Iuwãu 20:1-31
20 Miꞌi hawyi myẽꞌym eꞌat hawyi mytuꞌu eꞌat pe toto raꞌyn mana Maria yi Matarena kaipywiat Iesui syp hap kape. Iꞌypyryp te turan yt ihatꞌok i te turan toto. Putꞌok toꞌe hawyi tehaꞌat kahato Iesui syp hap kape. Miꞌi turan taꞌakasa raꞌyn teꞌokenhypꞌok pe raꞌyn toineꞌen.
2 Miꞌi hawyi teput kahato ipotmuꞌe Simau Nu piat henoi hamo iꞌewyte mekewat Iesui mikyꞌe kahato ipotmuꞌe piat henoi hamo. Miꞌi hawyi toꞌe iꞌatuepe -Taꞌatueroꞌok taꞌyn wyti Aikaꞌiwat Iesui hyp hap tote pyi mimiꞌin e. Miꞌi hawyi yt uruikuap i aikowo taꞌatuereto hap e tehay pirik wo.
3 Miꞌi hawyi Peteru wẽtup ok ipotmuꞌe wywo tuwat raꞌyn taꞌatukohyeput no hyp hap kape teꞌeraꞌakasa hamo.
4 Miꞌi hawyi putꞌok iꞌatuꞌe itote maꞌato wẽtup ok Iesui mikyꞌe poꞌog ihyha Peteru kai. Miꞌi pote miꞌi ti putꞌok e Nu eꞌyian mete.
5 Miꞌi hawyi tuweꞌymyk Iesui pũꞌẽ kape tehaꞌat hamo nu kaꞌa epiok hamo. Miꞌi turan tehaꞌat raꞌyn Iesui poꞌi poꞌi hap kape maꞌato yt teke i.
6 Maꞌato miꞌi hawyi Peteru putꞌok e watꞌypmo maꞌato meremo Peteru teke nu kaꞌa pe teput no. Miꞌi hawyi taꞌakasa Iesui suwy hap sokpe.
7 Miꞌi hawyi kokai taꞌakasa iꞌakag suwy hap toꞌokmoĩ me.
8 Miꞌi hawyi mekewat wẽtup ok poꞌog ihyha rakat teke raꞌyn wy. Miꞌi ti tehaꞌat yne kape hawyi toimohey kahato raꞌyn.
9 Saꞌawyꞌi te ti aikotã iwan me Iesui wẽtem guꞌuro pywiat e hap etiat yt taꞌatukuap hin i te.
10 Miꞌi hawyi teꞌeraꞌaipok i raꞌyn getap kape.
Iesui Tuwemoherep Maria Ete
11 Maꞌato mana Maria yi Matarena kaipywiat yt toto teran i maꞌato itote tuwak kahato hyp hap tote. Miꞌi hawyi tehaꞌat hyp hap kaꞌa puo.
12 Miꞌi hawyi taꞌakasa raꞌyn atipy kaipywiat typy ok iꞌatuesokpe ikytsig kahato apyk pe wẽtup ok iꞌakag kai wẽtup ok ipy kai aikope saꞌawyꞌi Iesui piit toineꞌen hap tote taꞌakasa.
13 Miꞌi hawyi miꞌiria teꞌeroꞌe mana Maria pe -Kat pote kahu erewak mana iꞌatuꞌe. -Yt uwe i raꞌyn uikaꞌiwat tosyp hawe pote an arewak e. Taꞌatueroꞌok taꞌyn sig an Uikaꞌiwat piit hawyi yt atikuap i raꞌyn aikope mio taꞌatupag ipiit hap pote an arewak e.
14 Miꞌi hawyi Maria tuwemorem tosaipepe hawyi taꞌakasa Iesui yꞌam me maꞌato yt toikuap i uwe meiẽ.
15 Miꞌi pote -Kat pote kahu erewak mana e uwe kahu etikat e. Mikoi kaꞌiwat sio e yn tuwanetup hawe miꞌi hawyi toꞌe -Aikope kahu etioto mesuwiat piit mimi e. Ehenoi uhepiat pote ten atat iraꞌyn e.
16 Miꞌi hawyi Iesui tiwesat -Maria e hawyi ihay ete aikotã toset puo tuwẽpowat hap ete toikuap uwe Iesui hawyi tuwemorem meremo hawyi -Woꞌomuꞌe hat e maꞌato topusu puo Hapuni e.
17 Miꞌi hawyi Iesui toꞌe -Epohep o uipy ete pyi mana katupono waku saꞌawyꞌi araꞌaipok Uiꞌywot kape e. Miꞌi hawyi maꞌato mohenoi ro uhehay e mio wyti koitywy araꞌam irane raꞌyn Uiꞌywot kape e. Miꞌi pote mohenoi ro uhehay Uipotmuꞌeria pe -Koitywy araꞌam irane raꞌyn Uiꞌywot uheTupana kape. Iꞌewyte eiꞌywot eheTupana kape ereꞌe ro uiꞌe hap uheꞌywytꞌin me mana e.
18 Miꞌi hawyi Maria yi Matarena kaipywiat toto raꞌyn meremo ipotmuꞌeria kape wakuap enoi hamo. -Waku kahato mimiꞌin katupono mio raꞌyn araꞌakasa raꞌyn Aikaꞌiwat Iesui am hap e. Pywo pe ti tuwẽtem naꞌyn guꞌuro pyi Iesui e. Miꞌi hawyi tohenoi yne Iesui ehay tepiat.
Iesui Tiwemoherep Temiitꞌin Me
19 Miꞌi hawyi mekewat mytuꞌu ewãtymꞌi turan ipotmuꞌeria teꞌeruwaꞌatunug iheg me Iuteuria akagnia pupiat teꞌerokenꞌẽ haype. Miꞌi turan putꞌok e raꞌyn Iesui iꞌatupyꞌasetpe. Miꞌi hawyi toꞌe iꞌatuepe -Koitywy yt eweikenꞌẽ teiꞌo. Eiwepiit ro e.
20 Mio tã toꞌe hawyi toimoherep toposuk hap koꞌi hawyi toꞌywytpe suk hap. Miꞌi hawyi taꞌatukaꞌiwat kapiat teꞌerehaꞌat kahato hawyi iꞌatuwepiit kahato raꞌyn.
21 Miꞌi hawyi Iesui toꞌe -Uiwyriaꞌin e mio ahẽtup taꞌyn Tupana pe eiwoꞌokyꞌe kahato hamuat hap. Miꞌi pote waĩ eiꞌarot rẽ poꞌog e. Saꞌawyꞌi te ti Uiꞌywot uipoꞌoro tehay wakuat moherep miitꞌin miat hamo. Miꞌi hap ewy te koran worohoꞌopoꞌoro eipe Uipoꞌoro hat tehay wakuat moherep wuatꞌi ywania pe hamo e.
22 Miꞌi hawyi Iesui ahenꞌẽ haty wo iꞌatuewowi hawyi toꞌe -Ereke ro uipyꞌa pe eweiꞌe ro Tupana Paꞌãu me e.
23 Karãpe Tupana Paꞌãu putꞌok e sese ehepe hawyi aru eipyꞌa topyhuꞌat kahato Tupana eiam mo e. Miꞌi tupono karãpe eweiꞌe Tupana pe eipyꞌa pyi -Waku waure wo ereineꞌen miꞌi miit minug saꞌag epiat hap koꞌi kai eweiꞌe meremo hawyi tuweityk taꞌyn. Tupana topyhuꞌat eiꞌe hap ewy e. Mio tã eweiꞌe hawyi Uiꞌywot atipy piat iꞌaparap hap koꞌi kai are. Maꞌato yt eweiꞌe i pote ti aru miit minug saꞌag hap koꞌi yt tuweityk i Tupana wanetup hawe are e.
24 Mekewat mytuꞌu eꞌat pyrakꞌi turan Iesui tuwemoherep taꞌyn iheg miaria temiitꞌin pyꞌasetpe. Miꞌi hap eꞌat pe wẽtup ok ipotmuꞌe Tume yt uwe i Tume e hap wẽtup het Titimu e hap itote.
25 Meiũran tuut raꞌyn Tume hawyi -Tuwẽtem naꞌyn guꞌuro pyi Aipotypot mehin iꞌatuꞌe. Pywo ti rat urutaꞌakasa raꞌyn iꞌatuꞌe. Toineꞌen pakup i Aikaꞌiwat iꞌatuꞌe. Maꞌato Tume tiꞌatuwesat -Eheso kahato rat katupono yt toineꞌen hin i e. Arepuiꞌĩa pag ipo suk hap kaꞌa pe hakupe suk hap kaꞌa pe pote yn taren pywo are. Miꞌi tã atunug pote yn atimohey e.
26 Miꞌi hawyi putꞌok e i raꞌyn mytuꞌu eꞌat hawyi teꞌeruwaꞌatunug i raꞌyn itote maꞌato mekewat eꞌat pe toineꞌen naꞌyn iꞌatupyꞌasetpe Tume. Miꞌi hawyi teꞌeruweꞌokenhyp heg me tukupteꞌen taꞌatuꞌyat pe. Maꞌato iheg me pykai meremo Iesui tuwemoherep yꞌam me iꞌatutoꞌoran me. Miꞌi hawyi toꞌe -Waku hap yn ahẽtup Tupana pe ehupi uiwyriaꞌin e.
27 Eiwepiit ro e. Uipotmuꞌe Tume e erokosap to uhewowi are erepuiꞌĩapag no uiposuk hawe iꞌewyte uhakupe suk hawe hawyi etimohey ro e.
28 -Uikaꞌiwat e koitywy woromohey kahato raꞌyn Uhetupana kahato raꞌyn En e Tume.
29 -Tume eraꞌakasa potiat uimohey hat en e maꞌato poꞌog uimohey hat yt akasa i uhewowiat haria poꞌog poꞌog uimohey haria ekawiat e katupono miꞌiria uimohey haria tukupteꞌen yt karãpe i uhewowiat akasa sese pykawiat haria miꞌiria e. Miꞌiria ti aru poꞌog Tupana mowepiit hanuaria torannia kai e Iesui Tume pe.
Yt Iꞌatu Hin I Yne Iesui Minug Koꞌi Mesuwe
30 Toineꞌen mesuwat yi tote turan Iesui tunug kahato tomisepap koꞌi are. Pywo ti rat Tupana esaika hap wywuat wakuap kahato toimoherep topotmuꞌeria akasa hamuat. Mesuwe yt atiwan kuap i torannia towato hap koꞌi e katupono mesuwat miwan me ipatꞌok yn ahenoi kuap Iesui minug koꞌi are.
31 Maꞌato kat koꞌi kat koꞌi atiwan mesuwat uimiwan me ahenoi kahato raꞌyn haty wo uipyꞌa pyi katupono atikyꞌesat kahato uimiwan kuap haria tukupteꞌen aru Iesui mohey haria. Atikyꞌesat kahato eweimohey Iesui ti Tupana Saꞌyru sese hap iꞌewyte atikyꞌesat ewetunug Iesui Eipotypot koro sese hap atikyꞌesat uimiwan etiat wemuꞌe haria. Eweimohey ro Iesui are uipyꞌa pyi. Pywo pe ti Iesui upiaria sese eweikupteꞌen pote waku pe eweikupteꞌen Tupana pya pe iꞌewyte wuatꞌi eꞌat piat eweikupteꞌen mesuwe iꞌewyte atipy pe are.
