Iesui Potmuꞌeria 8:1-40
8 Mekewat eꞌat turan kurum iwasu Sauru timoma teran yne Iesui mohey haria tawa Ierusarẽi totiaria. Toiꞌatusatyꞌi satyꞌi kahato Aikaꞌiwat emiitꞌin yne. Miꞌi hawyi iꞌatuehakyꞌeꞌi kahato itote imohey haria. Miꞌi pote teꞌeropopy kahato pya tawa Ierusarẽi kaipyi Sauru piat taꞌatuꞌatuꞌuka hap pupi. Miꞌi hawyi teꞌeruwesytpok kahato aikope aikope waku hap kape kat etawa hit kape kat etawa wato kape tuwat tuwat. Iraniaꞌin tuwat yi Samaria kape maꞌato iraniaꞌin tuwat yi Iuteu kape. Maꞌato Iesui saipepiaria 12 ok takaria yt teꞌeropopy hin i tawa Ierusarẽi pyi.
2 Miꞌi hawyi Iesui mohey haria koro koꞌi tuwat taꞌatuwy Etewãu piit syp hamo. Taꞌatuꞌasyp turan paa iꞌatuꞌe kahato ikyꞌe haype. Taꞌatusyp hawyi teꞌeruwak kahato itote ikyꞌe kahato haria pote.
3 Miꞌi hap eꞌat pe iꞌatuꞌakag Sauru timoma kahato Iesui mohey haria tawa Ierusarẽi miaria. Miꞌi pote yne iꞌatuꞌyat puo teke teke toiꞌatumoma teran haype. Ihainiaꞌin iꞌewyte haryporiaꞌin toiꞌatuherepꞌi herepꞌi yi upi hawyi toiꞌatupyhyp woꞌopyhik hawe. Miꞌi tet pupi iraniaꞌin Iesui mohey haria teꞌeruwesytpok kahato tawa Ierusarẽi kaipyi teꞌeruwenoꞌẽ.
Wiripi Tawa Samaria Pe Tohenoi Iesui Etiat
4 Miꞌi hawyi maꞌato kat etawa pe kat etama pe aikope aikope teꞌeropyhuꞌat hap tote taꞌatuꞌatusytpok kahato sehay wakuat yne Iesui etiat.
5 Miꞌi hawyi mekewat 7 ok takat Wiripi toto yi Samaria kape. Miꞌi hawyi itote topotmuꞌe tehay wo -Iesui ti Tupana Miꞌairo Aiporekuat nuat e.
6 Miꞌi hawyi Wiripi po puo Tupana timoherep kahato itotiaria pe tesaika hap. Iwato kahato toimoherep wakuap koꞌi yt miit minug kuap i hap ewy tutunug Wiripi po wo. Miꞌi pote yi Samaria piaria teꞌerahaꞌat kahato iꞌewyte teꞌeruwanetup kahato hawyi -Uhyt mimi koitywy uruimohey raꞌyn Iesui ti rat Tupana Saꞌyru iꞌatuꞌe. Pywo ti rat emienoi Wiripi iꞌatuꞌe.
7 Miꞌi pote Iesui tiꞌatusopo kahato ahiagnia yi Samaria ywania piit pyi Wiripi po wo. Toiꞌatusopo turan kak iꞌatuꞌe kak iꞌatuꞌe ahiagnia. Ikag motꞌi rakaria toiꞌatumoehãite kahato. Yt hewyry kuap i rakaria toiꞌatumoewyry i raꞌyn. Ipiit heg nakaria toiꞌatupiit moperupꞌi i raꞌyn.
8 Miꞌi pote yi Samaria totiaria -Waku sakpo waku sakpo En Tupana iꞌatuꞌe taꞌatuehay wepiit kahato popuo.
9 Waku kahato yi Samaria tote wen maꞌato toineꞌen itote wẽtup ok paini Simau e hap het rakat. Miꞌi ti tomikuap ewy inug topo wo yt pywo piat i. Toimoherep kat koꞌi kat koꞌi miitꞌin atumoperupꞌi hap katupono toikyꞌesat topo pe yne miitꞌin haype itotiaria tomohey hap toikyꞌesat. Miꞌi pote toꞌe -Pywo ti rat Tupana mipoꞌoro ahepaini wuat e Simau miitꞌin maꞌat hamo.
10 -Uito ti poꞌog poꞌog torannia kai e Simau itotiaria pe. Mio tã toꞌe pote iꞌatupap kahato paini koro upi -Pywo ti rat paini Simau ni Tupana misepap nug kuap hat sese iꞌatuꞌe tuꞌisaria itotiaria.
11 Meremo topo wuat tominug koꞌi wo paini tiꞌatumoperupꞌi yne tawa piaria yi Samaria piaria. Maꞌato topo wo meremo hap wywo toiꞌatumaꞌat kahato miitꞌin tominug yt pywo piat i hamo.
12 Mekewat eꞌat pe putꞌok e Wiripi itote yi Samaria tote Iesui moherep iꞌatuepiat hamo are. Miꞌi hawyi tohenoi henoi aikotã miitꞌin tunug Taꞌatuporekuat no Tupana hap koꞌi tohenoi -Taꞌi Tupana tipoꞌoro raꞌyn wyti Aiporekuat sese uiwyriaꞌin e. Iesui ti Tupana Miꞌairo Ahehakyeraꞌat hanuat e. Pyno -Woromohey En Iesui eweiꞌe ro hawyi atikyꞌesat En Iesui Uipotypot no eweiꞌe ro mesup uhytꞌiꞌin manaꞌin e Wiripi yi Samaria totiaria pe. Mio tã e hawyi teꞌeruwehik taꞌyn Wiripi mienoi Iesui etiat ete. Miꞌi hawyi taꞌatumohey raꞌyn Wiripi mienoi Iesui etiat. Waku miꞌi hawyi toiꞌatusetꞌok taꞌyn miꞌiria itotiaria haryporiaꞌin ihainiaꞌin yꞌy wo Iesui set upi. -Worohoꞌosetꞌok Iesui mohey haria yꞌy wo e Wiripi iꞌatuepe.
13 Miꞌi hawyi mekewat paini Simau timohey ran hawyi tuwesetꞌok taꞌyn miꞌi yꞌy wo. Miꞌi hawyi toto raꞌyn Wiripi upi katupono toikyꞌesat Wiripi esaika hap ewy -Atikyꞌesat Wiripi esaika hap ewy e. Wiripi ewywuat areineꞌen hawyi mono paini koro wo areineꞌen aru Wiripi ewy e Simau tuwepe. Miꞌi hawyi ipap kahato Wiripi upi. Taꞌakasa teran iminug koꞌi yt miitꞌin minug ewywuat i hap koꞌi kape. -Aikotã som tutunug e tuwanetup hawe paini.
Peteru Hawyi Iuwãu Samaria Piaria Iꞌatumuꞌe Hamo
14 Miꞌi hawyi meiũran Iesui potmuꞌeria 12 ok takaria tikuap taꞌyn aikotã yi Samaria piaria Tupana ehay upi raꞌyn teꞌeropyhuꞌat hap. Miꞌi hawyi taꞌatupoꞌoro raꞌyn uhyt Peteru uhyt Iuwãu ikuap hamo.
15 Peteru Iuwãu putꞌok taꞌatuꞌe hawyi taꞌatuhẽtup Tupana kape Topaꞌãu Wakuat ium Samaria ywania piat hamuat taꞌatuhẽtup.
16 Katupono saꞌawyꞌi Wiripi tiꞌatusetꞌok yꞌy wo Iesui mohey haria itotiaria wen maꞌato Topaꞌãu Wakuat Tupana yt tum i te mekewat ywania pe.
17 Miꞌi pote Peteru Iuwãu teꞌeruweponug Iesui mohey haria pakup i koꞌi ete hawyi -Tupana iꞌatuꞌe etum no Epaꞌãu Wakuat Esaꞌyru mohey pakup i haria pe iꞌatuꞌe. Miꞌi hawyi taꞌatusat raꞌyn hawyi iꞌatukai kahato raꞌyn Tupana Paꞌãu Wakuat.
18 Miꞌi hawyi paini Simau tikuap taꞌyn hawyi -Are paĩ atikyꞌesat kahato Peteru Iuwãu esaika hap e. Pyno aru atikyiꞌat hawyi atum aru Ipaꞌãu uhemiitꞌin me e tuwepe tuwanetup hawe. Miꞌi hawyi toꞌe -Mehin Peteru e atikyꞌesat etum uhepe esaika hap Maꞌãu ium kuap uhepiat hamuat e. Etum naꞌyn uhepe hawyi ti aru saꞌup atum iwato kahato epe e.
19 Waku kahato areineꞌen eꞌewy mehin katupono miꞌi hawyi atum kuap Ipaꞌãu uhepiat ikyꞌesat haria pe eꞌewy e paini. Iꞌewyte atikyꞌesat ewat esaika hap Tupana ewywuat. Miꞌi pote atum neran eꞌewy Maꞌãu uimikyꞌesat ewywuat nug haria pe. Pyno etum no uhepe esaika hap hawyi uito wy atum kahato haꞌup epe e Peteru pe.
20 Maꞌato Peteru tiwesat -Uhyt e uiwanetup hawe ti aria koro wuatꞌi eꞌat piat hap kapiat en e. Esaꞌup uato hap yt kan hamo i Tupana miium kyiꞌat hamo e. Waku Tupana tipoꞌoro esaꞌup uato aria koro kape ewywo e. Yt naku i rat erewanetup paini e katupono yne Tupana miium koꞌi yt kat saꞌup i yt uwe i ikyiꞌat kuap e. Yt naku i -Atikyiꞌat teran Tupana miium e.
21 Ewanetup hap ti yt Tupana kape hin i e. Yt ehepap hin i uruwywo epotpap hap e.
22 Pyno ehẽtup to poꞌog yn naꞌyn urukaꞌiwat pe -Atoiat yne teran uiminug saꞌag koꞌi hawyi koitywy woromohey En yn uhehakyeraꞌat hamo ere ro urukaꞌiwat Iesui pe katupono ti miꞌi yn ipotputꞌok e emowanetup kahu hamo emoweꞌeg hap nug hamo paini e.
23 Miꞌi yn emohãpyk kuap e. Yt ikahu hin i wyti ewanetup hap e. Yt ehay se hin i wyti mio tã ere e. Ahiag po pe sese wyti ereineꞌen e iꞌewyte eminug yt naku i hap eko po pe wyti ereineꞌen ne en e Peteru paini Simau me.
24 Miꞌi hawyi paini paa e kahato hawyi toꞌe haty wo Peteru pe -Ehẽtup to Tupana pe uhehakyeraꞌat hamo mehin e. Yt atikyꞌesat i kahato eꞌe hap ewy topyhuꞌat uhete Tupana kaipyi e paini Simau Peteru pe.
25 Miꞌi hawyi Peteru Iuwãu tiꞌatumuꞌe kahato itotiaria tawa Samaria totiaria yne Iesui mienoi nug hamuat hap ete. Miꞌi hawyi teꞌeraꞌaipok tawa Ierusarẽi kape maꞌato muap upi taꞌatuhenoi henoi yne raꞌyn tawa Ierusarẽi kape muap upiaria tawa hit upi taꞌatuhenoi yi Samaria piaria pe taꞌatuhenoi.
Wẽtup Ok Etiopia Kaipywiat Wiripi Tipuẽti
26 Mekewat eꞌat pe Tupana tipoꞌoro temiit atipy kaipywiat Wiripi kape tehay enoi hamo. -Ereto ro meiũpepyi Wiripi e Tupana. Ereto ro yi Samaria pyi aat posak pe mekewat yahig muat muap upi tawa Ierusarẽi pywiat tawa Kasa kapiat upi e Tupana mipoꞌoro Wiripi pe.
27 Miꞌi hawyi toto raꞌyn yahig koro kape Wiripi Tupana e hap ewy. Miꞌi hawyi itote tehaꞌat hawyi taꞌakasa mekewat muap upi yi Etiopia potypot haryporia kawiat mana Kantasi emiitꞌin akag potpoꞌoro kape. Miꞌi ti yi totiat yara piat kape taꞌakasa taꞌaipok taꞌyn tawa Ierusarẽi myi tetama Etiopia kape. Miꞌi tote saꞌawyꞌi te Ierusarẽi kape toto hawyi totomotypot itote Tupana. Waku yne hawyi taꞌaipok tetama kape i raꞌyn. Miꞌi miit topyhuꞌat Etiopia piat haryporia kawiat morekuat Kantasi ekareꞌen iꞌewyte tetineiru yne ipo piat hat. Morekuat Kantasi ekat yne apykok hanuat topyhuꞌat.
28 Miꞌi hawyi mekewat yara puo tuwemuꞌe aat Tupana miwan ete. Isaia miwan ete tuwemuꞌe toimowẽpap apyk pe pykai ihũ Kawaru koꞌi heꞌyara heroto yi upi hetama Etiopia kape.
29 Miꞌi howawiat Wiripi ehaꞌat turan Tupana toꞌe -Ereto ro Wiripi. Ereput ro mekewat yara upi e.
30 Mio tã e hawyi punꞌe raꞌyn hupi Wiripi. Miꞌi hawyi putꞌok e mekewat miit morekuat powyro hat ete. Miꞌi turan mekewat miit tomowẽpap taꞌyn Tupana ehay moherep hat Isaia miwan. Wiripi tikuap hawyi tuwẽpowat -Etikuap apo kat e kat e tohenoi iwan me mehin e.
31 Miꞌi pote toiwesat -Yt rat uhyt e. Yt uwe i rat uimuꞌe miꞌi pote rat yt atikuap kuap i rat e maꞌato uimuꞌe pote ti ren meremo atikuap e. Mio tã toꞌe hawyi -Pyno ereke ro uhyt eraꞌapyk to meiũpe uiꞌyatype e.
32 Saꞌawyꞌi wuat Tupana mienoi Isaia piat ete tuwemuꞌe kahato. Mio tã e Isaia -Aikotã aihũ Uweiria toto toꞌauka hamo hawyi yt tuꞌuka hin i toꞌauka haria wywo e. Miꞌi hap ewy wyti aru Uimipoꞌoro toto toꞌauka hamo e. Iꞌewyte aikotã aihũ mepyt yt ihay hin i wahapꞌok hap eꞌat pe hap ewy ti aru Uimipoꞌoro yt waĩꞌe i tohoꞌopot hap eꞌat pe e.
33 Iꞌywania yt timotypot hin i Uimipoꞌoro hawyi yt kat hamo i taꞌatuꞌauka saꞌag e. Taꞌatuwat taꞌatuminug yt ikahu i pote yt taꞌatukyꞌesat i henoi hap. Miꞌi pote saꞌag kahato taꞌatumohit e. Yt hãpyk hin i morekuaria titek Uimipoꞌoro e. Yt naku i kahato aru iꞌauka haria teꞌeropyhuꞌat wuatꞌi eꞌat pe e Tupana e Isaia pe Isaia 53.7-8 kaipyi toimowẽpap.
34 Miꞌi hawyi apo e Wiripi pe -Pyno Isaia henoi tuwetiat apo sio wẽtup ok etiat tohenoi yian mete e.
35 Miꞌi hawyi Wiripi tiwesat topyꞌa pyi -Taꞌi yt tuwetiat i wyti tohenoi maꞌato Tupana Mipoꞌoro Ahehakyeraꞌat hat Iesui etiat wyti Tupana ehay moherep hat Isaia henoi saꞌawyꞌi ahepe yianme miwan me e Wiripi. Miꞌi hawyi toimoherep yne mekewat miwan me Iesui etiat mekewat morekuat emiit pe.
36 Miꞌi hawyi putꞌok iꞌatuꞌe yꞌy ete. Miꞌi hawyi Morekuat powyro hat toꞌe -Meiko yꞌy uhyt waku apo uhetꞌok en meikowat yꞌy pe e Wiripi pe.
37 Mio tã e pote -Taꞌi mehin e pywo etomohey Iesui toineꞌen Ehakyeraꞌat hat epyꞌa pe pote ti waku worosetꞌok e. Miꞌi hawyi toiwesat -Uhyt e pywo ti rat atomohey sakpoꞌe Iesui ti Aiporekuat nuat Tupana Mipoꞌoro e. Miꞌi Miit ti Tupana Saꞌyru sese atomohey kahato mehin e Wiripi pe. -Pyno waku e Wiripi.
38 Miꞌi hawyi morekuat emiit akag toꞌe temiitꞌin me -Ewemopyhuꞌat ro meremo uheꞌyara mesuwe yẽpeke muap tote e. Miꞌi hawyi yara yi totiat pyi tuwenoꞌẽ yꞌy kape. Miꞌi hawyi tuwehytꞌok yꞌy pe. Miꞌi hawyi Wiripi hetꞌok taꞌyn miꞌi.
39 Miꞌi hawyi tuwenoꞌẽ yꞌy pyi hawyi yt tuwekuap i raꞌyn Wiripi katupono Tupana Paꞌãu tioto raꞌyn meremo itote pyi hawyi yt uwe i raꞌyn yahig note Wiripi. Miꞌi hawyi morekuat emiit toto raꞌyn tetama kape iwepiit kahato raꞌyn tuwehum kahato raꞌyn Tupana ete.
40 Miꞌi turan Wiripi tuwemoherep i raꞌyn tawa Asutu pe. Miꞌi hawyi tawa Asutu piaria toiꞌatumuꞌe kahato Iesui ete. Miꞌi hap totepyi toto i raꞌyn Sesareia kape maꞌato toto turan yne tawa hit upi toiꞌatumuꞌe yne muap upi tokosap mo.
