Iesui Potmuꞌeria 9:1-43
9 Mekewat eꞌat pe mekewat Sauru e hap het rakat toineꞌen Ierusarẽi me. Miꞌi ti ipyꞌahak kahato poꞌog Iesui mohey haria ete -Atiꞌatuꞌuka yne Iesui emiitꞌin e Sauru topyꞌa pe. Atiꞌatumoma torannia eipe e haty wo ipotmuꞌeria pe. Eimoma hap yn atikyꞌesat e. Miꞌi haype toto raꞌyn paꞌi koro kape Ierusarẽi miat kape.
2 Miꞌi hawyi toꞌe paꞌi koro pe -Uipoꞌoro ro en tawa Tamaku kape katupono atikyꞌesat kahato atikat teran mekewat wẽtup muap mohey haria itotiaria e. Taꞌi ihainiaꞌin iꞌewyte haryporiaꞌin imohey haria atiꞌatupytyk pytyk teran hawyi ti ateropoꞌok teran meikowo ewowi Ierusarẽi kape iꞌatuꞌapiheg hamo e. Miꞌi tupono ti emiwan atikyꞌesat ekaipyi uipoꞌoro epiat hap miꞌi hap nug hamo mehin e Sauru paꞌi koro pe. Miꞌi hawyi tutum Sauru pe mekewat ipoꞌoro hap miwan etiat. Mio tã toꞌe -Tawa Tamaku piaria Iuteuria paꞌi koꞌi e ewetunug no yne Sauru mikyꞌesat koꞌi ewy e miwan me.
3 Miꞌi hawyi Sauru toto tawa Tamaku kape yi upi. Miꞌi hawyi porap putꞌok e tawa Tamaku tote turan meremo putꞌok e Sauru ete ariãty hẽtyhot kahato rakat. Miꞌi hawyi hẽtyhot pyꞌasetpe toineꞌen.
4 Miꞌi pote Sauru taꞌat yi tote hawyi toikuap sehay -Sauru Sauru e kat hamo ten uhatyꞌi hatyꞌi en e.
5 Miꞌi pote toiwesat -Uweĩ En Mehin e. Miꞌi hawyi -Uito rat Emisatyꞌi satyꞌi sese Iesui e toiwesat.
6 -Sauru e epoĩꞌam no hawyi ereto ro tawa Tamaku kape. Itote ti aru etikuap taꞌyn aikotã waku etunug hamuat hap e Iesui.
7 Itote ti Sauru wyriaꞌin ikuap taꞌyn wy atipy kaipywiat sehay maꞌato ihay rakat yt teꞌeraꞌakasa i. Miꞌi pote yt kat iꞌatuꞌe kuap i raꞌyn. Miꞌi hawyi Sauru iꞌapeꞌokꞌam yi totepyi hawyi mehitꞌe wen maꞌato yt taꞌakasa i raꞌyn yt kat i heremo.
8 Miꞌi hawyi taꞌatukyꞌesat eroto raꞌyn muap upi tawa Tamaku kape yt ihapytig i pote.
9 Itote myẽꞌym eꞌat yt kat i taꞌakasa. Yt kat i tutuꞌu teran yt teꞌyꞌu i wyti Sauru.
Anania Putꞌok E Sauru Ewowi
10 Miꞌi hawyi tawa Tamaku pe wẽtup ok Iesui emiit toineꞌen Anania e hap het rakat.
11 Miꞌi pe imuꞌetu Iesui toꞌe -Anania ereineꞌen apo e. Miꞌi pote -Taꞌi areineꞌen Uikaꞌiwat e. -Pyno epoĩꞌam no katupono woropoꞌoro teran Iuta yat kape mekewat muap hãpyk takat rotiat yat kape e. Putꞌok ere Iuta yat piat hawyi ti aru etikat Sauru e hap het rakat tawa Tasu piat wemotag hat.
12 Katupono tohẽtup taꞌyn mesup uhowowi e. Mio Sauru taꞌakasa raꞌyn tomuꞌetu ewowi Anania e. Pyno ereke toꞌyat piat hamuat hap kape taꞌakasa raꞌyn tomuꞌetu e. Epo wuat tomoehapytig hamuat hap toikuap taꞌyn tomuꞌetu e Anania pe.
13 Miꞌi hawyi Anania tiwesat -Uikaꞌiwat e uruikuap kahato ti mekewat miit e. Taꞌi yt naku i kahato ti mekewat Sauru e. Taꞌi iraniaꞌin henoi kahato uhepe mekewat miit etiat -Miꞌi miit wyti Iesui mohey haria tawa Ierusarẽi miaria mosatyꞌi satyꞌi hat sese wyti iꞌatuꞌe.
14 Mesup taꞌyn wyti tuut urupoꞌi poꞌi hamo Uhyt e. Taꞌi paꞌi kororia mipoꞌoro ti Sauru urupyhik hanuat e Anania.
15 Miꞌi hawyi Iesui toꞌe -Taꞌi atikuap taꞌyn wen maꞌato ereto ro Sauru kape katupono uipo piat raꞌyn wyti miꞌi. Uimiꞌairo sese raꞌyn miꞌi e. Taꞌi atipoꞌoro wyti aru Sauru wuatꞌi ywania kape uhenoi hamo e. Morekuaria piat uimoherep hamo wyti aru atipoꞌoro Sauru e. Isareu ywania pe iꞌewyte iraniaꞌin ywania pe ti aru atipoꞌoro miꞌi miit e.
16 Maꞌato ti aru uimoherep turan aikope aikope toto hap tote tohoꞌopot kahato aru uhetiat uhehay enoi hap upi e. Yt tuwemoti hin i ti aru uhet moherep miitꞌin miat turan e. Miꞌi pote ti aru tohoꞌopot kahato uimoherep wuatꞌi ywania puo turan e. Hoꞌopot kahato hap wyti aru atomoherep Sauru pe e Iesui Anania pe.
17 Miꞌi hawyi toto raꞌyn Anania Sauru kape Tupana piat topoꞌoro hap ewy. Putꞌok toꞌe hawyi Anania tuweponug hawyi toꞌe -Uiwyꞌok Sauru e Aikaꞌiwat Koro Iesui uipoꞌoro mesup emoehãite hamo e. Gaꞌatpo tuwemoherep epe muap upi e. Miꞌi Miit uipoꞌoro mesup katupono toikyꞌesat kahato ehapytig sese hap iꞌewyte tutum neran epe Topaꞌãu Wakuat yn e Sauru pe Anania.
18 Mio tã e hawyi hewo raꞌyn pira pe ewywuat Sauru eha pyi hawyi ihapytig i raꞌyn hawyi iꞌapeꞌokꞌam naꞌyn hawyi Anania hetꞌok taꞌyn yꞌy wo.
19 Miꞌi hawyi ti Sauru tenuk i raꞌyn. Waku hawyi hesaika i raꞌyn.
Miꞌi hawyi Sauru toineꞌen motꞌi Iesui mohey haria wywo tawa Tamaku pe.
20 Miꞌi hawyi itote tohenoi kahato haty wo -Iesui ti Tupana Saꞌyru sese e toꞌywania Iuteuria pe taꞌatuwoꞌomuꞌe hawe Tupana motypot yat pe.
21 Mio tã e pote teꞌeroꞌe toꞌope -Iesui mohey haria atuuka hat raꞌyn apo meiũ iꞌatuꞌe. Paꞌi kororia mipoꞌoro Iesui mohey haria poꞌi poꞌi hanuat apo meiũ miit iꞌatuꞌe iꞌywania toꞌope.
22 Maꞌato Sauru henoi poꞌog neꞌi wakuap. Toiꞌatumoperupꞌi tehay wo tawa Tamaku piaria -Pywo pe ti Iesui ti Tupana Mipoꞌoro Miitꞌin Porekuat nuat e.
23 Toiꞌatumuꞌe kahato aat kaꞌap pote -Waĩꞌiꞌatuꞌe maꞌato toiꞌatumuꞌe te hawyi -Toꞌiro watiꞌauka Sauru iꞌatuꞌe. Toꞌiro watimopoꞌinik ihay saꞌag iꞌatuꞌe toꞌope Iuteuria.
24 Maꞌato Sauru tikuap taꞌyn iꞌatuꞌe hap tetiat toꞌauka irane hap. Miꞌi hawyi topopy teran tawa Tamaku pyi wen maꞌato suraraꞌin tipyhyp taꞌyn mekewat okenꞌypy wato iꞌauka hamo.
25 Maꞌato wãtym naꞌyn hawyi Iesui mohey haria tipowyro raꞌyn iwẽtem hap ete yrysakag wato pe. Taꞌatumoꞌapyk taꞌyn yi kape haity pe tawa ekurara ywaiti rakat sakpo taꞌatuenotem naꞌyn Sauru yi kape.
26 Tawa sakpo hawyi topopy raꞌyn Sauru tawa Ierusarẽi kape. Putꞌok e Sauru tawa Ierusarẽi note hawyi toto teran Iesui mohey haria wywo maꞌato yt teꞌeruwehik teran hin i Sauru ete kat pote teꞌerokenꞌẽ ipupi katupono yt taꞌatumohey i te Iesui mohey hatno toineꞌen hap pote.
27 Maꞌato mekewat mehin Panape tipowyro kahato Sauru. Miꞌi hawyi motpoꞌororia 12 ok takaria kape totioto Pauru imohey Iesui etiat hap enoi hamo. Miꞌi hawyi Panape toꞌe iꞌatuepe -Aikaꞌiwat Iesui ti tuwemoherep taꞌyn Sauru pe tawa Tamaku kapiat muap tote e Panape. Miꞌi tote ti taꞌakasa raꞌyn Aipotypot Iesui kape e. Miꞌi hawyi ti aiꞌewy raꞌyn toimohey Iesui e. Pywo ti rat Iesui mohey hat sese wo mio Sauru e. Taꞌi tohenoi kahato raꞌyn Iesui tawa Tamaku piaria pe e Panape.
28 Miꞌi hawyi motpoꞌororia 12 ok takaria -Waku kahato iꞌatuꞌe. Miꞌi hawyi Sauru topyhuꞌat iꞌatuwywo raꞌyn. Miꞌi hawyi hewyry kahato iꞌatuwywo raꞌyn tawa Ierusarẽi me. Karapeĩ tuwat Ierusarẽi myi hawyi Sauru toto iꞌatuwywo iꞌatuewyry hap upi Iesui ehay moherep hamo.
29 Miꞌi hawyi Sauru tomoherep kahato raꞌyn tehay wakuat Iesui etiat yne miitꞌin me. Yt uwe pupi i raꞌyn tokenꞌẽ -Tupana Mipoꞌoro Ahehakyeraꞌat hat ti Iesui e torannia pe Sauru.
Miꞌi hawyi itote Sauru henoi kahato itotiaria Kereku pusu kuap haria pe. Iꞌewyte yne Iesui etiat tohenoi aat kaꞌap kahato. Yt ipo hep hin i. Miꞌi hawyi apo apo iꞌatuꞌe Sauru pe iꞌatumikuap oktan niatpo sese sehay wen maꞌato waku pe yne toiꞌatuwesat. Miꞌi hawyi tuꞌuka kahato teran taꞌatuehay wo. -Pyno waku watiꞌauka mekewat Sauru iꞌatuꞌe toꞌope.
30 Miꞌi hawyi Iesui potmuꞌeria tikuap taꞌyn Sauru auka teran itotiaria piat hap. Miꞌi hawyi Sauru taꞌatuereto raꞌyn wẽtup tawa kape mekewat tawa Sesareia kape i raꞌyn. Miꞌi hawyi tawa Sesareia pyi taꞌatupoꞌoro mehin Sauru yꞌy wato sakpo raꞌyn tetawa Tasu e hap kape i raꞌyn yara puo.
31 Miꞌi hawyi Iesui mohey haria waku pe i raꞌyn tukupteꞌen tawa Iuteia Karireia hawyi Samaria pe katupono iꞌatusatyꞌi satyꞌi haria iꞌatuꞌuka teran haria iꞌatupohep porapꞌi pote. Waku iꞌatuꞌe toꞌope. Miꞌi hawyi teꞌeruwemoesaika kahato raꞌyn Iesui mohey hawe. Iꞌatuwepiit raꞌyn. Miꞌi hawyi yt uwe pupi i teꞌerokenꞌẽ.
32 Mekewat eꞌat pe Peteru hewyry i raꞌyn yne tawa puo Iesui mohey haria pakup i rakaria Tupana mimowakuaria miitꞌin upi ikuap hamo. Meiũran putꞌok toꞌe tawa Irita pe. Miꞌi tote toineꞌen Iesui mohey haria wywo.
33 Miꞌi hawyi itote Peteru tipuẽti Eneia e hap het rakat 8 iꞌaman mot pe toineꞌen yni pe aat kaꞌap yt hewyry kuap i rakat pote.
34 Miꞌi hawyi toꞌe Peteru tope -Mehin Eneia e Aiporekuat Iesui ti emopoĩꞌam naꞌyn mehin e. Pyno epoĩꞌam no uhyt hawyi etiꞌokpoꞌi ro eꞌyni hawyi ewyry ro e Peteru tope. Mio tã e hawyi meremo ipoĩꞌam.
35 Karapeĩ tawa Irita piaria iꞌewyte Tawa Saruna piaria teꞌeraꞌakasa Iesui mimopoĩꞌam kape hawyi teꞌeruwemorem kahato Aikaꞌiwat kape. Teꞌeruwat raꞌyn taꞌatuetupanaria kaipyi.
36 Miꞌi hawyi tawa Iope pe wẽtup ok haryporia Iesui mikyꞌesat nug hat toineꞌen. Miꞌi ti mana Turaka e hap het rakat. Miꞌi haryporia inug waku kahato aat kaꞌap. Toiꞌatupowyro kahato miitꞌin miwaure koꞌi. Toiꞌatupoi hesyꞌat rakaria. Iwese kahato hap toimoherep yne ihakyꞌeꞌi rakaria pe. Toiꞌatupowyro hatek takaria. Tekareꞌen ahyt toimoꞌẽ yt hekat i rakaria pe. Wẽtup het Tapita iꞌatuꞌe Kereku pusu kuap haria.
37 Maꞌato mekewat eꞌat iꞌahuu kahato raꞌyn hawyi mana Turaka ikuꞌuro raꞌyn. Miꞌi hawyi wẽtup ok 10 iꞌokpuk hawyi akipy ywaiti tote taꞌatupag ikuꞌuro rakat.
38 Miꞌi hawyi Iesui potmuꞌeria tawa Iope totiaria tikuap taꞌyn Peteru ieineꞌen tawa Irita piat hap. Tawa Irita yt pya hin i tawa Iope kaipyi toineꞌen. Miꞌi pote ipotmuꞌeria tipoꞌoro ihainia typy ok Peteru kat hamo meremo. Taꞌatupuẽti hawyi -Toꞌiro tawa Iope kape meremo Peteru iꞌatuꞌe. Miꞌi pote meremo toto raꞌyn iꞌatuwywo.
39 Miꞌi hawyi putꞌok e raꞌyn itote hawyi Peteru taꞌatueraꞌam akipy ywaitiat kape. Itote hiwu koꞌi teꞌeruwak kahato taꞌatupowyro hat mana Tapita ikuꞌuro hap haty kahato iꞌatuete pote. Miꞌi hawyi hiwu koꞌi timoherep Peteru pe ikuꞌuro rakat minug sokpe koꞌi mana Tapita miium iꞌatuepiat saꞌawyꞌi wuat koꞌi -Mimi iꞌatuꞌe miꞌi tã mana Tapita tum tominug sokpe uruepe saꞌawyꞌi uruehakyꞌeꞌi pote iꞌatuꞌe taꞌatuwak popuo.
40 Miꞌi hawyi Peteru toꞌe iꞌatuepe -Manaꞌin pywo ti rat atikuap taꞌyn e. Pyno uhehay teran Tupana wywo e. Pyno uiꞌatoiat mesuwe porapꞌi e. Tuwat hiwu koꞌi itote pyi hawyi Peteru tuwepỹꞌãtutuk hawyi toꞌe -Iesui e timoieineꞌen i ro mana Tapita e. Miꞌi hawyi tuwemorem iꞌokpuk takat kape hawyi toꞌe -Mana Tapita epoĩꞌam no guꞌuro pyi e. Miꞌi hawyi mehitꞌe raꞌyn mana Tapita hawyi tehaꞌat raꞌyn Peteru kape. Miꞌi hawyi mana Tapita tuweꞌãpeꞌokꞌam naꞌyn teꞌyni pyi.
41 Miꞌi hawyi Peteru tat mana Tapita ipo ete hawyi toimopoĩꞌam naꞌyn heꞌyni pyi. Miꞌi hawyi taꞌam naꞌyn. Miꞌi hawyi Peteru tiꞌatukay kay imohey haria itotiaria iꞌewyte hiwu koꞌi. Putꞌok iꞌatuꞌe hawyi toimoherep mana Tapita iꞌatuepe.
42 Meiũran mekewat sehay yne Iope piaria tikuap Iesui piat mana Tapita moieineꞌen pakup i raꞌyn hap hawyi ti taꞌatumohey kahato raꞌyn Aipotypot Iesui.
43 Miꞌi hawyi Peteru topyhuꞌat potꞌi tawa Iope pe towyꞌok Simau yat pe mekewat miat atukãꞌã hat yat pe toineꞌen.
