Iuwãu 6:1-71
6 Mio tã toꞌe kahu hawyi toto raꞌyn Iesui yi Karireia hyemyiꞌa sakpo mekewat ihyemyiꞌa Tiperiati e hap het rakat sakpo.
2 Miꞌi hawyi hewatꞌypmo miitꞌin tuwat typyꞌi kahato katupono teꞌerahaꞌat raꞌyn imisepap woꞌomoehãite hap kape.
3 Miꞌi tote pyi Iesui ipotꞌam yityꞌok kape. Putꞌok e yityꞌok tote hawyi taꞌapyk itote topotmuꞌeria wywo.
4 Mekewat eꞌat turan porap yn naꞌyn putꞌok e mekewat ienuk koro hap eꞌat yt pya hin i raꞌyn.
5 Miꞌi hawyi yityꞌok tote pyi Iesui taꞌakasa miitꞌin typyꞌi kahato õꞌẽ haria kape. Miꞌi hawyi apo e topotmuꞌe Wiripi pe -Aikope pyi aru iwato miꞌu watipuẽti typyꞌi rakaria miꞌu wo e.
6 Mio tã e Wiripi iãꞌãg hap katupono miꞌi ikuap aikope pyi miꞌu toipuẽti kuap miitꞌin poi hamuat hap.
7 Miꞌi hawyi Wiripi tiwesat -Are paĩ iwato kahato kapiat ti som iꞌatumiꞌu saꞌup uhyt e. Toineꞌen aipo pe pote 200 motpap kapiat pykai som yt putꞌok e hin i iꞌatumiꞌu saꞌup nug hamo e Wiripi.
8 Miꞌi hawyi Simau Peteru ywyt Ãtere ipotmuꞌe toꞌe Iesui pe
9 -Meiũwat kurum po pe ti 5 a yn man tiriku Sereai e hap kawiat iꞌewyte typy pira hit yn Uhyt maꞌato yt putꞌok e hin i typyꞌi rakaria poi hamo e.
10 Miꞌi hawyi Iesui toꞌe topotmuꞌeria pe -Eweiꞌapyk to meimuẽ puo eweiꞌe ro miitꞌin me e. Miꞌi hawyi teꞌeraꞌapyk mopep hyp we mopep tok kahato itote pote. 5 miu ihainia itote teꞌeraꞌapyk.
11 Miꞌi hawyi Iesui tat man hawyi waku e Tupana pe hawyi toipatꞌok patꞌok topotmuꞌeria pe mekewat man toimowato kahato. Miꞌi hawyi ipotmuꞌeria tum miitꞌin sem me apyk haria pe. Miꞌi hawyi iꞌewyte pira hit typy rakat toipatꞌok patꞌok iꞌatumiꞌu wo.
12 Miꞌi hawyi teꞌerenuk kahato iꞌatuꞌok kahato. Miꞌi hawyi toꞌe Iesui temiitꞌin me -Eweikat ro iꞌatumiꞌu ieĩpyt uhytꞌiꞌin e. Yt naku i miꞌu watomosatek e.
13 Miꞌi hawyi taꞌatuwo 12 eꞌyrysakag me topyhuꞌat heĩpyt miitꞌin miꞌu ieĩpyt 5 man typy pira hit kaipyi.
14 Miꞌi pote Iesui minug wakuap kapiat akasa haria teꞌeroꞌe toꞌope -Pywo pe ti aimiekatup Miꞌi Miit iꞌatuꞌe. Miꞌi Miit ti Tupana Mipoꞌoro tehay moherep ahepiat hanuat iꞌatuꞌe.
15 Maꞌato iꞌatuwanetup hap Iesui tikuap taꞌyn topyꞌa pe -Uinug irane taꞌatuporekuatno miꞌu kyewi e tuwepe. Miꞌi tã neꞌi toikuap hawyi meremo toto raꞌyn iꞌatupyꞌasetpyi yityꞌok kape. Tuweran yn naꞌyn toto yt toikyꞌesat i tuwepag iꞌatupo pe iꞌatuporekuatno haype.
Ywyt Uato Turan Iesui Hewyry Yꞌy Tote
16 Wãtymꞌi hawyi ipotmuꞌeria tuwat raꞌyn ihyemyiꞌa kape.
17 Miꞌi hawyi tuwehytꞌok yara pe hawyi tuwat ysakpo teran tawa Kawanaum kape maꞌato yt uwe i Iesui iꞌatupyꞌasetpe.
18 Miꞌi turan meremo ywytu uato putꞌok e ihyemyiꞌa tote. Miꞌi hawyi ihy weꞌokmoĩ watoꞌin kahato.
19 Ihyemyiꞌa pyꞌasetpiat turan teꞌeraꞌakasa raꞌyn Iesui kape. Tuut raꞌyn iꞌatuupi yowa tote hewyry. Teꞌeraꞌakasa hawyi teꞌerokenꞌẽ kahato.
20 Iesui toꞌe iꞌatuepe. -Uito rat yt eweikenꞌẽ teiꞌo e.
21 Taꞌatuehay kuap hawyi ereke uhyt iꞌatuꞌe. Mio tã iꞌatuꞌe hawyi Iesui teke raꞌyn yara pe. Miꞌi hawyi putꞌok iꞌatuꞌe aikowo tuwat hap tote merep hap ewy Tupana inug.
Iesui Man Sese Toineꞌen
22 Heꞌihatꞌok pe ihyemyiꞌa sakpuaria imiꞌatoiat koꞌi tikat raꞌyn Iesui -Aikowo som toto Iesui iꞌatuꞌe. Gaꞌatpo ti wẽtup yara yn toineꞌen mesuwe. Miꞌi puo raꞌyn tuwat Iesui potmuꞌeria maꞌato Iesui yt toto i iꞌatuꞌe. Aikowo som pyno toto iꞌatuꞌe.
23 Miꞌi hawyi tõꞌẽ poꞌog yara puo aikope saꞌawyꞌi Iesui tiꞌatupoi man wo hap kape. Aikope waku e Tupana pe hap kape tõꞌẽ tõꞌẽ tawa Tiperiati kaipyi.
24 Maꞌato yt taꞌatupuẽti Iesui iꞌewyte yt taꞌatupuẽti i ipotmuꞌeria. Miꞌi pote tuwehytꞌok taꞌatueꞌyara koꞌi piat i raꞌyn hawyi tuwat ysakpo tawa Kawanaum kape ikat hamo.
25 Putꞌok iꞌatuꞌe ysakpo hawyi taꞌatupuẽti taꞌatumikat hawyi apo iꞌatuꞌe Iesui pe -Kat puo eriot meikowo urumuꞌe hat iꞌatuꞌe.
26 Maꞌato Iesui tiꞌatuwesat -Paĩ e atikuap kat hamo uikat eipe e. Eimoꞌok miꞌu wuat hap kyewi yn uikat eipe e. Maꞌato atunug uimisepap Tupana esaika hap upi uwe sese Uito hap moherep hamo hap upi yt eweikat hin i. Man atimowato kahato eimoꞌok hamo hap ikyewi yn eweikat.
27 Eweikat kahato wyti miꞌu eimeꞌen moꞌok hamuat neꞌi e maꞌato miꞌi ti nem rakatnuat neꞌi e. Maꞌato waku eweikat miꞌu sese wuatꞌi eꞌat piat eimoieineꞌen hamuat e. Miꞌi yn wyti Miitꞌin Ykeꞌet tum kuap ehepe. Pywo Miitꞌin Ykeꞌet tum kuap katupono iꞌywot atipy piat waku kahato miꞌi nug hamo e.
28 Miꞌi hawyi apo iꞌatuꞌe -Aikotã som pyno Tupana tikyꞌesat urutunug iꞌatuꞌe.
29 Miꞌi hawyi Iesui tiꞌatuwesat -Tupana tikyꞌesat kahato ti tomipoꞌoro mohey ehepiat hap e Iuteuria pe.
30 Mio tã e hawyi teꞌeroꞌe -Kat som pyno etunug irane iwato rakat Tupana minug ewywuat uruꞌakasa hamo ekuap hamo emohey hamo iꞌatuꞌe.
31 Saꞌawyꞌi ti aheꞌaseꞌiꞌin yahig note man iꞌatumiꞌu wo toineꞌen iꞌatuꞌe aikotã miwan tohenoi Esutu 16.15 pe -Man tutum iꞌatuepe atipy kaipyi iꞌatumiꞌu wo e miwan me iꞌatuꞌe.
32 Miꞌi hawyi Iesui tiꞌatuwesat -Mekewat man atipy kaipywiat yt Muisei miium iꞌatuepiat i maꞌato Uiꞌywot miium. Koran tutum neran wẽtup man ehepe e. Mio Uiꞌywot miium naꞌyn man sese atipy kaipywiat eimoieineꞌen wuatꞌi eꞌat piatnuat tutum naꞌyn ehepe e.
33 Tupana wat man tuut raꞌyn atipy kaipyi. Tutum neꞌen neran wuatꞌi miitꞌin moieineꞌen hamuat e.
34 Miꞌi pote teꞌeroꞌe tope -Urupoi ro pyno miꞌi man wo Uhyt wuatꞌi eꞌat pe iꞌatuꞌe.
35 Maꞌato Iesui tiꞌatuwesat -Miꞌi man ni Uito e. Uito rat miꞌu miitꞌin moieineꞌen hanuat e. Uwe uwe uhewowiat suut hat uimohey hanuat ti aru yt karãpe i hesyꞌat yt karãpe i teꞌyꞌutui e Iesui.
36 Haꞌawyte are ehepe -Eipe uhewowiat sehaꞌat haria maꞌato yt uimohey i eipe are e.
37 Uiꞌywot miium uhepiaria wyti aru uhewowi tõꞌẽ miitꞌin. Miꞌiria ti aru yt karamuo i raꞌyn atiꞌatuꞌaro uiꞌyatypepyi.
38 Katupono Uito ti ariot atipy kaipyi Uipoꞌoro hat mikyꞌesat yne nug hamo e.
39 Uipoꞌoro hat mikyꞌesat ahenoi ehepe katupono toikyꞌesat yt wẽtup ok i imiium howasat uiꞌyatypepywiat hap. Maꞌato toikyꞌesat mekewat ikahuro hap eꞌat pe turan atiꞌatuampeꞌokꞌam imiium uhepiat koꞌi iꞌatuieineꞌen pakup i hap kape e.
40 Miꞌi hap Uiꞌywot tikyꞌesat -Uwe uwe taꞌakasa Haꞌyru kape hawyi imohey miꞌi hat ti wuatꞌi eꞌat piat ieineꞌen hat topyhuꞌat e. Uwe uwe Haꞌyru mohey miꞌi haria ti aru Haꞌyru tiꞌatuenoꞌẽ iꞌatuꞌasyp hap kaipyi iꞌatuieineꞌen pakup i hamo e.
41 Mio tã e hawyi taꞌatueromopusu Iesui -Uito man atipy kaipywiat e pote.
42 Miꞌi haype teꞌeroꞌe toꞌope -Taꞌi watikuap kahato uwe en iꞌatuꞌe eꞌywot uwe ety hap uruikuap iꞌatuꞌe. Taꞌi Iuse saꞌyru ti en iꞌatuꞌe. Katuponoĩ atipy kaipywiat Uito ere iꞌatuꞌe.
43 Miꞌi hawyi Iesui tiꞌatuwesat -Waĩ uheromopusu teiꞌo eiwoꞌope e.
44 Uipoꞌoro hat Uiꞌywot sese yt ehekyi i uhewowi eipyꞌa pe pote yt eweikosap kuap i uhewowi e. Uwe uwe uhewowiat gosap haria ti aru atenoꞌẽ iꞌatuꞌasyp hap kaipyi ikahuro hap eꞌat pe are e.
45 Saꞌawyꞌi te wuat Tupana e hap moherep haria teꞌeroꞌe -Meiũran ti aru wuatꞌi puo Tupana tiꞌatumuꞌe miitꞌin iꞌatuꞌe miwan me e Iesui. Miꞌi pote areꞌe uwe uwe tuwanetup Uiꞌywot mienoi kape miꞌi hat ti aru tuut uhewowi e.
46 Yt uwe i ti mesuwat yi totiaria teꞌeraꞌakasa Uiꞌywot atipy piat kape e. Miꞌi rẽ wẽtup ok yn ni Tupana kapiat akasa hat. Miꞌi Miit ti Tupana kaipywiat suut hat pote are e.
47 Pywo pe areꞌe ehepe uwe uwe uimohey hat ti aru toineꞌen wuatꞌi eꞌat pe ieineꞌen hap toipuẽti raꞌyn e.
48 Man ewy kahato Uito are uwe uwe uimohey miꞌi hat ti uimimoieineꞌen wuat topyhuꞌat wuatꞌi eꞌat pe e Iesui.
49 Saꞌawyꞌi ehaꞌaseꞌiꞌin tuꞌu man yahig note maꞌato mio miꞌi haria topap yne raꞌyn.
50 Maꞌato ti mekewat atipy kaipywiat man wyti yt miꞌi man ewywuat i raꞌyn katupono uwe uwe iꞌu hat yt karamuo i raꞌyn ikuꞌuro sese e.
51 Uito ti atipy kaipywiat man miitꞌin moieineꞌen hamuat e. Uwe uwe miꞌi man iꞌu miꞌi hat ti aru toineꞌen wuatꞌi eꞌat pe e. Mekewat uimiium man wyti uipiit e. Atum aru uipiit miitꞌin moieineꞌen hamuat e Iesui.
52 Miꞌi hawyi Iuteuria tuꞌuka toꞌope sehay wo kat toꞌe sese Iesui hap ete -Aikotã aru pyno mekewat miit tum ahepe topiit aimiꞌu wo iꞌatuꞌe toꞌope.
53 Miꞌi pote Iesui toꞌe -Pywo pe ti ewetuꞌu Miitꞌin Ykeꞌet puꞌi iꞌewyte huu wo eiweꞌyꞌu pote eheineꞌen hap sese wuatꞌi eꞌat piatnuat eweipuẽti maꞌato yt ewetuꞌu i ipiit yt eiweꞌyꞌu i huu wo pote yt kat i eheineꞌen hap sese eweipuẽti e.
54 Uwe uwe uipuꞌi iꞌu uwe uwe uhuu wo teꞌyꞌu miꞌi haria yn ni aru wuatꞌi eꞌat piat ieineꞌen hap puẽti hanuaria wo teꞌeropyhuꞌat e.
55 Uipuꞌi ti miꞌu kahato e uhuu sapo hy kahato e.
56 Uwe uwe uipuꞌi uhuu u haria teꞌeropyhuꞌat uipyꞌa pe iꞌewyte areineꞌen iꞌatupyꞌa pe e.
57 Uiꞌywot uipoꞌoro hat toineꞌen tuwekaipyi iꞌewyte Uito areineꞌen ikaipyi. Miꞌi hap ewy uwe uinug tomiꞌu wo miꞌi hat toineꞌen wuatꞌi eꞌat pe uikaipyi e Iesui.
58 Uipuꞌi ti man atipy kaipywiat e. Saꞌawyꞌi te man ahaꞌaseꞌiꞌin tuꞌu mesuwat yt uimiium ewywuat i e katupono mekewat man yahig notiat u haria topap taꞌyn maꞌato ewetuꞌu mesuwat man uimiium neran ehepiat hawyi wuatꞌi eꞌat piat ieineꞌen hap eweipuẽti e.
59 Yne mekewat man etiat tohenoi turan toineꞌen Tupana motypot yat tawa Kawanaum piat pe.
60 Miꞌi pote Iesui potmuꞌeria iraniaꞌin teꞌeroꞌe toꞌope -Yt aimikyꞌesat ewy hin i aimuꞌe Iesui iꞌatuꞌe. Yt watimohey kuap i iꞌatuꞌe.
61 Miꞌi hawyi Iesui tikuap taꞌyn temiitꞌin ehay saꞌag tetiat hap tuwanetup hawe. Miꞌi haype toꞌe topotmuꞌeria pe -Pyno uimienoi ehepiat eimoꞌarotꞌi apo e.
62 Pyno kat eweiꞌe aru eweiꞌakasa Miitꞌin Ykeꞌet taꞌam iraꞌyn aikope toineꞌen saꞌawyꞌi wuat hap kapiat pote e.
63 Taꞌi Tupana Paꞌãu ete uhehay yt uipuꞌi ete i uhehay e. Uhehay Maꞌãu kaipywiat eimuꞌe hap. Miꞌi yn eimoieineꞌen hap wuatꞌi eꞌat piatnuat e.
64 Maꞌato tukupteꞌen eipyꞌasetpe yt uimohey i haria e. Katupono saꞌawyꞌi Iesui tikuap ti raꞌyn tukupteꞌen eipyꞌasetpe yt imohey i hanuaria. Toikuap taꞌyn temiit tomaꞌat hanuat hat.
65 Miꞌi haype toꞌe i -Yt uimohey yne i eipe aikotã areꞌe -Uiꞌywot yt ehekyi i uhewowi eipyꞌa pe pote yt eweikosap kuap i uhewowi e Iesui topotmuꞌeria ran me.
Iꞌatu Rakaria Iesui Atoiat Haria Wo Teꞌeropyhuꞌat
66 Mio tã e pote typyꞌi raꞌyn ipotmuꞌeria tuwat raꞌyn Iesui upi pyi taꞌatuꞌatoiat raꞌyn. Yt tuwat poꞌog neran i hupi.
67 Miꞌi hawyi toꞌe temiitꞌin sese pe 12 ok takaria pe -Eipe apo iꞌewyte raꞌyn uiꞌatoiat reran iraniaꞌin ewy e.
68 Maꞌato Simau Peteru tiwesat Iesui -Yt paĩ e. Yt uwe i raꞌyn ten eꞌewywuat uruporekuat e. En yn ni urumuꞌe kuap hat e. Emienoi yn ni urumoieineꞌen wuatꞌi eꞌat piat hamuat urukaꞌiwat e. Uruiꞌatoiat En hawyi ti ren uruiꞌatoiat raꞌyn sehay wuatꞌi eꞌat piat kuap hap e.
69 Koitywy uruimohey raꞌyn En uruporekuat nuat Tupana Mipoꞌoro Tupana sese Saꞌyru En e. Worokuap taꞌyn En Uhyt e. Uruikuap En naꞌyn urupyꞌa pe e Peteru Iesui pe.
70 Miꞌi hawyi Iesui toꞌe -Uimiꞌairo 12 ok takaria eipe maꞌato wẽtup ok eipyꞌasetpe ahiag ipyꞌa piat rakat e.
71 Iesui Iuta etiat tohenoi. Miꞌi ti Simau Ikariote saꞌyru. Toineꞌen 12 ok takaria pyꞌasetpe Iesui miꞌairo maꞌato meiũran hawyi Iesui maꞌat hanuat topyhuꞌat.
