Epereu 6:1-20
6 Saꞌawyꞌi kurin kurin watikuap Aipotypot Iesui etiat. Kurin kurin watikuap ihay etiat. Iꞌewyte saꞌawyꞌi aipotmuꞌeria Iuteuria aimuꞌe kurin kurin Tupana Mipoꞌoro Aiporekuat nuat ete. Miꞌi koꞌi toineꞌen ne aiwanetup hawe. Waku miꞌi koꞌi wen maꞌato poꞌog waku watikuap yne yne Iesui e hap yne yne iminug koꞌi e. Waku watuwemotag ikuap hap ete. Yt naku i watopyhuꞌat mekewat aimikuap hit hap ewy yn. Saꞌawyꞌi -Ewetoiat ro eiminug saꞌag koꞌi hawyi ewetomohey ro Tupana iꞌatuꞌe ahepe hawyi iꞌatuehay upi watuwat.
2 Pyno aiꞌywania Iuteuria teꞌeruwepiitsei teꞌeruweposei teꞌeruwepysei kahato aheko ewy. Miꞌi hap yn saꞌawyꞌi watuwemuꞌe. Miꞌi watunug aiwemopokuap hamo pote -Waku pe watopyhuꞌat Tupana pe saꞌawyꞌi watoꞌe. Saꞌawyꞌi watuweponug aimiꞌauka aihũ tote hawyi tuweityk aiminug saꞌag watoꞌe saꞌawyꞌi. Waku watoiat miꞌi koꞌi katupono mesup Aikaꞌiwat yn ahehakyeraꞌat kuap waku watoꞌe yn. Saꞌawyꞌi aikotã aru ikuꞌuro rakaria tukupteꞌen hap kape yn watuwanetup aikotã teꞌeruwehymut hap kape yn watuwanetup aikotã aru Tupana tiꞌatuhymut miꞌiria guꞌuro pyi hap ete yn watuwanetup.
3 Saꞌawyꞌi miꞌi hap kape yn watuwanetup Iuteuria ywania aito pote. Mesup koitywy waku watuwanetup aheko kape maꞌato aikotã aimuꞌe hit hap kape hap ewy. Waku poꞌog watuwanetup Iesui eko kape katupono aimuꞌe Iesui etiat poꞌog aheko saꞌawyꞌi wuat kai pote.
4 Iesui toineꞌen aipyꞌasetpe turan aiꞌywania tuwat kahato Aikaꞌiwat ehay upi -Pywo iꞌatuꞌe saꞌawyꞌi Iesui e hap ete hawyi paa iꞌatuꞌe taꞌatuminug saꞌag ete hawyi iꞌatuwepiit kahato mekewat kuap pakup hap ete. Tupana Miium Iesui taꞌatuiãꞌãg sio waku sio yt hap ete sio Tupana ehay ihay sio yt hap kuap hamo taꞌatuiãꞌãg. Miꞌi turan Tupana Paꞌãu wakuat iꞌatumuꞌe kahato aiꞌywania Iuteuria. Miꞌi hawyi teꞌeropyhuꞌat Tupana Wakuat Paꞌãu eiam wo.
5 Miꞌi hawyi Tupana ehay wakuat ete iwẽ pywiat kurin kurin taꞌatukuap hawyi -Waku kahato iꞌatuꞌe. He kahato Tupana ehay iꞌatuꞌe aiꞌywania. Waku kahato aru karãpe putꞌok e raꞌyn ti Tupana mesuwe Aiporekuat no iꞌatuꞌe iraniaꞌin aiꞌywania.
6 Miꞌi taꞌatukuap yne hap kaipyi taꞌatuꞌatoiat saꞌag Iesui. Taꞌatupun yne imohey hap itote hawyi -Yt uruimohey i Miꞌi Miit iꞌatuꞌe -Eweiꞌauka ro eweiꞌauka ro e haria tukupteꞌen aiꞌywania. Eweiꞌauka ariaꞌyp posak ete yt watikyꞌesat i Tupana Saꞌyru Aiporekuat no e haria miꞌiria. Yt kan hamo i Mesuwat Miit iꞌatuꞌe haty wo taꞌatuehay pirik wo. Miꞌi hap kaipyi Tupana tiꞌatukuap miꞌiria topyꞌa pe. -Iꞌatuehay kaipyi Uhaꞌyru auka hap kaipyi atiꞌatuꞌapiheg aru iraniaꞌin aiꞌywania tuwat Iesui mohey hap upi pykai. Taꞌatumohey rakirẽ raꞌyn taꞌatupun Iesui mohey hap. Miꞌiria ewywuaria koitywy yt watimorem kuap i raꞌyn Tupana kape katupono Tupana Saꞌyru pun haria raꞌyn miꞌiria.
7 Maꞌato aito Tupana Saꞌyru mohey haria aikotã aiko wakuat rakat ewywuaria watopyhuꞌat yi wakuat iꞌaman sym hat ewy aito Tupana mikoi wakuat ewywuaria mikoi Tupana mipoityro kahato ewywuat koꞌi. Tupana tum iꞌaman hawyi ihãite kahato hap ewy watopyhuꞌat watat ahehakyeraꞌat hap hawyi.
8 Maꞌato aiko aimikoi yi yt kan hamo i ewy Tupana Saꞌyru pun haria tukupteꞌen. Hu ypia ewy hyri hyp ewy yt uwe i mikyꞌesat ewywuaria tukupteꞌen yt imohey i haria. Miꞌi hawyi meipepe ro ekahuro epyyp eꞌu aria watoꞌe. Miꞌi hap ewy topyhuꞌat miꞌiria. Aiꞌywania Tupana Saꞌyru pun haria aria wo tukupteꞌen aru aiko piat hyri hyp ewy.
9 Maꞌato eipe uiwyriaꞌin uimikyꞌe koꞌi yt miꞌiria ewywuaria hin i eipe. Yt aiko aimikoi wẽkiꞌã eꞌyi ewy hin i eipe are. Maꞌato aiko aipoi kahato hap ewywuaria eipe are. Worohoꞌomohey kahato eipe uhekatuwyria. Ahehakyeraꞌat hat mohey sese haria eipe. Ahehakyeraꞌat hat moherep haria kahato eipe. Wuatꞌi miitꞌin eikuap Ahehakyeraꞌat hat mohey haria eipe hap. Maꞌato eipe aimikoi hẽꞌẽ kahato rakat ewywuat hap kaipyi eikuap miitꞌin.
10 Taꞌi Tupana hãpyk kahato. Yt karãpe i toiwaure tokyꞌe hap eipotpap tomotypot ehepiat hap etiat e. Yt toiwaure kuap i eiminug wakuat tomotypot etiat hap Tupana pote. Yt karãpe i toiwaure temiitꞌin powyro hap tomotypot tokyꞌe ehepiat hap kaipywiat koꞌi.
11 Pyno poꞌog waku miꞌi hap ewywuat no watukupteꞌen. Waku Tupana motypot hap kahato wywo watoineꞌen. Imohey potꞌi kahato aikuꞌuro hap eꞌat kape yn waku imohey hap watoꞌe.
12 Pyno yt naku i watoineꞌen iperup woꞌomuꞌe hap etiat rakatno neꞌi are. Yt naku i iperup neꞌi imohey hap ete. Yt naku i watopyhuꞌat yt ikuap teran i haria wo e. Yt naku i aiwanetup hap watimokenꞌẽ neꞌi Tupana Paꞌãu miat aimuꞌe turan. Waku watukupteꞌen aikotã saꞌawyꞌi wuat Tupana ehay moherep haria ewywuat imohey iwatoꞌin rakaria ewywuat meimuẽwat saꞌawyꞌi wuaria Tupana ehay moherep haria ewy. Katupono miꞌiria tukupteꞌen wuatꞌi eꞌat pe Tupana mohey motꞌi haria. Yt teꞌeruwemoti hin i -Atimohey taꞌatuꞌe hap ete. Yt taꞌatupun hin i taꞌatumimohey Tupana piat -Atunug aru e hap mohey hap. Waku miꞌiria ewywuaria watukupteꞌen. Yt naku i pya kahato neꞌi aiwanetup hap Tupana kapiat hap.
13 Waku watopyhuꞌat ahaꞌaseꞌi Aparãu ewywuaria. Saꞌawyꞌi Tupana toꞌe Aparãu me -Pywo ti rat woropoityro en e. Uhet wyti Tupana e. Yt kat i miit miꞌi rẽ poꞌog uhet kawiat e. Atunug aru emiariruꞌin waikiru iꞌatu kahato hap ewy e. Miꞌi pote aresetpehik atunug aru uiꞌe hap ete e Tupana Aparãu me.
14 -Woropoityro poityro e. Pywo ti rat atunug aru uiꞌe hap ewy e. Atimotypyꞌi esaꞌyruꞌin e. Iꞌatu sakpo typyꞌi esaipepiaria yi kyt ewy iꞌatu hap ewy emiariruꞌin e Tupana Aparãu me.
15 Maꞌato Tupana yt meremo hin i hum toꞌe hap ewy. Miꞌi pykai toimohey potꞌi Aparãu. Yt ipun hin i -Atunug aru e Tupana piat hap. Miꞌi hawyi tuwemoherep taꞌyn haꞌyru Isaki Tupana e hap ewy.
16 Karapeĩ miitꞌin toꞌe ahepe -Atunug aru uiꞌe hap ewy toꞌe hawyi maꞌato yt watomohey i pote taꞌatukay kay raꞌyn taꞌatuetuꞌisa taꞌatuꞌe hamuat -Yt atunug i uiꞌe hap ewy pote heso rakat areineꞌen wuatꞌi ehamo iꞌewyte Tupana ehamo e hamuat. Mio tã toꞌe hawyi watomohey poꞌog wuatꞌi ehamo toꞌe pote.
17 Maꞌato Tupana toꞌe tuwehamo yn -Atunug aru emepytꞌin iꞌatu waikiru ewy e Aparãu me. -Areineꞌen hegyiꞌat kahato rakatno aru emiariruꞌin koꞌi pe e. Yt uheso hin i e. Atunug aru uiꞌe hap oktan e. Meiũran aru atiꞌatupoityro esaipepiaria e. Yt atiwaure hin i kat uiꞌe hap e. Maꞌato atunug aru uiꞌe hap ewy e. Uito Tupana pote atunug uiꞌe hap ewy e Aparãu me haty wo. Yt karãpe i kue wẽtup sehay atunug aru maꞌato atipytꞌatnug uhehay Uito Tupana pote e nimo te Aparãu me. Iꞌewyte yne esaipepiaria pe pywuat uiꞌe hap kuap hanuaria tukupteꞌen aru e.
18 Pyno atipytꞌatnug uhehay Tupana Uito pote e. Pywo yt uwe i imonik kuap uiꞌe hap -Atunug aru Tupana e hap Tupana iꞌe pote. Tupana yt heso kuap i miꞌi pote waku watomohey kahato miꞌi tã -Atunug aru e hap koꞌi. -Urumowepiit hat kahato En Tupana watoꞌe. Ewowi uruteput wanikaptia pupi. Urutopytyk kahato ehay -Atunug aru eꞌe hap. Pyno typy toꞌe -Atunug aru e hap koꞌi. Typy tohenoi tehay ahepe.
19 Tupana e hap wẽtup -Worohoꞌopoityro aru wuatꞌi eꞌat pe e hap aimowepiit kahato. Miꞌi hawyi iꞌe hap typy -Atunug aru e hap. Pyno pywo ti aru uruehakyeraꞌat watoꞌe tope. Uruhekatup kahato urupyꞌa pe watoꞌe. Miꞌi hawyi uruehakyeraꞌat aru toꞌe hap ewy watoꞌe.
Aimimohey aikytyt kahato iheg me aikotã haity Tupana eiam sese kaipyi tuut aipiit kape hap ewy. Taꞌi imohey hap haity ewy. Yt karãpe i uruiwaure eꞌe hap Tupana watoꞌe.
20 Katupono mekewat Aimimohey Iesui teke Tupana eiam koro sese pe raꞌyn. Saꞌawyꞌi Ahepaꞌi Iesui teke Tupana eiam sese pe. Hewatꞌypmo ti aito. Ahepaꞌi mekewat Mekeseteki ewywuat poꞌog nakat Ahepaꞌi Koro wuatꞌi eꞌat piat. Yianme teke aikotã aheꞌyara tuwemoheg iꞌasaity ete. Miꞌi hap ewy watomohey Tupana e hap -Atunug aru e hap watomohey kahato miꞌi e hap hawyi aimoheg kahato Tupana ete wuatꞌi eꞌat pe saity iheg nakat ewy.
