Iuwãu 18:1-40
18 Mio tã toꞌe Toꞌywot piat hawyi toto raꞌyn Iesui yꞌy hitꞌi Setõ hy sakpo. Miꞌi hap tote teke mikoi ypia pe temiitꞌin wywo.
2 Maꞌato Iesui maꞌat hat Iuta tikuap taꞌyn mekewat mikoi ypia katupono saꞌawyꞌi Iesui teꞌeruwaꞌatunug yn temiitꞌin 12 ok takaria wywo itote.
3 Miꞌi kape Iuta teropoꞌok taꞌyn suraraꞌin Iesui ieineꞌen hap kape iꞌewyte Tupana motypot yat apykok haria tuwat hupi. Toteropoꞌok paꞌi kororia ehay upi iꞌewyte iꞌatuꞌakag koꞌi ehay upi tuwat typyꞌi. Ariãty pirik hot puo tuwat iꞌewyte ariãty koꞌi puo tuwat ariaꞌyp akun koꞌi wywo tuꞌuka hamo tuwat tuwat.
4 Miꞌi hawyi putꞌok iꞌatuꞌe itote maꞌato Iesui tikuap taꞌyn yian mete aikotã aikotã tutunug tetiat hamuat koꞌi. Miꞌi hawyi toto raꞌyn Iuta mieropoꞌok koꞌi owa kape. Miꞌi hawyi toꞌe -Uweĩ eweikat e iꞌatuepe.
5 Miꞌi pote suraraꞌin tiwesat -Taꞌi mekewat Iesui tawa Nasare piat wyti uruikat iꞌatuꞌe. Miꞌi pote Iesui toꞌe -Uito rat Miꞌi e.
6 Mio tã e pote hewo yi tote taꞌatuꞌape wo.
7 Miꞌi rakirẽ Iesui toꞌe i -Uweĩ pyno eweikat e. -Iesui tawa Nasare piat rat uruikat iꞌatuꞌe i.
8 Miꞌi pote -Uito rat Miꞌi e i. -Uito uikat pote waku eipohep to uhemiitꞌin ete tuwat mono pyno e suraraꞌin me.
9 Saꞌawyꞌi wuat toꞌe hap ewy -Papai yt atikyꞌesat i emiium uhepiat uhemiitꞌin yt wẽtup ok i taꞌat uipo pyi toꞌe hap ewy tupono.
10 Miꞌi tã raꞌyn pote Simau Peteru tihep taꞌyn tekyseꞌyp hawyi toiꞌatek paꞌi koro emiit. Miꞌi hawyi ipo sese kawiat iꞌahape toihep taꞌyn Mauku e hap het rakat ahape.
11 Miꞌi hawyi Iesui toꞌe Peteru pe -Etopag i ro ekyseꞌyp heiam me Simau e. Yt uikawiatno teiꞌo en kyseꞌyp mo katupono Uiꞌywot tikyꞌesat ahoꞌopot hap e. Waku atuꞌu mekewat kuiꞌa piat Uiꞌywot miium paĩ e.
12 Miꞌi hawyi Iuta mieropoꞌok koꞌi topytyk Iesui hawyi surara koꞌi tipoꞌi poꞌi Iesui saity wo ipopy tet pupi.
13 Miꞌi hawyi taꞌatueroto Iesui paꞌi koro Kaꞌiwasi ehamopot Anai kape. Kaꞌiwasi Iuteuria akag koro wo toineꞌen mekewat anu pe e
14 Miꞌi paꞌi koro Kaꞌiwasi saꞌawyꞌi henoi paꞌi kororia pe Iesui etiat. Mio tã e -Pyno waku wẽtup ok ikuꞌuro miitꞌin ehakyeraꞌat hamuat e.
Peteru Yt Atikuap I Iesui E
15 Miꞌi hawyi toto Simau Peteru Iesui saipe upi wẽtup ok Iesui potmuꞌe wywo. Miꞌi hawyi putꞌok iꞌatuꞌe paꞌi koro yat ete. Miꞌi hawyi wẽtup ok Iesui emiit teke raꞌyn paꞌi wato kuap hat pote.
16 Maꞌato Peteru yt teke i. Toineꞌen kokawiat heꞌokenꞌypyke neꞌi. Miꞌi hawyi mekewat paꞌi wato kuap hat Iuwãu e het rakat toto eꞌokenꞌypy apykok hat piꞌã kape -Waku meiũwat miit teke ere ro suraraꞌin me toꞌe piꞌã piat hamo.
17 Miꞌi turan mekewat piꞌã Peteru eke okenꞌypy puat turan toꞌe Peteru pe -Iesui potmuꞌe keĩ en e. Mio tã e hawyi Peteru tiwesat piꞌã -Yt miꞌi i rat uito e.
18 Miꞌi turan oken note paꞌi wato eropat haria teꞌereꞌariaꞌuhu suraraꞌin wywo. Miꞌi hawyi itote teꞌeremope naꞌak pote. Miꞌi kape Peteru iꞌewyte tuwemope iꞌatupyꞌasetpe.
19 Miꞌi turan paꞌi wato ehamopot Anai apo apo e Iesui pe -Ehenoi ro uruepe aikotã ere epotmuꞌeria wywo ereineꞌen iꞌatumuꞌe haype hap e.
20 Miꞌi hawyi Iesui tiwesat -Uito ti herep wuo atiꞌatumuꞌe Tupana yat iwato rakat pe. Iꞌewyte kat pe ahenoi henoi kahato miitꞌin sem me aikope aikope teꞌeruwaꞌatunug hap tote Tupana motypot yat iwato rakat pe. Iꞌewyte kat e hap ahenoi henoi kahato miitꞌin sem me aikope aikope teꞌeruwaꞌatunug hap tote. Yt kat i ti miitꞌin muꞌe hap atunug ihik pe neꞌi e.
21 Pyno kat poteĩ apo apo ere uhepe -Kat ereꞌe miitꞌin mesuwe ere e. Epiat ikuap teran uipotmuꞌe hap koꞌi etiat pote waku apo ere uhehay kuap haria pe katupono miꞌiria tikuap kahato kat uiꞌe hap kat uimienoi koꞌi e Iesui paꞌi koro Anai pe
22 Mio tã e Iesui pote wẽtup ok surara tiꞌahyk taꞌyn Iesui howa ete topopep mo -Waĩ ehay saꞌag neiꞌo paꞌi koro ete e haty wo Iesui pe
23 Maꞌato Iesui tiwesat -Kat pote uiꞌahyk e. Uhehay saꞌag mote ehenoi ro uhepe aikotã saꞌag uiꞌe hap wuatꞌi pe maꞌato pywuat uhehay ahenoi pote yt uiꞌahyk teiꞌo en e Iesui surara pe.
Myẽꞌym Wo Atikuap I Iesui E Peteru
24 Miꞌi hawyi paꞌi koro Anai tipoꞌoro Iesui ipoꞌi poꞌi pe wẽtup paꞌi koro kape mekewat Kaꞌiwasi e hap kape tomimoehapyap kape.
25 Miꞌi turan Iesui potmuꞌe Peteru toineꞌen yꞌam me aria kupyke tuwemope. Miꞌi hap tote iraniaꞌin apo iꞌatuꞌe Peteru pe -Uhyt mimi iꞌatuꞌe en apo wẽtup ok Iesui potmuꞌe sio yt iꞌatuꞌe. Maꞌato Peteru tiwesat -Yt rat e yt uito i rat e.
26 Miꞌi hawyi paꞌi koro eropat hat mekewat Peteru miꞌahapehep wyꞌok toꞌe Peteru pe -Uhyt e araꞌakasa en muki iwywo mikoi ypia piat turan e.
27 Miꞌi hawyi Peteru toꞌe -U yt uito i rat e. Yt atikuap i Miꞌi Miit e haty wo. Mio tã e saꞌag turan waipaka paiꞌat ihay raꞌyn.
28 Miꞌi hawyi hunete taꞌatueroto Iesui ipoꞌi poꞌi pe morekuat wato eiam kape paꞌi wato Kaꞌiwasi yat pyi. Miꞌi hawyi maꞌato Iuteu ywania akag koꞌi yt tuwehytꞌok teran i Iesui upi morekuat eiam me katupono -Yt naku i wateke meiũwat getap we iꞌatuꞌe katupono yt aiwat aiꞌywania yat i iꞌatuꞌe. Wateke pote ten yt watenuk kuap i raꞌyn iraniaꞌin aiꞌywania wywo Tupana motypot ienuk wato hap turan iꞌatuꞌe toꞌope.
29 Miꞌi pote morekuat Piratu tuwẽtem toꞌyat pyi iꞌatuewowi. Miꞌi hawyi toꞌe -Kat pote eweterut meiẽwat Miit uhewowi e. Kat som saꞌag tutunug ehepe e.
30 Miꞌi hawyi taꞌatuwesat -Meiũwat Miit wyti yt nakuat i sese ti rat iꞌatuꞌe. Miꞌi pote uruterut Miꞌi Miit ewowi mehin iꞌatuꞌe. Waku Miꞌi Miit pote ten yt karãpe i uruterut ewowi iꞌapiheg hamo mehin iꞌatuꞌe. Maꞌato pywo ti Miꞌi Miit yt naku i sese rakat iꞌatuꞌe. Miꞌi pote ti uruterut ewowi iꞌatuꞌe morekuat pe.
31 Miꞌi hawyi morekuat Piratu toꞌe -Kat poteĩ uhewowi eweterut Miꞌi Miit e. Waku ewetioto Miꞌi Miit einapin haria kape aikotã yt eheko ewy i hap kuap hamo e Piratu Iuteu ywania akag koꞌi pe. Mio tã e Piratu hawyi teꞌeroꞌe -Maꞌato mehin yt ehay pyi i pote yt uwe kuap i iꞌauka iꞌatuꞌe. Katupono ti urueko yt aipoꞌoro i miitꞌin auka hamo iꞌatuꞌe.
32 Aikotã yian mete Iesui tuwenoi tokuꞌuro hamuat ariaꞌyp posak ete hap ewy raꞌyn ti taꞌatunug naꞌyn tuete itote.
33 Miꞌi hawyi taꞌatuꞌatoiat hawyi teke i raꞌyn teiam me morekuat Piratu hawyi Iesui toikay kay tuwewowi hawyi toꞌe -Eꞌywania Iuteuria Porekuat apo En e.
34 Miꞌi pote Iesui tiwesat -Ewanetup hawe apo ere sio etimohey sese iꞌatuporekuat Uito hap sio iraniaꞌin henoi epe uikuap hamuat e Iesui morekuat pe.
35 Miꞌi hawyi Piratu tiwesat -Uito ti yt ewat eꞌywania Iuteu ewywuat hin i e. Eꞌywania paꞌi koro koꞌi ti erut uhewowi ekuap hamo sio waku En sio yt naku i e hap kuap hamo e. Pyno kat som yt nakuap i etunug Uhyt e Piratu.
36 Miꞌi hawyi Iesui tiwesat -Uito ti mesuwarotiat morekuaria yt ewywuat i are Uito yt miitꞌin poꞌorokary haty wuat hat i e. Atiꞌatupoꞌorokary uhemiitꞌin yt epoꞌoro hat morekuat Sesa yt ewy i Uito e. Morekuat kahato areineꞌen wen maꞌato yt mesuwarotiaria ewy hin i e. Mesuwarotiat morekuat Uito pote meremo uhemiitꞌin uhesuraraꞌin atiꞌatupoꞌoro uikawiatno hamo mesuwe. Miꞌi pote ten Iuteu ywania yt uipytyk kuap i are. Maꞌato Uito yt mesuwarotiat morekuaria ewy hin i e Iesui.
37 Mio tã e pote Piratu toꞌe -Pyno En ni Miitꞌin Potypot Koro sio yt e. -Taꞌi Mehin eꞌe hap ewy Morekuat nuat Tupana uipoꞌoro miꞌi hanuat areineꞌen mesuwe iꞌewyte miꞌi hamo aremoherep mesuwat yi tote e. Pywuat sakpo sehay enoi hamo ariot miitꞌin muꞌe hamo are. Miꞌi pote pywuat sese sehay kyꞌesat haria teꞌeruwanetup kahato uhehay pywuat kape e Iesui.
38 Miꞌi hawyi toꞌe Piratu Iesui pe -Yt kat i rasom pywuat sese mesuwarote uiwanetup hawe e. Mio tã e morekuat Piratu hawyi tuwemorem hawyi toto raꞌyn toꞌyat pyi Iuteu ywania akag koꞌi kape tehay moherep hamo sio Iesui waku sio yt e hamo. Miꞌi hawyi toꞌe Piratu itote -Mehinꞌin e ahãꞌãg naꞌyn Mekewat Miit Iesui e hap het rakat hawyi uiwanetup hawe waku kahato Miꞌi Miit e. Yt kat i saꞌag nug hat Miꞌi Miit e Piratu.
39 Maꞌato wyti toineꞌen eiwat eiwepokuap hap mesuwat eꞌat piat aiminug pore e. Taꞌi yne anu pe wyti mesuwat ienuk wato hap turan wẽtup ok eimipyhik eweiputsit tuereto eiwepokuap hap ewy e. Miꞌi tupono apo are ehepe -Eweikyꞌesat apo atiporenotem Iesui e. Eweikyꞌesat apo eiꞌywania Iuteu potypot atiputsit e morekuat Piratu.
40 Miꞌi hawyi teꞌeruwatka popuo -Yt wyti yt wyti. Waku poꞌog etiporenotem mekewat miit Parapa iꞌatuꞌe. Waku etiporenotem Parapa ewoꞌopyhik hap pyi mehin iꞌatuꞌe. Miꞌi hawyi etiꞌauka ro mekewat Iesui iꞌatuꞌe haty wo. Mekewat Parapa seroꞌok e hat miitꞌin auka hat e -Etiporenotem no mekewat miit Parapa hawyi waku etiꞌauka Mekewat Iesui e hap het rakat iꞌatuꞌe saꞌag morekuat Piratu pe.
