Epereu 13:1-25
13 Pyno toꞌiro watoꞌokyꞌe motꞌi uiwyriaꞌin Iesui mohey haria aito pote. Waku watoꞌokyꞌe aikotã wẽtup ok yat piaria ewy.
2 Karãpe putꞌok e aiꞌyat pe yt aimikuap i te wen miꞌi pykai waku -Ereke ro mehin mana waku watoꞌe. Eweikupteꞌen no meiũpe waku watoꞌe. Aimiꞌu raꞌyn waku watoꞌe iꞌatuepe yt aimikuap i pe katupono Tupana tipoꞌoro tuereto temiit ahowawi atipy piaria yt aimikuap i koꞌi aiwese hap kuap hamo. Saꞌawyꞌi Tupana tipoꞌoro temiitꞌin atipy piaria tehay moherep hamo. Miꞌi hawyi taꞌatupoityro kahato Aparãu saꞌawyꞌi. Miꞌi ewywuat waku watuwewyꞌinug yt eimikuap i te rakaria e Tupana ahepe mesup.
3 Waku watikyꞌe kahato aiwyriaꞌin morekuaria mipyhyp koꞌi. Yt naku i waure wo watoineꞌen woꞌopyhyp haria kai. Waku wahatyꞌu aipyꞌa pe iꞌatupyhik hap koꞌi upi. Waku aikotã itote watoineꞌen mote haty ahete hap ewywuat kuap hap wywo. Waku watoꞌokyꞌe aiwoꞌoꞌewy watomohey haype. Toineꞌen wẽtup ok Iesui mohey hat iraniaꞌin mikyryꞌi hamo miꞌi hat waku watuwat miꞌi powyro hamo kat pote wẽtup yn hap ewy watopyhuꞌat imohey haria. Waku wahatyꞌu hatyꞌu haria wywo wẽtup aimimohey yn mote wẽtup miit yn aipiit pote.
4 Uiwyriaꞌin Iesui mohey haria -Waku heꞌaito kahato rakatno ereineꞌen e. Waku iharyꞌi kahato rakatno ereineꞌen e. Waku eharyꞌi wywo yn ewaire e. Waku eꞌaito wywo yn ewaire e. Miꞌi etunug pote arehum ewowi e Tupana maꞌato iraniaꞌin wywuat eiwoꞌopytyk pote -Yt naku i en areꞌe e. Woroꞌapiheg aru e Tupana yt iweꞌeg i haria pe. Iꞌewyte wewiat weweneru wuatꞌi piat haria atiꞌatuꞌapiheg yne yne e ahepe. Iꞌewyte wewiat weweneru haria kyiꞌat haria atiꞌatuꞌapiheg e. Hewaire rakaria uimiꞌapiheg wuaria e Tupana. Eꞌaito wywo eharyꞌi wywo kahato hap uimowepiit hap e Tupana.
5 Iꞌewyte yt naku i ti watehaꞌat iraniaꞌin ekareꞌen kape ikyꞌesat hap wywo aiwat no teran aiꞌe hap mywo. Waku watuwehum Tupana kape imiium ahekareꞌen sio iwato sio yt. -Waku kahato eimiium oktan Tupana watoꞌe waku. Katupono saꞌawyꞌi Tupana toꞌe -Yt karãpe i ti aru worohoꞌoꞌatoiat e. Yt karãpe i eikupteꞌen piku piku koꞌi sese wo e Tupana ahepe saꞌawyꞌi. Waku watikat Tupana miium koꞌi aimowepiit hap wywo maꞌato yt naku i watikyꞌesat iraniaꞌin ekareꞌen e Muisei tomiwan Teturonamia 3.5 pe.
6 Waku watoꞌe -Pywo rat uipowyro kahato hat En Tupana miꞌi pote yt arekenꞌẽ hin i Uipowyro kahato hat En mote waku watoꞌe. Uiwywo ereineꞌen mote aikotã aikotã saꞌag miitꞌin tunug uhetiat pykai yt arekenꞌẽ hin i waku watoꞌe Tupana pe e morekuat Tawi towepy 118.67 hawe.
7 Waku watimotypot aiꞌapykok haria aimuꞌe haria mesuwarotiaria iꞌewyte saꞌawyꞌi wuaria Tupana ehay moherep haria. Yt naku i waure wo neꞌi miꞌiria kai watopyhuꞌat katupono miꞌiria aimotag Tupana mohey hap etiaria wo tukupteꞌen. Waku watukupteꞌen aiꞌapykok haria saipepiaria wo iꞌatuminug wakuap nug haria wo. Waku iꞌatuiãꞌãkap wo watoineꞌen iꞌatuminug wakuap koꞌi nug hap ete. Miꞌiria Tupana mimotypot wuatnuaria. Waku aito watunug miꞌiria minug wakuat ewywuat. Waku watomohey Tupana miꞌiria piat imohey hap oktan.
8 Iesui ti Aiꞌakag Akag toineꞌen tuweꞌewy wuatꞌi eꞌat pe. Aikotã saꞌawyꞌi Iesui toineꞌen koitywy iꞌewyte toineꞌen tuweꞌewy te mukiꞌite tuweꞌewy te toineꞌen eꞌihatꞌok tuweꞌewy te wuatꞌi eꞌat pe tuweꞌewy te yn toineꞌen. Tewaku hap ewy yn topyhuꞌat wuatꞌi eꞌat pe.
9 Waku watopyhuꞌat imohey hap ete Iesui kape yn watuwanetup wuatꞌi eꞌat. Yt naku i watuwat iraniaꞌin miat aimuꞌe hap upi yt Iesui yt etiat i raꞌyn hap upi. Katupono iꞌatu kahato aimuꞌe hap koꞌi yt pywuat i raꞌyn koꞌi. Iꞌewyte iꞌatu kahato aimuꞌe yt Iesui etiat i. Iꞌatu aimuꞌe Iesui etiat rakaria maꞌato yt hãpyk i rakaria. Yt naku i watuwat heso rakaria aimuꞌe wẽtup sehay yt Iesui etiat i hap upi. Waku watomohey Iesui hap yn sehay pywuat Iesui etiat. Miꞌi ti waku watunug. Waku watuwanetup aat kaꞌap aikotã Tupana aikyꞌe yt kat saꞌup i pykai aikyꞌe hap upi. Aikotã ahewaku hap yt putꞌok e i aikyꞌe hamuat saꞌup ete hap upi waku watuwanetup. Miꞌi watunug mote aipyꞌa iheg me Iesui mohey hap ete. Yt naku i watuwanetup aat kaꞌap miꞌu sio waku Tupana tikyꞌesat sio waku atuꞌu sio yt aiꞌe hap kape. Iraniaꞌin miꞌu waku sio yt aheko ewy hap kape yn teꞌeruwanetup haria tukupteꞌen. Teꞌeruwanetup miꞌu waku sio yt hap kape yn maꞌato miꞌi haria yt iꞌatuehãite i kahato Iesui mohey hap ete. Hãpyk kahato aheko miꞌu u hap etiat iꞌatuꞌe wen maꞌato Tupana mohey hap kape yt teꞌeruwanetup hin i miꞌi pote yt iꞌatuesaika i te Tupana ehay moherep hamo.
10 Saꞌawyꞌi paꞌiria teꞌerenuk kahato aihũria aimiium Tupana piat ete. Taꞌatuwuk Tupana kape turan taꞌatuhep ipuꞌi kãꞌã taꞌatumiꞌu wo. Maꞌato aito Iesui mohey haria wẽtup auka hap kaipyi watenuk. Yt mesuwarotiat aiꞌywania Tupana yat sokpe kawiat piat ewy hin i aimiꞌu maꞌato poꞌog poꞌog wakuat Aihũ Aimiium saꞌawyꞌi wuaria kai katupono Aihũ Pakup Aimiium ti Iesui piit.
11 Saꞌawyꞌi aitoria waterut kahato aihũria Tupana motypot yat kape imotypot hamo. Itote ahepaꞌi akag tiꞌauka aimierut Tupana motypot yat sokpe kawiat okenꞌypyke hawyi totereke aihũria suu Tupana yat sokpe kawiat pe aiminug saꞌag moweityk hamo aiꞌapiheg hap monik hamo. Miꞌi hawyi mekewat aihũ piit taꞌatuereto pya aiꞌyat kai iwuk hamo paꞌi tioto.
12 Miꞌi hap ewy kahato Iesui ikuꞌuro pya tawa wato Ierusarẽi pyi tohoꞌopot mekewat tawa Ierusarẽi ekuekai aikawiatno ikuꞌuro Aihũ ewy. Huu taꞌat itote aimowaku hamuat. Iesui tum tosuu itote temiitꞌin moewaku hamo.
13 Yt ikahu hin i taꞌatunug Ahehakyeraꞌat hat ete. Taꞌatuꞌauka turan mekewat tawa Ierusarẽi ekuekai taꞌatunug. Waku watuwat tawa pyi iꞌewywuat hamo wy iꞌatumikyryꞌi hamo ahete hemiitꞌin aito pote. Waku wẽtup miit ewy wẽtup piit ewy wohoꞌopot iwywo wẽtup ok piat hoꞌopot hap ewy yn waku.
14 Katupono ahetawa sese yt mesuwat tawa Ierusarẽi i maꞌato aiwat ahetawa iheg nakat yt karãpiat i ikahuro rakat. Mesuwat yi tote yt karãpe i watipuẽti aru ahetawa yt ikuꞌuro rakat i. Ahetawa sese tuut aru yi kape atipy kaipyi watoꞌe.
15 Atipy kaipywiat yn wahekatup ahetawa sese uut hap watoꞌe. Uiwyriaꞌin waku kahato watomotypot Tupana. Waku aiwẽ pyi ahẽku pe Tupana kapiat yn aiwehum hap -Eset Tupana poꞌog ikahu torannia kai waku watoꞌe. Yt watuwehum teran i pykai waku watuwehum ahehay wo Tupana pe -Waku kahato Ahehakyeraꞌat Hat Aikaꞌiwat waku watoꞌe aat kaꞌap howawi aikotã aimiium iwato kahato hap ewy Tupana mowepiit kahato hap topyhuꞌat.
16 Waku hegyiꞌat rakaria wo watoineꞌen. Ihakyꞌeꞌi rakaria pe waku watimoꞌẽ ahekat. Waku watipowyro hatek takaria ahekat kaipyi ahesokpe kaipyi aheꞌuꞌi kaipyi e. Yt naku i waure wo watoineꞌen ihakyꞌeꞌi rakaria kai. Watimoꞌẽ pote Tupana mowepiit haria wo watopyhuꞌat. Haty pykai waku watum. Ahegyiꞌat hap kape Tupana taꞌakasa hawyi tuwehum kahato ahowawi.
17 Waku watuwat Iesui mohey haria akagnia ehay upi aiꞌapykok haria upi. Katupono miꞌiria tikyꞌesat kahato ahehãite kahato Iesui mohey hap etiat hap. Waku watunug iꞌatumikyꞌesat ewy katupono miꞌiria hẽtup kahato Tupana kape ahupi. Miꞌi watunug mote iꞌatumowepiit hap topyhuꞌat aiwoꞌowese hap wywo. Maꞌato yt pote haty iꞌatuete hap wywo teꞌeropyhuꞌat. Miꞌi hawyi yt aiweꞌeg i hap taꞌatuhenoi raꞌyn Tupana pe hawyi aiꞌapiheg hap topyhuꞌat Tupana kaipyi. Eiweꞌeg wo o. Miꞌi hawyi aheineꞌen hap mesuwe poꞌog saꞌag topyhuꞌat yt watunug i raꞌyn iꞌatuehay upiat hawyi. Maꞌato watunug iꞌatuehay upi pote poꞌog ihãite rakaria wo watopyhuꞌat. Miꞌi hawyi iꞌewyte aiweꞌeg hap taꞌatuhenoi raꞌyn Tupana pe hawyi aipoityro aimowepiit hamo watopyhuꞌat.
18 Pyno ewehẽtup i hẽtup i urupowyro hamuat uruwyriaꞌin Tupana kape. Urutunug neran wakuap yn wuatꞌi eꞌat pe. Yt kat i uruminug saꞌag upi urutuwemoti Tupana ehamuat hap uruikyꞌesat. Iꞌewyte yt kat i uruminug saꞌag upi urutuwemoti miitꞌin ehamuat hap uruikyꞌesat. Urutoineꞌen neran hãpyk kahato miitꞌin pyꞌasetpe yt uwe pupiat i uruwemoti hap mywo. Miꞌi pote ewehẽtup uruupi Tupana pe uruieineꞌen hap ikahu rakat nug hamo.
19 Uimimuꞌeria waku ewehẽtup uhupi uikaꞌiwiatno haty wo uiꞌaipok ehowawiat hamuat. Ewehẽtup wote meremo araꞌaipok ehewowi.
20 Mio tã areꞌe Tupana pe eikawiatno -Tupana are atikyꞌesat kahato aimimuꞌeria waku nug haria wo En ewy are. Waku kahato En Wuatꞌi Woꞌowese Hap Nug Hat are. En ni urukaꞌiwat Iesui Moieineꞌen Ikuꞌuro Hap Kaipywiat Hat are. En ni Ehũria Emohey Haria Apykok Hat Moieineꞌen Hat are. En ni urupyhik ehay wakuat wuatꞌi eꞌat pe hamo are. Esaꞌyru suu wo urumosat epyꞌa pe Tupana are.
21 -Tupana etiꞌatumohãpyk aiwyriaꞌin wakuap nug haria are. Etunug miꞌiria Esaꞌyru mikyꞌesat ewy waku nug haria wo are. Etunug miꞌiria Esaꞌyru mohey hap etiat itag nakaria wo are. Atikyꞌesat etum iꞌatuepe esaika hap wakuap nug hamuat are. Atikyꞌesat iꞌatuminug emowepiit hap yne hawyi eha mowepiit hap topyhuꞌat are. Tupana uito ti emipoꞌoro Esaꞌyru mohey kahato hat. Esaꞌyru wywo ahẽtup mesup ewowi are. Atikyꞌesat Esaꞌyru mowato mesuwat yi totiat wuatꞌi eꞌat piat hap atikyꞌesat Tupana. Tupana waku kahato En aat kaꞌap are. Etiꞌatukawiatno meiũpepyi uiwyriaꞌin Iuteu ywania are. Iesui set upi ahẽtup Toran naꞌyn uiꞌe hap are.
22 Pyno uiwyriaꞌin uheinytꞌin Iesui mohey haria atikyꞌesat eiwanetup kahato mesuwat uimiwan einapin hap kape. Ewetum no ehewaure kaꞌa poꞌog poꞌog uimienoi kape. Uikyꞌe ehepiat pote eiwemuꞌe ro mesuwat uimiwan kurin kat ete. Yt iꞌywop hin i mesuwat uimiwan. Eweiꞌatumuꞌe yne iraniaꞌin uimiwan mo are. Uimiwan mesuwarote yt iꞌywop hin i are katupono atimohit kahato uhehay mesuwe.
23 Aheywyt Timoteu tuwẽtem naꞌyn morekuat woꞌopyhyp hawyi. Koitywy -Waku ewyry emikyꞌesat ewy e morekuat tope. Pywo ti rat waku kahato. Karãpe tuut uhowowi Timoteu hawyi uimowepiit kahato. Miꞌi hawyi atioto teran uhaꞌyru Timoteu ehewowi eiꞌakasa hamo.
24 Kuekatu atipoꞌoro ehewowi iꞌewyte eiꞌapykok haria kape iꞌewyte kuekatu atipoꞌoro yne Tupana mimoewaku koꞌi kape. Yne Iesui mohey haria meiũpiaria yi Itaria piaria tipoꞌoro kuekatu ehewowi.
25 Tupana etiꞌatukyꞌe ro yne uruꞌywania Esaꞌyru mohey haria Iuteuria ywania are. Yt iꞌatuwaku hap upi i maꞌato egyiꞌat hap kaipyi etiꞌatupoityro uruꞌywania are Tupana pe eikawiatno. Ikahuro raꞌyn uimiwan ehowawiat uiꞌywania Iuteu ywania ewowi mekewat aseꞌi Aparãu emiariru emiariru koꞌi ewowi mekewat Iesui ywania Iuteuria ewowi mekewat Epereu pusu kuap haria kape.
