Epereu 10:1-39
10 Waku kahato saꞌawyꞌi wuat Muisei miwan aiꞌywaniaria Epereu pusu kuap haria moweꞌeg hamo katupono tohenoi tomiwan me -Tuut aru Ahehakyeraꞌat hat e. Yne Muisei miwan ete aimuꞌe -Waku aru waku aru tuut wyti aru Tupana Mipoꞌoro uito ewywuat maꞌato poꞌog waku rakat e kahato maꞌato hãꞌãkap ewy ihay ahehakyeraꞌat hamuat ete. Aikotã aipaꞌãu aiꞌewy toineꞌen yi tote miꞌi hap ewy toimoherep Iesui aiꞌakag Muisei. Yianmiat miwan me tohenoi yne Iesui etiat aikotã wẽtup ok paꞌãu aat kape tuut heremo yt heremo kahato i wen maꞌato toꞌewy ipaꞌãu wywo hap ewy toimoherep Iesui yian mete ahaꞌaseꞌi Muisei miwan yt heremo kahato i rakat pe. Hãꞌãkap wuat Muisei henoi yne Iesui ieineꞌen hap ete ikuꞌuro hap ete iꞌewyte toineꞌen i guꞌuro pywiat hamuat hap ete. Saꞌawyꞌi ahaꞌaseꞌi Muisei tiꞌatuꞌuka kahato aihũria aikawiatno Iesui auka hap moherep hamo. Miꞌi ti imoherep kahato poꞌog wakuat uut hamuat ete. Katupono yne 12 ewaty pe taꞌatuꞌatuꞌuka taꞌatuehũria Tupana piat taꞌatumoewaku hap puẽti hamo wen maꞌato yt taꞌatupuẽti hin i. Maꞌato miꞌi hap nug hap kaipyi teꞌeruwanetup Tupana hũ sese kape taꞌatuehakyeraꞌat sese hamuat kape yian mete ipaꞌãu ewy tukupteꞌen taꞌatuhũria.
2 Aihũria Wewato ahup auka hap kaipyi yt putꞌok e i aipyꞌa piat aiwanetup hawiat saꞌag nakat monik hamo. Saꞌawyꞌi wahãꞌãg kahato putꞌok e hap ete maꞌato yt putꞌok e i Tupana piat aimohãpyk hamo. Saꞌawyꞌi tõꞌẽ tõꞌẽ miitꞌin Tupana motypot hamo -Heno aihũria iꞌatuꞌe paꞌi pe. Etiꞌauka ro aiminug saꞌag hep hamo iꞌatuꞌe. Katupono haty kahato aipyꞌa pe aiwanetup hawe aiminug saꞌag iꞌatuꞌe. Aiwemoti miꞌi hap koꞌi yt watiwaure kuap i miꞌi hap koꞌi iꞌatuꞌe paꞌi pe. Taꞌatuꞌauka wuatꞌi 12 ewaty pe. Taꞌatunug yne hãpyk taꞌatuhũ auka hap ete maꞌato yt naku i hap te topyhuꞌat rẽ iꞌatupyꞌa pe katupono aihũria suu yt putꞌok e i aipyꞌa piat aiwanetup hap koho hamo. Taꞌatunug kahato pykai haty te ahete. Miꞌi pote watunug anu i anu i ewy yt putꞌok e kuap i mohag wo sese pote. Putꞌok e pote yt taꞌatunug i raꞌyn. Maꞌato taꞌatunug anu i anu i pote tohenoi raꞌyn yt putꞌok e i hap.
3 Saꞌawyꞌi watunug yne 12 ewaty pe miꞌi hap ete watikuap taꞌyn yt naku i te aipyꞌa pe aiminug saꞌag hap Tupana pe watiꞌaparap toineꞌen ne. Miꞌi pote toineꞌen ne aiminug saꞌag aiwanetup hawe hawyi watuwemoti watunug naꞌyn yne anu hawyi.
4 Katupono aihũ Wewato ahup suu yt putꞌok e i aiminug saꞌag hep hamo. Topyhuꞌat rẽ aiminug saꞌag hep hamuat. Aihũria suu watum kahato pykai yt putꞌok e i Tupana wywuat waku hamo. Aihũ suu yt tomoweityk kuap i ahepiat iꞌaparap hap koꞌi.
5 Karãpe Aipotypot putꞌok e mesuwat yi tote turan -Uhetupana e yt etikyꞌesat i poꞌog miitꞌin tiꞌauka taꞌatuhũria e. Pyno koitywy waku raꞌyn atum uipiit Papai e. Uhuu yn waku mohag wo emowepiit hamo Papai e.
6 Worokuap kahato En Papai e. Iꞌatumiium koꞌi yt emowepiit hin i iꞌatuhũ wuk heiam notiat hap e. Katupono mekewat iꞌatuhũria suu iꞌatuminug saꞌag hep hamuat yt putꞌok e i emowepiit hamo e. Miꞌi pote uipiit atum epe Papai e.
7 Pyno koitywy ariot miitꞌin ehakyeraꞌat hamo eimikyꞌesat ewy Papai emikyꞌesat ewywuat nug hamo e. Aikotã Muisei toꞌe hap ewywuat atunug yne yne Papai e. Taꞌi Muisei ihay kahato yianme uhetiat tohenoi e. Iꞌewyte yne saꞌawyꞌi wuaria ehay moherep haria iꞌatuehay kahato uheineꞌen hap ete uhehay ete uimoherep haria saꞌawyꞌi wuaria e. Uheineꞌen hamuat hap ete yn iꞌatuehay uiꞌywãꞌĩ hap eꞌyian mete iꞌatuehay uhetiat Papai e. Miꞌi iꞌatuehay ewy yne yne atunug naꞌyn Papai emikyꞌesat ewy miitꞌin ehakyeraꞌat hamo Papai e Iesui saꞌawyꞌi te morekuat Tawi wepy hap miwan 40.6 pe.
8 Aikotã ereꞌe hap ewy areꞌe i raꞌyn Papai. -Yt atikyꞌesat i poꞌog eihũria eimiium koꞌi ereꞌe miitꞌin me saꞌawyꞌi e hap ewy Papai. Eimiꞌauka eimiwuk koꞌi yt atikyꞌesat i poꞌog yt uimowepiit kuap i pote ereꞌe Papai e. Eihũria suu eimiium koꞌi yt putꞌok e i uimowepiit hamo ereꞌe hap ewy. Eihũria suu yt putꞌok e i eiminug saꞌag hep hamo uiwanetup hawe ereꞌe. Hãpyk kahato eimiwuk pykai einapin uhepiat hap miwan miat ewy kahato pykai miwan me toꞌe hap ewy ewetunug pykai maꞌato yt atikyꞌesat i poꞌog eimiwuk koꞌi ereꞌe miitꞌin me e hap ewy saꞌawyꞌi Papai e. Waku wen maꞌato yt putꞌok e i eiminug saꞌag hap koꞌi hep hamo ereꞌe e.
9 Miꞌi eꞌe hap atikuap hawyi pyno areto Papai areꞌe epe saꞌawyꞌi. Uiꞌywot atum aru uipiit emowepiit hamo e. Areto are yi kape emikyꞌesat nug hamo e. Areto emowepiit hap nug hamo aru e Haꞌyru Tupana pe saꞌawyꞌi miwan me. Miꞌi pote mesup Tupana yt tikyꞌesat i aihũria suu katupono wẽtup suu yn waku mesup Haꞌyru suu yn waku e.
10 Miꞌi pote koitywy waku pe raꞌyn watoineꞌen Tupana ehamo. Imiewaku sese wo raꞌyn watopyhuꞌat aito katupono mekewat Tosaꞌyru piit ium hap kaipyi aimohãpyk hap toineꞌen. Tupana towaku hap ewy ainug. Aikaꞌiwat Aipotypot suu aat yi totiat hap kaipyi aimohãpyk hap toineꞌen mesup. Tupana tewaku hap ewy tutum ahepe. Haꞌyru haꞌup nug tosuu wo wẽtup mo yn. Yt kat i miꞌi rẽ katupono -Waku raꞌyn eipe e Tupana toran naꞌyn e.
11 Maꞌato nagnia hepaꞌi koꞌi yne iꞌatupotpap aihũria koꞌi wuk hap ete te. Yne eꞌat pe miꞌi tã taꞌatunug. Taꞌatuwuk tuereto aihũria wen maꞌato ahepiat iꞌaparap hap topyhuꞌat kahato te. Taꞌatunug hãpyk kahato Tupana e hap saꞌawyꞌi wuat ewy pykai yne eꞌat pykai yt putꞌok e i aimowaku hamo Tupana wanetup hawe.
12 Maꞌato Ahepaꞌi Akag Iesui wẽtup mo yn haꞌup nug yne raꞌyn wuatꞌi eꞌat piat ahepiat iꞌaparap hap hawyi -Miꞌi Miit Eihũ wo waku e Tupana. Ikuꞌuro miitꞌin apiheg hap u yne hamo ariaꞌyp posak ete e. Wẽtup mo topiit tutum Tupana pe ariaꞌyp posak ete hawyi taꞌaipok guꞌuro pyi hawyi -Woromotypot teran mesuwe Uhaꞌyru e. Eraꞌapyk to mesuwe uipo sese kai e Tupana. Uhũ sese En e Tosaꞌyru pe. Miꞌi Miit yn wyti waku mohag wo e Tupana ahepe mesup.
13 -Eraꞌapyk to mesuwe Uhaꞌyru uipo sese kai katupono woromotypot teran En aikope ereineꞌen Morekuat no hap e. Uhaꞌyru woronug aru En Wuatꞌi Ywania Porekuat no e yne yne ewanikaptia atiꞌatumohit kahato e. Pywo ti rat ewanikaptia okpe tote aru ereineꞌen Morekuat no wuatꞌi eꞌat pe Uhaꞌyru e. Epy ywytꞌokpype aru torannia ewanikaptia ahytmoi e. Pyno waku mesuwe eraꞌapyk Uhaꞌyru e. Waku ehekatup mesuwe katupono atunug yne aru uiꞌe hap ok eꞌe hap oktan e Tupana Iesui pe saꞌawyꞌi.
14 Saꞌawyꞌi watomohey hawyi aimohãpyk kahato Iesui suu wo iꞌewyte mesup te aimohãpyk yne eꞌat Tupana Saꞌyru suu wo yne eꞌat poꞌog saꞌawyꞌi wuat kai. Waku wahẽtup yne eꞌat huu wywo aikoho hap aimowaku hamuat. Miꞌi watunug mote meiũran itag nakaria wo watoineꞌen imohey hap ete. Tupana miewaku koꞌi wo watopyhuꞌat mesuwarote. Tupana Saꞌyru ewywuat watopyhuꞌat hawyi yt kat i saꞌag aikai. Miꞌi hawyi tosuu wo aimotag kuap kahato.
15 Aikotã Tupana Paꞌãu toꞌe aipyꞌa pe hap ewy -Uhaꞌyru suu yn eimohãpyk kuap mehin mana e kahato ahepuo. Aikotã saꞌawyꞌi toꞌe hap ewy mio tã te toꞌe mesup Tupana Paꞌãu aipyꞌa pyi raꞌyn -Waku pe ereineꞌen uiwywo e ahepe.
16 Aikotã Tupana Paꞌãu toꞌe saꞌawyꞌi miwan me hap ewy -Meiũran aru uhehay atimoheg kahato Uhaꞌyru mohey haria pya pe e. Miꞌi pote waku eweĩꞌẽ uhowowi atunug aru uiꞌe hap ewy e. Mekewat eꞌat pe aru eweikyꞌesat uiꞌe hap pote uhehay eiam koꞌi kahato eweikupteꞌen eipe e. Pywo ti rat uiꞌe hap atiwan aru eiwanetup hawe e. Uiꞌe hap ewy atiwan yne eiwanetup hap ete e. Eweikyꞌesat uiꞌe hap pote atipytꞌatnug eipyꞌa uiꞌe hamo hawyi yt pya hin i einapin uhepiat hap eikai e. Miꞌi hawyi eweikuap yne eipyꞌa pyi uhehay e. Uhehay eiam mo eweipyhuꞌat e. Waku eweĩꞌẽ pote ahytmoi eipyꞌa pe uiwanetup hap ewywuat e Tupana Paꞌãu ahepe miwan me saꞌawyꞌi e hap ewy mesup te toꞌe pakup i ahepe.
17 Miꞌi hawyi ehepiat iꞌaparap hap atiwaure yne e Tupana Paꞌãu ahepe mekewat Ieremia miwan 31.33 pe.
18 Pywo ti rat eiminug saꞌag uhetiat yt kat i raꞌyn Uhaꞌyru mohey haria eipe pote e ahepe mesup. Yt kat i raꞌyn topyhuꞌat uiwanetup hawe eiminug yt naku i koꞌi e. Atiwaure yne yne raꞌyn e Tupana Paꞌãu ahepe. Miꞌi tupono koran yt kat hamo i raꞌyn eihũria eweiꞌauka eiꞌaparap hap saꞌup mo katupono waku raꞌyn uiwanetup hawe eipe e Tupana ahepe tosuu hum hat mohey haria pe.
19 Miꞌi tupono koitywy yt watokenꞌẽ i Tupana kapiat ahehatꞌat hamo ahehay hamo. Taꞌi uiwyriaꞌin koitywy yt watokenꞌẽ hin i raꞌyn Tupana eiam kapiat ahehatꞌat hamo. Iesui suu aipo pe raꞌyn pote aipit pitꞌok yne hamo aipyꞌa koho yne hamo pote -Waku raꞌyn meiẽwat teke ahowawi Papai e Iesui ahepiat pe Toꞌywot pe. Miꞌi pote waku wateke Tupana eiam sese pe yt kat i aimokenꞌẽ hap wywo.
20 Koitywy toineꞌen muap Tupana kapiat wuatꞌi eꞌat piat aheineꞌen sese hamuat. Koitywy ereke ro meiũpe e yn naꞌyn ahepe. Waku raꞌyn koitywy eiwehytꞌok uhaꞌyruꞌin eipe uhakiꞌytꞌin eipe pote e ahepe mesup. Saꞌawyꞌi sokpe iꞌanam nakat kawiat eipyhyp uhowowi maꞌato mesup hiotꞌe raꞌyn okenꞌypy e Tupana. Miꞌi pote waku yne raꞌyn eiperia eiwehytꞌok uhowowi Uhaꞌyru mohey haria eipe pote e. Mekewat sokpe iꞌanam hiotꞌe hap Uhaꞌyru puꞌi hiotꞌe hap iãꞌãkap kahato e. Miꞌi puo toĩ muap uhowowi mesup e Tupana ahepe.
21 Koitywy waku raꞌyn eiwehytꞌok uhowowi katupono Uhaꞌyru Ehepaꞌi Koro wo raꞌyn toineꞌen uimotypot hap yat sese pe e Tupana ahepe.
22 Pyno toꞌiro Tupana kape uiwyriaꞌin. Waku watipun ahehay aheso hap koꞌi wateke Tupana wywuat piat hamo. Waku yt kat i aipyꞌa piat aheso hap. Miꞌi hawyi yt kat i aimowemoti hap wywo wateke. Toꞌiro pyno Tupana ewowi. Waku watipen aiwanetup hap aipyꞌa piat Iesui suu wo. Waku Iesui aipyꞌa sei hap Tupana tunug suu wo wateke. Waku yt kat i aiwanetup hap saꞌag aimoti hap wywo i waku wateke. Waku watuwei kahato mekewat yꞌy wakuat sese wuatꞌi eꞌat piat wat pe. Miꞌi hawyi waku wateke aipyꞌa sei hap wywo aikoho hap mywo aipiit toran koho hap mywo yn waku wateke Tupana ewowi uiwyriaꞌin.
23 -Uhaꞌyru eweimohey pote worohoꞌoehakyeraꞌat e Tupana. Pyno Tupana tunug toꞌe hap ewy yt heso kuap i Tupana pote. Koitywy waku watoꞌe -Woromohey kahato ti rat En Iesui watoꞌe waku haty wo. Waku miꞌi wahenoi wuatꞌi miitꞌin muo -Iesui Uimimohey kahato watoꞌe. Yt naku i watokenꞌẽ neꞌi -Iesui yn muap atipy kapiat aiꞌe iraniaꞌin tok piat hamo. Katupono saꞌawyꞌi toꞌe Tupana -Eweimoherep iraniaꞌin ne Uhaꞌyru mohey hap hawyi worohoꞌoehakyeraꞌat eipe e. Mio tã e hap watoꞌe pote yt aimaꞌat kuap i iraniaꞌin. Miꞌi pote waku watopyhuꞌat iꞌewywuatno. Waku watunug aiꞌe hap ewy tope wy.
24 Iꞌewyte waku watikyꞌe iraniaꞌin Iesui mohey haria. Waku watiꞌatupowyro aiwyriaꞌin imohey haria. Waku watoꞌopowyro wẽtup yat piaria ewy. Waku watoꞌonapin aiwyriaꞌin -Toꞌiro watoꞌokyꞌe watoꞌe aiminug wakuap mywo. Waku ahegyiꞌat hap kaipyi watiꞌatuekyi iraniaꞌin Iesui mohey haria wo.
25 Yt naku i watoꞌoꞌatoiat atoiat neꞌi aiwaꞌatunug hap totepyi karãpe watuwaꞌatunug turan. Yt naku i watoꞌe -Yt uipap i mesup Tupana ehay etiat uiwemuꞌe hamo watoꞌe aiwoꞌope. Karãpe Aipotypot mohey haria teꞌeruwaꞌatunug miꞌi pote waku watiꞌatuwyꞌinug waku watuwat iꞌatuupi. Toineꞌen aipyꞌasetpe wẽtup ok wẽtup ok aiwaꞌatunug hap kape -U paĩ U an e haria yt uipap i kahato aiwaꞌatunug hap kape e hat pote pyno waku miꞌi e haria watiꞌatunapin -Tupana tikyꞌesat kahato ereto hap uhyt mana katupono Aikaꞌiwat tuut irane hawyi waku ereineꞌen uruwywo huut turan waku watoꞌe yt ipap i e haria pe. Miꞌi watunug aiwoꞌomuꞌe hap tote pote poꞌog watomoesaika moesaika imohey hap ete. Waku watuwaꞌatunug poꞌog poꞌog Iesui uut hap watikuap yt pya i raꞌyn hawyi.
26 Maꞌato karãpe iraniaꞌin yt Iesui mohey i hat watoineꞌen hawyi watikuap pywuat sehay yne Iesui etiat neꞌi hawyi -Yt atikyꞌesat i watoꞌe aipyꞌa pe miꞌi pote yt kat i muap ahepe atipy kapiat maꞌato aiꞌapiheg hap kapiat muap upi yn watuwat. Miꞌi hawyi heremo kahato aiminug saꞌag Tupana pe yt kat i Iesui suu ahepiat aipiit aipiit iꞌaparap hap koho hap pote. Yt kat i aiꞌaparap hap moweityk hamuat. Watipun naꞌyn Iesui muap sese raꞌyn watipun hawyi yne eꞌat pe raꞌyn aimoma hap topyhuꞌat mesuwe aimoma neꞌi. Aimoꞌakagꞌaia hap yn naꞌyn topyhuꞌat. Aria kape areto uiminug saꞌag upi aiꞌe hap yn naꞌyn aiwanetup hawe. -Tupana ewanikaptia wuk hap kape yn naꞌyn aru areto aiꞌe hap yn naꞌyn aiwanetup hawe pote. Kat pote yt kat i watipuẽti wẽtup muap Tupana kape watipun naꞌyn Iesui hawyi.
27 Maꞌato watikat aihũ suu upi neꞌi Tupana kapiat muap pote yt putꞌok watoꞌe i atipy kape yt naku i ahei hamo katupono -Uhaꞌyru suu yn putꞌok e eikoho hamo e Tupana. Maꞌato -Yt atikyꞌesat i epuꞌap watoꞌe Tupana pe hawyi yt naku i ti Esaꞌyru suu watoꞌe hap ewy watoꞌe Tupana pe. Miꞌi hawyi yt kat i ahehakyeraꞌat hap mio tã watoꞌe neꞌi pote. Miꞌi hawyi yt kat i topyhuꞌat muap Tupana kape watikat pykai.
28 Saꞌawyꞌi ahepaꞌi koro Muisei ainapin kahato kat som waku kat som yt naku i watunug hap ete. Ainapin haty wo niatpo rakat ainapin kahato saꞌawyꞌi. Miꞌi ainapin hap yt watunug i hawyi aiꞌauka hap topyhuꞌat saꞌawyꞌi. Typy ok miit taꞌakasa aiminug saꞌag yt ainapin Muisei piat hap ewy i hawyi miꞌiria henoi morekuaria pe hawyi aiꞌauka hap topyhuꞌat yt ahehakyꞌeꞌi hin i aiꞌauka hap eꞌat pe.
29 Maꞌato Tosaꞌyru auka haria poꞌog Tupana tiꞌatumosoꞌopot mekewat Muisei waĩꞌe hap pun haria kai -Yt atikyꞌesat i Esaꞌyru suu uimoewaku hamo e haria yt atikyꞌesat i Esaꞌyru suu uhekyeraꞌat e haria yt kat hamo i Esaꞌyru suu e haria. Miꞌiria ewywuaria Tupana tiꞌatuꞌapiheg typy sakpo kahato Tosaꞌyru pun haria Tosaꞌyru akit neꞌi teran haria. Karãpe Tupana Paꞌãu -Pywo ti Iesui Uhaꞌyru Sese e ahepe maꞌato -Heso watoꞌe Tupana Paꞌãu pe miꞌi hawyi poꞌog aiꞌapiheg hap topyhuꞌat Muisei piat aiꞌapiheg hap kai. Karãpe -Yt egyiꞌat i kahato watoꞌe Tupana Paꞌãu pywo rakat pe. Eso En watoꞌe Tupana Paꞌãu pe hawyi -Yt atikyꞌesat i egyiꞌat hap e haria wo watopyhuꞌat. Tupana eremopusu kahato hewaku hap etiat haria wo watopyhuꞌat. Miꞌi tã haria aito pote Tupana aiꞌapiheg wuaria wo watukupteꞌen poꞌog poꞌog Muisei piat aiꞌapiheg hap kai.
30 Saꞌawyꞌi mio tã e Tupana -Ateruwepyk ti aru Uhaꞌyru etiat mikyryꞌi haria yne yne e. Iꞌatuminug saꞌag upi atiꞌatuꞌapiheg aru e. Meiũran aru ahenoi uwe waku uwe yt naku i hap Uhaꞌyru etiat haria wuatꞌi ehamo e. Uwe hemiit sese uwe yt hap ahenoi e Tupana mesup ahepe. Tupana yt heso kuap hin i pote pywo yn tohenoi sio pywo watomohey sio yt e hap.
31 Pyno waku watokenꞌẽ kahato Tupana piat aiꞌapiheg hap pupi katupono yt naku i kahato watopyhuꞌat Tupana ewanikap wuatꞌi eꞌat piatno. Yt naku i watopyhuꞌat Tupana miꞌapiheg wo neꞌi. Waku watokenꞌẽ aiꞌapiheg hap pupi.
32 Watomohey saꞌawyꞌi Iesui hawyi ahehakyeraꞌat hap topyhuꞌat kahato ahete. Miꞌi hap eꞌat pe ahewyry waku pe kahato heremo yne Tupana aiwanetup hawe. Aiwepiit hap yn ahete. Miꞌi hawyi miitꞌin teꞌeruwekyryꞌi kahato ahete e. Miꞌi hawyi ahatyꞌi hatyꞌi kahato miꞌiria. Miꞌi hap wahoꞌopot kahato.
33 Miꞌi hawyi aimohit wuatꞌi ehamo teꞌerahaꞌat kahato ahowawi. Iraniaꞌin yt aiwesat i. Iraniaꞌin yt teꞌeruwehum i poꞌog ahowawi Iesui waku watoꞌe pote. Aimoꞌarot kahato taꞌatuminug saꞌag kaipyi aimaꞌat hamo. Karãpe iraniaꞌin Iesui mohey haria hoꞌopot miitꞌin mikyryꞌi hap ete mekewat eꞌat pe watuwat iꞌatuwywo hoꞌopot iꞌatuwywuat hamo. Miꞌi hawyi wahoꞌopot aiwoꞌoꞌewy ewy itote ahatek hap eꞌat pe. Yt naku i taꞌatunug ahete hap eꞌat pe.
34 Miꞌi pote mekewat eꞌat pe aipyhyp woꞌopyhyp hawe wanikaptia po pe watoineꞌen. Miꞌi tote aiꞌahyk ahyk saꞌag neꞌi Iesui mohey haria aito pote. Maꞌato waĩꞌiꞌatuꞌe pykai yt watoiat hin i Iesui. Iesui mohey haria iraniaꞌin yt aiꞌatoiat hin i hoꞌopot hap eꞌat pe maꞌato -Waku urumosatyꞌi satyꞌi wy watoꞌe morekuaria pe katupono waku uruhoꞌopot wy uruwyriaꞌin nywo uruto Iesui mohey haria wy pote waku watoꞌe suraraꞌin me. Miꞌi hawyi wẽtup miit ewy wahoꞌopot hap topyhuꞌat katupono aiwoꞌokyꞌe kahato hap itote pote. -Pyno waku watuwat aito wy iꞌatuwywo wahoꞌopot hamo waku watoꞌe aiwanikaptia pe. Miꞌi hawyi suraraꞌin tiꞌatupohari yne yne ahekat koꞌi ete Iesui mohey haria aito pote wen maꞌato miꞌi turan yt kat watoꞌe hin i maꞌato Tupana kape watuwehum kahato imimowepiit koꞌi wuatꞌi eꞌat piaria aito pote. -Pywo ti rat ahekareꞌen sese atipy pe yn toineꞌen mio watoꞌe aiwoꞌope mekewat eꞌat saꞌag me ahekat yne taꞌatupohari turan hap eꞌat pe. Itote ti wakuat poꞌog ahekareꞌen watoꞌe aiwoꞌope aipohari yne ete pykai.
35 Taꞌi mekewat eꞌat pe wahoꞌopot kahato watomohey Iesui hawyi. Iꞌatumikyryꞌi hamo watukupteꞌen. Mesup eꞌat pe poꞌog waku saꞌawyꞌi wuat kai toineꞌen ahete pote waku watuweꞌeg wo watukupteꞌen uiwyriaꞌin katupono yt naku i mekewat ahatek hap eꞌat pe watoiat neꞌi Aimimohey Iesui. Waku watimoheg kahato Iesui mohey hap aikuꞌuro hap kape. Miꞌi watunug mote saꞌup iwato kahato aiwatnuat topyhuꞌat wuatꞌi eꞌat pe aru maꞌato watoiat neꞌi imohey hap pote yt kat i watipuẽti mekewat wahoꞌopot i hoꞌopot saꞌawyꞌi wuat hap saꞌup e.
36 Waku typy sakpo watomohey motꞌi Iesui aiwepiit hap eꞌat iꞌewyte aiꞌarot hap eꞌat. Yt naku i aipohep imohey hap ete. Yt naku i watunug tunug waure neꞌi. Waku potꞌi watomohey hawyi -Atum aru uiꞌe hap ewy e Tupana ahepe. Mio tã e hap yn waku wahekatup. Yt naku i wahekatup hawyi yt hum i te turan watoiat neꞌi raꞌyn -Atum aru e hap e. Maꞌato wahekatup poꞌog poꞌog hawyi putꞌok e Aikaꞌiwat atipy kaipyi haꞌup mywo hawyi yt watuwemoti hin i. Pywo pywo yn watoꞌe aimimotypot hap eꞌat pe. Waku kahato watoineꞌen itote.
37 Pyno kurin wahoꞌopot poꞌog naꞌyn hawyi merep tuut Ahehakyeraꞌat hat Iesui tomimoewaku koꞌi moehãite hamo wuatꞌi eꞌat pe.
38 Imohey haria sese imohey hap ete ti raꞌyn Tupana timopokuap. Maꞌato Tupana toꞌe saꞌawyꞌi -Uwe uwe ipohep neꞌi uimohey hap ete pyi miꞌi hat yt uimowepiit hatno i topyhuꞌat e Tupana tehay moherep hat Apakuki miwan 2.34 pe.
39 Maꞌato aito yt miꞌi haria yt ewywuat i katupono yt wataꞌaipok hin i Iesui mohey hap kaipyi. Tupana kapiat wat imohey wywuat haria wo aito. Yt wataꞌaipok teran i ahowasat aria kapiatnuat aiꞌapiheg hap kape. Aito ti mekewat Iesui mohey aikuꞌuro hap kapiat haria. Miꞌi tã imohey haria aito ahehakyeraꞌat wuatꞌi eꞌat piat hap kapiat haria yn aito paĩ an uhytꞌiꞌin manaꞌin areꞌe.
