Epereu 4:1-16
4 Pyno mio tã e Tupana saꞌawyꞌi -Eweihytꞌok yi pakup we yi Kanaꞌã pe pote eiwemohy aru itote uiwywo uiꞌe hap ewy e. Pyno toꞌiro watuwehytꞌok Tupana eꞌyi pakup we iwywuat aiwoꞌomowepiit hap kape. Waku watokenꞌẽ kahato yt wateke i hap pupi.
2 Pyno koitywy watikuap mekewat sehay aikotã saꞌawyꞌi ahaꞌaseꞌiꞌin tikuap hap ewy maꞌato taꞌatukuap pykai yt kat hamo i topyhuꞌat yt taꞌatumohey i pote.
3 Mio tã e aiꞌywaniaria nimo te wuaria pe -Uimopyꞌahak haria eipe e miꞌi pote pywo ti rat yt karãpe i aru eiwehytꞌok aikope aiwemohey hap kape yi wakuat pe yt uimohey i eipe pote e. Maꞌato aito imohey haria pote aiwemohey Tupana piat hap toineꞌen iꞌe hap ewy katupono karãpe Tupana tunug yne hawyi -Waku raꞌyn toran naꞌyn e miꞌi hawyi tuwemohy. Miꞌi hap ewy waku watuwemohy iwywo e morekuat Tawi wepy 95.11 pe.
4 Iꞌewyte Tupana henoi aikotã saꞌawyꞌi te tuwemohy hap etiat miwan me -Tutunug yne mesuwat mytyyp aat waty waikiru koꞌi hawyi tuwemohy e miwan me. 6 eꞌat tuwepotpap hawyi ipohep waku yne raꞌyn tominug hawyi tuwemohy 7 eꞌat piat hawyi e miwan me.
5 Miꞌi hawyi toꞌe tominug koꞌi miitꞌin me -Eweikupteꞌen no mesuwe hawyi worohoꞌopoityro mono mesuwat uimikoi yi wakuat pe e. Eiwemowepiit kahato hap atum teran ehepe mesuwe e aiꞌywania pe saꞌawyꞌi maꞌato -Yt rat iꞌatuꞌe Tupana pe. Miꞌi pote -Yt karãpe i eiwehytꞌok aru mesuwe aiwemohey hamuat uhetama pakup we e Tupana haty wo morekuat Tawi miwan 95.11 pe.
6 Yt taꞌatumohey i pote yt tuwehytꞌok kuap i tawa wakuat Kanaꞌã pe. Miꞌi pote mesup Tupana toꞌe iraniaꞌin me wuatꞌi ywania pe -Waku eiwemohy mesuwe uhetama pe uiwywo e ahepe. Aiꞌywania saꞌawyꞌi wuaria yt imohey i Tupana toiꞌatunapin kahato pykai. Yt tuwehytꞌok i Tupana wemohy hawe yi Kanaꞌã pe. Pyno waku aiweꞌeg wo hap wywo wateke Tupana wemohy hawe atipy pe iꞌewyte mesuwe toikyꞌesat.
7 Tupana tiꞌairo aiwemohey hap eꞌat yt saꞌawyꞌi wuat yi Kanaꞌã piat yt ewywuat i. Mio tã e Tupana mesup ahepe -Koitywy eheꞌat sese eiwemowepiit hamuat e. Miꞌi pote meiũran Tupana ihay i raꞌyn morekuat Tawi wẽ pyi aiwemohey sese hap eꞌat ete ihay -Mesup eꞌat eweiwemohy teran wuatꞌi eꞌat pe pote eweĩꞌẽ ro uhowowi mesup e. Eweikuap uhehay pote yt eweimopun neiꞌo eipyꞌa pe eikay kay hap kape e Tupana ahepe morekuat Tawi wepy 95.7 pe.
8 Pyno ahaꞌaseꞌi Muisei yt teke i yi Kanaꞌã pe maꞌato haipepiat Iusue hupi aiꞌywania Epereu pusu kuap haria nimuat tuwehytꞌok yi Kanaꞌã pe e. Maꞌato itote yt teꞌeruwemohy hin i yi Kanaꞌã pe. Tuꞌuka hap yn taꞌatunug itote iraniaꞌin ywania wywo. Maꞌato miꞌi pykai -Atum aru meiũran eheꞌat sese eiwemohy hap e Tupana aheꞌyian miaria pe.
9 -Maꞌato tuut aru eiwemohy hap e morekuat Tawi. Maꞌato saꞌawyꞌi yt kat i itote morekuat Iusue eꞌat pe. Mio ti watikyꞌesat pote toineꞌen naꞌyn aiwemohey Tupana kaipywiat hap aiwepiit hap aito Tupana emiitꞌin wuat pote.
10 Ahehakyeraꞌat raꞌyn hawyi waku yne raꞌyn hawyi aiwemohey hap ewy toineꞌen. Yt kat i aipotpap poꞌog aiwehakyeraꞌat hamuat katupono Iesui potpap upi ahehakyeraꞌat hap toineꞌen. Ariaꞌyp posok tote toikyiꞌat aiwepiit hap. Tuwemohy raꞌyn mesup Iesui. Apyk pe raꞌyn toineꞌen. Waku raꞌyn watuwemohy iwywo. Miꞌi pote yt naku i watuwepotpap ahehakyeraꞌat hap kyiꞌat hamo neꞌi katupono ahehakyeraꞌat hap kyiꞌat hap toineꞌen naꞌyn Aikaꞌiwat tunug.
11 Saꞌawyꞌi -Eweiwehytꞌok o eheꞌyi Kanaꞌã pe e Tupana aheꞌyian miaria pe. Waku itote eiwemohy e maꞌato -Yt iꞌatuꞌe. Miꞌi hawyi howasat rakaria wo tukupteꞌen yahig note. Yt naku i mio tã watoꞌe Tupana pe. Waku watoꞌe -Taꞌi urupap kahato eupi waku watoꞌe. Urutuwemohy teran kahato ewywo waku watoꞌe. Yt naku i ahoꞌowasat hap topyhuꞌat nagnia ewy uiwyriaꞌin.
12 Tupana aikuap kahato. Tehay hãi hyk kahato aikotã kyseꞌyp hãihyk toꞌowa piat rakat suraraꞌin ekyseꞌyp ewywuat Tupana e hap. Hãihyk hesaika mekewat kyseꞌyp ewywuat Tupana ehay teke kuap kahato aipiit pe aiwanetup hawe. Toitek tek kuap kahato aiminug saꞌag koꞌi. Tupana ehay aimoieineꞌen kuap kahato. Yt heremo i aipiit piat rakat yt naku i hap toipuruk kuap kahato aiwanetup hap kaipyi aipiit pyi. Hesaika kahato Tupana ehay aimoehãite hap nug hamuat aiwanetup hawe. Tupana ehay tikuap kahato aipaꞌãu. Toikuap kahato kat e hap kat e hap aipiit pe toineꞌen hap sio watomohey teran sio watimotypot teran sio watuwemotypot teran sio miitꞌin aimotypot hap yn watikyꞌesat sio Tupana motypot hap watikyꞌesat hap. Kyseꞌyp hãihyk takat ewy Tupana ehay tipoꞌoro kuap kahato yt naku i aiwanetup hap pya pyi aikai. Toipatꞌok kuap kahato yt naku i sio waku hap. Toikuap yne aipiit piat yt heremo i rakat. Toikuap kahato aipyꞌa piat aimikyꞌesat kyꞌesat hap toineꞌen hap ihay teke teke kahato aiwanetup hawe pote. Iꞌewyte kan hamoĩ watunug wakuap hap toikuap. Toikuap aiwanetup waku sio yt hap. Kat pote mekewat sio Tupana kyꞌe hap aikai sio yt miꞌi i hap toikuap. Sio aiwemotypot hap sio Tupana motypot hap toikuap. Yt heremo i rakat wen aiwanetup hap toikuap yne aipyꞌa piat aimikyꞌesat koꞌi kyseꞌyp hãi hyk toꞌowa piat rakat ewywuat tehay wo.
13 Iꞌewyte Tupana tikuap yne yne miitꞌin waku hap sio yt naku i hap wuatꞌi ywania wat aikope aikope gupteꞌen hap tote katupono yne aiminug koꞌi miitꞌin miꞌiria pote. Yt watuwemig kuap i Tupana pupi aiwanetup hap waku sio yt hap toikuap yne pote. Aiminug koꞌi iꞌewyte heremo yne Tupana pe sio waku pe sio yt naku i pe hap toikuap. Pyno waku aiweꞌeg wo katupono meiũran tuwemoherep yne kuap aiminug koꞌi wuatꞌi ehamo. -Kat poteĩ miꞌi tã neꞌi ewetunug e aru ahepe. Kat poteĩ mio tã neꞌi erewanetup e aru Tupana ahepe. Uiwesat ro e aru. Araꞌakasa yne tig eminug koꞌi e aru ahepe haty wo.
Ahepaꞌi Sese Iesui
14 Maꞌato toineꞌen wẽtup aikawiatno hat ihay Tupana wywo rakat Miꞌi Miit ri Ahepaꞌi sese Iesui. Haꞌawytepyi tutunug yne Toꞌywot mikyꞌesat oktan hawyi ti taꞌam atipy kape. Teke raꞌyn Toꞌywot wywuat pe Ahepaꞌi Koro sese. Miꞌi tupono waku watomohey Miꞌi Miit aikuꞌuro hap kape. Miꞌi tupono waku watoꞌe yne eꞌat pe howawi -Woromohey En Iesui watoꞌe waku.
15 Katupono Ahepaꞌi Tupana wywuat ihay aikawiatno hat yt mesuwarotiaria yt ewy hin i. Karãpe ahete ahatek hap putꞌok e hap haty hap topyhuꞌat hawyi toikuap kahato katupono Miꞌi Paꞌi hatyꞌu kahato satek hap saꞌawyꞌi tuwete. Iꞌewyte yt ahesaika i hap toikuap kahato katupono saꞌawyꞌi mesuwe aiꞌewy tohãꞌãg tosero hap mesuwat yi tote. Saꞌawyꞌi hãꞌãg ahiag kaipywiat hap toikuap kahato yt naku i nug hamuat hap katupono ahiag hãꞌãg kahato Iesui yne yt naku i nug hamuat katupono Iesui aipiit puꞌi ewywuat kawiat sese Ahepaꞌi Koro hawyi yne toiãꞌãg ahiag miat hap toikuap maꞌato yt taꞌat i tomaꞌat hap upi. Taꞌi Aikaꞌiwat no kahato ti Ahepaꞌi toineꞌen. Karãpe yt naku i hap ahete pote aikawiatno hamo topyhuꞌat aipowyro kahato ahiag sopo hamo.
16 Miꞌi pote waku watuwat Tupana kape yt aikenꞌẽ wywo hin i yt kat i aiwemoti hap wywo katupono toineꞌen aiwywo Ahepaꞌi Koro. Miꞌi pote ti hegyiꞌat kahato Tupana ahepe Ahepaꞌi Koro kyꞌe haype Ahepaꞌi Koro emiit no watoineꞌen mote. Wahenoi yne aiminug saꞌag tope pote meremo topyhuꞌat waure wo. Watikyꞌesat aipowyro hap hoꞌopot hap eꞌat piat pote waku merep wahenoi tope. Wahẽtup hawyi meremo tutum neꞌen neꞌi aipowyro hap. Iꞌewyte satek hap saty monik hamo wahẽtup pote meremo tutum ahepe tehakyꞌeꞌi hap. Taꞌi hegyiꞌat kahato ahepe katupono Haꞌyru Ahepaꞌi wo toineꞌen pote. Toineꞌen atipy pe ahehay moherep Toꞌywot piat hatno Ahepaꞌi. Miꞌi hawyi Iꞌywot aimoesaika kahato kat e hap kat e hap niatpo kahato rakat ahete hap turan aimoesaika kuap kahato e.
