Epereu 11:1-40
11 Karãpe watomohey sese Tupana hawyi tuut kahato aimiẽtup Tupana kaipyi. -Atikuap kahato uipyꞌa pe tuut wyti aru uimiẽtup Tupana po pyi watoꞌe imohey hap wywo aiwanetup hawe yt toineꞌen i te aipo pe pykai yt heremo i te maꞌato watomohey kahato toineꞌen naꞌyn hap hawyi heremo rakatno topyhuꞌat aipyꞌa pe hap ewy. Watomohey te yt heremo i te pykai aimimohey. -Toineꞌen naꞌyn mesup watoꞌe yt heremo i te pykai hawyi tuwemoherep ahepiat imohey hap oktan Tupana po pyi hawyi heremo aimimohey oktan.
2 Saꞌawyꞌi wuat tomohey haria sese pe yn Tupana toꞌe -Uimowepiit kahato haria eipe katupono uimohey haria sese eipe e.
3 Saꞌawyꞌi Tupana tuwanetup -Atunug aru waikiru waty aat e topyꞌa pe. Miꞌi hawyi tutunug toꞌe hap ewy tomohey ewy. Toiꞌatumoewyry aat waikiru waty yi tomohey hamo hawyi ikahu kahato tukupteꞌen toꞌe hap ewy. Mekewat eꞌat pe yt kat i aito yt wataꞌakasa hin i inug hap pykai watomohey Tupana tunug yne yne hap. Watomohey hawyi watikuap Wuatꞌi Saꞌawyꞌi wuat Nug Hat Tupana. Watikuap Tupana ehay kawiat yne yne topyhuꞌat mesuwe atipy pe.
4 Saꞌawyꞌi wuat sese Atãu saꞌyru Apeu tum tomiium imohey wywo Tupana pe -Woromohey kahato En Tupana e hamo. Iꞌewyte ieykeꞌet Kaĩ tum Tupana pe tomiium wen maꞌato Tupana yt tuwehum kahato i Kaĩ miium ete katupono Kaĩ yt timohey kahato -Atikyꞌesat ehũ suu emiium e hap hawyi tutum tomiium tomikoi koꞌi Tupana pe pote. Maꞌato iꞌywyt pe -En ni uimimoewaku ereineꞌen e Tupana Apeu pe. Ehũ emiwuk poꞌog waku Kaĩ wat kai katupono uimohey en mote e. Mesup te -Waku kahato Apeu miium e uimohey kahato hat Apeu pote e ahepe. Ikuꞌuro raꞌyn pykai Apeu ihay aimuꞌe te Tupana mohey hap yn aimohãpyk hap e ahepe. Apeu suu ihay te hap ewy ahowawi yi pyi ihay te.
5 Saꞌawyꞌi ahaꞌaseꞌi Inoki yt ikuꞌuro hin i te turan Tupana tioto atipy kape tomohey hap ikawiat iwato pote. Ipiit mesuwiat wywo te Tupana tiꞌykesat raꞌyn atipy kape. Tupana tioto raꞌyn yt uwe i ipuẽti Tupana tipohari raꞌyn mesuwat ete tomohey kahato hawyi. Yt ikuꞌuro hin i mesuwarote maꞌato toto yian mete miꞌi tã e miwan me -Uimowepiit kahato hat ti mehin Inoki e Tupana.
6 Maꞌato watikuap taꞌyn yt watomohey i Tupana pote yt karãpe i watimowepiit kuap. Maꞌato watikat Tupana imohey hap mywo miꞌi hawyi watipuẽti Tupana maꞌato yt watomohey i hawyi yt karamuo i putꞌok watoꞌe ipuẽti hamo. Miꞌi hawyi yt toꞌe kuap i ahepe -Eriot ro uhowowi e hap yt toꞌe kuap i yt tomohey i rakat pe.
7 Nimo Tupana toꞌe ahaꞌaseꞌi Nuꞌe pe -Tuut aru yꞌy wato mesuwat yi wuatꞌi moma hamo e. Miꞌi pote ahenoi epe yian mete iꞌaman kahato aat kaꞌap hap etiat e. Waku pe etunug eheꞌyara wato yꞌy wato owakai uiꞌe ewy e. Waku etunug yara iwatoꞌin nakat ehehakyeraꞌat hamuat e Tupana Nuꞌe pe. Pyno yt kat i te iꞌaman pykai tutunug yara wato. Nuꞌe timohey Tupana e hap hawyi tutunug iꞌe hap ewy toꞌe pote. Yt heremo i te yꞌy wato pykai tutunug yara wato aat kaꞌap hap ewy. Miꞌi hawyi tokenꞌẽ kahato mekewat iꞌaman wato uut hap pupi pote Tupana e hap ewy tutunug yara wato kahato. Toꞌyat piaria teharyꞌi tosaꞌyruꞌin tomimoehapyꞌaptia ehakyeraꞌat hamo tutunug. Maꞌato iraniaꞌin yi totiaria yt imohey hin i -Tuut irane yꞌy wato aiꞌakit hamo e Nuꞌe hap maꞌato teꞌeruwekyryꞌi kyryꞌi aat kaꞌap iminug ete imohey ete. Maꞌato Nuꞌe timohey kahato te Tupana -Atunug aru e hap. Miꞌi pote tutunug yara wato. Tepiat imohey hap mywo toimoherep mesuwarotiaria yt imohey i haria pe. Miꞌi hawyi Tupana toꞌe -Uimohey hap kaipywiat uimimohãpyk ti Nuꞌe e miꞌi pote uipyꞌa pe hãpyk kahato Nuꞌe topyhuꞌat e Tupana mesup te ahepe.
8 Iꞌewyte nimo te Tupana toꞌe ahaꞌaseꞌi pot Aparãu me -Atikyꞌesat ereto wẽtup yi kape uimimoherep eꞌyi kape yt emikuap i yi kape e uimiium epiat wuat eꞌyi kape e iꞌewyte yne yne emepytꞌin emiariruꞌin watnuat e yi kape e. Miꞌi hawyi Aparãu timohey Tupana e hap hawyi toto iꞌe hap ewy yt taꞌakasa i aikope toto hap kapiat pykai.
9 Miꞌi hawyi ikohyewyry kahato mekewat -Yi atum aru e Tupana piat hap tote. -Mesuwat yi aru Tupana tum uhepe e Aparãu topyꞌa pe Tupana yt tum i te turan. Sewyry aat haype maꞌato toꞌyat aparap koꞌi te toineꞌen sokpe kawiat pe. Miꞌi tote ikohyewyry tosaꞌyru Isaki wywo iꞌewyte temiariruꞌin wywo. -Mesuwat yi aru yne eiwatno e Aparãu iꞌatuepe tomepytꞌin me katupono Tupana tum aru mesuwat yi yne ahepe e Aparãu imohey hap wywo. Uhaꞌyruꞌin e atikat kahato ahetawa sese yt mesuwarotiat tawa ewywuat hin i e. Iheg kahato rakat tawa atikat e. Yt miitꞌin minug ewywuat i maꞌato Tupana minug tomikuap ewywuat atikat e temiariruꞌin me. Atimohey kahato Tupana tum aru ahepe mesuwat yi yt araꞌakasa i te pykai e.
10 -Tupana atikyꞌesat kahato ahetawa yt karãpe i ikahuro rakat e. Atikyꞌesat ahetawa iheg sese rakat yt karãpe i ipotꞌi rakat e. Miꞌi pote toikat kahato mesuwarotiat tetawa sese Tupana minug yt karãpe i ikahuro rakat toikat. -Atikyꞌesat kahato ahetama uheꞌyi wuatꞌi eꞌat piat ieineꞌen hanuat eminug araꞌakasa hap e Tupana pe aseꞌi Aparãu Tupana mohey kahato hap wywo.
11 Saꞌawyꞌi iharyꞌi mana Sara yt imepyt nug i toineꞌen ipotꞌi kahato rakat. Tuwei wuatꞌi eꞌat piat ewy toineꞌen hawyi yt imepyt i rakat sese topyhuꞌat. Miꞌi turan Tupana toꞌe Sara pe -9 ewaty hawyi aru emepyt raꞌyn Mana e. Miꞌi pote -Pywo ti aru an woromohey En e. Toimohey pote ti Tupana tum tesaika hap Mana Sara pe hawyi hupiꞌa rakatno topyhuꞌat Aparãu eharyꞌi. Miꞌi hawyi Tupana tum naꞌyn tesaika hap Sara pe hawyi tuwemoherep Aparãu saꞌyru Isaki. Miꞌi hawyi Sara toꞌe -Are an Tupana tunug naꞌyn koitywy ahepe toꞌe saꞌawyꞌi wuat hap ewy e. Yt heso hin i ahepe e.
12 Aparãu iporo sese kahato rakat yt imepytꞌi kahato rakat i maꞌato tomohey hap kaipyi Aparãu tuwesaꞌyru nug naꞌyn. Koitywy Aparãu emiariruꞌin typyꞌi tukupteꞌen. Haipepiaria iꞌatu kahato waikiru koꞌi iꞌatu hap ewy aikotã yꞌy wato hyẽpe etiat yi kyt iꞌatu hap ewy Aparãu emiariru sem. Yt uwe i imorania kuap Aparãu emiariruꞌin toimohey yn mote.
13 Taꞌi saꞌawyꞌi wuaria Aseꞌi Apeu Nuꞌe Aparãu Inoki hary Sara ti Tupana mohey potꞌi kahato haria. Taꞌatumohey kahato taꞌatukuꞌuro hap kape. Yt heremo i te -Atunug aru e Tupana piat hap turan pykai taꞌatumohey te. Taꞌatukuꞌuro hap turan teꞌeraꞌakasa hap ewy taꞌatuwanetup hawe Tupana tunug aru e hap. Yt tutunug i te toꞌe hap ewywuat pykai taꞌatumohey kahato taꞌatupyꞌa pe. Taꞌi uruto yt mesuwarotiaria imohey haria ewy hin i iꞌatuꞌe. Wẽtup ywania ewywuaria aito iꞌatuꞌe. Ihamanaꞌi rakaria ewywuaria uruto mesuwe iꞌatuꞌe. Wẽtup yi kat haria ewywuaria uruto iꞌatuꞌe.
14 Miꞌi tã haria imoherep kahato mesuwe ahepe taꞌatuehay wo -Uruikat kahato wẽtup setama taꞌatumoherep taꞌatuehay wo. Uruetawa sese yt kat i mesuwe iꞌatuꞌe ahepe.
15 Yt teꞌeraꞌaipok teran hin i teꞌeruwanetup hawe saꞌawyꞌi wuat taꞌatueꞌyi kape neꞌi yt iꞌatuehatꞌat hin i saꞌawyꞌi wuat taꞌatueꞌyi kyewi. Maꞌato taꞌatukyꞌesat saꞌawyꞌi wuat taꞌatueꞌyi pote meiũran teꞌeraꞌaipok maꞌato yt hin i.
16 Miꞌiria tikat kahato wẽtup tawa poꞌog poꞌog waku saꞌawyꞌi wuat mesuwiat kawiat rakat katupono atipy piat e tawa taꞌatukat. Koitywy Tupana yt tuwemoti hin i toꞌe -Uito ti rat Aparãu Etupana toꞌe hamo. Miꞌi pote iꞌatuetawa atipy piat waku piat raꞌyn toineꞌen Tupana minug pakup yn naꞌyn itote. Ikahu pe raꞌyn tutunug iꞌatuewa kai taꞌatumohey pote.
17 Saꞌawyꞌi Aparãu Tupana hãꞌãg kahato sio toimohey sio yt hap kuap hamo -Atikyꞌesat etiꞌauka esaꞌyru wẽtup ok takat Isaki uimotypot hamo e Tupana Aparãu pe. Maꞌato yian mete Aparãu me -Esaꞌyru Isaki kawiat ti aru atunug yne esaipepiaria e. Miꞌi pykai Aparãu toto tosaꞌyru wẽtup ok takat auka hamo Tupana e hap ewy.
18 Nimo Tupana toꞌe Aparãu me -Esaꞌyru Isaki kaipyi aru esaipepiaria ahyt tuwẽtem yne e. Miꞌi e hap Aparãu tikuap pykai totioto Isaki iꞌauka hamo Tupana e hap ewy.
19 Pyno atiꞌauka rakirẽ Tupana timoieineꞌen i guꞌuro pyi toꞌe hap mywo toto. Maꞌato iꞌauka irane turan Tupana toꞌe -Aparãu yt etiꞌauka teiꞌo Isaki. Waku raꞌyn koitywy worokuap sese hap atikuap taꞌyn mesup uimohey kahato epiat hap e. Miꞌi hawyi tutum Aparãu me Isaki i raꞌyn Tupana tum. Miꞌi hawyi Isaki topyhuꞌat Iesui iãꞌãkap ewy katupono Isaki aikotã tuwẽtem i guꞌuro pywiat hap ewy topyhuꞌat. Koitywy atikuap uimohey hap e Aparãu me Tupana.
20 Saꞌawyꞌi Isaki tiꞌatupoityro tosaꞌyruꞌin tokuꞌuro hap eꞌyian mete. Mio tã e Iako Esaꞌu pe -Tupana timotypyꞌi kahato aru eimiariru emiariruꞌin aikotã Tupana toꞌe uhepe hap ewy tutunug aru e hap kaipyi watikuap taꞌyn Isaki tomohey kahato te Tupana e hap tokuꞌuro hap ewywuat eꞌat pe.
21 Saꞌawyꞌi ahaꞌaseꞌi Isaki saꞌyru Iako tiꞌatupoityro te temiariruꞌin tokuꞌuro turan -Atimohey kahato Tupana e hap uhepiat -Atunug aru esaꞌyruꞌin saipepiaria waikiru sem koꞌi iꞌatu miꞌi pote eterut ro uhowowi uhemiariruꞌin e Iako tosaꞌyru Iuse pe katupono atiꞌatupoityro teran miꞌiria e. Miꞌi hawyi -Tupana e waku etunug no uhemiariru koꞌi typyꞌi kahato rakaria wo eꞌe hap ewy e Iako tuwemopoꞌog myi ariaꞌyp topoꞌyha etiat pyi tokuꞌuro sese hamo. Miꞌi tehay wywo toimoherep tepiat Tupana mohey kahato hap.
22 Miꞌi hawyi ahaꞌaseꞌi Iuse ikuꞌuro hap owakai toꞌe toꞌywania Isareu ywania pe -Meiũran Tupana tunug aru toꞌe hap ewy e. Meiũran aru mesuwat yi Esitu pyi eiwenoꞌẽ Tupana e hap ewy e. Tupana tiporeraꞌat aru eipe wanikaptia po pyi hawyi mekewat tawa Tupana piat -Atum aru e hap kape eweiwat e. Uikuꞌuro raꞌyn mesup maꞌato atikyꞌesat karãpe eweiwat turan ewetioto eiwywo uikag koꞌi eweiwat Tupana piat -Atum aru e hap kapiat turan e. Miꞌi toꞌe hap kaipyi watikuap Iuse tomohey kahato Tupana atunug aru e hap tomohey hap.
23 Saꞌawyꞌi ahaꞌaseꞌi Muisei iꞌewyte Tupana mohey kahato hat. Muisei ywãꞌĩ ikahu kahato tuwemoherep hawyi -Ikahu kahato aimepyt iꞌatuꞌe iꞌywotꞌin. Miꞌi turan wanikaptia morekuat Warãu tama Esitu piat toꞌe Tupana ywania pe -Eweiꞌatuꞌuka ro yne eimepyt ihainia iꞌatuꞌywaĩꞌĩ hap eꞌat pe e. Yt naku i kahato eipe typyꞌi kahato poꞌog iꞌatu aru eiperia uruꞌywania kai pote e. Maꞌato Muisei ty iꞌywot yt tiꞌauka hin i yt teꞌerokenꞌẽ hin i morekuat Esitu piat pupi hawyi taꞌatuerewyi Muisei ywãꞌĩ -Tupana iꞌatuꞌe etiehakyeraꞌat urumepyt morekuat suraraꞌin po pyi hawyi meiũran iꞌatu kahato aiꞌywania iꞌatuꞌe hap pyi watikuap Tupana e hap -Atunug aru emepytꞌin iꞌatu yi kyt ẽpe etiat iꞌatu hap ewy e hap mohey haria Muisei ywotꞌin hap.
24 Miꞌi hawyi meiũran Muisei moto hap turan hawyi morekuat sakiꞌyt tipuẽti hawyi totat tomepyt no. Itag hawyi waku ereineꞌen uimepyt no sese e uruꞌywania wo e Muisei pe morekuat sakiꞌyt.
25 Maꞌato Muisei toꞌe -Mamai e yt atikyꞌesat i uiꞌywania sese atoiat e katupono miꞌiria Tupana miꞌairo ywania e. Taꞌi Uiꞌywania hoꞌopot kahato haria mesuwe tukupteꞌen e. Miꞌi pote areꞌairo ahoꞌopot iꞌatuwywo hamo e. Yne eheko yt Tupana mowepiit hap hin i e. Miꞌi atoiat yne e. Aimowepiit kahato porap i aheko Mamai maꞌato poꞌog waku ahoꞌopot Tupana emiitꞌin nywo mesuwarote hawyi watoineꞌen Tupana wywo wuatꞌi eꞌat pe e. Aimowepiit mesuwiat yt naku i nug hap etiat eiꞌewywuat yt atikyꞌesat mamai e Muisei Morekuat Akag sakiꞌyt pe -Woronug en morekuat no uhaipepiat e hat pe.
26 Atikuap taꞌyn ehekat uiatno yne aru hap ikahu rakat iꞌewyte yne Esituꞌin ekat emepyt no pote uiatno yne epowatꞌyp hap atikuap taꞌyn pykai atikyꞌesat poꞌog areineꞌen Tupana ywania wo katupono atimohey miꞌiria ywania kaipyi aru Tupana Miꞌairo tuwemoherep Wuatꞌi Ywania Porekuat Nuat mamai e Muisei morekuat koro Warãu sakiꞌyt toty hit pe. Miꞌi hap mohey hap upi uiꞌywania hoꞌopot mamai e. Iꞌewyte uito ahoꞌopot aru iꞌatuwywuat hamo atiꞌairo e. Meiũran aru Tupana mipoityro areineꞌen e. Miꞌi eꞌat pe Tupana tum iwato kahato poꞌog iwato yne yne mesuwat yi Esitu ekat hap kai tutum uhepe Mamai e. Miꞌi pote miꞌi Tupana miium atikyꞌesat poꞌog e.
27 Taꞌi mamai atimohey kahato areto meiũpepyi hawyi araꞌakasa aru Tupana sese mekewat yt heremo rakat i e. Atikuap eꞌywot uhaꞌaseꞌi Warãu Esitu piat morekuat aru ipyꞌahak kahato uhete yt uiꞌoksatꞌi i hin i maꞌato yt arekenꞌẽ i Warãu pupi e. Uiꞌauka pote uiꞌauka maꞌato areto raꞌyn Tupana mohey haria upi katupono araꞌakasa teran Tupana sese yt heremo rakat i e Muisei toty Esitu piat pe. Miꞌi hawyi totiat yne yi Esitu ekat iwato kahato hawyi tomimohey upi toto.
28 Saꞌawyꞌi Tupana toꞌe Muisei pe -Atipoꞌoro aru uhesurara atipy kaipyi Esituꞌin apiheg hamo e. Miꞌi eꞌat pe atiꞌatumoma Esituꞌin eꞌykeꞌetꞌin torannia e. Miꞌi pote waku eihũria suu wo etiꞌatusapei sapei eiꞌyat okenꞌypy ete e. Miꞌi ewetunug mote aru yt atimoma i eheykeꞌetꞌin e. Miꞌi hawyi Muisei tunug Tupana e hap ewy toimohey kahato pote. Toimohey kahato Tupana e hap hawyi toꞌe toꞌywania pe -Tuut aru ykeꞌet yne moma hanuat e. Miꞌi pote waku watopyhuꞌat aihũ suu aiꞌyat ete Tupana mohey haria aito hap kuap hamo e. Miꞌi watunug mote tokosap aheykeꞌetꞌin sakpo hawyi yt toiꞌatumoma aheykeꞌetꞌin surara akag atipy kaipywiat e Muisei tomohey hap wywo. Miꞌi hawyi taꞌatunug suu yne yat okenꞌypy ete hawyi yt wẽtup ok i ikuꞌuro Tupana mohey piaria eꞌykeꞌetꞌin maꞌato yi Esitu eꞌykeꞌetꞌin topap yne itote.
29 Miꞌi rẽ tuwat toꞌywania wywo ihyemyiꞌa wato kape yꞌy hup e hap kape. Miꞌi hawyi Tupana toꞌe iꞌatuepe -Atunug ni aru ehepe muap wato yꞌy wato sakpo e yꞌy toꞌoran muo yi heg upi ehewyry hamo e. Miꞌi hawyi taꞌatumohey hawyi yꞌy wato sakpuat muap upi raꞌyn tuwat yi Esitu esuraraꞌin koꞌi pupi yꞌy hy teke muap upi. Miꞌi hawyi wanikaptia tiꞌatumohan naꞌyn ysakpo. Miꞌi hawyi wanikaptia hãꞌãg naꞌyn maꞌato miꞌiria topap yne yꞌy pe yꞌy wato miꞌakit koꞌi wo tukupteꞌen.
30 Meiũran Tupana ywania putꞌok iꞌatuꞌe tawa Ieriko tote. Mekewat tawa wato apypueri wo ipyhyp hap toineꞌen iꞌanam nakat ywaiti kahato rakat wanikaptia pupiat. Miꞌi tawa eweiꞌapypueri 7 wo hawyi aru taꞌat raꞌyn ipyhyp hap e Tupana. Yne nu wato koꞌi hewo hewo e. Miꞌi hawyi Tupana e hap taꞌatumohey hawyi taꞌatunug iꞌe hap ewy. Miꞌi hawyi hewo hewo ipyhyp hap imohey hap kaipyi pote.
31 Maꞌato wẽtup haryporia weweneru hat yt ikuꞌuro itote mana Hape e hap katupono yian mete miꞌi imohey Tupana e hap -Atimoma hamuat meiũwat tawa Ieriko e hap katupono yian mete typy ok tuwat suraraꞌin Iuteuria wat iꞌatuetawa epiok hamo. Miꞌiria pe -Eiwehytꞌok to mimiꞌin e iꞌatuepe mekewat haryporia. Miꞌi hawyi toiꞌatuerowyi toꞌyat pe iꞌatuꞌuka teran haria pupi. Toimohey pote toimoherep muap tetawa pyi. Mekewat haryporia yn imohey. Miꞌi pote iraniaꞌin topap maꞌato Mana Hape yt ikuꞌuro hin i toimohey iꞌatuꞌe hap pote. Yt naku i nug hat Hape pykai toimohey hawyi Tupana miehakyeraꞌat topyhuꞌat.
32 Taꞌi ahenoi teran mekewat saꞌawyꞌi wuaria imohey haria etiat maꞌato iꞌatu kahato miꞌiria pote yt ahenoi kuap i. Iwan hamo yt uipotputꞌokꞌe i typyꞌi kahato tupono. Ahenoi teran mekewat surara Kiteãu piat Tupana mohey hap etiat iꞌewyte mekewat surara akag Parake piat imohey hap etiat ahenoi teran iꞌewyte mekewat hesaika rakat Sãsau piat imohey hap etiat ahenoi teran wy. Iꞌewyte mekewat surara akag Iete piat Tupana mohey hap ahenoi teran iꞌewyte ahenoi teran aiporekuat saꞌawyꞌi wuat Tawi piat Tupana imohey hap maꞌato yt uipohepap i neꞌi are. Iꞌewyte Tupana tunug aru e hap moherep hat Samueu piat imohey hap ahenoi teran iꞌewyte yne saꞌawyꞌi wuaria aiꞌywaniaria piat Tupana ehay moherep haria etiat ahenoi teran maꞌato yt uipotputꞌokꞌe i henoi yne hamo mesuwat uimiwan me.
33 Tupana mohey hap kaipyi teꞌeropyhuꞌat iꞌatuesaika kahato wanikap ywania moma hamo iraniaꞌin moperupꞌi hamo. Taꞌatuwanikaptia porekuat no tukupteꞌen Tupana mohey hap wywo. Yt naku i nug hap taꞌatumoma kahato hawyi wakuap nug haria raꞌyn tukupteꞌen taꞌatumohey hawyi. Morekuaria yt nakuaria i taꞌatusopo neꞌi Tupana mohey hap wywo. Taꞌatumohey Tupana e hap hawyi topyhuꞌat iꞌatupo pe iꞌe hap oktan. Karãpe wanikaptia hytmoĩ Tupana ehay moherep hat Tanieu awyato tok pe iꞌu hamo miꞌi hap eꞌat pe Tupana tiꞌatuwẽhik awyatoria hawyi yt taꞌatuꞌauka kuap i Tupana mohey hat.
34 Iꞌewyte taꞌatuwuk teran aria pe imohey haria maꞌato yt satꞌe i aria iꞌatuete katupono Tupana tiꞌatuehakyeraꞌat aria pe tukupteꞌen motꞌi pykai tomohey hap upi. Iꞌewyte Iraniaꞌin tuꞌuka suraraꞌin ete turan wanikaptia ekyseꞌyp yt tiꞌauka kuap i Tupana mohey haria pote. Tupana tiꞌatuekawiatno kahato tomohey haria yt iꞌatuesaika hin i turan taꞌatumohey hawyi Tupana tiꞌatumoesaika kahato. Karãpe tuꞌuka surara wanikaptia wywo turan toiꞌatumoesaika kahato tomohey haria suraraꞌin koꞌi. Miꞌi hawyi teꞌeropyhuꞌat surara saꞌag wuꞌuka sepap haria ewy. Miꞌi hawyi wanikaptia ikohyeput neꞌi topap tet pupi.
35 Saꞌawyꞌi wuat haryporia wẽtup ok wẽtup mepyt Tupana tihep guꞌuro pyi manaꞌin tomohey hap upi. Saꞌawyꞌi mekewat yt Tupana mohey i haria teꞌeroꞌe imohey haria pe -Ewetoiat Tupana mohey hap pote yt uruiꞌatuꞌuka i eipe yt uruiꞌatumosoꞌopot i eipe iꞌatuꞌe wen maꞌato -Yt rat iꞌatuꞌe yt uruiꞌatoiat i yt sake i raꞌyn Tupana iꞌatuꞌe. Miꞌi hawyi taꞌatuꞌatuꞌuka turan maꞌato teꞌeroꞌe -Pywo ti rat Tupana urumoieineꞌen aru iꞌatuꞌe. Mesuwat eꞌat pe Tupana mimotypot koꞌi watopyhuꞌat iꞌatuꞌe.
36 Iraniaꞌin Tupana mohey haria miitꞌin mikyryꞌi kahato haria wo teꞌeropyhuꞌat Tupana mohey hap yt pun haria i pote. Wuatꞌi ehamo taꞌatuꞌahyk ahyk -Eweipun no Tupana mohey hap iꞌatuꞌe maꞌato -Yt karãpe i uruipun imohey hap iꞌatuꞌe. Taꞌatuhãꞌãg kahato raꞌyn mekewat imohey hap moma hamuat maꞌato -Yt iꞌatuꞌe. Iraniaꞌin Tupana mohey haria miitꞌin mipak pak wo teꞌeropyhuꞌat. Iraniaꞌin imohey haria miitꞌin miꞌahyk ahyk wo miitꞌin mituk tuk wo miitꞌin miꞌauka wo teꞌeropyhuꞌat. Iraniaꞌin ituktuk iꞌatupiit ete iraniaꞌin ikohyewyry haity iheg nakat ete iraniaꞌin taꞌatupyhik iheg me iꞌypyryp we kahato maꞌato yt taꞌatuꞌatoiat hin i imohey hap.
37 Iraniaꞌin kape nu wo mak mak iꞌatuꞌe imohey haria kape hawyi topap taꞌyn. Iraniaꞌin topap hepama taꞌatuꞌoktek kyse hãi kurup takat wywo imohey hap atoiat hap kyewi maꞌato -Yt iꞌatuꞌe. Iraniaꞌin wyti -Etoiat imohey hap pote ti aru urutum iwato kareꞌen ehepe iꞌatuꞌe maꞌato -Yt iꞌatuꞌe hawyi iraniaꞌin taꞌatuꞌuka kyseꞌyp mo. Iraniaꞌin imohey haria kyseꞌyp mo taꞌatuꞌokpak maꞌato miꞌi pykai -Yt uruoꞌatoiat i aheTupana iꞌatuꞌe. Iraniaꞌin imohey haria yt iꞌatuꞌyat hin i. Iraniaꞌin imohey haria yt kat i iꞌatuꞌyat ikohyewyry kowoꞌi kowoꞌi iꞌatuesokpe saꞌag miat pe kawiat hesyꞌat rakaria tukupteꞌen. Miitꞌin mimosoꞌopot kahato koꞌi miitꞌin mikyryꞌi hap koꞌi. Miitꞌin tiꞌatumosoꞌopot kahato wo tukupteꞌen mesuwarote pykai yt taꞌatuwaure hin i taꞌatuepiat Tupana mohey hap.
38 Iꞌatuehamanaꞌi neꞌi yahig note tukupteꞌen. Gaꞌapy puo tukupteꞌen. Yihot pe iꞌatuꞌyat ariaꞌyp kaꞌa pe tukupteꞌen. Iꞌatuꞌyat piat kaꞌa koꞌi yi kaꞌa koꞌi. -Miꞌiria uimohey haria kahato e Tupana poꞌog waku miꞌiria eikai e mesuwarotiaria pe. Pyno atiporenoꞌẽ miꞌiria eipyꞌasetpyi e. Ehewaku hap yt putꞌok e i miꞌiria uimohey haria kupteꞌen eipyꞌasetpiat hamo e mesuwarotiaria pe. Waku kahato uimohey haria e. Yt atikyꞌesat miꞌiria poꞌog eipyꞌasetpe pote atiꞌatumoꞌẽ eipo pyi e yt imohey i haria pe.
39 -Uimohey kahato haria miꞌiria e Tupana typyꞌi sok miitꞌin sem ehamo. Maꞌato miꞌi pykai yt taꞌatupuẽti hin i mesuwarote taꞌatupoityro Tupana kaipywiat taꞌatumowepiit hap maꞌato taꞌatumohey te -Yt heremo i te wen maꞌato Tupana mipoityro wo urutopyhuꞌat wuatꞌi eꞌat piat Tupana e hap ewy iꞌatuꞌe. Taꞌatukuꞌuro hap turan taꞌatumohey i te hap wywo topap -Meiũran aru tukupteꞌen iꞌatu kahato Aparãu mimohey saipepiaria Tupana e hap ewy iꞌatuꞌe. Maꞌato yt teꞌeraꞌakasa hin i te Tupana ehay miꞌiria maꞌato taꞌatumohey kahato te miitꞌin miat taꞌatuꞌauka hap kape. Yt teꞌeraꞌakasa i te Iesui putꞌok e hap iꞌewyte yt teꞌeraꞌakasa i te aito aheineꞌen hap pykai. Yt teꞌeraꞌakasa i te aito imohey haria sem pykai maꞌato taꞌatumohey te topap hap kape yt heremo i pykai.
40 -Pyno iꞌatu kahato uimohey haria aru ehaipepiaria e Tupana tomohey yianmiaria pe. Pyno mesup watopyhuꞌat miꞌiria mimuꞌeria katupono miꞌiria ewywuat watomohey. Pyno watomohey yne hawyi wẽtup piit ewy watopyhuꞌat hawyi -Waku raꞌyn e aru Tupana. Toran naꞌyn. Atunug yne raꞌyn uiꞌe hap ewywuat pote mesup waku raꞌyn miitꞌin sem naꞌyn waikiru koꞌi ewywuat yi kyt koꞌi ewywuat uimohey haria sok iꞌatu kahato hap ewywuat tukupteꞌen uimiehakyeraꞌat koꞌi wuatꞌi ywania hap ewywuat mesup uimohey haria tukupteꞌen mesup e aru. Miꞌi pote atunug naꞌyn yne uiꞌe hap ewywuat e aru Tupana hawyi waku maꞌato yt uwe i aito Iesui mohey haria pote yt tutunug yne i te toꞌe hap ewywuat e.
