Iuwãu 13:1-38
13 Miꞌi tote pyi ienuk koro eꞌat owakai te Iesui tikuap taꞌyn topyꞌa pe taꞌaipok Toꞌywot kapiat mesuwat yi tote pywiat hamuat. Iesui tiꞌatukyꞌe kahato temiitꞌin mesuwarotiaria. Toiꞌatukay kay saꞌawyꞌi miꞌi hawyi toiꞌatumuꞌe kahato. Iesui toineꞌen mesuwat yi totiat turan toiꞌatukyꞌe kahato temiitꞌin hawyi tokuꞌuro hap kape iꞌewyte toiꞌatukyꞌe.
2 Teꞌerenuk hap tote Simau Ikarioti saꞌyru hemiit Iuta e hap piit pe ahiag teke raꞌyn Iesui maꞌat hamuat raꞌyn.
3 Meiẽpe Iesui tikuap taꞌyn Tupana esaika hap torannia yne raꞌyn topyhuꞌat ipiit pe hap. Miꞌi pote topyꞌa pe toikuap tuwewi Tupana kaipywiat tuut hap iꞌewyte Tupana kapiat toto hamuat toikuap topyꞌa pe itote.
4 Toikuap hawyi tenuk kahu raꞌyn hawyi Iesui ipoĩꞌam naꞌyn miꞌi hawyi tuwekamisa wato hep hawyi tuweꞌokpoꞌi toꞌokhakpo wepotip hamo.
5 Miꞌi te soꞌosatꞌe yꞌy kuiꞌa pe hawyi toiꞌatupysei raꞌyn temiitꞌin. Waku hawyi toiꞌatupymogag tomipoꞌi toꞌokhak puat wo.
6 Miꞌi hawyi Peteru pysei hamo tokosap maꞌato Peteru toꞌe -Yt naku i uipysei En e.
7 Maꞌato Iesui tiwesat -Woropysei raꞌyn Peteru e mio maꞌato yt etikuap i te kan hamo woropysei hap e. Meiũran ti aru maꞌato etikuap taꞌyn uhyt e.
8 Miꞌi pote Peteru toꞌe -Yt karãpiat i uipysei hat En e haty wo. -Maꞌato yt woropysei i pote yt Ekaꞌiwatno i poꞌog areineꞌen Uito e.
9 -Pyno Uikaꞌiwat yt uipy yn i ro etikoho maꞌato uipo uhowa etikoho ro wy e.
10 -Peteru e etikuap taꞌyn aikotã wei kahu haria wyti teꞌeruwepysei yn naꞌyn putꞌok taꞌatuꞌe hawyi e. Taꞌi eipit pit hap sese tuweityk taꞌyn maꞌato yt yne i te mesuwe ikytsig nakat toineꞌen e.
11 Mio tã toꞌe katupono toikuap wẽtup ok iꞌatupyꞌasetpiat ipit pit rẽ rakat ewy yt misei i rakat ewy toineꞌen. Toikuap toineꞌen miꞌi ti tomaꞌat hanuat hat.
12 Toiꞌatupysei yne hawyi tuwekamisa wato pag i raꞌyn hawyi taꞌaipok yparakai kape taꞌapyk hamo. Miꞌi hawyi toꞌe iꞌatuepe -Eweikuap apo kat pote worohoꞌopysei e.
13 Pyno urumuꞌe hat uruporekuat no En eweiꞌe ti uhepe e. Taꞌi Miꞌi ti Uito are. Uito ti Eipotypot Uito ti eimuꞌe hat e.
14 Taꞌi Uito ti Eiporekuat sese Eimuꞌe hat sese maꞌato ti worohoꞌopysei semiit poꞌog yi kape hat ewy Uito e. Miꞌi tupono aikotã Uito ewy waku eweikupteꞌen wuatꞌi eropat hanuaria ewy e.
15 Uiminug ehetiat ewy woꞌoeropat haria ewy ro eweikupteꞌen Uito ewy e.
16 Pywo pe ti areꞌe woꞌoeropat hat wyti yt karãpe i poꞌog tokaꞌiwat kai toineꞌen. Iꞌewyte yt karãpe i miitꞌin mipoꞌoro poꞌog toineꞌen topoꞌoro hat kai e. Yt naku i watuwemowato hap watikyꞌesat e. Waku iraniaꞌin eropat haria wo yn watopyhuꞌat e.
17 Miꞌi tupono eweikuap taꞌyn aikotã waku woꞌoꞌeropat haria uiꞌewy eweikupteꞌen hap e. Miꞌi ewetunug pote Tupana mowepiit kahato haria wo eweikupteꞌen e Iesui iꞌatuepe.
18 Pyno eiperia uimiꞌairoria. Atikuap kahato ti uikyꞌe haria eipe maꞌato wẽtup ok aipyꞌasetpiat uimaꞌat hanuat. Miꞌi miit aikotã saꞌawyꞌi miwan me Saumu 41.9 pe Tupana toꞌe hap ewy mio tã e -Uimiꞌu suꞌu haria pyꞌasetpe ti aru toineꞌen atomaꞌat mo e hat e. Mio tã e hap ewy wyti mesup topyhuꞌat e.
19 Mio ahenoi kahato ehepe aikotã aikotã taꞌatunug uhetiat hamuat iꞌewyte ehetiat hamuat e. Miꞌi hap putꞌok e uiꞌe hap ewy hawyi aru poꞌog naꞌyn uimohey eipe katupono yne uiꞌe hap ewy yne tuwemoherep aru katupono pywuat sese Uito Tupana mipoꞌoro eiporekuatnuat eweikuap taꞌyn e.
20 Pywo ti uwe uwe uimipoꞌororia pe -Ereke ro e hat iꞌewyte uhepiat ereke ro e hat e Iesui. Miꞌi hawyi iꞌewyte uwe uwe uhepiat -Ereke ro e hat iꞌewyte uipoꞌoro hat piat ereke ro e hat e.
Iesui Timoherep Tomaꞌat Hat
21 Mio tã toꞌe rakirẽ Iesui hatyꞌu tuwanetup hawe hawyi toimoherep tehay -Pywo ti aru wẽtup ok aiwywuat hat uimaꞌat hanuat hat e.
22 Mio tã e raꞌyn hawyi teꞌerahaꞌat toꞌoꞌewowi uwe pe som mio tã e iꞌatuꞌe teꞌeruwanetup.
23 Pyno wẽtup ok imikyꞌe kahato iꞌywytpiat iwy tuweꞌakytꞌanug Iesui ãtiꞌypyke.
24 Miꞌi pote Peteru ipo merup Iesui etiat wepehik hat kape toꞌe hamo -Apo ere kahu uwe som emaꞌat hanuat Mehin ere kahu e.
25 Miꞌi hawyi Iesui etiat wepehik hat apo e -Uwe som pyno emaꞌat hanuat Uhyt e.
26 Apo e hawyi Iesui tiwesat -Koran uimaꞌat hanuat pe ti aru atipuka miꞌu moĩ me man hawyi atum tope e. Miꞌi hawyi Iesui tat man hawyi totopag imoi me hawyi tutum Iuta pe Simau Ikarioti saꞌyru pe tutum.
27 Miꞌi totat man Iesui po pywiat turan ahiag potypot Satanai e hap het rakat teke raꞌyn Iuta piit pe. Miꞌi hawyi toꞌe Iesui tope -Pyno aikotã etunug neran hap etunug no meremo mehin e Iuta pe.
28 Maꞌato yparakai ywytpiat apyk haria yt ikuap hin i kat toꞌe hawe mio tã e Iuta piat hap.
29 Maꞌato teꞌeruwanetup Iuta sio toipoꞌoro ienuk hap miꞌu kyiꞌat hamo iꞌatuꞌe neꞌi sio toipoꞌoro saꞌup moꞌẽ ihakyꞌeꞌi rakaria piat hamo sio iꞌatuꞌe. Kat pote Iuta po pe tineiru eiam toineꞌen miitꞌin miium koꞌi eiam iꞌapykok hat toineꞌen pote.
30 Miꞌi hawyi Iuta tat kahu man Iesui po pyi hawyi meremo toto raꞌyn Iesui maꞌat hamo. Tuwẽtem turan wãtym naꞌyn iꞌypyryp wuo toto.
31 Miꞌi hawyi Iesui toꞌe Iuta saipekai -Pyno koitywy waku raꞌyn katupono koitywy ti putꞌok e raꞌyn Tupana motypot sese hap eꞌat e. Mesup taꞌyn ti Miitꞌin Ykeꞌet ewaku hap tuwemoherep iꞌewyte Tupana ewaku hap tuwemoherep Miitꞌin Ykeꞌet ieineꞌen hap upi.
32 Taꞌi Tupana motypot hamuat hap topyhuꞌat Miitꞌin Ykeꞌet iminug kaipyi. Atimotypot Uiꞌywot hawyi uimotypot kahato. Miꞌi tutum uhepe aru tomotypot hap oktan. Tuwemotypot hap oktan Uiꞌywot tum aru uhepe. Atimowato Uiꞌywot wuatꞌi ehamo mesuwepyi e. Taꞌi wẽtup miit ewywuat yn woꞌomotypot hap topyhuꞌat e.
33 Uimepytꞌin areineꞌen porap i yn naꞌyn eiwywo mesuwarote e. Areto hawyi maꞌato uikat wyti aru mesuwe eipe maꞌato ti aru yt uipuẽti i kahato e. Haꞌawyte wuat uiꞌe hap ewy ti -Yt eweiwat kuap i te Uito hap kape areꞌe saꞌawyꞌi wuat Iuteuria piaria pe hap ewy e Iesui.
34 Einapin pakup hap i ahenoi ehepe eiwoꞌokyꞌe uhemiitꞌin worohoꞌokyꞌe hap ewy. Eiwoꞌokyꞌe uhemiitꞌin worohoꞌokyꞌe hap ewy e.
35 Miꞌi tã ewetunug pote iraniaꞌin eikuap taꞌyn eipe uhemiitꞌin sese hap e 11 ok takaria pe.
Iesui Henoi Peteru Pe Aikotã Iesui Maꞌat Hatno Topyhuꞌat
36 Miꞌi hawyi ipotmuꞌe Simau Peteru toꞌe Iesui pe -Aikowo aru pyno ereto urukaꞌiwat e hawyi Iesui tiwesat -Koran te ti yt ereto kuap i te uhupi are maꞌato meiũran ti aru uhupi ereto e.
37 -Uikaꞌiwat areto teran eupi e. Kat pote koran yt areto kuap i eupi mehin katupono yt karamuo i ti aru woroꞌatoiat e. Areto eupi uiꞌauka hamo ekawiatno e Peteru Iesui pe.
38 Miꞌi hawyi Iesui tiwesat -Uiꞌauka pote uiꞌauka maꞌato yt woroꞌatoiat hin i ereꞌe apo Peteru. Pywo pe ti areꞌe epe mesup wãtym muo waipaka ehay owakai ti aru -Yt atikuap i kahato Miꞌi Miit ereꞌe ti aru myẽꞌym mo uhepiat pe iraniaꞌin apo iꞌatuꞌe epe hawyi e Iesui Peteru pe.
