Iuwãu 5:1-47
5 Miꞌi hawyi yi Karireia kaipyi Iesui toto tawa Ierusarẽi kape i raꞌyn ienuk hap koro kape toto.
2 Miꞌi hawyi Ierusarẽi me toineꞌen yt pya i okenꞌypy kai yꞌy eiam iwato rakat Pesaita e hap het rakat. Miꞌi tote yẽpe ete 5 og toineꞌen. Miꞌiria ti yt pya i tukupteꞌen aikope iꞌatuhũ Uweiria koꞌi eꞌokenꞌypy kai aikope tuwehytꞌok iꞌatuhũria Ierusarẽi me hap tote.
3 Miꞌi tote taꞌatueꞌog me tukupteꞌen iꞌahuu rakaria typyꞌi kahato yꞌy eiam ẽpeke. Yt ihapytig i rakaria yt ipoĩꞌam kuap i rakaria ipy kĩꞌã rakaria ti tukupteꞌen.
4 Miꞌi tote ti taꞌatuekatup yꞌy mutꞌok mutꞌok e hap katupono atipy kaipywiat Tupana mipoꞌoro putꞌok e tuereto ihypykoĩ hanuat. Miꞌi hawyi ihy pykoĩ turan mohag wo topyhuꞌat yꞌy. Saꞌawyꞌi wuat wyti mekewat yꞌy piat seke hat topyhuꞌat ihãite raꞌyn iꞌatuꞌe.
5 Mekewat eꞌat pe toineꞌen itote wẽtup ok iꞌahuu rakat nimo kahato 38 iꞌaman mot piat turan raꞌyn iꞌahuu atug me tetupe tote toineꞌen.
6 Miꞌi Iesui taꞌakasa hawyi toikuap nimo raꞌyn iꞌahuu hap. Miꞌi hawyi toꞌe tope -Ehãite hap apo etikyꞌesat uhyt e.
7 -Taꞌi e maꞌato yt uwe i uiꞌykesat uipowyro yꞌy piat uipag hamo uhyt e. Tuut tuereto yꞌy hypykoĩ hat wen maꞌato yt areke kuap i katupono iraniaꞌin uipyhyp uheꞌyian me tuwehytꞌok hamo e. Miꞌi pote yt areke kuap i e.
8 Mio tã e hawyi toꞌe Iesui -Eꞌãpeꞌokꞌam no mehin e. Etat ro etupe hawyi ewyry ro e.
9 Mio tã e hawyi meremo waku. Ipoĩꞌam naꞌyn hawyi totat tetupe hawyi toto raꞌyn ihãite raꞌyn Iesui ehay pyi. Tupana motypot eꞌat turan Iesui timoehãite iꞌahuu rakat.
10 Miꞌi hawyi muap upi Iuteuria akag koꞌi teꞌeroꞌe imimoehãite pe -Koityꞌi eꞌat Tupana motypot hap eꞌat pe neꞌi uhyt iꞌatuꞌe. Yt etioto teiꞌo etupe mesup eꞌat pe katupono iwan miat ainapin hap wyti waĩꞌe kahato meke tã hap ete iꞌatuꞌe.
11 -Maꞌato uimoehãite hat toꞌe uhepe -Etat ro etupe hawyi ewyry ro e uhepe e.
12 -Uwe kahu pyno mio tã e epe iꞌatuꞌe.
13 -U e yt atikuap i uwe uimoehãite uhytꞌiꞌin e katupono miitꞌin typyꞌi tok puo toto pote yt ahẽtup kuap i kat eĩ eset uiꞌe hap e.
14 Meiũran tomimoehãite Iesui tipuẽti Tupana motypot yat pe i raꞌyn. Miꞌi hawyi toꞌe tope -Eweꞌeg wo uhyt saꞌawyꞌi wuat eminug saꞌag. Yt etunug i raꞌyn maꞌato etunug ne pote ti aru meiũran poꞌog saꞌag topyhuꞌat ekai eꞌahuu saꞌawyꞌi wuat kai e.
15 Miꞌi hawyi toikuap hawyi tohenoi raꞌyn Iuteuria akagnia pe -Uimoehãite hat Iesui e iꞌatuepe.
Iesui Iꞌywot Ewywuar Tutunug
16 Miꞌi pote Iesui taꞌatusatyꞌi satyꞌi katupono Tupana motypot eꞌat pe toimoehãite raꞌyn pote.
17 Maꞌato Iesui toꞌe Iuteuria akagnia pe -Uiꞌywot ipotpap kahato te ti wakuap nug hamo. Uito mesup te uipotpap kahato wakuap nug hamo e Iesui.
18 Miꞌi tã e pote Iuteuria tiꞌauka teran neꞌi Iesui katupono ipotpap Tupana motypot eꞌat pe iꞌewyte toꞌe Tupana Uiꞌywot e tuwenug Tupana ewy te pote.
19 Miꞌi hawyi toꞌe Iuteuria akagnia pe -Pywo pe yt kat i tuwepyꞌa pyi Haꞌyru tunug. Toꞌywot minug ewywuat yn ni tutunug. Tehaꞌat Toꞌywot minug ewowiat hawyi tutunug iꞌewywuat e.
20 Iꞌywot tikyꞌe Tosaꞌyru miꞌi pote toimoherep tope yne tominug koꞌi e. Meiũran ti aru poꞌog toimoherep mesuwat kai eimowanetup hamo e.
21 Iꞌywot tiꞌatumoieineꞌen pakup i map haria. Miꞌi hap ewy ti Haꞌyru tiꞌatumoieineꞌen tomiꞌairoria koꞌi e.
22 Iꞌywot wyti aru yt henoi i uwe uwe imiꞌapiheg wuat maꞌato henoi hat topyhuꞌat Haꞌyru kai uwe uwe imiꞌapiheg wuaria enoi hamuat e.
23 Miꞌi hap nug hamuat tutum yne Tosaꞌyru pe katupono toikyꞌesat Tosaꞌyru motypot hap tomotypot hap ewy e. Uwe uwe Haꞌyru yt motypot i hat ipoꞌoro hat Iꞌywot yt motypot i hat topyhuꞌat.
24 Pywo pe ti areꞌe ehepe uwe uwe uhehay mohey hat ti aru uipoꞌoro hat mohey hat toineꞌen. Miꞌi hat ti aru topyhuꞌat wuatꞌi eꞌat pe yt karãpe i imiꞌapiheg wo. Ikuꞌuro hap tokosap taꞌyn hawyi heineꞌen hap yn topyhuꞌat wuatꞌi eꞌat piat ikai e.
25 Pywo pe ti areꞌe ehepe tuut ti aru heꞌat koitywy putꞌok e raꞌyn heꞌat karapeĩ ikuꞌuro rakat ewy Tupana Saꞌyru ehay kapiat wanetup haria. Miꞌiria ti aru ikuap Tupana Saꞌyru ehay hawyi iꞌatuieineꞌen wuatꞌi eꞌat piat hap taꞌatupuẽti raꞌyn e.
26 Iꞌywot toineꞌen tuwekaipyi yt uwe i inug. Miꞌi hap ewy tutum Tosaꞌyru pe tuwekaipywiat toineꞌen hap e.
27 Tupana toꞌe Tosaꞌyru pe -En wyti Miitꞌin Ykeꞌet miit sese erepyhuꞌat. Miꞌi tupono waku ereꞌe uwe waku uwe yt uwe topyhuꞌat miꞌapiheg wo uwe yt ere miitꞌin me hamo e Tupana Tosaꞌyru pe.
28 Pyno eiwanetup kahato o uimienoi kape katupono tuut wyti aru mekewat eꞌat pe ti aru yne misyp koꞌi map haria ikuap taꞌyn Miitꞌin Ykeꞌet ehay hawyi teꞌeruwenoꞌẽ raꞌyn taꞌatusyp hawyi e.
29 Teꞌeruwenoꞌẽ wakuaria taꞌatuieineꞌen wuatꞌi eꞌat piat hap kape e maꞌato yt nakuaria i ti aru teꞌeruwenoꞌẽ hoꞌopot hap kape e.
30 Uito ti yt arepotꞌairo hin i uiwepyꞌa pyi uwe uwe miꞌapiheg wuaria enoi hap ete maꞌato yt nakuat i e Tupana pote Uito iꞌewyte yt nakuat i are wy maꞌato wakuat e Tupana pote Uito wakuat are te wy miꞌi hat pe e Iesui. Atunug yne uipoꞌoro hat mikyꞌesat ewy e.
31 Uiwewi neꞌi arenoi uiwewi uwe Uito hap ete pote heso kahato rakat areineꞌen.
32 Miꞌi pote toineꞌen wẽtup ok uwe Uito hap enoi hanuat. Miꞌi ti henoi hãpyk kahato uhetiat uwe sese Uito hap ete e.
33 Saꞌawyꞌi te wyti eweipoꞌoro ehemiitꞌin Iuwãu kape uwe Uito hap kuap hamo. Miꞌi hawyi toiꞌatuwesat pywo piat hãpyk taꞌyn uwe Uito hap ete.
34 Kat e Iuwãu uhetiat tohenoi uikuap ehepiat hamo ehehakyeraꞌat hat Uito hap are maꞌato kat e uhetiat tohenoi hap atikuap uipyꞌa pe yt Iuwãu kaipyi i arekuap uwe Uito hap e.
35 Taꞌi saꞌawyꞌi Iuwãu mienoi uhetiat ariãty ewy hẽtyhot yne e. Haꞌawyte ran eweikupteꞌen Iuwãu ehay upi ihay se kahato eweiꞌe saꞌawyꞌi.
36 Pyno Iuwãu mienoi kaipyi eweikuap saꞌawyꞌi uwe Uito hap maꞌato mesup poꞌog naꞌyn eweikuap katupono uiminug iwato hap kaipyi Uiꞌywot mikyꞌesat nug hap kaipyi eweikuap taꞌyn Uito Uiꞌywot mipoꞌoro hap Iuwãu mienoi ewy raꞌyn.
37 Iꞌewyte Uiꞌywot uhenoi raꞌyn maꞌato yt eweikuap i ihay. Katupono uipoꞌoro hat yt karãpe i eweiꞌakasa howa kape e.
38 Miꞌi pote yt kat i eipyꞌa pe Uiꞌywot mienoi katupono yt eweimohey i imipoꞌoro Uito e Iuteuria pe.
39 Eiwemuꞌe kahato Tupana miwan ete eipe -Miwan ni ahehakyeraꞌat kuap eweiꞌe eiwoꞌope maꞌato yne Tupana miwan uhetiat tohenoi e.
40 Pywo ti yt eweikuap i uhetiat miwan henoi kahato pykai ti eipe yt eweiwat teran i uhewowi eheineꞌen hap sese sat hamo.
41 Uito yt atikat i miitꞌin miat waku kahato En e hap.
42 Eipe worohoꞌokuap kahato. Atikuap taꞌyn yt kat i Tupana kyꞌe hap eipyꞌa pe e.
43 Ariot ti Uiꞌywot ehay pyi maꞌato yt eiwese i uhete maꞌato miitꞌin tuwehay pywiat neꞌi suut hat putꞌok e eipyꞌasetpe hawyi miꞌi ete eiwese raꞌyn e.
44 Kat pote yt karamuo i uimohey teran eipe. Eweikyꞌesat kahato miitꞌin miat waku kahato eipe iꞌatuꞌe hap maꞌato Tupana piat waku kahato eipe e hap yt eweikat i yt eweikuap i pote e.
45 -Yt eiwanetup teiꞌo uito areꞌe aru Uiꞌywot pe miꞌiria yt naku i nug haria are ehepiat hap katupono mekewat eꞌat pe aru Muisei imoherep Tupana pe -Yt naku i nug haria miꞌiria e aru ehetiat Tupana pe eiperia Muisei ahekyeraꞌat hat toineꞌen eweiꞌe pykai maꞌato yt eweimohey i Muisei miwan pote.
46 Muisei miwan eweimohey pote ti ren uimohey haria wo eweipyhuꞌat mesup katupono Muisei henoi kahato yian me uhetiat iwan me e Iesui.
47 Yt eweimohey i Muisei mienoi miwan me uhetiat pote aikotã aru uimohey eipe e Iesui Iuteuria akag koꞌi pe.
