Iuwãu 17:1-26
17 Miꞌi tã toꞌe Iesui hawyi ihaꞌat ywaipe miꞌi hawyi toꞌe -Papai e putꞌok e raꞌyn uheꞌat e. Pyno waku woromotypot Papai e. Emimotypot wo areineꞌen hawyi miꞌi upi emotypot hamuat hap atikyꞌesat e.
2 Papai uinug naꞌyn yne miitꞌin mimotypotno katupono etikyꞌesat kahato miitꞌin emiium koꞌi emiꞌairoria ehakyeraꞌat hamuat hap e.
3 Miꞌi hawyi miitꞌin teꞌeropyhuꞌat En Tupana pywuat rakat kuap haria wo hawyi iꞌewyte Uito emipoꞌoro kuap haria wo hawyi wuatꞌi eꞌat piat gupteꞌen haria wo teꞌeropyhuꞌat e.
4 Taꞌi ewat emotypot hap yn ni miitꞌin me atomoherep Uiꞌywot are e. Atunug naꞌyn wyti yne uipoꞌoro epiat hap emikyꞌesat nug hap Papai are e.
5 Miꞌi hawyi eꞌyatype emimotypotno areineꞌen neran aikotã saꞌawyꞌi yian me tewat mesuwat mytyyp nug hap owakai te hap ewy areineꞌen neran e.
6 Taꞌi woromoherep taꞌyn yne emiium uimimuꞌeria koꞌi pe are. Saꞌawyꞌi te ewatnuaria uhemiitꞌin tukupteꞌen maꞌato mio etum uhepe hawyi uiwatnuaria wo raꞌyn tukupteꞌen ehay upiaria raꞌyn tukupteꞌen maꞌato saꞌawyꞌi mesuwarotiaria ehay upiaria wo tukupteꞌen are e.
7 Koitywy taꞌatukuap taꞌyn yne emiium uhetiat koꞌi putꞌok e ekaipyi hap e.
8 Atimoherep taꞌyn yne emienoi uhepiat Papai are. Miꞌi taꞌatukuap yne raꞌyn emienoi uiwẽ pywiat hawyi taꞌatusat yne raꞌyn ehay katupono taꞌatukuap kahato raꞌyn ekaipyiwiat Uito hap iꞌewyte Uito Emipoꞌoro hap taꞌatumohey kahato raꞌyn are e.
9 Papai ahẽtup emiium uhemiitꞌin koꞌi powyro hamuat katupono ewatnuaria sese miꞌiria pote etiꞌatupoityro o miꞌiria koitywy are. Atikyꞌesat miꞌiria wẽtup miit ewy yn uimohey hap ete. Yt ahẽtup i ti yt uimohey i haria powyro hap maꞌato ahemiitꞌin emiium uhepiat koꞌi powyro hap ahẽtup epe Papai are e.
10 Papai torannia wyti uimohey haria ewatnuaria wo tukupteꞌen are. Miꞌi pote iꞌewyte yne ewatnuaria uiatno tukupteꞌen are. Aimohey haria waku nug haria tukupteꞌen mote uimotypot kahato haria wo tukupteꞌen e.
11 Papai araꞌaipok irane ewowi maꞌato ti aru uimohey haria teꞌeropyhuꞌat mesuwarote are. Papai Uito areto raꞌyn ehewowi hawyi waku En iꞌatuꞌapykok hatno ereineꞌen. Waku eset esaika hap upi mekewat set emiium uhepiat puo etiꞌatuꞌapykok. Atikyꞌesat miꞌiria wẽtup ok ewy yn tukupteꞌen aikotã En Uito wẽtup ok ewy yn watoineꞌen hap ewy.
12 Papai uheineꞌen iꞌatupyꞌasetpiat turan Eset emiium uhepiat esaika wo atiꞌatukawiatno torannia uhemiitꞌin. Yt wẽtup ok i uimohey hat waure hat wo topyhuꞌat maꞌato mekewat wẽtup ok howasat rakat uimohey waure hat topyhuꞌat aikotã saꞌawyꞌi wuat miwan henoi hap ewy ti raꞌyn uiwaure toꞌuhu hap ewy tutunug miꞌi tã e.
13 Papai koitywy areto hamuat iraꞌyn ewowi. Miꞌi tupono Koran wuat meiũwat uiꞌe hap ahenoi kahato uimohey haria pe iꞌatumowepiit hamuat. Atikyꞌesat kahato uiwepiit hap ewy topyhuꞌat iꞌatupyꞌa pe hap yt areineꞌen i mesuwarote hawyi.
14 Ahenoi raꞌyn ni eko uhemiitꞌin me Papai. Koitywy ti Eko ewy raꞌyn tukupteꞌen iꞌewyte uiꞌewy teꞌeruwanetup are. Miꞌi pote yt imohey haria i yt iꞌatuwese hin i iꞌatuete katupono yt mesuwat rotiat ewy hin i tukupteꞌen aikotã Uito wy yt mesuwat rotiat eko ewy hin i areineꞌen hap ewy e.
15 Papai etiꞌatuꞌywyk o uhemiitꞌin yt aimohey i haria pyꞌasetpyi yt are i ahẽtup epe. Maꞌato etiꞌatuꞌywyk o uimohey reꞌym haria porekuat ahiag po pyi uhemiitꞌin are ahẽtup Papai.
16 Katupono iꞌatueko yt mesuwarotiaria eko ewy hin i raꞌyn. Iꞌewyte uheko yt iraniaꞌin wanetup haria ewywuat i are e.
17 Papai waku iꞌatukawiatno hat ereineꞌen ehay pywuat kawiat upi. Miꞌi hawyi waku etiꞌatupoꞌoro mesuwat mytyyp totiat miitꞌin kape ehay moherep hamo aikotã uipoꞌoro raꞌyn mesuwat mytyyp kape emoherep hamo hap ewy are e.
18 Papai saꞌawyꞌi uipoꞌoro mesuwarotiaria ehakyeraꞌat hamo emiitꞌin nug hamo e. Koitywy Eꞌewy atiꞌatupoꞌoro ahemiitꞌin wuatꞌi mesuwarotiaria emiitꞌin nug hamuat aikotã uipoꞌoro En hap ewy are e.
19 Pywo Papai epo pe areineꞌen emikyꞌesat ewy nug hamo. Miꞌi hawyi atikyꞌesat wy uhemiitꞌin epo pe teꞌeropyhuꞌat eimikawiatno sese wuaria wo e.
20 Papai uhemiitꞌin koran wuaria yt upi yn i ahẽtup epe iꞌatupowyro hamo maꞌato iꞌewyte meiũran wuaria uimohey hanuaria saipepiaria upi ahẽtup epe iꞌatuehay upiat aimohey hanuaria upi are.
21 Atikyꞌesat aikotã aiwanetup hap wẽtup yn hap ewy ahemiitꞌin wẽtup wanetup ewy yn hap ahẽtup ekaipyi are. Aikotã areineꞌen ekai iꞌewyte ereineꞌen uikai miꞌi hap ewy atikyꞌesat aimimuꞌeria tukupteꞌen ahepe wẽtup miit ewy are. Iꞌatuwanetup hap aiwat ewy atikyꞌesat miꞌi hawyi mesuwarotiaria En uipoꞌoro hatno ereineꞌen hap taꞌatumohey raꞌyn e.
22 Papai saꞌawyꞌi ereꞌe uhepe -Waku kahato En uiꞌewy ere. Miꞌi hap ewy koitywy areꞌe uhemiitꞌin me -Wakuaria kahato eipe uiꞌewy are. Mio tã are iꞌatuepe katupono atikyꞌesat miꞌiria wywo aiwoꞌoꞌewy ewy aiwanetup hap are e Iesui.
23 -Uiꞌywot atikyꞌesat En Uito hawyi ahemiitꞌin wẽtup miit ewy yn hap are. Atikyꞌesat ahemiitꞌin wakuaria sese ahewaku hap oktan hap atikyꞌesat are. Aiwoꞌoꞌewy kahato watoineꞌen Papai En Uito ahemiitꞌin wywo wẽtup yn aiwanetup hap koꞌi hap atikyꞌesat are. Taꞌatuꞌatumuꞌe miitꞌin turan pywo sese ti Tupana Mipoꞌoro Iesui ahehakyeraꞌat hanuat iꞌatuꞌe wanetup haria hap atikyꞌesat e. Taꞌi Tupana aikyꞌe kahato Tosaꞌyru kyꞌe hap ewy iꞌatuꞌe iraniaꞌin hap ahẽtup. Katupono hãpyk sese tukupteꞌen ahemiitꞌin iraniaꞌin ehamo pote hap ahẽtup epe Uiꞌywot are e.
24 Papai mesuwat yi nug hap eꞌyian mete uikyꞌe kahato En are. Taꞌi saꞌawyꞌi sese mesuwat yi yt etunug i te turan -Wakuat kahato En aiwoꞌokyꞌe hap toꞌoꞌewy kahato ere uhepe Papai are. Atikyꞌesat kahato uhemiitꞌin uimohey haria emiium koꞌi tukupteꞌen aru aiũpe aiũpe uheineꞌen hap upi i are. Atikyꞌesat uikahu hap kape teꞌerahaꞌat aru are. Atikyꞌesat emiium uhewaku hap sese kuap hamo hap Papai are e.
25 Papai hãpyk kahato rakat En maꞌato emohey reꞌym haria mesuwe uwe En hap yt taꞌatukuap hin i. Maꞌato Uito ti worokuap kahato are iꞌewyte uipoꞌoro epiat hap mohey haria tikuap kahato En wy are e.
26 Haꞌawyte pyi te mesup te woromoherep uiwyriaꞌin me are. Iꞌewyte ti aru meiũran wuaria pe woromoherep te uwe En hap uhemiitꞌin me are. Atikyꞌesat kahato iꞌatuwoꞌokyꞌe hap aiwoꞌokyꞌe hap ewy are. Atikyꞌesat aikotã En uikyꞌe hap ewy iꞌatupyꞌa piat pe toineꞌen e. Atikyꞌesat wuatꞌi eꞌat pe areineꞌen iꞌatuwywo iꞌatupyꞌa pe iꞌatuwanetup hawe e. Etiꞌatukyꞌe ro uhaipepiaria uimohey haria uikyꞌe hap ewy are e Iesui toꞌywot pe topotmuꞌeria etiat.
