Epereu 2:1-18
2 Pyno waku Tupana ehay moherep haria aimuꞌe turan watuwewaure kaꞌa kahato. Yt naku i watoket neꞌi Tupana piat aimuꞌe hap ete. Yt naku i watiwaure mekewat saꞌawyꞌi wuat aimikuap Tupana etiat. Pyno waku aiweꞌeg wo o miꞌi hap pupi uiwyriaꞌin uiꞌywania.
2 Saꞌawyꞌi Tupana tipoꞌoro topotpoꞌororia atipy piaria yi kape tehay sese moherep hamo mesuwarotiaria aiꞌywania kape. Taꞌatumoherep kahato ihay pywo kahato rakat Tupana e hap ewy taꞌatumoherep. Maꞌato yt taꞌatumohey i Tupana ehay pywuat koꞌi pote toiꞌatuꞌapiheg saꞌawyꞌi aiꞌywania. Iꞌatuminug saꞌag saꞌup tutum iꞌatuepe toꞌe hap ewy.
3 Miꞌi tupono waku aiweꞌeg wo kahato toꞌe hap ete katupono koitywy Tosaꞌyru wẽ pyi aimuꞌe raꞌyn Tupana. Haꞌyru piat aimuꞌe hap ti poꞌog atipy piaria wẽ pywiat kai. Miꞌi tupono yt naku i kahato watoꞌokyryꞌi ahehakyeraꞌat hat ete. Maꞌato yt watat i Haꞌyru e hap hawyi watipun neꞌi ahehakyeraꞌat hap hawyi aikotã aru. -Yt atikyꞌesat i emiium Iesui aiꞌe hawyi aikotã aru. Taꞌi yt kat i hin i aru watipuẽti muap Tupana kapiat mio tã aiꞌe hawyi. Maꞌato aiꞌapiheg hap yn naꞌyn topyhuꞌat yt watat i imiium hawyi. Saꞌawyꞌi ahehakyeraꞌat hap ete aimuꞌe kahato Aikaꞌiwat Iesui. Iꞌewyte tosaipepiaria topotmuꞌeria kaipyi aimuꞌe kahato wy. Taꞌatumoheg kahato iꞌe hap torannia ahowawi.
4 Katupono Aikaꞌiwat Iesui tiꞌatupowyro kahato tosaipepiaria tehay enoi hanuaria hawyi tutum tesaika hap iꞌatuepe. Topaꞌãu tutum tomisepap koꞌi ewywuat nug hamuat. Toipywo kahato tehay iꞌatuwẽ piat katupono taꞌatunug imisepap yt miitꞌin misepap ewy hin i ipaꞌãu esaika hap wywo. Miꞌi hawyi iꞌatupiit pyi tuwẽtem hesaika hap miitꞌin moehãite hamuat. Iꞌatupo iꞌatupiit pyi taꞌatunug kahato miitꞌin yt ewy hin i miitꞌin mowanetup hamo miitꞌin waꞌakasa hamo. Miꞌi hap kape teꞌerahaꞌat iꞌatuesaika hap kape hawyi pywo iꞌatuꞌe. Tutum Topaꞌãu iꞌatuepe topotpap nug waku kahato hamo. Tomikyꞌesat ewy toimoꞌẽ yne tesaika hap iꞌatuepe.
5 Uiꞌywania pywo ti rat yt karãpe i Tupana tunug temiitꞌin atipy piaria. -Worohoꞌonug eipe Miitꞌin Porekuat no yt e i atipy piaria pe Tupana. Meimewat yi totiaria porekuat no worohoꞌonug yt e i. Maꞌato Tosaꞌyru Iesui pe mio tã e -Woronug ni En Wuatꞌi Miitꞌin Porekuat no e. Miꞌi hap etiat wyti mesup ahenoi hamuat ehepe.
6 Saꞌawyꞌi wẽtup ok toꞌe miwan me -Tupana kat poteĩ miitꞌin ewowi uruewawi erahaꞌat kahato urukyꞌe kahato hap wywo e. Kat kawiatno pyno urupaꞌãu katupono uruto emikyꞌe kahato koꞌi iꞌewyte uwe sese Aheykeꞌet koro e. Kat poteĩ uruepiok kahato aat kaꞌap urukyꞌe hap wywo e. Iꞌewyte kat poteĩ ewyry teran kahato uruwywo. Kat poteĩ ehay teran kahato uruwyro Tupana e.
7 Tupana koitywy urumotypot hap iwato kahato aikotã atipy piaria ewy urumotypot En e. Kat poteĩ urukyꞌe miꞌi kupitu e. Koitywy urueykeꞌet etunug Yne Yne Eminug Koꞌi Apykok Hatno e. Taꞌi imotypot kahato hat En. Urueykeꞌet Painug Kahato Hat En Tupana e miwan me.
8 -Miꞌi hawyi yne atopag Miꞌi py ywytꞌokpype ereꞌe Tupana. Miꞌi Uimimotypot kahato topyhuꞌat e. Miꞌi aru atunug Wuatꞌi Porekuatno e miwan me. Pyno Miꞌi uruykeꞌet Wuatꞌi Porekuatnuat e. Miꞌi pote ipo pe tutum torannia hawyi yt kat i raꞌyn yt ipo pe i reꞌym e. Yne raꞌyn ipo pe e. Maꞌato mesup te yt i te maꞌato meiũran ti aru pywo sese topyhuꞌat yne yne ipo pe toꞌe hap ewy e Tawi wepy hawe 8.4 piat pe.
9 Pyno koran aheha Iesui kape iꞌewyte koitywy howawi aiwanetup hap. Miꞌi raꞌyn topyhuꞌat hap kape aheha. Mekewat poꞌog iwato atipy piaria kawiat hat kape aiwanetup hap. Maꞌato mesuwarotiat toineꞌen turan tuwemohit kahato. Atipy piaria eꞌyi kai te topyhuꞌat. Yt atipy piat ewy hin i toineꞌen Aheykeꞌet mesuwarote tuwepuꞌi nug hap eꞌat pe. Maꞌato hoꞌopot kahato aikawiatno hamo yi tote toineꞌen turan. Ikuꞌuro miitꞌin ehakyeraꞌat hamo. Koitywy Tupana tunug naꞌyn Wuatꞌi Porekuat no. Miꞌi Miit tuwepainug naꞌyn. Miꞌi hawyi Tupana tunug Tosaꞌyru Wuatꞌi Epaꞌi Koro wo raꞌyn e. Mio koitywy Ahepaꞌi Koro wo Iesui raꞌyn katupono Miꞌi Miit ipitpitꞌok yne aiminug saꞌag koꞌi. -Koitywy waku raꞌyn uiwanetup hawe eipe e Tupana ahepe. Koitywy wẽtup miit ewywuat watopyhuꞌat Tupana Aiꞌywot ahepe. Wẽtup mepytꞌin sok yn aito Aheykeꞌet mohey haria e. Taꞌi yt watuwemoti hin i mesup te aiminug saꞌag saꞌawyꞌi wuat ete katupono watomohey Tupana Saꞌyru hawyi wẽtup miit ewy watopyhuꞌat iꞌywot wywo. Eipe uheꞌywytꞌin uheinytꞌin e Iesui ahepe.
10 Tupana tiꞌatumoherep yne yne mesuwat yi tote atipy tote aat yi waikiru koꞌi toiꞌatuꞌatunug wuatꞌi toran naꞌyn toiꞌatumoherep yi yꞌy gaꞌapy miat aimikoi koꞌi toiꞌatunug wuatꞌi meimuẽwaria e. Toiꞌatuꞌatunug yne yne hawyi toiꞌatuꞌapykok kahato yne tominug koꞌi e. Taꞌi toiꞌatumoewyry yne tominug koꞌi e. Waku pe tutunug aat kaꞌap yne tominug koꞌi e. Miꞌi pykai toipoꞌoro Tosaꞌyru Iesui hoꞌopot kahato mesuwat yi hawywiat ahehakyeraꞌat hamo. Miꞌi hawyi tohoꞌopot kahato poꞌog aikai mesuwat yi tote hawyi yt totiat hin i maꞌato Toꞌywot mikyꞌesat koꞌi tutunug yne. Tohoꞌopot kahato toineꞌen hawe tokuꞌuro hawe hawyi waku watoꞌe aiꞌiãꞌãg hap upi Aikaꞌiwat ewywuat -Mesup wahoꞌopot maꞌato Iesui poꞌog hoꞌopot aikai waku watoꞌe. Ahehakyeraꞌat hat hoꞌopot kahato aikawiatno hamo aikyꞌe pote waku watoꞌe. Aikyꞌe kahato hawyi ahereto atipy kape Ahehakyeraꞌat hat waku watoꞌe aiwoꞌope are.
11 Iesui ti aikoho kuap kahato. Pywo ti rat aipyꞌa piat aiminug saꞌag koꞌi aiwanetup hap koꞌi toimoweityk kuap. Miꞌi hawyi ainug Toꞌywot saꞌyruꞌin sakiꞌytꞌin no. Tupana mepytꞌin no ainug hawyi Iesui Aheykeꞌet Aikywyt toineꞌen. Waku pe kahato hawyi watopyhuꞌat. Aikoho tosuu wo hawyi yt tuwemoti i toꞌe hamo ahepiat -Miꞌiria ti uheꞌywytꞌin koꞌi uheinytꞌin koꞌi e hap pupi yt tuwemoti hin i toꞌe hamo. Aheykeꞌet Aikywyt Iesui watimohey hawyi aikoho tosuu wo hawyi waku kahato e.
12 Saꞌawyꞌi mio tã e Haꞌyru Tupana pe -Woromoherep En Papai wuat uheꞌywytꞌin uheinytꞌin me e aikope aikope teꞌeruwaꞌatunug ehay kuap hamo hap upi e. Miꞌi pote -Areineꞌen iꞌatupyꞌasetpe emotypot hamo Papai uhehay wo uiwepy hamo iraniaꞌin wywo emotypot haria yatype emotypot haype Papai e morekuat Tawi miwan 22.22 pe.
13 Iꞌewyte mio tã e Haꞌyru Tupana pe -Emohey uhepiat hap koitywy tuwehik kahato raꞌyn uhete e. Erahaꞌat ro uhowowi Papai e. Koitywy emohey haria ahyt raꞌyn tukupteꞌen naꞌyn uiwywo emiium koꞌi esaꞌyruꞌin koꞌi esakiꞌytꞌin koꞌi e saꞌawyꞌi Tupana ehay moherep hat Isaia miwan 8.18 pe.
14 Pyno aito miit kawiat maꞌato -Uhaꞌyruꞌin uhakiꞌytꞌin eipe e Tupana ahepe Tosaꞌyru mohey haria pe mesup. Miit puꞌi kawiat kahato Iesui piit maꞌato yt karãpe i tutunug yt naku i. Ikuꞌuro aikawiatno hare pote tuwenug miit no iꞌewyte wẽtup piit ewy iwywo watopyhuꞌat watimohey hawyi e. Wẽtup suu ewy kahato iwywo aito iꞌewyte aihep taꞌyn ahiag po pyi tutuꞌu yne aikuꞌuro hap hawyi. Saꞌawyꞌi ahiag aimokenꞌẽ kahato aikuꞌuro hamo maꞌato mesup Iesui tihep taꞌyn mekewat aimokenꞌẽ hap.
15 Nimo te turan ni aikuꞌuro hap pupi watokenꞌẽ kahato. Saꞌawyꞌi te wuat aheineꞌen hap ti aikenꞌẽ aikuꞌuro pupiat hap yn ni toineꞌen ahete maꞌato mesup yt kat i raꞌyn katupono Aheykeꞌet Aikywyt ikuꞌuro aheiam me pote.
16 Iesui topyhuꞌat miit piit aiꞌewywuat pote. Yt tuwepuꞌinug hin i atipy piat topuꞌi ewy maꞌato mesuwiat muꞌi ewy yn tuwepuꞌinug hawyi aipiit wo topyhuꞌat. Ahaꞌaseꞌi Aparãu Saipepiat hemiariru Emiariru kaipywiat tuwepuꞌinug yne miitꞌin mesuwarotiat powyro hamuat.
17 Miꞌi hawyi tuweꞌywãꞌĩ miit no tuwemoherep. Miit kahato no raꞌyn topyhuꞌat. Miꞌi tupono waku kahato Miit Miꞌi hat. Tuwemoehakyꞌeꞌi tuwewi aikawiatno hatno Ahepaꞌi Koro topyhuꞌat pote tohaꞌup nug naꞌyn aiminug saꞌag Tupana pe. Tutuꞌu yne aiꞌapiheg hap koꞌi hawyi aiwywo topyhuꞌat. Iꞌywot Tupana waure wo topyhuꞌat aiminug saꞌag koꞌi kai koitywy. Yt karãpe i aimaꞌat hatno topyhuꞌat iꞌewyte yt karãpe i Toꞌywot maꞌat hatno topyhuꞌat. Miꞌi pote Ahepaꞌi sese Miꞌi.
18 Ahepaꞌi Iesui tikuap kahato ahepiat hoꞌopot hap iꞌewyte ahiag kaipywiat ahãꞌãg hap tohãꞌãg yne. Miꞌi tupono ihakyꞌeꞌi kahato ahepiat hoꞌopot turan. Aikawiatno hat kahato topyhuꞌat Miꞌi Iesui. Toikuap kahato ahãꞌãg piat ahãꞌãg hap pote koitywy aipowyro kuap kahato ahiag miat aimaꞌat turan. Aipowyro kuap kahato ahepiat hoꞌopot hap eꞌat pe katupono toikuap kahato ahiag piat toiãꞌãg hap. Saꞌawyꞌi mesuwarote tohoꞌopot kahato miitꞌin mikyryꞌi hap ete miꞌi pote aipowyro kuap kahato ahepiat hoꞌopot hap ahete turan. Taꞌi Iesui tikuap kahato ahatek hap saty hap mesup watikuap.
