Epereu 12:1-29
12 Aikotã watehaꞌat seput haria kape hap ewy aheꞌyian miaria Tupana mohey haria teꞌerahaꞌat ahowawi atipy kaipyi aikotã som watopyhuꞌat Tupana mohey hap ete hap kape teꞌerahaꞌat. Iꞌatu kahato miꞌiria ahowawiat sehaꞌat haria. Atipy kape tuwat raꞌyn aheꞌyian miaria saꞌawyꞌi wuaria Tupana mohey sese haria sehaꞌat ahowawiat haria. Taꞌi ipotyi rakat yrysakag aiꞌakag etiat wywo pote yt aihyha hin i aikohyeput turan. Aiminug saꞌag yrysakag howapy kahato aiꞌok pe tote hap ewy aiwanetup saꞌag hap ipotyi hap ewy. Aiꞌakit hamuat wateput turanuat hap ewy maꞌato yt kat i ipotyi hap pote wateput kuap aihyha kahato aiminug saꞌag watipun hawyi. Miꞌi pote waku watiꞌokhytpun aiminug yt naku i nug hap koꞌi. Miꞌi rẽ waku watomohey Tupana haty wo yne aipyꞌa pe. Miꞌi watunug mote seput haria ikohyeput haty wo rakaria ewy watopyhuꞌat. Maꞌato ahepiat aiꞌaparap kahato imohey hap etiat pote aikotã ipotyi hap aiꞌaparap hap ewy. Aikotã seput hat teput hap ete yt waure i hatek pykai ipy sero pykai hap ewy waku watomohey -Putꞌok are aru paĩ an waku watoꞌe hap yn aiwanetup hap. Waku watomohey potꞌi yt kat i iwaure wo wuat neꞌi hap wywo aiwanetup hawiat hap wywo.
2 Aikotã seput haria teꞌerahaꞌat popuo taꞌatueput hap etiat -Putꞌok are iꞌatuꞌe hamuat hap kape yn hap ewy waku watehaꞌat aiwanetup hawe -Putꞌok are aru Iesui yatype aiꞌe hap kape yn katupono Iesui topyhuꞌat seput haria akag ewy katupono toimohey Tupana poꞌog torannia kai. Uiwyriaꞌin waku Iesui piat Tupana mohey hap ewy waku watomohey Tupana are. Iesui ti aimoehãite kuap kahato Tupana mohey hap ete. Haꞌawytepyi watomohey Iesui hawyi aiwanetup hap Iesui yn topyhuꞌat miꞌi hap ewy waku watomohey te Iesui putꞌok watoꞌe iꞌyatypiat hap eꞌat kape. Aikotã seput haria taꞌatusaꞌawynug hawyi te ikahuro hap kape teꞌeruwanetup hap ewy Iesui toineꞌen mesuwiat turan seput hat ewy topyhuꞌat. Putꞌok e Tupana etiat hap kape yn iha ariaꞌyp posak kape yn iha Tupana mikyꞌesat nug hap kape yn iha. Miꞌi hap yn imowepiit hap. Miꞌi hawyi tutuꞌu aiꞌapiheg hap ariaꞌyp posak ete. Yt toikyꞌesat hin i miitꞌin mikyryꞌi hap pykai. Toikuap kahato tomohit hap maꞌato yt tuwemoti hin i ariaꞌyp posak totiat toineꞌen saꞌag hap miitꞌin ehaꞌat hap pupi. Tokuꞌuro hawyi taꞌapyk Tupana po sese kai aikope Tupana piat topainug hap tote. Tokuꞌuro hap no aikawiatno hap kape yn toto toineꞌen mesuwe turan. Tupana mikyꞌesat nug hap yn imowepiit hap mesuwarote topyhuꞌat tohoꞌopot hap eꞌat turan. Iesui seput hat akag ewy toineꞌen meiũpe turan.
3 Waku watuwanetup kahato Iesui ieineꞌen hap kape. Waku watunug iꞌewy yne. Saꞌawyꞌi yt naku i nug haria mikyryꞌi hap tohoꞌopot kahato maꞌato yt ipohep hin i imohey hap ete Iesui. Waku iminug ewy wahãꞌãg. Karapeĩ yt naku i nug haria ahatyꞌi hatyꞌi kahato imohey pote miꞌi pote yt naku i watoiat neꞌi imohey hap aikotã watoiat aheput hap aipiit sero hawyi hap ewy. Yt naku i watihep imohey hap aipyꞌa piat.
4 Iesui tikuap kahato yt naku i nug hap. Yne tosuu toipun yt naku i hap moma hamo. Waku miꞌi ewy watopyhuꞌat aiꞌauka pote waku ahuu okpun pykai yt watoiat i imohey hap. Waku wahãꞌãg Iesui ewy hoꞌopot hap ete yt naku i hap koꞌi akit hamuat.
5 Saꞌawyꞌi Tupana ainapin kahato wahoꞌopot hamuat hap ete miwan me -Uhaꞌyruꞌin uhakiꞌytꞌin e eipe uimepytꞌin pote worohoꞌoꞌapiheg tuereto eiminug saꞌag koꞌi poꞌypyi e. Pywo yt eweipoepyk neꞌi teiꞌo uhete Eiꞌywot uito pote e. Yt eweikupteꞌen neiꞌo eiperupꞌi rakaria e. -Pywo kahato uruꞌapiheg waku eweiꞌe worohoꞌoꞌapiheg hap eꞌat pe. Worohoꞌokyꞌe pote worohoꞌonapin eiꞌapiheg hap wywo. Yt atikyꞌesat i eheha yi kape worohoꞌoꞌapiheg hawyi katupono eimowepiit hamuat worohoꞌoꞌapiheg e Tupana saꞌawyꞌi miwan me. Yt naku i watiwaure mesuwat iꞌe ahepiat hap.
6 -Uhaꞌyruꞌin uhakiꞌytꞌin e uimikyꞌeria kahato ti eipe uimohey haria ti eipe pote waĩ neiꞌo areꞌe tuereto ehepe e Tupana ahepe. Aikotã aikotã eiꞌywot ewy areineꞌen miꞌi tupono worohoꞌoꞌapiheg tuereto e. Uiatno eweikupteꞌen wuatꞌi eꞌat pe worohoꞌoꞌahyk eimoweꞌeg hamo e. Eiwehytꞌok uhaꞌyruꞌin uhakiꞌytꞌin are aru ehepe miꞌi pote worohoꞌoꞌapiheg tuereto eiminug saꞌag poꞌypyi Eiꞌywot Uito pote e Tupana saꞌawyꞌi.
7 Pyno karãpe Tupana aiꞌapiheg sese hap waku watuꞌu yne surara ewy. Yt naku i watipoepyk katupono aiꞌapiheg hap kaipyi watikuap Tupana saꞌyruꞌin sakiꞌytꞌin sese wuaria wo aito hap. Katupono yne Tupana saꞌyruꞌin sakiꞌytꞌin iminapin koꞌi wo watukupteꞌen. Aikotã aiꞌywotꞌin ainapin aiꞌapiheg hap wywo hap ewy koitywy Tupana ainapin aiꞌapiheg hap wywo.
8 Maꞌato aito Tupana saꞌyruꞌin sakiꞌytꞌin pote aiꞌapiheg aimoweꞌeg hamo. Miꞌi tã Aiꞌywot tunug yne imohey haria ete maꞌato yt karãpe i aiꞌapiheg hap topyhuꞌat Tupana kaipyi pote yt iꞌywot i rakaria ewy watukupteꞌen yt kat i aiꞌapiheg hap pote yt Tupana sakiꞌytꞌin Tupana saꞌyruꞌin i aito.
9 Saꞌawyꞌi mesuwarotiaria aiꞌywotꞌin aipopetek aimoweꞌeg hamo. Miꞌi hawyi iꞌatumotypot haria wo watopyhuꞌat poꞌog saꞌawyꞌi wuat kai. Miꞌi pote karãpe Aiꞌywot Atipy piat aiꞌapiheg miꞌi hawyi waku imotypot haria wo watukupteꞌen. Waku imikyꞌesat nug haria wo watopyhuꞌat aiꞌapiheg hawyi. Katupono Tupana ainug tomepytꞌin no Topaꞌãu wo.
10 Aiꞌywot aity mesuwarotiat aipopetek kahato aimotag hap eꞌat pe turan taꞌatumotypot hap kyewi taꞌatumikuap wakuap hap oktan aihire te yn. Maꞌato Tupana aiꞌapiheg wẽtup wanetup hap mywo toikyꞌesat ahehãite aimoewaku hap aimotag hamuat wuatꞌi eꞌat piat. Toikyꞌesat aito waku rakaria wo tewaku hap ewy ainug neran haype. Tewaku hap ewy ainug neran hãpyk wuatꞌi eꞌat piat teko hãpyk takat ewy ainug toikyꞌesat aito toꞌewy hap aikyꞌe haype aimowepiit teran haype.
11 Karãpe Tupana ainapin hamo aiꞌapiheg turan yt he hin i maꞌato haty kahato yt aimowehum kuap i yt aimowepiit i aiꞌapiheg turan. Meiũran maꞌato aru tokosap haty hap hawyi ti satꞌe kahato ahete hewaku hap. Haꞌyruꞌin hakiꞌytꞌin hãpyk kahato rakaria wo watopyhuꞌat. Tupana tikyꞌesat aimoehãite tomohey hap etiat hap tomikyꞌesat etiat hap.
Uiwyriaꞌin yt naku i aiperup Tupana potpap nug hap ete. Waku aipo hesaika ipotpap nug hap ete. Waku aipy hesaika ipotpap ereto hamuat hap ete. Toikyꞌesat aito toꞌypia aikotã hewo kahato rakat ewywuat tomowepiit haria wo.
12 Pyno waku watuwemoesaika Tupana esaika hap wywo ipotpap hap nug hamo are. Waku watuwemoesaika Tupana esaika hap wywo aipy ihay sytpok hamo ahewyry wuatꞌi tapyiꞌa muꞌe hamo.
13 Saꞌawyꞌi yt hãpyk i ahewyry maꞌato mesup ti hãpyk taꞌyn. Aheko saꞌag yt naku i nug hap aipy pik hap ewy waku watunug aipuꞌap ikahu rakat ewy aipy powyro hamo. Muap ewy waku watuwanetup Tupana kape aipy pikꞌe hap mog hamo. Miꞌi hawyi waku ahewyry iwywo o. Waku aipuꞌap yt iꞌanam hin i rakat ewy miꞌi hawyi yt wataꞌat kuap i. Aipy haty rakat yt hewyry kuap i muap iꞌanam nakat upi. Ahewyry itote hawyi wataꞌat merep iꞌanam kahato pote. Ahewyry raꞌyn poꞌog hawyi merep aipy iꞌahuu kahato. Yt karãpe i aipy waku. Muap iherep upi yn waku ahewyry hãpyk takat muap upi pote. Miꞌi hawyi aipy ihãite kuap. Miꞌi hap ewy aito waku wahewyry Tupana puꞌap upi maꞌato yt pote yt karãpe i ahehãite maꞌato ipy pik rakaria ewy yn wahewyry. Waku watoiat muap saꞌag saꞌawyꞌi wuat aiminug yt naku i hap iꞌaparap aparap hap aiwanetup saꞌag koꞌi hap.
14 Uiwyriaꞌin waku watikat aat kaꞌap aiwoꞌowese torannia wywuat hamuat. Iesui suu aimohãpyk kuap aikoho kahato hawyi ainug Tupana ewaku hap ewywuat hamo. Maꞌato yt kat i aimowaku hap Tupana wuat hap ahete pote yt karãpe i aru watopyhuꞌat Tupana akasa hamo. Pywo ti rat yt Tupana yt ewy i watoineꞌen pote yt Karamuo i Tupana kape wataꞌakasa aru e.
15 Pyno waku aiweꞌeg wo kahato. Yt naku i watipun Tupana piat aikyꞌe hap aipoityro teran hap. Yt naku i watopyhuꞌat ipyꞌahak miitꞌin etiat rakaria wo iꞌewyte Tupana ete katupono ahaiwot hap uku hapo kahato rakat ewy toineꞌen. Pyno waku aiweꞌeg wo watoineꞌen katupono yt niatpo hin i watopyhuꞌat myꞌahak haria wo watoiat ainapin Tupana piat hap hawyi. Waku watihep hapo miitꞌin auka hap uku ewywuat aipyꞌa pyi yt pote myꞌahak rakaria wo yn watopyhuꞌat miitꞌin ete iꞌewyte Tupana ete. Miꞌi hawyi yt uwe i woꞌokyꞌe hat itote. Ahaiwot iraniaꞌin Iesui mohey haria ete hawyi torannia itote aiwoꞌoꞌewy hawyi yt uwe i iwese toꞌope itote.
16 Nimo te Iako eꞌykeꞌet Esaꞌu hewaire kahato iraniaꞌin haryporiaꞌin wywo iꞌewyte tuwekyryꞌi Tupana ehay ete. Uiwyriaꞌin Iesui mohey haria yt naku i Esaꞌu ewywuat watopyhuꞌat. Saꞌawyꞌi aseꞌi Isaki toꞌe toꞌyat piaria pe -Uikuꞌuro hawyi atikyꞌesat uhaꞌyru Esaꞌu uhaipe piatno uipowatꞌyp e. Esaꞌu ti topyhuꞌat aru Tupana Mipoꞌoro Yianmiat Ahehakyeraꞌat hanuat ahaꞌaseꞌi pono e. Wẽtup eꞌat pe Esaꞌu hesyꞌat kahato hawyi toꞌe toꞌywyt Iako pe -Uipoi ro en paĩ ipuꞌi apokik wo katupono uhesyꞌat kahato uhyt e. Miꞌi hawyi Iako tiwesat -Areineꞌen teran aiꞌywot saipepiatno uito e. Atikyꞌesat Tupana mipoityro wo aiꞌywot e hap ewy e. Miꞌi e hap etum uhepe pote woromoꞌok kahato meikowat ipuꞌi moĩ wo e. Miꞌi hawyi -Taꞌi ewatno raꞌyn katupono yt kan hamo i Tupana aipoityro hap e Esaꞌu e Iako pe.
17 Miꞌi tuwemoꞌok kahato mekewat miꞌu puꞌimoĩ wo. Maꞌato meiũran Esaꞌu tikyꞌesat i raꞌyn Tupana piat topoityro hap. Toikyꞌesat kahato Tupana miꞌairo toꞌywot Isaki saipepiatno hap. Miꞌi hawyi toikat hãpyk kahato toꞌywot e hap -Papai etum i ro uhepe Tupana miium epowatꞌyp e towak popuo. Maꞌato iꞌywot Isaki -Yt rat e yt atum kuap i ewowi uhaꞌyru e -Papai papai etum i ro etum i ro uhepe epowatꞌyp e towak popuo wen maꞌato yt tutum kuap i tutum naꞌyn tosaꞌyru Iako pe Esaꞌu eꞌywyt pe pote. Yt naku i aito Esaꞌu ewywuaria watopyhuꞌat e.
18 Saꞌawyꞌi tuwat tuwat aiꞌywania Iuteuria ywania yityꞌok wato Sinai e hap kape Tupana piat ainapin hamuat kape mekewat aseꞌi Muisei upi. Saꞌawyꞌi watuwat mekewat yityꞌok kape turan watehaꞌat turan hẽty wato kahato toineꞌen heꞌyhig hun kahato itote. Heꞌyhig wepypueri kahato ywytu uato ewy. Iꞌypyryp yn itote yityꞌok tote. Aria ẽty hun hap aimoꞌarot hap ewy.
19 Putꞌok e ahaꞌaseꞌiꞌin hawyi ihay pirik hap topyhuꞌat aikotã hu huꞌe hap ewywuat. Maꞌato mekewat hu huꞌe hap sehay ewy toineꞌen. Watikuap mekewat sehay haty kahato ahewaure kaꞌa pe iꞌewyte aiwanetup hawe aimokenꞌẽ kahato hap sio aikuꞌuro hap ewy watoꞌe. Miꞌi hawyi Muisei pe -Waĩ urutoꞌe yt uruikyꞌesat ewy hin i mekewat sehay watoꞌe saꞌawyꞌi.
20 -Ehẽtup to Tupana pe ihay monik hamo watoꞌe katupono hu huꞌe hap ehay iwato kahato hap ewy topyhuꞌat ihay pirik. -Yt urutuwesepap i mekewat sehay wywo watoꞌe. Mekewat sehay yt uruikuap teran i poꞌog watoꞌe saꞌawyꞌi Muisei pe. Saꞌawyꞌi Tupana mekewat yityꞌok totepyi toꞌe -Yt naku i eihũria tukupteꞌen meiũpe yityꞌok tote e. Muisei yn waku meiũpe uiwywo toineꞌen yityꞌok tote e. Maꞌato eihũ taꞌam uhowowi yityꞌok kape pote meremo nu wo mak mak wo eweiꞌauka ro eihũ e Tupana Muiseiꞌin me. Mio tã e hawyi -Yt ihay se i Tupana iꞌatuꞌe. Yt atikuap teran poꞌog i Tupana e hap iꞌatuꞌe Muisei pe ahaꞌaseꞌiꞌin.
21 Mekewat yityꞌok Sinai e hap kape yt watehaꞌat kuap i saꞌawyꞌi i katupono watehaꞌat pote ipoityꞌi neꞌi aiꞌauka kuap neꞌi. Miꞌi hap Muisei taꞌakasa hawyi -Uimogyt kahato uimotyry uimokenꞌẽ kahato hap e.
22 -Yt naku i iꞌatuꞌe teꞌeraꞌakasa hawyi. Miꞌi yityꞌok Sinai pyi saꞌawyꞌi aiꞌywania Tupana tiꞌatunapin tehay pirik wo yt aimowepiit hin i hap ewy Tupana ihay yityꞌok Sinai totepyi. Maꞌato mesup Tupana ihay i raꞌyn atipy kaipyi ihay ahowawi mekewat atipy piat Ierusarẽi kaipyi yityꞌok Siãu e hap kaipyi ihay mesup ahowawi. Yt saꞌawyꞌi i wuat ewy mesup Tupana ihay ahowawi atipy kaipyi Tosaꞌyru mohey haria aito pote. Poꞌog wakuat saꞌawyꞌi wuat kai ihay ahowawi Tosaꞌyru wẽ pyi mekewat Nusaken pakup e hap kaipyi aikope tukupteꞌen atipy piaria sem poꞌog yt watimorania kuap i etawa kaipyi ihay mesup ahowawi. Mesup watuwat mekewat atipy kape tawa Ierusarẽi pakup kape Tupana sese eiam kape watuwat. Itote ti aru watuwaꞌatunug kahato aitoria Iesui mohey haria pote.
23 Koitywy watuwaꞌatunug Aheykeꞌet Iesui Muisei saipepiat kape Aikywyt Iesui kape hap. Atipy pe toineꞌen miwan me ahet koꞌi yne yne aikotã wẽtup ok i raꞌyn herohik hap ewy aheywytꞌin aheykeꞌetꞌin aheinytꞌin aikypyꞌytꞌin koitywy wateꞌeruwaꞌatunug ienuk hamo hap ewy Aheykeꞌet Sese Aikywyt Sese Iesui wywo. Aikope atipy pe torannia iwan me Tupana miehakyeraꞌat wuaria koꞌi set toineꞌen hap kape. Wuatꞌi miitꞌin kuap hap sio waku sio yt hat Tupana kape watuwaꞌatunug aito. Aikope toꞌewywuat Tupana mimohãpyk koꞌi tukupteꞌen hap kape watuwaꞌatunug aito Aikope Tupana mimohãpyk yianmiaria imohãpyk sese towaku hap oktan hap kape watuwaꞌatunug aito. Aikope aipiit waku pe topyhuꞌat Tupana ewaku hap ewy hap kape watuwaꞌatunug atipy piat tawa kape watuwaꞌatunug aru. Tupana kape watuwat aito Iesui emiit aito Tupana Saꞌyru Paꞌãu Sese aipiit pe toineꞌen mote.
24 Pyno koitywy yt saꞌawyꞌi i yityꞌok Sinai yt kape hin i aikope ainapin Muisei piat hap ewy watuwat. Watuwat mesup aito maꞌato poꞌog saꞌawyꞌi wuat kawiat kape aikope Iesui ainapin hap kape watuwat raꞌyn mesup mekewat yityꞌok atipy piat kape katupono Ahepaꞌi Koro Iesui tunug Tupana wywuat aiwoꞌowese hamuat hap atipy pe. Mesup ahehay toimoherep Tupana pe. Iesui ti aimowehik Tupana wywuat hat. Saꞌawyꞌi Atãu saꞌyru Apeu suu aat hat ihay Tupana kape yi pyi hap ewy e miwan me. Miꞌi hap ewy mesup Iesui suu ihay ahetiatno maꞌato poꞌog miꞌi sehay ikahu Apeu suu aat hat kai -Etiꞌauka ro uiꞌauka hat e Apeu suu maꞌato Iesui suu toꞌe Tupana pe -Waure wo o ereineꞌen uiꞌauka haria kai Papai e. Yt taꞌatukuap i rat kat som taꞌatunug e Iesui suu aat hat ihay yi pyi te. Iesui suu wo waku watuwepen yne aiminug saꞌag moweityk hamo. Waku Tupana ahapei hapei Tosaꞌyru suu wo. Miꞌi yn waku ahehakyeraꞌat kuap hamo.
25 Saꞌawyꞌi Tupana ihay yityꞌok totepyi aiꞌywania pe yityꞌok Sinai pyi maꞌato aiꞌywania saꞌawyꞌi wuaria itotiaria yt ikyꞌesat i Tupana ehay teꞌeruwewaurehik neꞌi. Miꞌi hawyi miꞌiria Tupana miꞌapiheg koꞌi wo teꞌeropyhuꞌat. Taꞌi miꞌi hawyi topap topap yahig note saꞌawyꞌi wuaria aiꞌywania Epereu pusu kuap haria. Taꞌatuhãꞌãg Tupana e hap nug hamuat maꞌato yt wẽtup ok i tuwenug kuap. Yt taꞌatunug i taꞌatunapin hap. Maꞌato koitywy Tupana ainapin Tosaꞌyru wẽ pyi atipy kaipyi. Waku watunug atipy kaipywiat ainapin hap. Waku aiweꞌeg wo ainapin hap nug hamuat hap ete. Maꞌato watuwewaurehik saꞌag Haꞌyru piat ainapin kape hawyi poꞌog naꞌyn saꞌag saꞌawyꞌi wuat kai. Yt watuwemig kuap aiꞌapiheg hap pupi watipun naꞌyn ainapin hap ipakup i Tupana piat hap pote.
26 Mio tã e Tupana mesup miwan me -Saꞌawyꞌi atihuruk taꞌyn yityꞌok mesuwat Sinai e hap totiat maꞌato meiũran aru atihuruk taꞌyn mesuwat yi wato hap oktan e maꞌato yt mesuwat yi yn i atihuruk maꞌato iꞌewyte aat waikiru waty yne atihuruk e miwan me Tupana.
27 Pyno Tupana toꞌe -Atihuruk i raꞌyn wẽtup mo yn e. Miꞌi atunug hawyi waku raꞌyn toran naꞌyn uimihuruk e. Yt typua i atihuruk aru e katupono yt kan hamo i typua e. Miꞌi huruk hap putꞌok e yne raꞌyn e. Mekewat eꞌat yne yt iheg nakat i taꞌat yne e. Maꞌato mekewat yt hurukꞌe i rakat iheg sese rakat aru topyhuꞌat wuatꞌi eꞌat pe e. Mesuwarotiat morekuaria minug koꞌi yne taꞌat e maꞌato Uimiꞌairo Eiporekuatnuat minug koꞌi aru topyhuꞌat rẽ atihuruk yne yne hawyi e Tupana.
28 Pyno yt iheg nakat i aru taꞌat yne hawyi yt taꞌat kuap i rakat koꞌi aiwatno raꞌyn topyhuꞌat katupono watunug Aiporekuat nuat Haꞌyru pote. Miꞌi hap kape waku watuwehum kahato hawyi waku watunug Aipotypot Tupana mowepiit hamuat hap ete waku watimotypot Haꞌyru.
29 Tupana aria ewywuat toineꞌen. Waku kahato aria aimowepiit hap aria maꞌato iꞌewyte waku aiweꞌeg wo ipupi katupono aria aiwuk kuap iꞌewyte e.
