Iuwãu 12:1-50
12 6 eꞌat yn naꞌyn mekewat saꞌawyꞌi wanikap po pywiat tuwenoꞌẽ hap watetup hap eꞌat ienuk koro owakai te Iesui toto raꞌyn tawa Petania kape towyꞌok Irasaru hap kape. Tomiꞌãpeꞌokꞌam guꞌuro pywiat yat kape toto temiitꞌin 12 ok takaria wywo.
2 Itote Irasaruꞌin tunug ienuk wato hap Iesui etiat taꞌatuwehum hap. Itote mana Mata Tuwemiꞌu nug. Waku yne hawyi taꞌatukay kay Iesui hawyi teꞌeraꞌapyk taꞌyn Irasaru yparakai ywyt pe Iesui wywo.
3 Miꞌi hawyi mana Maria tat topohag hy haꞌup Naratu pohyt kawiat. Miꞌi hawyi Iesui pyꞌokpe koꞌi ete toiꞌokpun yne mekewat mohag hy hawyi toimogag ipyꞌokpe toꞌasap mo. Miꞌi hawyi ikamhig se kahato raꞌyn topyhuꞌat iꞌyat waku kahato.
4 Miꞌi hawyi ipotmuꞌe Iuta mekewat Simau Ikarioti saꞌyru Iesui maꞌat hanuat mio tã e.
5 -Yt kan hamo i etiꞌokpun mohag hy e. Kat poteĩ yt etiweneru i mekewat mohag hy haꞌup woity rakat hawyi watum haꞌup yt hekat i rakaria pe e. Taꞌi haꞌup woityꞌi rakat ti mekewat 300 eꞌat motpap kapiat hap saꞌup e itotiaria pe.
6 Iuta tikyꞌesat haꞌup topo piat hap towatno. Yt toikyꞌe hin i yt hekat i rakaria pykai i katupono toteroꞌok kahato 12 ok takaria wywuat tineiru heiam miat.
7 Maꞌato Iesui toꞌe -Waĩꞌe tero mana Maria mohag hy wo uipiit pen uiꞌasyp hap owakai te aheko ewy e.
8 Areto irane raꞌyn ti Uito miꞌi hawyi aru yt kat i maꞌato etum emiium koꞌi uhepe e. Yt hekat i rakaria ti aru maꞌato tukupteꞌen wuatꞌi eꞌat pe mesuwe eiwywo kat ium ehepiat hamo.
9 Miꞌi hawyi Iuteuria tikuap taꞌyn mekewat tawa Petania piat Iesui ieineꞌen hap. Miꞌi pote typyꞌi teꞌeruwaꞌatunug Iesui kapiat teꞌeraꞌakasa hamo iꞌewyte Irasaru imiꞌãpeꞌokꞌam guꞌuro pywiat kapiat Teꞌeraꞌakasa hamo.
10 Miꞌi hawyi iꞌewyte paꞌi kororia iꞌauka teran Irasaru Iesui mimoieineꞌen.
11 Katupono Iesui tihep Irasaru guꞌuro pyi hawyi Iuteuria typyꞌi kahato rakaria imohey raꞌyn Iesui.
Iesui Teke Raꞌyn Ierusarẽi Me
12 Mukiꞌite ihatꞌok hawyi toto raꞌyn Iesui tawa Ierusarẽi kape. Miꞌi totiat turan ti ienuk wato hap nug haria tikuap taꞌyn Iesui uut hap.
13 Miꞌi hawyi typyꞌi raꞌyn tuwat Iesui ewowi. Miꞌiria tuwat Pinawa yhop taꞌatupo piat wywo Iesui kape. Miꞌi wywo iꞌatuehay wepiit kahato -Waku ti En iꞌatuꞌe. En ni Tupana Mipoꞌoro aiꞌywania Porekuat iꞌatuꞌe. Tupana Mipoityro poꞌog waku torannia kawiat hat aiꞌywania Porekuat nuat iꞌatuꞌe.
14 Miꞌi hawyi Iesui tipuẽti hũ Iumentu hawyi taꞌapyk iꞌokpe tote aikotã tohenoi miwan me hap ewy.
15 Miꞌi tote taꞌapyk aikotã saꞌawyꞌi te miwan me Sakaria 9.9 pe Tupana toꞌe hap ewy -Tawa Siãu piaria worohoꞌoehakyeraꞌat teran ehewanikaptia po pyi e. Yt eweikenꞌẽ poꞌog teiꞌo tawa Ierusarẽi piaria katupono atipoꞌoro irane Eiporekuat sese ehewowi ehehakyeraꞌat hamo e. Miꞌi Miit ti aru atipoꞌoro ehewowi apyk pe eihũ Iumentu mepyt rote tuut e miwan me Tupana e.
16 Iesui emiitꞌin yt tikuap hin yian me te aikotã aru Tupana e hap koꞌi miwan miat Iesui etiat hap. Maꞌato Iesui tuwẽtem guꞌuro pyi hawyi iꞌatuwatetup kahato Tupana e hap kape hawyi -Meiẽ iꞌatuꞌe Iesui tunug yne mesuwe aikotã aikotã Tupana toꞌe yian me miwan me hap ewy iꞌatuꞌe. Iesui taꞌaipok taꞌyn atipy kape tẽtyhot puo hawyi taꞌatukuap aikotã iwan miat Tupana e hap ewywuat Iesui tunug naꞌyn hap.
17 Miꞌi hawyi Iesui wy Irasaru moieineꞌen pakup i hap kapiat akasa haria henoi henoi kahato raꞌyn tawa Ierusarẽi miaria pe aikotã Iesui tihep Irasaru guꞌuro pywiat hap. Aikotã Iesui tunug yt miitꞌin mikuap ewy i tomisepap koꞌi hap taꞌatumoherep miitꞌin me itote.
18 Miitꞌin tikuap taꞌyn aikotã iminug hap koꞌi etiat hawyi tuwat raꞌyn ipuẽti hamo.
19 Miꞌi pote Iuteu woꞌonapin haria teꞌeroꞌe toꞌope -Yt naku i kahato. Yt watipytyk kuap i iꞌatuꞌe katupono miitꞌin iꞌatupap kahato raꞌyn Iesui upi iꞌatuꞌe.
Kereku Ywania Kaipywiaria Teꞌerehaꞌat Teran Iesui Ewowi
20 Miꞌi turan wẽtup ywania Kereku ywania putꞌok iꞌatuꞌe tawa Ierusarẽi me Tupana motypot hamo mekewat ienuk koro hap eꞌat pe.
21 Miꞌiria taꞌatuhẽtup Iesui emiit Wiripi pe -Uhyt urutehaꞌat teran Iesui kape iꞌatuꞌe mekewat Wiripi pe yi Kereku ywania tawa Pesaita kaipywiat ri.
22 Miꞌi hawyi Wiripi toto Ãtere kape Kereku koꞌi ehay enoi hamo wẽtup ywania miẽtup enoi hamo. Miꞌi hawyi tuwat typy ok Iesui kape henoi hamo.
23 Miꞌi hawyi Iesui tiꞌatuwesat raꞌyn -Pyno Miitꞌin ykeꞌet motypot hap eꞌat yt pya hin i raꞌyn e.
24 Pywo pe ti areꞌe kat iãꞌỹi yt misyp i te turan yt ikuꞌuro i miꞌi pote wẽtup yn toineꞌen. Maꞌato ikuꞌuro pote meiũran hẽtyt hawyi tuwemotag hawyi haat kahato raꞌyn are e.
25 Uwe uwe mesuwarotiat ieineꞌen hap yn kyꞌesat haria ti aru yt ipuẽti i raꞌyn toieineꞌen pakup i hap e. Iꞌewyte uwe uwe mesuwarotiat toineꞌen hap kawiat waureꞌe hat wyti aru ipuẽti ipakup i toineꞌen hap yt karamuo i ikahuro rakat e Iesui.
26 Pyno uhemiitno ereineꞌen neran motꞌi waku ereto uhupi uimikyꞌesat ewy nug hamo. Miꞌi hawyi aikope aikope areineꞌen miꞌi hap upi iꞌewyte uhaipepiaria uhemiitꞌin tukupteꞌen e. Iꞌewyte miꞌiria ti uheropat haria Tupana mimotypotno teꞌeropyhuꞌat e.
27 Miꞌi hawyi Iesui toꞌe Tupana pe -Uiꞌywot e kat areꞌe kahu epe sio Papai etiꞌywyk to uhepiat hoꞌopot hap uikuꞌuro tet pupi are sio yt Papai e. Pyno yt naku i mio tã areꞌe epe kat pote ariot uikuꞌuro miitꞌin ehakyeraꞌat hamo mesuwat yi kape e.
28 Miꞌi hawyi waku etimowato eset Uiꞌywot. Eset moẽtyhot hamuat e toꞌywot pe. Mio tã e hawyi putꞌok e sehay atipy kaipyi toꞌe hamo -Pywo pe ti uhewaku hap atimoherep taꞌyn iꞌewyte atimoherep iraꞌyn e.
29 Mio tã e hawyi miitꞌin typyꞌi rakaria mekewat atipy kaipywiat sehay kuap haria teꞌeroꞌe toꞌope -Mio ti huruꞌe hap ewy ihay iꞌatuꞌe. Maꞌato iraniaꞌin -Atipy kaipywiat miit wyti mio ihay Iesui kape iꞌatuꞌe.
30 Maꞌato Iesui toꞌe. Yt uhetiatno i wyti mio sehay tuut maꞌato ehepiatno wyti e.
31 Koitywy wyti putꞌok e raꞌyn Tupana eꞌat uwe uwe uimohey haria sese uwe uwe yt haria moherep hamuat uwe waku uwe yt e hamuat eꞌat mesup e. Koitywy iꞌatuporekuat mesuwarotiat ahiag Tupana tisopo hamuat eꞌat putꞌok e raꞌyn e.
32 Karamuo miitꞌin uimopoĩꞌam yi tote pywiat turan ti aru atiꞌatuekyi yne ywania uhewowi uiwatno raꞌyn e.
33 Mio tã e toimoherep aikotã me hamuat tokuꞌuro hap etiat moherep hamuat temiitꞌin me.
34 Miꞌi pote itotiaria -Uruykeꞌet kat pote -Uikuꞌuro irane ereꞌe iꞌatuꞌe maꞌato urunapin haria iraniaꞌin yt ewat ehay ewy i iꞌatuꞌe katupono -Tupana Mipoꞌoro wyti aru yt ikahuro rakat i e miwan me iꞌatuꞌe uruepe. Miitꞌin Ykeꞌet apo en sio yt iꞌatuꞌe. En Tupana Mipoꞌoro uruporekuat nuat sio yt iꞌatuꞌe. Kat pote -Uikuꞌuro irane ereꞌe Mehin iꞌatuꞌe.
35 Miꞌi hawyi Iesui tiꞌatuwesat -Toineꞌen ne Ariãty eiwywo eipuꞌap moẽtyhot hamuat. Miꞌi pote waku ehewyry Ariãty hot puo toĩ ne turan katupono meiũran iꞌypyryp putꞌok e ehete hawyi aru yt eweikuap i aikowo aikowo waku ehewyry hap e.
36 Waku mio raꞌyn Ariãty mohey hanuaria wo eweikupteꞌen. Katupono yt pya hin i yt kat i Ariãty hamuat hap. Eweimohey pote Ariãty saꞌyruꞌin sakiꞌytꞌin wo eweikupteꞌen e. Mio tã toꞌe hawyi toto raꞌyn yt tomohey i haria pyꞌasetpyi.
37 Iwato tomisepap tutunug iꞌatupyꞌasetpe yt iꞌatumisepap ewy i wen maꞌato yt taꞌatumohey hin i.
38 Aikotã saꞌawyꞌi Tupana ehay moherep hat Isaia toꞌe hap ewy -Tupana e atiꞌatumuꞌe kahato ehay wo maꞌato yt uhehay mohey hin i emimoherep esaika hap yt taꞌatumohey hin i taꞌatukuap pykai. Teꞌeraꞌakasa raꞌyn yne emisepap koꞌi eminug koꞌi kape pykai yt taꞌatumohey hin i Emipoꞌoro e Isaia 53.1 pe nimo te Iesui e hap etiat.
39 Iuteu akagnia yt timohey teran i Iesui aikotã saꞌawyꞌi Isaia mienoi ewy.
40 Mio tã e Isaia miwan me 6.10 pe Iesui etiat -Atimoherep kahato esaika hap wen maꞌato yt teꞌeraꞌakasa teran i e. Atiꞌatumuꞌe kahato ehay ikahu rakatno wen maꞌato yt taꞌatumohey hin i ehay uiwẽ piat Tupana e. Miꞌi pote iꞌatuminug saꞌag koꞌi yt atipuruk kuap i raꞌyn e.
41 Isaia nimo te taꞌakasa yian mete Iesui ewaku hap hẽtyhot hap kape hawyi tohenoi raꞌyn tomikuap hap oktan.
42 Maꞌato Iuteu akagnia Iesui mohey haria tukupteꞌen itote wen maꞌato -Uito Iesui mohey hat yt iꞌatuꞌe i miitꞌin ehamo kat pote teꞌerokenꞌẽ -Wahenoi imohey hap pote taren aipugha neꞌi raꞌyn aiwoꞌomuꞌe hap pyi iꞌatuꞌe. Miꞌi pote Iesui mohey hat uito yt iꞌatuꞌe i teꞌerokenꞌẽ kahato iraniaꞌin akag koꞌi pupi pote.
43 Katupono miitꞌin kaipyi -Waku kahato en e hap taꞌatukyꞌesat kahato poꞌog poꞌog Tupana kaipywiat -Waku en e hap kai. Taꞌatukyꞌe poꞌog miitꞌin piat taꞌatumotypot hap Tupana piat taꞌatumotypot hap kai.
44 Miꞌi hawyi Iesui toꞌe tehay pirik wo iꞌatuepe -Uwe uwe uimohey hanuaria miꞌiria aru iꞌewyte uipoꞌoro hat mohey hanuaria wy teꞌeropyhuꞌat e.
45 Pywo uikuap haria wo eiperia hawyi Uiꞌywot kuap haria wy eweikupteꞌen e.
46 Taꞌi ariãty ewy uipoꞌoro mesuwat yi totiaria moẽtyhot hamo e. Uwe uwe uimohey haria ti ariãty hot puo ikohyewyry hawyi iꞌypyryp we yt ikohyewyry hin i katupono uimohey hat Tupana kuap hat topyhuꞌat e.
47 Atiꞌatuehakyeraꞌat teran kahato mesuwat yi totiaria. Miꞌi hamo yn ariot meikowo maꞌato tukupteꞌen mesuwe uimienoi pun haria e. Taꞌi uimienoi taꞌatukuap maꞌato yt taꞌatunug neran i. Maꞌato yt ahoꞌosatyꞌi satyꞌi teran i miꞌiria katupono iꞌatuehakyeraꞌat hamo yn uipoꞌoro e.
48 Koran te ti en yt naku i yt areꞌe i uipun haria pe. Koran te yt kat areꞌe i iꞌatuepe maꞌato meiũran aru karãpe ikahuro hap eꞌat pe toineꞌen wẽtup iꞌatuꞌapiheg hamuat. Mekewat eꞌat pe aru uhehay uimienoi saꞌawyꞌi wuat iꞌatuepiat topyhuꞌat iꞌatuꞌapiheg hamo. Yt taꞌatumohey i saꞌawyꞌi wuat uimienoi miꞌi ti aru yt nakuaria i eiperia hap moherep hatno topyhuꞌat e.
49 Uipoꞌoro hat ehay moherep hat Uito. Yt ihay i uiwẽ pyi pote yt uhehay kuap i Uito e. Mio tã e Uiꞌywot hap yn uhehay wo paĩ.
50 Ikahu kahato Uiꞌywot e hap atipuẽti katupono ihay miitꞌin moieineꞌen wuatꞌi eꞌat piat hamuat topyhuꞌat. Pyno yne iꞌe hap yn tuwẽtem uiwẽ pyi miitꞌin moieineꞌen wuatꞌi eꞌat piat e hap.
