Epereu 3:1-19
3 Pyno Iesui poꞌog atipy piaria kai iꞌewyte mesuwiaria kai. Waku watuwanetup kahato aimimohey kape. Tupana mimowaku koꞌi aito uiwyriaꞌin. Aito wẽtup ok ywytꞌin koꞌi wo yn Tupana ainug Aheykeꞌet Iesui pote. Aito wẽtup sok yn wuatꞌi atipy kapiat wat hanuaria aito. Koitywy Tupana aikay kay atipy kape. Miꞌi pote waku watuwanetup kahato Ahepaꞌi Koro Iesui kape hawyi -Iesui Ahepaꞌi Koro watoꞌe iraniaꞌin me miꞌi pote wẽtup yn miit ewywuat watopyhuꞌat wẽtup ehay ewy yn watoꞌe.
2 Saꞌawyꞌi ahaꞌaseꞌi Muisei tiꞌatuꞌapykok Tupana emiitꞌin Tupana piat topoꞌoro hap ewy. Toꞌyatypiaria ewy tutunug. Yt ipohep hin i iꞌatukyꞌe hap ete. Miꞌi pote Muisei Tupana mimotypot kahato wo topyhuꞌat. Maꞌato Haꞌyru Iesui poꞌog Muisei kai -Miꞌi Miit Uimimotypot Poꞌog e Tupana. Yt uwe i miꞌi rẽ miꞌi kai uimikyꞌesat yn nug hat e. Miꞌi Miit poꞌog uiwanetup hawe uimikyꞌesat nug yne hat e Tupana Iesui etiat.
3 Pyno Muisei Tupana mohey haria apykok kahato hat Tupana emiitꞌin powyro kahato hat. Miꞌi hawyi Iesui poꞌog Muisei kai katupono poꞌog toiꞌatuꞌapykok Tupana yat piaria Muisei kai e. Pyno Tupana yat piaria Akag Iesui topyhuꞌat Tupana yat piaria Apykok hat sese. Tupana yat yne nug hat toineꞌen.
4 Uiwyriaꞌin karãpe aiminug aiꞌyat ipakup ikahu rakat topyhuꞌat aimimotypot kahato hamo toineꞌen. -Taꞌi ehepap kahato yat nug hamuat e miitꞌin ahepe. Ikahu tig iꞌatuꞌe ahepe aiꞌyat pakup hawyi ainug hap aimotypot hap topyhuꞌat. Maꞌato poꞌog poꞌog Tupana motypot hap watopyhuꞌat aiꞌyat kai katupono inug hat aito pote.
5 Pyno Tupana mikyꞌesat ewy Muisei tunug Tupana yat piaria apykok hap ete. Ipotpap Tupana mohey haria apykok hap ete. -Atunug aru eꞌe hap ewy e Tupana pe. Miꞌi hawyi ihay kahato aikotã aikotã Tupana toꞌe hap ewy toꞌe.
6 Maꞌato Aipotypot Iesui poꞌog Muisei kai kat pote Tupana Saꞌyru sese pote. Miꞌi pote poꞌog waku topyhuꞌat iꞌyat piaria apykok hamo Haꞌyru pote. Muisei Tupana eropat hat maꞌato Iesui Haꞌyru sese. Pyno aito imohey haria Tupana yat piaria ewywuaria watoineꞌen. Taꞌi miꞌi tã aito watomohey potꞌi pote -Uito imohey hat watoꞌe yt aiwemoti hin i pote. Pywo ti rat Iesui yn aimiekatup aiꞌe pote. Iesui yn ahehakyeraꞌat kuap hat watoꞌe pote. Yt kat i aiwemogyt hap aikuꞌuro hap mesup watoꞌe. Mio tã aiꞌe pote Tupana yat piaria wuat aito.
7 Koitywy Tupana Paꞌãu Wakuat aimuꞌe kahato mio tã e -Karãpe Tupana ihay ewywo turan o yt ehewãꞌãhik teiꞌo ehewaure kaꞌa e.
8 Yt epyꞌa ran neiꞌo e. Yt ereꞌe saꞌag neiꞌo eipyꞌa pe -Yt atikyꞌesat i uipyꞌa pe Tupana ehay e hap ewy yt ereꞌe teiꞌo. Yt eweikupteꞌen neiꞌo aikotã aiꞌywania saꞌawyꞌi wuaria ipyꞌahak takaria yahig notiaria ewy e. Katupono miꞌiria tuꞌuka kahato Tupana ete. Taꞌatuhãꞌãg kahato Tupana taꞌatuminug saꞌag wo sio uruꞌapiheg sio yt hap kuap hamo. -Pyno yt naku i miꞌiria ewy ewetunug e Tupana Paꞌãu ahepe.
9 Pyno mio tã e Tupana mesup ahepe. -Yahig notiaria eheꞌyian miaria uhãꞌãg kahato taꞌatuminug saꞌag wo sio atiꞌatuꞌapiheg sio yt hap kuap hamo e. Motꞌi uhãꞌãg e hawyi uimopyꞌahak teran 40 anu itote e. Teꞌeraꞌakasa yne uiminug wakuap taꞌatuepiat koꞌi pykai yt miitꞌin minug kuap i koꞌi atimoherep kahato iꞌatuepiat pykai yt uimohey i e.
10 -Motꞌi hawyi uimopyꞌahak kahato eheꞌyian miaria ehaꞌaseꞌiꞌin e. Eiꞌywaniaria wanetup hap yt karãpe i waku atipuẽti e. Yt naku i hap kape yn iꞌatuwanetup hap. Atiꞌatumoꞌakasa kahato uipuꞌap uiwanetup waku rakat kapiat maꞌato -Yt uruikyꞌesat i iꞌatuꞌe uhepe e.
11 Miꞌi pote uipyꞌahak iꞌatuete eiꞌywania saꞌawyꞌi wuaria ete e. Miꞌi hawyi mio tã areꞌe iꞌatuepe. -Uimopyꞌahak eipe e. Worohoꞌokuap taꞌyn eipe e. Yt naku i nug haria eipe e. Miꞌi pote aru worohoꞌoꞌapiheg uiꞌe hap ewy e. Eweipap yne mesuwat yahig wato tote e. Yt eweipuẽti i eimowepiit hap yi wakuat rote aikope ewemohy hap tote e saꞌawyꞌi Tupana aiꞌywania Epereu ywania pe.
12 Uiwyriaꞌin uheinytꞌin wẽtup yn Iꞌywot rakaria aito pote worohoꞌonapin -Waku aiweꞌeg wo aheTupana mohey hap pun hap pupi katupono yt naku i kahato aipyꞌahak Tupana ete hap areꞌe. Yt naku i watoiat Tupana yt kat i imohey hap aikawiat haype. Yt naku i watopyhuꞌat wuatꞌi eꞌat piat ieineꞌen hat ewanikap mo aheTupana atoiat haria wo.
13 Uiꞌywania waku watopyhuꞌat aito woꞌokyꞌe haria wo katupono mesup taꞌyn watoꞌopowyro kuap. Waku mesup taꞌyn watoꞌopowyro aipyꞌa heg Tupana kapiat hap monik hamo. Waku watoꞌokyꞌe mesup taꞌyn mesup te katupono yt watikuap i sio toineꞌen mukiꞌite aiwatnuat sio yt hap. Saꞌag nug hap aheko aimaꞌat kahato hap topyhuꞌat wuatꞌi eꞌat pe e. Waku woꞌokyꞌe haria wo watopyhuꞌat. Mukiꞌite putꞌok e pote waku yn miꞌi tã hap nug haria wo watukupteꞌen hawyi mukiꞌite eꞌihatꞌok waku woꞌokyꞌe haria wo teꞌen teꞌen watopyhuꞌat wuatꞌi eꞌat pe mesuwat ewy. Yt pote woꞌomaꞌatꞌi haria wo watopyhuꞌat.
14 Pyno waku uiwyriaꞌin watomohey aheineꞌen hap oktan aikotã saꞌawyꞌi watomohey hap ewy te teꞌen teꞌen waku watomohey Iesui hawyi yt naku i wẽtup mohey hap kape i kowoꞌi kowoꞌi neꞌi watiꞌywyk ywyk imohey hap. Waku watomohey Iesui akasa hap kape. Waku iheg me imohey hap ete aikuꞌuro hap kape. Miꞌi tã watunug mote Aikaꞌiwat ekatuwyria wo watopyhuꞌat torannia aitoria wuatꞌi eꞌat pe.
15 Tupana piat aiꞌywania napin hap ewy worohoꞌonapin. Mio tã e Tupana saꞌawyꞌi miwan me -Koitywy eweikuap uhehay pote yt eweikupteꞌen neiꞌo ipyꞌahak takaria wo uhehay ete e. Yt eweikupteꞌen neiꞌo saꞌawyꞌi wuat uhehay pun haria wo aikotã ehaꞌaseꞌiꞌin yahig notiaria ewy e. Uiwyriaꞌin yt naku i watopyhuꞌat ipyꞌahak Tupana etiat rakaria ahaꞌaseꞌiꞌin saꞌawyꞌi wuat ewy.
16 Uwe apo ipyꞌahak saꞌawyꞌi wuaria Tupana piat taꞌatunapin hap ete. Taꞌi aiꞌywania ahaꞌaseꞌiꞌin Muisei mihep wanikaptiaria po pywiaria koꞌi iꞌatupyꞌahak kahato Tupana napin hap ete.
17 Uwe apo meimuẽwaria 40 anu turanuat yahig wato tote saꞌag yn nug haria Tupana mopyꞌahak hanuaria. Taꞌi ahaꞌaseꞌiꞌin aiꞌywaniaria Iuteu ywania. Taꞌi aiꞌywotꞌin aityꞌin topap yne iꞌatuminug saꞌag tiꞌatuꞌuka.
18 Uwe wywo Tupana toꞌe saꞌawyꞌi -Pywo ti rat yt wẽtup ok i atipuẽti eiperia waku rakaria pote yt uwe i teke kuap eiperia uheꞌyi pakup we aikope aiwoꞌomowepiit hap kape aiwemohey hap kape e ipyꞌahak takaria pe aheꞌyian miaria pe Tupana.
19 Pyno aharyꞌiꞌin ahaꞌaseꞌiꞌin yt tipuẽti i taꞌatueꞌyi wakuat yi Kanaꞌã Tupana -Atum aru e pykai. Taꞌi yt taꞌatumohey i -Atum aru e hap pote yt taꞌatupuẽti i. Yt naku i yt watomohey i miꞌiria ewy are.
