Epereu 5:1-14
5 Nimo te pyi Tupana tiꞌairo wẽtup miit aiꞌywania paꞌi koro wo -Atikyꞌesat en paꞌi wo miitꞌin ehay moherep uhepiat hamo e iꞌewyte iꞌatuminug moherep uhepiat hamo e. Woroꞌairo en wẽtup ok yn paꞌi akag wo e. Karapeĩ miit tunug saꞌag hawyi waku etiꞌauka iꞌatumiium wo ehũ iꞌatuminug saꞌag hep hamo e. Miꞌi etunug mote waure wo areineꞌen iꞌatuminug saꞌag kai e Tupana tomiꞌairo paꞌi koro pe saꞌawyꞌi aiꞌywania pe.
2 -Woroꞌairo en miitꞌin atukyꞌe hamuat e. Karapeĩ miitꞌin uiꞌatoiat hawyi waku paa ere o epyꞌa pe miitꞌin satek hawyi e. Miꞌi hawyi etimoherep iꞌatuepe muap uhowawiat e. -En miit kawiat ereineꞌen e iꞌewyte etikuap miitꞌin miat iꞌaparap taꞌyn hap yt iꞌatuweꞌeg i hap koꞌi yt ikuap kahato i hap koꞌi hawyi waku etiꞌauka taꞌatuehũria taꞌatuekawiatno iꞌewyte ekawiatno e saꞌawyꞌi Tupana tomiꞌairo paꞌi koro pe.
3 -En ni tapyiꞌa ewy kahato iꞌaparap hat pote waku etiꞌauka ehũ emiꞌaparap moweityk hamo iꞌewyte emiitꞌin minug saꞌag koꞌi hep hamuat e. Miꞌi nug hamo woroꞌairo e Tupana.
4 -Woroꞌairo paꞌi akag wo e. Yt miitꞌin miꞌairo hap kaipyi i ereineꞌen paꞌi koro wo maꞌato uimiꞌairo en e. Yt naku i ereꞌe miitꞌin me -Uiꞌairo no eipaꞌi wo katupono uito yn waku paꞌi akag airo hamo e. Yt eꞌe hap kaipyi paꞌi koro wo ereineꞌen. Maꞌato uiꞌe hap kaipyi yn waku e. Nimo areꞌe Muisei ywyt Arãu me -Woroꞌairo en miitꞌin epaꞌi akag wo e. Ereineꞌen no miitꞌin pyꞌasetpe paꞌi koro wo areꞌe Muisei ywyt Arãu me saꞌawyꞌi e. Arãu yt tuwenug hin i paꞌi koro wo maꞌato uimiꞌairo uimikyꞌesat ewywuat neꞌi Arãu e Tupana.
5 Tupana tunug Aikaꞌiwat Iesui Arãu ewywuat kahato maꞌato poꞌog miꞌi kai. Yt tuwenug hin i Ahepaꞌi Koro wo Iesui. Yt tuwemotypot i paꞌi wo maꞌato Tupana mimotypot no Miꞌi Miit toineꞌen. Aikotã Tupana toꞌe saꞌawyꞌi miwan me hap ewy -Eꞌywot sese ti Uito Uhaꞌyru e. Wuatꞌi eꞌat piat Uhaꞌyru En e katupono wuatꞌi eꞌat piat Eꞌywot sese wo areineꞌen e. Mesup eꞌat woromoherep En wuatꞌi miitꞌin me Uhaꞌyru hap e. En yn Uhaꞌyru mesuwe miit kaipywiat e wepy hawe 2.7 miwan me.
6 Miꞌi hawyi toꞌe Tupana wẽtup miwan me -Uhaꞌyru e woronug en wuatꞌi eꞌat piat wuatꞌi ywania Paꞌi Koro wuat woronug En mekewat aikotã saꞌawyꞌi te wuat paꞌi koro Mekeseteki hap het rakat ewywuat sese Uhaꞌyru e saꞌawyꞌi morekuat Tawi Tosaipepiat Iesui etiat 110.4 miwan me.
7 Miꞌi hawyi mesuwat yi totiat toineꞌen turan Iesui ihay Tupana kape tuwak popuo tepiat hatyꞌu hap wywo tohẽtup hẽtup tehay wo -Papai Papai e uihep En guꞌuro po pyi e uikuꞌuro hap kaipyi uihep o En guꞌuro po pyi e haty wo. Miꞌi hawyi Tupana tiwesat -Pywo Uhaꞌyru atunug aru eꞌe hap ewy e. Worohep En guꞌuro pyi e Uimotypot kahato hat En mote e uimikyꞌesat ewy neꞌi ekuꞌuro pote e. Eremohit kahato miꞌi pote woromotypot Uhaꞌyru e. Emiẽtup oktan worohep En guꞌuro pyi e.
8 Tupana Saꞌyru sese Iesui maꞌato tohoꞌopot popuo tuwemuꞌe Tupana mikyꞌesat nug hap ete paa e hat ewy. Miꞌi kaipyi aimohãpyk hamuat tutuꞌu yne tepiat hoꞌopot hap hawyi toikuap Tupana mikyꞌesat nug hap. Yt ikuꞌuro teran i pykai ikuꞌuro aikawiatno Tupana mikyꞌesat toikyꞌesat pote.
9 Aikaꞌiwat yt karãpe hin i iꞌaparap Toꞌywot mikyꞌesat nug hap ete pote -En yn miitꞌin ehakyeraꞌat hatno e Tupana. Iesui watomohey hawyi tutum aheineꞌen wuatꞌi eꞌat piat hamuat ahepe tomikyꞌesat nug haria wo watoineꞌen mote.
10 Tohoꞌopot kahu hawyi. -Pywo sese hãpyk takat miit En e Tupana tope. Ewaku hap uiat ewy pote waku En yne miitꞌin Epaꞌi wo e. En ni mekewat paꞌi wakuat saꞌawyꞌi wuat Mekeseteki ewywuat e. Paꞌi Mekeseteki Saipepiatno Sese woronug En e Tosaꞌyru pe.
Tohenoi Paꞌi Mekeseteki Etiat
11 Uiwyriaꞌin worohoꞌomuꞌe teran Paꞌi Mekeseteki Saipepiat ete. Ahenoi teran poꞌog Iesui ete wen maꞌato ehewaure kaꞌa iperup kahato Tupana ehay etiat kuap hamo. Taꞌi eweiket kahato eiwanetup hawe Tupana etiat eimuꞌe turan miꞌi pote yt worohoꞌomuꞌe kuap i yne Ahepaꞌi Akag etiatno.
12 Motꞌi eweikupteꞌen Iesui mohey haria pykai -Urumuꞌe i ro eweiꞌe yn yt uruikuap i te ti urumuꞌe hap Tupana eha etiat eweiꞌe aat kaꞌap haria eipe. Are paĩ koitywy ti waku raꞌyn miitꞌin muꞌe haria wo eweikupteꞌen maꞌato ti yt itag i te Tupana ehay kuap hap etiaria eiperia are. Miꞌi hawyi ikuap perup i haria eweikupteꞌen. Miꞌi pote miitꞌin mimuꞌe wo te neꞌi eweikupteꞌen. Miꞌi pote -Uruiwaure raꞌyn saꞌawyꞌi te wuat urumuꞌe hap e haria wo eipe. Miꞌi pote urumuꞌe i ro mehin mana mekewat saꞌawyꞌi wuat sehay Tupana etiat ehenoi i ro uruepe eweiꞌe. Aikotã hirokat ihire te rakat ewy eweikupteꞌen Tupana ehay kuap hap ete. Aikotã aimepyt hit yt tenuk kuap i iheg kahato rakat ete hap ewywuat kahato eweikupteꞌen Tupana ehay u hap ete. Aikotã aimepytꞌin mi hy yn ikyꞌesat hap ewy eweikupteꞌen. Tupana ehay miꞌu puꞌi ewywuat u hap ete yt eweikuap kuap i.
13 Niatpo rakat saꞌawyꞌi wuat Tupana ehay etiat kurin kurin eweikuap. Aimepyt ihup te rakat ewy mi hy yn toisym kuap ewywuat eipe katupono yt eweikuap i te kat koꞌi kat koꞌi som sio pywuat sio yt pywuat i hap. Sio waku watunug sio yt naku i watunug e hap katupono Tupana pywuat hap yt eweikuap i te sio waku sio yt Tupana e hap yt eweikuap i te pote.
14 Maꞌato nagnia hãi rakaria ihãite rakaria tutuꞌu kuap kahato ipuꞌi kãꞌã iheg nakat ihainiaꞌin haryporiaꞌin. -Toꞌiro watenuk iꞌatuꞌe aimiꞌu raꞌyn iꞌatuꞌe. Miꞌi hap ewy Tupana ehay miwan miat kuap haria ihãite rakaria Iesui mohey haria Tupana ehay kuap kahato rakaria tikuap kahato kat som waku watunug kat som yt naku i watunug hap koꞌi Tupana e hap miwan miat pyi. Miꞌi haria Tupana nug haria teꞌeropyhuꞌat taꞌatuehãite imohey hap etiatno. Miꞌiria miꞌu puꞌi u haria ewy are.
