Iuwãu 2:1-25
2 Myẽꞌym eꞌat hawyi teꞌeruwaꞌatunug miitꞌin tawa Kana pe yi Karireia pe. Miꞌi tote taꞌatunug ienuk hap katupono typy ok woꞌokyiꞌat hap eꞌat taꞌatunug itote. Iesui ty wy toineꞌen itote.
2 Iꞌewyte Iesui hemiitꞌin wywo taꞌatuwenka iꞌatuwoꞌokyiꞌat hap ienuk hap kape.
3 Miꞌi turan maꞌato Uwa sapo hy taꞌatumoꞌẽ yne raꞌyn miꞌi pote Iesui ty toꞌe -Yt kat i raꞌyn wyti Uwa sapo hy meiũpe Uimepyt e.
4 Miꞌi pote Iesui toꞌe -U mana kat som etikyꞌesat atunug e. Koran te ti yt uipopap i te Tupana esaika hap moherep miitꞌin miat hamo e toty pe.
5 Miꞌi hawyi ity toꞌe ienuk nug hat eropat haria pe -Kat e Uimepyt ehepe hap ewy o ewetunug eipoꞌoro hap oktan e.
6 Miꞌi turan itote 6 kamuti wato nu kawiat koꞌi tukupteꞌen itote miitꞌin posei hamuat Iuteuria eko ewy. Wẽtup kamuti pe tukupteꞌen 15 ekuiruꞌa piat yꞌy iꞌatuꞌe.
7 Miꞌi hawyi Iesui toꞌe woꞌeropat haria pe -Eweiꞌatuewopyro ro yꞌy wo kamuti koꞌi e. Mio tã e hawyi taꞌatupytꞌatnug yne taꞌatuewopyro raꞌyn 6 kamuti.
8 Howopy yne hawyi Iesui toꞌe iꞌatuepe -Ewehoꞌosat ro koitywy kamuti piat kurin hawyi ewehoꞌopomeꞌeg no ienuk hap kaꞌiwat pe e. Miꞌi hawyi taꞌatueheꞌeroto miꞌi kape.
9 Miꞌi hawyi ienuk hap kaꞌiwat hãꞌãg naꞌyn mekewat sapo hy yt yꞌy hin i raꞌyn maꞌato Uwa sapo hy wo raꞌyn topyhuꞌat yꞌy. Maꞌato yt toikuap i aikope pywiat Uwa sapo hy wo hap maꞌato heropat haria yn ikuap. Miꞌi hawyi ikaꞌiwat tikay kay tuwewowi iharyꞌi rakat nuat.
10 Miꞌi hawyi toꞌe tope -Mehin e saꞌawyꞌi wuat ienuk nug hawe ti uruimoꞌẽ miitꞌin me Uwa sapo hy he rakat e maꞌato watꞌypmo ti iꞌatuꞌok hawyi uruimoꞌẽ heĩpyt yt he rakat i raꞌyn e maꞌato en wyti yt uruꞌewy hin i kat pote watꞌypmuat raꞌyn poꞌog he rakat saꞌawyꞌi wuat kai etum uruepe Uwa sapo hy e. Taꞌi he sese ti rat mesuwat sapo hy e iharyꞌi pakup takat pe.
11 Yt miitꞌin mikuap oktan i Iesui haꞌawynug itote Uwa sapo hy he rakat yꞌy kawiat 6 kamuti howopy toimoherep yꞌy kawiat itote. Saꞌawyꞌi te turan yt karãpe i Iesui timoherep tesaika hap iwato hap nug hamuat mekewat Tupana yn inug kuap hap minug ewy. Saꞌawyꞌi tohaꞌawynug miꞌi tã hap tawa Kana pe yi Karireia pe. Toimoherep Tupana esaika hap topiit pywiat wakuap nug kuap hap itote. Miꞌi hawyi ipotmuꞌeria timohey kahato raꞌyn taꞌatupyꞌa piat pyi.
12 Miꞌi hawyi ti Iesui toto raꞌyn tawa Kana kaipyi tawa wato Kawanaum kape toty toꞌywytꞌin sese temiitꞌin wywo. Miꞌi hawyi tukupteꞌen porapꞌi itote.
Iesui Tihywytip Raꞌyn Tupana Motypot Yat
13 Miꞌi turan Iuteuria waꞌatunug hap eꞌat putꞌok e irane i raꞌyn mekewat teꞌeruwanetup aikotã saꞌawyꞌi Tupana tiꞌatuhep wanikaptia po pywiat hap eꞌat. Miꞌi hawyi Iesui toto tawa koro Ierusarẽi kape.
14 Putꞌok e hawyi Tupana motypot hap yat wato pe Iesui teke raꞌyn mekewat okenꞌypy wato tote. Miꞌi turan itote toiꞌatupuẽti hũria Wewato ahup weneru haria Uweiria koꞌi weneru haria Pykasu weneru haria sem toiꞌatupuẽti iꞌewyte tineiru poreraꞌat haria apyk puaria yparakai ypyke tukupteꞌen toiꞌatupuẽti.
15 Miꞌi pote Iesui tunug haity kawiat iꞌatuꞌapiheg hamuat. Miꞌi hawyi haity wo toiꞌatusytpok kahato Tupana motypot yat piat wehũria weneru haria. Iꞌewyte toiꞌatusytpok Wewato ahup koꞌi Uweiria koꞌi Tupana motypot yat pyi. Miꞌi hawyi wuatꞌi etama etineiru patꞌok patꞌok hap yparakai koꞌi toiꞌatuꞌãpeꞌokpun naꞌyn tohytpok yne tineiru koꞌi yi tote.
16 Miꞌi hawyi Iesui toꞌe pykasu weneru haria puo -Eweiꞌatuporenotem no ehepykasu koꞌi Tupana motypot hap yat pyi e. Waĩꞌe yt ewetunug neiꞌo Uiꞌywot motypot yat weneruꞌi weneruꞌi e hap yat no e. Eweiwat ro mesuwe pyi e.
17 Toiꞌatusopo sopo yne hawyi hemiitꞌin teꞌeruwanetup taꞌyn aikotã saꞌawyꞌi miwan me tohenoi hap kape -Uikyꞌe hap emotypot etiat aikotã aria ewy uipyꞌa pe hap ewy e. Atikyꞌe kahato emotypot yat Tupana e miwan Saumu 69.9 pe.
18 Miꞌi hawyi itotiaria Iuteuria teꞌeroꞌe Iesui pe -Etomoherep to koitywy eminug iwato rakat. Uwe kahu epoꞌoro meke tã nug Tupana motypot yat piat hamo iꞌatuꞌe. Waku merep hap ewy etimoherep uwe epoꞌoro hat miꞌi nug hamuat iꞌatuꞌe.
19 Miꞌi hawyi toiꞌatuwesat -Pyno waku iwato kahato atimoherep ehepe e. Eweiꞌaporok meiũwat Tupana motypot yat pote atiꞌãpeꞌokꞌam i raꞌyn myẽꞌym eꞌat pe yn atunug i raꞌyn e Iesui Iuteuria akag koꞌi pe.
20 -Eso kahato iꞌatuꞌe kat pote saꞌawyꞌi te nagnia tunug niatpo kahato 46 anu pe taꞌatunug meiũwat Tupana motypot yat iꞌatuꞌe. Aikotã ten pyno etunug kuap myẽꞌym eꞌat pe yn iꞌatuꞌe.
21 Maꞌato hãꞌãkap wuo Iesui henoi iꞌatuepe. Mio tã e topiit etiat pe Tupana yat e.
22 Maꞌato Iesui wyriaꞌin i wyti mio tã e hap yt uwe i ikuap maꞌato meiũran Iesui ikuꞌuro hawyi toineꞌen i raꞌyn guꞌuro pyi hawyi taꞌatukuap taꞌyn kat som toꞌe sese hãꞌãkap wuo hap.
23 Mekewat ienuk wato turan Iesui tiꞌatumoehãite kahato tawa Ierusarẽi miaria iꞌahuu rakaria. Miꞌi pote typyꞌi kahato itotiaria tipywo raꞌyn Iesui kat pote teꞌeraꞌakasa raꞌyn iwat iminug koꞌi kape.
24 Maꞌato Iesui yt tipywo hin i tomohey iꞌatuepiat hap katupono toikuap taꞌyn yt towat temiitꞌin sese i hap toikuap.
25 Yt uwe i henoi Iesui pe miitꞌin etiat wen maꞌato toikuap taꞌyn miitꞌin wanetup hap koꞌi tuwekaipyi. Toikuap tuwewi miitꞌin wanetup hap koꞌi.
