Iuwãu 16:1-33
16 Eiweꞌeg wo o uimohey hap atoiat hap pupi are katupono yian mete ahenoi raꞌyn ehepe aikotã aikotã saꞌag ehetiat hamuat karãpe putꞌok e hawyi mono yt eweipun i raꞌyn uimohey ehepiat hap e.
2 Katupono ti aru meiũran eipugha Tupana motypot yat pyi e. Meiũran ti aru eiꞌatuuka hanuaria tukupteꞌen. Mesuwat yi totiaria ti aru teꞌeroꞌe toꞌope -Toꞌiro waku watiꞌatuuka Tupana mohey haria iꞌatuꞌe saꞌag neꞌi e.
3 Miꞌi tã ti aru taꞌatunug ehete katupono yt uikuap i uwe sese Uito hap iꞌewyte uwe Uiꞌywot hap yt taꞌatukuap i e.
4 Maꞌato ti ahenoi yne raꞌyn mesup ehepe yian mete aikotã taꞌatunug saꞌag hamuat koꞌi e. Miꞌi tupono mekewat putꞌok e raꞌyn ehete hawyi waku eiwatetup yn naꞌyn mesuwat uimienoi kape e. Saꞌawyꞌi te ti yt ahenoi i ehepiat hoꞌopot hamuat katupono saꞌawyꞌi ti eipyꞌasetpe areineꞌen eikawiatno eiꞌapykok hamuat. Miꞌi pote yt ahenoi i maꞌato mesup ti ahenoi raꞌyn ehepe aikotã ehehakyꞌeꞌi hamuat koꞌi e.
5 Mio wyti maꞌato areto hamuat uipoꞌoro hat kape i raꞌyn are maꞌato eipe yt apo eweiꞌe i uhepe -Aikowo aru pyno ereto Uhyt yt eweiꞌe i uhepe e.
6 Areto motꞌi irane eitok pyi are pote ti ewehatyꞌu kahato uikyꞌe haype e.
7 Pywo pe ti areꞌe ehepe meiũpe yn areineꞌen pote ti ren yt tuut i eipowyro pakup i hamuat Tupana Paꞌãu maꞌato areto meiũpe pyi pote ti aru atipoꞌoro kuap eipowyro pakup i hanuat e.
8 Mio tã e aru Tupana Paꞌãu wuatꞌi miitꞌin me -Eiperia wyti torannia Tupana piat iꞌaparap haria e putꞌok toꞌe hawyi. Tupana yn ni eimohãpyk kuap hat e ti aru wuatꞌi miitꞌin me. Taꞌi yt nakuap i nug haria ti Tupana tiꞌatusatyꞌi satyꞌi kahato hamuat e miitꞌin me Tupana Paꞌãu putꞌok toꞌe hawyi e Iesui.
9 -Tupana piat iꞌaparap haria ti eiperia e katupono yt uimohey i haria eweikupteꞌen e aru Tupana Paꞌãu ehepiat e Iesui.
10 -Tupana yn ni eimohãpyk kuap hat e ti aru miitꞌin me -Pywo ti Haꞌyru yn eimohãpyk kuap e kat pote toineꞌen Toꞌywot yatype atipy pe eimiẽtup moherep hamuat ehehakyeraꞌat hamuat e. Maꞌato yt eweimohey i pote yt karãpe i ewehaꞌat Haꞌyru kape e ti aru Tupana Paꞌãu miitꞌin me e. -Areto raꞌyn e miꞌi hawyi aru uimohey haria yn naꞌyn uipuẽti haria wo e maꞌato iraniaꞌin aru yt karãpe i raꞌyn uipuẽti mesuwe. Yt karãpe i uhowowi teꞌerahaꞌat e Iesui.
11 -Tupana hatyꞌi aru eipotypot ahiag wuatꞌi eꞌat pe e iꞌewyte aru wy toiꞌatusatyꞌi satyꞌi iwywo Haꞌyru mohey hap pun haria e ti aru Tupana Paꞌãu mesuwarotiaria pe uhepiat e Iesui.
12 Poꞌog wyti ahenoi teran ehepe mesuwat etiat wen maꞌato ti eiwanetup hap yt putꞌok e i ikuap hamo e.
13 Meiũran ti aru tuut Tupana Paꞌãu ehewowi pywuat sese sehay yne moherep hamo. Miꞌi ti aru henoi yne yne pywuat sese etiat ehepe e. Tuwehay pyi yt ihay i. Uiꞌe hap yn ihay aru e. Tupana Paꞌãu timoherep aru ehepe kat aru kat aru toineꞌen hap toiꞌatumoherep ehepe Topaꞌãu pywuat sese wo e.
14 Taꞌi uimotypot kahato hat ri Tupana Paꞌãu miꞌi pote kat are tope hap yn tohenoi ehepe uiwyriaꞌin e.
15 Wuatꞌi Uiꞌywot wat ipo piat uiatnuat koꞌi tukupteꞌen e. Miꞌi tã tupono ti aru uiꞌe hap ewy Tupana Paꞌãu henoi ehepe e Iesui topotmuꞌeria pe.
16 -Aipok wo Uiꞌywot kape areto hawyi meremo uipuẽti i eipe e.
17 Miꞌi hawyi teꞌeroꞌe toꞌope -Kat toꞌe hawe som -Aipok wo areto hamuat Uiꞌywot kape hawyi aru meremo uipuẽti iraꞌyn eipe e ahepe iꞌatuꞌe.
18 -Kat pote som yt motꞌi i aru Uiꞌywot kape areto e iꞌatuꞌe. Kat toꞌe hawe som pyno aipok wo areto e. Aikotã hamuat hap som tohenoi ahepe paĩ iꞌatuꞌe toꞌope.
19 Miꞌi hawyi Iesui tikuap apo iꞌatuꞌe teran tepiat hap miꞌi pote toꞌe -Uiwyriaꞌin apo eweiꞌe teran apo aipok wo Uiꞌywot kape areto e hap ete. Pyno ahenoi raꞌyn ehepe ehepiat ikuap hamo e.
20 Pywo pe ti areꞌe meiũran ti aru eiwoꞌokakꞌi Uito yt uwe i pote maꞌato iraniaꞌin yt uimohey haria i ti aru iꞌatuwepiit neꞌi raꞌyn e. Iꞌatuwemowepiit hap ete ti aru eipe yt eiwemowepiit hin i e. Miꞌi rẽ ti aru maꞌato meremo tokosap yt eiwepiit i hap hawyi ti aru meremo eiwepiit i raꞌyn e.
21 Pywo pe ti areꞌe ehepe aikotã haryporia imepyt haty turan yt iwepiit hin i raꞌyn topyꞌa pe maꞌato tuwemoherep taꞌyn imepyt hawyi meremo iwepiit kahato katupono imepyt tuwemoherep taꞌyn pote imepyt putꞌok e pote.
22 Miꞌi hap ewy ti mesup areto hamuat raꞌyn eiꞌyatypepyi miꞌi pote yt eiwepiit hin i maꞌato meiũran worohoꞌopuẽti i raꞌyn hawyi ti aru maꞌato meremo raꞌyn eiwepiit hap tuut aikotã aity iwepiit aiꞌywãꞌĩ hap eꞌat pe hap ewy e. Aremoherep i raꞌyn eipyꞌasetpe hawyi eimowepiit sese hap topyhuꞌat eiwepiit sakpo hap ewy aikotã imepyt pakup hap ewy are. Areineꞌen i eiwywo hawyi eiwepiit sese hap toineꞌen eipyꞌa pe iheg me toineꞌen yt uwe i raꞌyn eiwepiit hap porap kuap hat e.
23 -Koitywy yt ewehẽtup kuap i te uhepe eimikyꞌesat koꞌi maꞌato areto hawyi ewehẽtup kuap uhepe e. Maꞌato ti aru putꞌok e eipowyro pakupꞌi hanuat Tupana Paꞌãu. Miꞌi hawyi waku ewehẽtup Uiꞌywot pe eimikyꞌesat koꞌi -Tupana eweiꞌe o Esaꞌyru Iesui e hap het rakat mohey haria uruto eweiꞌe o. Miꞌi hawyi uhet upi tutum ehepe kat koꞌi kat koꞌi eimiẽtup oktan uimikyꞌesat nug wywuat pote e.
24 Haꞌawyte pyi ti uhepe yn ewehẽtup eimikyꞌesat koꞌi maꞌato koitywy pyi aru waku ewehẽtup Uiꞌywot pe uhet wywo uimikyꞌesat ewy. Miꞌi hawyi Uiꞌywot tum aru eimowepiit sese hamuat e. Ewehẽtup miꞌi tã hap ewy pote eweipuẽti aru eimiẽtup eimowepiit kahato hamuat e.
Waku E Hap Iesui Henoi Iꞌatuepe
25 Saꞌawyꞌi pyi te ti yne ahenoi ehepe uhehay hãꞌãkap wuo maꞌato putꞌok e heꞌat hawyi ti aru herep wuo yn naꞌyn ahenoi ehepe Uiꞌywot etiat e.
26 Mekewat herep wuo yn naꞌyn ahenoi ehepiat hap eꞌat pe ti aru waku ewehẽtup Uiꞌywot pe uhet upi eimiẽtup koꞌi yt Uito yn i raꞌyn ahẽtup eimikyꞌesat koꞌi katupono atikyꞌesat eipe wy ewehẽtup Uiꞌywot kape e.
27 Waku kahato ewehẽtup tope katupono eikyꞌe kahato hat Uiꞌywot e. Taꞌi eikyꞌe kahato katupono Uikyꞌe haria eipe iꞌewyte eweimohey kahato Tupana Mipoꞌoro Uito hap Tupana kaipywiat suut hat Uito hap e. Miꞌi pote waku ewehẽtup hãpyk Uiꞌywot ewowi e.
28 Pywo kahato Uiꞌywot kaipywiat Uito ariot raꞌyn miitꞌin kape. Miꞌi rẽ araꞌaipok hamuat i raꞌyn Uiꞌywot kape mesuwat yi totepyi e.
29 Miꞌi hawyi hemiitꞌin teꞌeroꞌe Iesui pe -Urukaꞌiwat mesup taꞌyn uruikuap taꞌyn ehay katupono ehenoi heremo raꞌyn mio yt hãꞌãkap wuo i raꞌyn iꞌatuꞌe.
30 Koitywy ti uruimohey raꞌyn En wuatꞌi kuap yne hat iꞌatuꞌe. Miꞌi hawyi pyno yt apo urutoꞌe i raꞌyn epe uwe En hap ete katupono mesup uruimohey raꞌyn Tupana Mipoꞌoro sese En hap iꞌatuꞌe.
31 Iesui toꞌe -Pywo apo uimohey eipe e.
32 Meikoran ti aru mesup taꞌyn uiꞌatoiat yne eipe hawyi eiwesytpok yne uiꞌyatypepyi eiꞌyat koꞌi kape. Miꞌi hawyi uiweran uiꞌatoiat yne eipe hawyi. Maꞌato ti aru yt uiweran sese i katupono Uiꞌywot yt uiꞌatoiat hin i e.
33 Miꞌi hawyi Iesui toꞌe -Eimosoꞌopot kahato hanuaria yt uimohey i haria tukupteꞌen aru maꞌato yt eweikenꞌẽ teiꞌo iꞌatupupi katupono iꞌatupyhyp hat Uito areineꞌen iꞌatumoperup i hat Uito miꞌi pote eiwesaika ro uhete e. Wuatꞌi kat koꞌi kat koꞌi ahenoi raꞌyn ehepe eimoesaika hamuat eimowepiit hamuat. Eimowepiit hat sese Uito e. Yt eiwanetup koꞌi koꞌi teiꞌo katupono atiꞌatuꞌakit akit aru yne yne ahewanikaptia e. Hoꞌopot hap putꞌok e ehetiat turan yt paa eweiꞌe sese teiꞌo eipyꞌa pe eiwanetup hawe katupono yt karãpe i worohoꞌoꞌatoiat sese e Iesui topotmuꞌeria pe.
