi Esitu kape tehay atipy kaipywiat enoi hamo e. Yt taꞌatukyꞌesat hin i Muisei taꞌatuporekuat nuat pykai Tupana tipoꞌoro miꞌi miit aiꞌywania saꞌawyꞌi wuaria ehakyeraꞌat hamo e. Tupana ihay mekewat ariaꞌyp wuk hap kaipywiat turan toipoꞌoro Muisei temiitꞌin powyro hamo. Putꞌok e itote yi Esitu pe hawyi hemiitꞌin sese teꞌeroꞌe -Uwe kahu epoꞌoro uruporekuat no urunapin hamo iꞌatuꞌe Muisei pe. Mio tã e haria kape Tupana tipoꞌoro Muisei e Etewãu.
36 Taꞌi iwato kahato Tupana esaika hap Muisei timoherep yi Esitu pe e. Miꞌi hawyi toiꞌatuporenotem naꞌyn aiꞌywania saꞌawyꞌi wuaria wanikaptia po pyi e. Miꞌi hawyi Muisei timoherep Tupana esaika hap hyemyiꞌa koro yꞌy hup e hap tote e. Taꞌi tutunug muap yꞌy pyꞌasetpuo ihyemyiꞌa koro sakpo e. Miꞌi hawyi tuwat ihyemyiꞌa sakpo yi gag upi wanikaptia po pyi e. Miꞌi hawyi yahig wato tote 40 anu toimotypot Tupana iwat hesaika hamo e. Itote tutunug yt miitꞌin minug kuap i koꞌi wuatꞌi ehamo e.
37 Taꞌi aiꞌywania miꞌatoiat Muisei saꞌawyꞌi topyhuꞌat Tupana miꞌairo miꞌi miit pykai e Etewãu toꞌauka teran haria pe. Taꞌi nimuat Muisei henoi yiannote Isareu ywania pe -Uiꞌywania e meiũran wyti aru Tupana tomowato kahato tomipoꞌoro uiꞌewywuat eiporekuat koro wo e. Miꞌi Miit uhaipepiat sese tuwemoherep aru wẽtup ahemiariru e saꞌawyꞌi Muisei e.
38 Saꞌawyꞌi toiꞌatunapin kahato aiꞌywania Isareu ywania mekewat yityꞌok Sinai e hap tote aikotã atipy kaipywiat henoi tope hap ewy tohenoi ahepe saꞌawyꞌi sehay wuatꞌi eꞌat piat tohenoi aiꞌywania pe e.
39 Maꞌato ahaꞌaseꞌiꞌin yt iꞌatupap teran hin i Tupana mimoherep sehay wuatꞌi eꞌat piatnuat upi e. Taꞌatupun neꞌi hawyi teꞌeruwemorem neran yi Esitu kape i raꞌyn e.
40 Miꞌi hawyi teꞌeroꞌe Muisei ywyt Arãu me -Etunug no Ahetupana epo wo mehin aipuꞌap moherep hanuat iꞌatuꞌe. Katupono aipuꞌap moherep hat eꞌykeꞌet Muisei ti toto raꞌyn yityꞌok kape iꞌatuꞌe. Miꞌi hawyi mio yt uruikuap i raꞌyn aikope toineꞌen Muisei hap sio ikuꞌuro sio yt iꞌatuꞌe Arãu me e.
41 Miꞌi hawyi ahaꞌaseꞌiꞌin tunug Wewato ahup hit iãꞌãkap taꞌatuetupana wo e. Miꞌi ete teꞌeruwehum kahato iꞌewyte aiꞌywotꞌin tomotypot taꞌatupo wuat taꞌatuminug Wewato ahup hit e. Miꞌi hawyi ti taꞌatuꞌauka raꞌyn taꞌatuhũ imotypot hamo e. Miꞌi hawyi taꞌatuium hãꞌãkap we -Waku kahato en tupana taꞌatuꞌe hap wewato pe aiꞌywotꞌin nimuaria e. Ikahu kahato ahetupana iꞌatuꞌe toꞌope e.
42 Miꞌi hawyi Tupana toꞌe -Pyno waku eweipyhuꞌat ehetupana wẽtup kawiat wywo e Tupana. Miꞌi hawyi taꞌatumotypot tupana wo aat waty waikiru koꞌi e. -Uruetupana kahato en aat waty waikiru iꞌatuꞌe saꞌag ahaꞌaseꞌiꞌin e.
43 Yt naku i taꞌatumotypot tupana wo Tupana minug koꞌi aikotã Tupana toꞌe miwan me hap ewy -Yt uimotypot hin i eipe -Uruimotypot En eweiꞌe uhepiat pykai e Tupana. -Uruhũria uruiꞌauka emotypot haype eweiꞌe uhepe wen maꞌato atikuap kahato eheso hap e. Yt uimohey haria hin i eipe e. Atikuap eiwanetup hap eipyꞌa piat aat kaꞌap ehewyry uimipoꞌoro Muisei upiat turan mekewat yahig wato tote turan. Yt uhowowi hin i eipyꞌa koꞌi maꞌato mekewat ehetupana Moroki kape yn eipyꞌa e. -Waikiru Irewã waku kahato ahetupana wo eweiꞌe eiwoꞌope itote e. Tupanaria iãꞌãkap koꞌi wyti ewetunug kahato itote ehetupana ewywuat koꞌi e. Miꞌiria yn eweimotypot aat kaꞌap itote. -Uruimotypot kahato Aparãu eTupana eweiꞌe kahato yt pywo pe pykai i e Tupana sese. Pyno worohoꞌopoꞌoro eipe pya kahato eheꞌyi wakuat kai wẽtup ywania kape wẽtup tama kape. Ehewanikaptia esuraraꞌin po pe eweikupteꞌen aru pya kahato eheꞌyi uimiium wakuat kaipyi hawyi e. Ehewanikaptia yt nakuaria i po pe wyti aru eweikupteꞌen e. Mekewat yi Papironia e hap kape worohoꞌopoꞌoro aru e. Miꞌi tote ehewanikaptia yt nakuaria i eropat hamo worohoꞌopoꞌoro aru e Tupana saꞌawyꞌi miwan me aiꞌywania pe Amosi 5.25-27 pe e.
44 Pyno yahig koro puo nimuaria aiꞌywania ikohyewyry kahato e. Miꞌiria pe Muisei toꞌe -Waku watunug no Tupana yat koro meiũpe aikotã Tupana mimoherep kat kupitu kat kupitu hap ewy e. -Waku ipe kawiat iꞌewyte sokpe kawiat ewetunug uimotypot yat e Tupana uhepe e Muisei e. Saꞌawyꞌi Tupana ihay kahato aiꞌywania pe tomotypot yat sokpe kawiat puo.
45 Miꞌi hawyi karãpe tuwehytꞌok yi Kanaꞌã pe turan mekewat eꞌat pe Tupana motypot yat ipe kawiat taꞌatuereto yi Kanaꞌã kape e. Maꞌato ahaꞌaseꞌi Muisei yt teke i yi Kanaꞌã pe katupono ikuꞌuro Iutãu hy sakpo yityꞌok tote e. Miꞌi hawyi Tupana tiꞌasyp itote e. Miꞌi hawyi Muisei saipepiat Iusue upi raꞌyn tuwehytꞌok kahato tawa Kanaꞌã pe nimuaria aheꞌyian miaria e. Miꞌi hawyi yi Kanaꞌã pe taꞌatupuẽti wẽtup ywania koꞌi raꞌyn ahewanikaptia sese yt nakuaria i maꞌato miꞌiria Tupana tiꞌatusopo yne raꞌyn hawyi tutum yi Kanaꞌã aiꞌywania pe e. Miꞌi hawyi toineꞌen naꞌyn Tupana motypot yat ipe kawiat yi Kanaꞌã tote e. Miꞌi hawyi aiꞌywania teꞌeruwemotypyi kahato itote e. Miꞌi hawyi mehin Tawi topyhuꞌat morekuat koro wo itote e.
46 Morekuat Tawi ete Tupana tuwehum kahato raꞌyn e. Miꞌi hawyi wẽtup eꞌat pe morekuat Tawi toꞌe -Uhaꞌaseꞌi Iako eTupana e atunug neran meiũpe aheꞌyi Kanaꞌã tote emotypot yat sese e.
47 Miꞌi hawyi -Waku esaꞌyru inug e. Miꞌi hawyi morekuat Tawi ikuꞌuro hawyi haꞌyru morekuat Sarumau tunug naꞌyn Tupana yat koro itote e.
48 Maꞌato watikuap taꞌyn aikotã aheTupana yt toineꞌen kuap i aipo wuat aiminug toꞌyat pe e Etewãu.
49 Kat pote nimo Tupana toꞌe -Atikyꞌesat pote waku yne waikiru koꞌi tote araꞌapyk hawyi mytyyp yne tote waku uipy heiam topyhuꞌat e. Uiwato kahato. Yt areineꞌen neran i miitꞌin minug uiꞌyat koꞌi pe e. Uiꞌyat wato hap oktan yt uwe i inug kuap are katupono areineꞌen atipy pe iꞌewyte areineꞌen yi tote e.
50 Uiwat uiminug yne yne waikiru sem hawyi aat yi waty iꞌewyte yne ipuat koꞌi atiꞌatunug yne. Pyno aikotã aru pyno eipe ewetunug uheiam yi tote e Tupana miwan me Isaia 66.1-2 pe e Etewãu toꞌauka teran haria pe.
51 Uiꞌywania e saꞌawyꞌi te pyi ahaꞌaseꞌiꞌin tuꞌuka kahato Tupana mikyꞌesat nug hap ete e. Koitywy miꞌiria ewywuaria eweikupteꞌen eiperia e. Taꞌi ahaꞌaseꞌiꞌin ewywuaria kahato eweikupteꞌen e. Taꞌi eipyꞌa heg kahato aikotã aiꞌywania saꞌawyꞌi wuaria ewy sese eweikupteꞌen e. Tupana Paꞌãu mikyꞌesat koꞌi yt ewetunug hin i eiperia e. Ipyꞌahak sese rakaria wo eweikupteꞌen Tupana piat eikyꞌe hap ete e. Taꞌi ewehoꞌoꞌokenhyp kahato wyti ehewaure kaꞌa koꞌi Tupana ehay kape e. Aikotã aiꞌywania nimuaria ewy kahato ti ewetunug yt naku i saꞌag kahato Tupana mipoꞌoro koꞌi ete e. Taꞌi Tupana mipoꞌororia yne auka haria ti eipe eiꞌywotꞌin pot koꞌi ewy e.
52 Taꞌi Tupana ehay moherep haria saꞌawyꞌi wuaria yne henoi henoi kahato Hemiit Wakuat uut hamuat hap maꞌato miꞌiria ete wyti ahaꞌaseꞌiꞌin tiꞌatumikyryꞌi kahato hawyi taꞌatuꞌatuꞌuka saꞌag neꞌi e. Taꞌi ahaꞌaseꞌiꞌin ewywuaria eweikupteꞌen katupono gaꞌatpo Tupana tipoꞌoro Temiit Wakuat Aiporekuat nuat sese aikotã toꞌe hap ewy wen maꞌato Miꞌi Miit Wakuat eweimaꞌat saꞌag neꞌi hawyi ti eweiꞌauka saꞌag neꞌi ariaꞌyp posak tote e Etewãu toꞌauka teran haria pe.
53 Taꞌi iꞌewyte Tupana mipoꞌororia atipy kaipywiaria henoi hãpyk kahato Muisei pe Tupana ehay Miꞌi Miit etiat einapin hamuat wen maꞌato yt eweimohey hin i iꞌatumimoherep koꞌi e. Atipy kaipywiaria ehay pun haria eipe e Etewãu toꞌauka teran haria pe.
54 Miꞌi hawyi mio tã e pote iꞌatupyꞌahak kahato raꞌyn Etewãu ete kyryet kyryet iꞌatuꞌe.
55 Maꞌato Tupana Paꞌãu Wakuat no toineꞌen kahato Etewãu ete. Miꞌi hawyi tehaꞌat atipy kape Etewãu. Miꞌi tote Tupana mimotypot hap ẽtyhot hap itote taꞌakasa. Miꞌi turan -Aheykeꞌet Iesui itote e.
56 Ewehaꞌat ro Tupana po sese kawiat ipoĩꞌam naꞌyn e. Are paĩ ikahu kahato ikahu kahato e. Waku kahato itote. Ewehehaꞌat ro e Etewãu iꞌatuepe.
57 Miꞌi hawyi -Waĩꞌiꞌatuꞌe yt naku i e hat iꞌatuꞌe. Epoꞌinik to katupono yt uruikuap teran i poꞌog ehay iꞌatuꞌe taꞌatuehay pirik wo. Miꞌi haype meremo teꞌeruwewaure kaꞌa hik taꞌatupo wo. Miꞌi hawyi torannia itotiaria tuwat tuwat Etewãu ehay monik hamo.
58 Miꞌi pote taꞌatuporenotem Etewãu tawa Ierusarẽi myi. Miꞌi hawyi iꞌauka haria teꞌerekamisa hep ium taꞌatuꞌakag kurum iwasu Sauru po pe. Miꞌi hawyi Sauru toꞌe tesuraraꞌin me -Eweiꞌauka ro Etewãu nu wo e haty wo.
59 Miꞌi hawyi mak makꞌe iꞌatuꞌe nu wo Etewãu auka hamo. Miꞌi turan Etewãu ihay haty wo -Uikaꞌiwat Iesui epo pe raꞌyn atum uipaꞌãu e.
60 Mio tã toꞌe hawyi tuwepỹꞌãtutuk hawyi -Uikaꞌiwat etiꞌatukyꞌe yn naꞌyn o yne uiꞌauka haria e. Waure wo ereineꞌen uiꞌauka hap kai e haty wo hawyi ipyhu tekꞌe hawyi ikuꞌuro raꞌyn toket sese.
